Nipawil So Kompiyansa!
ANGGAMAN say peles a kaaandi na kompiyansa so tanda na ‘kaunoran iran agew,’ say kaandian na kompiyansa so mapatnag met la ed nilibon taon lay apalabas. (2 Timoteo 3:1) Inmunan linmesa ed ag-inilaloan a pasen—diad sakey a paraiso. Ibabaga na Biblia so nipaakar ed lugar: “[Say] Dios angitanem na sakey a tanamanan ed Eden ed dapit bukig; et diman to impasen so too a ginawa to. Tan si Jehova a Dios pinabutay to ed dalin so saray amin a kiew a makaroyo ed mata tan maong ira a kanen; say kiew na bilay wadman met ed pegley na tanamanan, tan say kiew na pakaamtaan na maong tan mauges.”—Genesis 2:8, 9.
Saray ontumbok a bersikulo so mangisisindag na liwawa ed no antoy pikoneksionan na saya ed modernon-kaaandi na kompiyansa. Nabasa tayo: “Si Jehova a Dios binilin to so too a kuan to: ‘Nayarian mo so mangan na labay mo ed amin a kiew na tanamanan. Ingen ta say kiew na pakaamtaan mo na maong tan mauges, agmo nepeg a panganan; ta dia ed agew a pangan mo ed satan ompatey ka.’” (Genesis 2:16, 17) Walaan ta si Adan na antokaman a rason a panduaruwaan so imbaga nen Jehova?
Ituloy tayon basaen: “Bang say uleg masisilib nen dinanman ya ayep na uma a ginawa nen Jehova a Dios. Et imbaga na uleg ed bii: ‘Nia, say Dios inkuanto, agkayo mangan ed anggan anto a kiew na tanamanan?’ Et say bii, inkuanto ed uleg: ‘Nayarian mi mangan na bunga na kakiewan na tanamanan. Ingen ta say bunga na kiew a wala ed pegley na tanamanan, inkuan na Dios, “Agkayo mangakan ed satan, nisay diwiten yo, ta no andi ompatey kayo.”’ Et say uleg kuanto ed bii: ‘Agkayo ompatey. Noag say amta na Dios a dia ed agew a pangan yo ed saman, nalukasan so saray mata yo ed satan, et singa kayo Dios, ya amta yo so maong tan mauges.’ Et sanen anengneng na bii so kiew et maong a pantagano, tan makapaliket ed saray mata, tan anengneng to so sakey a kiew a panpirawatan a makapangiter na karunongan, amudbor na bunga, tan angan, et angiter met ed asawa to a laki ya ibiba to, et si asawa to angan.”—Genesis 3:1-6.
Diad impangibaliwala ed malinew a pasakbay na Dios, impanengneng di Adan tan Eva so kaandian na kompiyansa ed si Jehova. Anisiaan day kabusol na Dios a si Satanas, ya akisalita ed si Eva diad panamegley na literal a serpienti. Andian si Satanas na kompiyansa ed pananguley nen Jehova. Lapud saya tan ed mapaatagey tan ambisyoson puso, sikatoy nanrebeldi ed Dios tan pinalikdo toy totoo a manrebeldi met. Inimpluensiaan tora a manisip a say Dios et agnepeg a panmatalkan.
Say Resulta? Balingaan a Relasyon
Nayarin naimanom la a saray totoon agmanmamatalek ed arum et naiirapan a manmantini ed pikakaaro. Insulat nen Publilius Syrus, sakey a Latin a managsulat nen inmunan siglo K.K.P.: “Say kompiyansa so mogmon bedber na pikakaaro.” Diad impanrebeldi ra, impanengneng di Adan tan Eva ya ag-ira nanmatalek ed Dios. Kanian, maseguron andian so Dios na rason a panmatalkan ira. Bilang resultay inkabuyak na talek, odino kompiyansa, abalang na inmunan totoo so pikakaaro ed Dios. Anggapoy pakapatnagan ya akisalita lamet si Jehova ed sikara kayarin kinondena tora lapud impanrebeldi ra.
Naapektoan met so relasyon di Adan tan Eva. Pinasakbayan nen Jehova si Eva: “Manpasakit ka a mangiyanak na saray anak; tan say pirawat mo naani say nipaakar ed asawam, tan sikato so manguley ed sika.” (Genesis 3:16) Kuan na The Jerusalem Bible: “Sikato so pakatawan ed sika.” Imbes ya agamilen so maaron inkaulo ed akulaw to, unong a kaliktan na Dios, si Adan natan so nagmaliw a katawan to, a pakatawan ed sikato.
Kayari impankasalanan da, sinali nen Adan ya ipasay pakatetelan ed akulaw to. Diad opinyon to et makasengeg ed ginawa nen Eva a sikaray apapaway ed ayadyarin harden a paarap ed agni abayuboan a dalin, akondenan manirap ed silong na ag-ayadyari iran kipapasen sakbay ya ompawil ed dabok. (Genesis 3:17-19) Naisip tayon maong a saya so sengegay inglitan dan dua. Nayarin asyodotan a maong si Adan, ya inkuanton agto lan balot dengelen lamet si Eva. Nayarin alikna ton makatunongan diad pangibabaga to’d si Eva, ‘Manlapu la’d natan, siak so naunor!’ Si Eva, ed biek a dapag, et nayarin naimano ton sinmaew si Adan ed betang to bilang ulo na pamilya, a sengegay inkaandi kompiyansa to’d sikato. Anggaman ontan, diad impangipanengneng na kaandiay kompiyansa ed Dios, abalang na totoo so pikakaaro ra ed sikato tan dineral day relasyon da’d sakey tan sakey.
Siopay Napanmatalkan Tayo?
Aliwan amin et makanepegan na kompiyansa tayo, a singa iyiilustra na alimbawa di Adan tan Eva. Panoy pakaamta tayo no siopay makanepegan tan agmakanepegan na kompiyansa tayo?
Sisimbawaen itayo na Salmo 146:3: “Agyo iyan so panmatalek yo ed saray piprinsipe, nisay dia ed anak na too, a dia ed sikato anggapo so tulong.” Tan diad Jeremias 17:5-7, nabasa tayo: “Naayew so too a manmatalek ed too, tan gawaen to a laman so taklay to, tan say puso to onsian ed Jehova.” Diad biek a dapag, “mapalar so too [a] manmatalek ed Jehova, tan say ilalo to sikato si Jehova.”
Tua, say pankompiyansa ed totoo et aglawas makapuy. Ipapabitar labat na saratan a teksto a say pankompiyansa ed Dios et segurado, balet say pankompiyansa ed ag-ayadyarin totoo so no maminsan et mansumpal ed desyang. Alimbawa, saray totoon manmamatalek ed katooan pian dampoten so nagawaan labat na Dios—pangitarya na kilalaban tan pangitarok na sigpot a kareenan tan kaligenan—so nipapaarap ed pakadismayaan.—Salmo 46:9; 1 Tesalonica 5:3.
Diad tua, saray totoo tan institusyon na too so makanepegan labat na kompiyansa diad laknab na ikiwas da a mitunosan ed saray gagala na Dios tan idemostra so maridios iran prinsipyo. Kanian, pian nalagyat tayoy arum a mankompiyansa ed sikatayo, nepeg a mansalita tayoy katuaan, magmaliw a matua tan napanmatalkan. (Uliran 12:19; Efeso 4:25; Hebreos 13:18) Dia lambengat ed ikiwas tayon mitunosan ed saray prinsipyo na Biblia a makatunongay panmatalek na arum ed sikatayo tan napaneknekan a lapuan na pakapanpapabiskegan tan pakapanpapasesegan.
Kipawil na Kompiyansa
Walaan na mabiskeg a basiyan iray Tastasi nen Jehova parad pankompiyansa ed Dios tan pamaseseg ed arum a manggawa met na ontan. Matoor tan napanpiyaan si Jehova, sikatoy lawas napanmatalkan a manumpal ed imbaga to, lapud ‘agnayarin mantila so Dios.’ Say pankompiyansa ed Dios na aro so agbalot mansumpal ed pakadismayaan.—Hebreos 6:18; Salmo 94:14; Isaias 46:9-11; 1 Juan 4:8.
Saray totoon nankakasakey ed pankokompiyansa ed si Jehova tan manbibilay unong ed saray prinsipyo to so mabiskeg a napapakiwas a mangipanengneng na kompiyansa ed sakey tan sakey. Diad mundon manasagmak na kaandian na kompiyansa, agaylan gayaga so pakaromog ed totoon napanmatalkan! Isipen pa no panon kadumay mundo no nawalaan tayoy sigpot a kompiyansa ed ibabaga tan gagawaen na amin! Onia so magmaliw a kipapasen ed onsabin balon mundo ya insipan na Dios. Aglan balot niwala ditan so antokaman a kaandian na kompiyansa!
Labay mo tay manbilay ditan? No ontan, iimbitaan ka na Tastasi nen Jehova pian pabiskegey kompiyansam ed Dios tan ed saray sipan to diad panaral a nagkalalo ed saray kakaukolanen to parad bilay. Say panaral ed Biblia so mangiiter na prueba a wala so Dios, a sikatoy interesado ed pankaabigan na katooan, tan magano lan onkiwas pian solbaren iray problema ed mundo panamegley na Panarian to. Minilyon so makakaaral lan mankompiyansa ed Dios tan ed Salita to, say Biblia. Maliket iray Tastasi nen Jehova a mangidemostra ed sika ed publikon serbisyo a panagaral na Biblia ya iyoopresi ran libre. Odino mansulat ed saray manangipalapag na sayan magasin parad nagkalalo nin impormasyon.
[Blurb ed pahina 5]
Say kaandian na kompiyansa ed Dios so mansumpal ed aderal iran relasyon na too
[Blurb ed pahina 6]
Makanepegan lambengat iray totoo na kompiyansa ed laknab na ikiwas da a mitunosan ed maridios iran prinsipyo