Manmatalek ed si Jehova Legan a Manasingger so Anggaan

“Manmatalek kayo ed Jehova lawas.”​—ISA. 26:4.

1. Antoy pandumaan na saray lingkor na Dios tan saray totoo ed mundo?

DIAD sayan mundo a pambibilayan tayo, agla amta na dakerakel a totoo no siopa odino anto so panmatalkan da. Anganko et lapud aminpiga iran adismaya odino asakitan. Balet, miduman tuloy iray lingkor nen Jehova! Lapud paigigiya ira ed karunongan na Dios, ag-ira manmamatalek ed sayan mundo odino ed saray “manuley” to. (Sal. 146:3, NW) Imbes, imamatalek day bilay tan arapen da ed si Jehova, ta amta ran inar-aro to ra tan lawas ton totooren so Salita to.​—Roma 3:4; 8:38, 39.

2. Antoy inkuan nen Josue nipaakar ed inkanapanmatalkan na Dios?

² Apaneknekan nen Josue nensaman a napanmatalkan so Dios. Sanen mansamposampot lay bilay to, inkuan to’d saray kapara ton Israelita: “Amta yo ed simoon a puso yo tan ed simoon a kamarerwa yo, ya anggapo so sakey a bengatla a linmiwat ed amin a maong a bengabengatla a si Jehova a Dios yo sinalita to nipaakar ed sikayo, sikara so agawa ya amin ed sikayo.”​—Jos. 23:14.

3. Anto so ipaparungtal na ngaran na Dios nipaakar ed sikato?

³ Totooren nen Jehova iray sipan to, aliwa labat a lapud inaro to ray lingkor to, noag nagkalalo ed amin et lapud ngaran to. (Exo. 3:14; 1 Sam. 12:22) Oniay introduksion na The Emphasized Bible, nen J. B. Rotherham, nipaakar ed ngaran na Dios: “[Sayan ngaran so] magmaliw ya sankaabigan a sipan; say kapasidad na Dios ya ontukoy ed antokaman a situasyon, kairapan, pankaukolan a nayarin onlesa . . . Sakey [iyan] sipan, puyan, pakanodnonotan, samba. Diad sayan Ngaran et lawas manmatoor so Dios; agton balot iya ibaing.”

4. (a) Antoy ipapaseseg na Isaias 26:4 a gawaen tayo? (b) Antoy aralen tayo ed sayan artikulo?

⁴ Tepetan pay sarilim: ‘Kasin kabkabat kon maong si Jehova diad ontan et sikatoy sigpot kon panmamatalkan? Kasin agko tatakotay arapen lapud amtak a kontrolado na Dios so amin a bengatla?’ Oniay inkuan na Isaias 26:4: “Manmatalek kayo ed Jehova lawas, ta dia ed Jehova, si Jehova lanlamang sikato so ando lan ando a batondampay.” Tua, aliwan singa nensaman, agla natan mamilagron onsasalet so Dios ed bilay na saray totoo to. Balet, bilang “ando lan ando a batondampay,” sikatoy “lawas” a napanmatalkan. Panon a tutulongan na napanmatalkan a Dios tayo iray matoor a manlilingkor ed sikato natan? Imanoen pay taloran paraan: Papabiskegen to itayo sano onkekerew itayoy tulong to pian nalabanay tukso, susuportaan to itayo sano ibabaliwala odino pirmin susumpaen, tan papasesegen to itayo sano napapagaan ed panagbilay. Legan tayon aaralen iraya, kaukolan mon nodnonoten no panon mon napabiskeg so talek mo’d si Jehova.

Manmatalek ed Dios Sano Natutukson Manggaway Mauges

5. Kapigan mas nasubok so panagmatalek tayo ed Dios?

⁵ Nayarin mainomay so manmatalek ed si Jehova no nipaakar ed sipan ton Paraiso odino kikioli, saray bengatlan pipirawaten tayo. Balet no nipaakar la’d moralidad, ompan mairap tayoy manmatalek ed sikato odino nakombinsin say pangunor ed saray paraan tan estandarte to et duga tan parad pankaabigan tayo. Oniay insulat nen Arin Solomon ya bilin: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo. Dia ed saray amin a dalan mo sikato so bidbiren mo, et sikato itonton to so saray basbas mo.” (Uli. 3:5, 6) Imanoen a tinukoy to so “amin a dalan” tan “saray basbas” tayo. On, nepeg a napatnagan ed interon kabibilay tayo so panagmatalek tayo ed Dios, aliwa labat a diad ilalo tayo bilang Kristiano. Panon tayon nipanengneng itan a panagmatalek sano natutukso?

6. Panon tayon napabiskeg so determinasyon tayon agmannonot na mauges?

⁶ Say iyarawi ed mauges et onggagapo’d panagnonot. (Basaen so Roma 8:5; Efeso 2:3.) Panon mo sirin a napabiskeg so determinasyon mon agmannonot na mauges? Konsideraen irayan limaran paraan: 1. Kerewen so tulong na Dios diad pikakasi. (Mat. 6:9, 13) 2. Dalepdepen iray alimbawa’d Biblia na saramay dinmengel tan agdinmengel, insan imanoen no antoy nansumpalan da.a (1 Cor. 10:8-11) 3. Nonoten no anto kasi naliknam tan na saray inad-arom no nankasalanan ka. 4. Isipen no antoy nalikna na Dios sano walay sakey a lingkor ton makagaway seryoson kasalanan. (Basaen so Salmo 78:40, 41.) 5. Isipen no panon kaliket si Jehova sano nanengneng toy sakey a lingkor ton mangipupulisay ed mauges tan manggagawa na maong, wala ‘may makakaimaton odino anggapo. (Sal. 15:1, 2; Uli. 27:11) Sarag mo met ya ipanengneng a manmamatalek ka’d si Jehova diad panggaway duga.

Manmatalek ed Dios Sano Ibabaliwala tan Susumpaen

7. Antoray akasubokan nen Jeremias, tan antoy alikna to?

⁷ Dakel ed saray agagi tayo so manlilingkor ed mair-irap iran teritorya. Si propetan Jeremias et nanlingkor ed ontan a teritorya, say panarian na Juda legan na magulon panaon. Inagew-agew ya asubok so pananisia to lapud matulok ton inyabawag so panangukom na Dios. Asabi-sabi ni ingen a lapud kesaw et nanreklamo lay matoor a sekretaryo to a si Baruc. (Jer. 45:2, 3) Adismaya kasi si Jeremias? Tua, walaray pankanawnawan sikatoy agonigon. Inkuan to: “Naayew komon so agew ya inkianak ko . . . Anto so makasengeg a pinmaway ak ed panag-anakan a makanengneng ed sagpot tan ermen, pian saray agew ko naupot ira ed baing?”​—Jer. 20:14, 15, 18.

8, 9. Unong ed Jeremias 17:7, 8 tan Salmo 1:1-3, antoy kaukolan tayon gawaen pian mantultuloy a manbunga na maabig?

⁸ Balet, agsinmuko si Jeremias. Sikatoy siansian nanmatalek ed si Jehova. Bilang resulta, naeksperiensya na sayan matoor a propeta so kasumpalan na mismon salita nen Jehova ya nabasa’d Jeremias 17:7, 8: “[Maliket] so too a manmatalek ed Jehova, tan say ilalo to sikato si Jehova. Ta sikato naani singa sakey a kiew a nitanem ed abay na saray danum, ya ikayat to so saray lamot to ed abay na ilog, et ag-antakot no onsabi so petang, noag ingen say bulong to malambot naani; et agnaani mapaga ed panaon na tiagew, tan agmet naani ontunda so pambunga to.”

⁹ Singa say sakey a masalompapak tan mabungan kiew “a nitanem ed abay na saray danum,” agbalot ‘ontundan manbunga’ si Jeremias. Agto nampaimluensya ed saray mauges a managbalaw ya walad kaliberliber to. Imbes, sikatoy nansiansia ed Lapuan na manangiter-bilay a “danum” tan impapuso ton amin so imbaga nen Jehova ed sikato. (Basaen so Salmo 1:1-3; Jer. 20:9) Talagan maabig ya ehemplo si Jeremias, nagkalalo la’d sikatayoran manlilingkor ed Dios diad mair-irap iran teritorya! No ontan so situasyon mo, itultuloy moy manmatalek a maong ed si Jehova, ya ontulong pian makapan-anos kan ‘mangipakabat ed ngaran to.’​—Heb. 13:15.

10. Antoray bendisyon ed sikatayo, tan antoy nepeg ti’n itepet ed sarili tayo?

¹⁰ Pian makapansungdo itayo legan na sarayan kaunoran ya agew, dakel so intarya nen Jehova ya espiritual a tulong. Kaiba’d satan so kompleton Salita to, a suston nipapatalos ed dakerakel a lenguahe. Inter toy daakan a nipanpanaon iran espiritual a naakan panamegley na matoor tan makabat ya aripen. Tan inter to so dakerakel ya kaagian a mamapabiskeg ed sikatayo diad aral tan asemblea. Kasin papablien mo irayan probisyon? Amin a mamapabli ed saraya et “mankanta . . . naani a nisengeg ed liket na puso.” Balet, saramay ag-ondengel ed Dios et “manakis . . . naani a nisengeg ed ermen na puso, tan managogol . . . naani a nisengeg ed irap na espiritu.”​—Isa. 65:13, 14.

Manmatalek ed Dios Sano Napapagaan ed Panagbilay

11, 12. Lapud saray problema ed mundo, anto so makabat a gawaen?

¹¹ Unong ya impasakbay, saray totoo et singa dedelapen na makapagonigon iran problema. (Mat. 24:6-8; Apo. 12:12) Sano walay delap, say natural a reaksion na totoo et ombatik ed atagey a pasen odino onkalab ed atep na abung. Mipadpara, legan ya onloloor so problema na mundo, dakel so pasasalimbengan ed abaloan dan maligen iran institusyon a singa say politika, relihyon, negosyo, ontan met ed siensia tan teknolohiya. Balet, anggapo ed saraya so peteg a napansalimbengan. (Jer. 17:5, 6) Diad biek a dapag, saray lingkor nen Jehova et walaay seguradon salimbeng​—‘say Batondampay ed ando lan ando.’ (Isa. 26:4) Inkuan na salmista: “[Si Jehova] so dampay ko tan kilalaban ko; sikato so atagey ya ilang ko.” (Basaen so Salmo 62:6-9.) Panon itayon pasalimbengan ed sayan Batondampay?

¹² Pasasalimbengan tayo’d si Jehova no tatalinengen tayoy Salita to, a kaslakan lan misumlangan ed karunongan na too. (Sal. 73:23, 24) Singa bilang, nayarin ibaga na saramay naimpluensyaan na karunongan na too ya: ‘Maminpinsan ka labat a manbilay, gawam lay labalabay mo.’ ‘Mangala kay atagey a kurso.’ ‘Manpayaman ka.’ ‘Saliw mo itan, saliw mo ya.’ ‘Pasyar ka, enjoy mo labat so bilay.’ Say karunongan balet na Dios so mitunosan ed sayan simbawa: “Saramay manguusar ed mundo et singa [komon] saramay agmanguusar a maong ed satan; ta say nanenengneng tayo natan ed sayan mundo et manguuman.” (1 Cor. 7:31) Ontan met, ipapaseseg nen Jesus ya lanang tayon iyuna so Panarian, diad ontan et mantipon na “kayamanan ed tawen” ya agbalot nasayang.​—Mat. 6:19, 20.

13. Sano dadalepdepen so 1 Juan 2:15-17, antoray nepeg ti’n itepet ed sarili tayo?

¹³ Kasin ipapatnag na panmoriam ed “mundo” tan ed “saray bengatlan walad mundo” ya sigpot kan manmamatalek ed Dios? (1 Juan 2:15-17) Kasin mas pipilaleken tan papablien mo ray espiritual a bendisyon tan pribilehyo nen saray bengatlan iyoopresi na mundo? (Fil. 3:8) Kasin panggugunaetan mon pansiansiaen a ‘simpli so matam’? (Mat. 6:22) Siempre, aglabay na Dios a magmaliw kan palpalaran odino iresponsabli, lalo la no walay pamilyam a kaukolan mon legpeten. (1 Tim. 5:8) Balet iilaloan to ray lingkor to a sigpot a manmatalek ed sikato, aliwan diad sayan manpapanabos lan mundo nen Satanas.​—Heb. 13:5.

14-16. Panon ya agunggonaan so arum lapud pinansiansia ran ‘simpli so mata’ ra tan inyuna ray Panarian?

¹⁴ Imanoen pay eksperiensya di Richard tan Ruth, a walaay taloran ugugaw nin anak. “Amtak ya dakel ni nagawaan ko parad si Jehova,” so inkuan nen Richard. “Mainawan tuay bilay mi, balet naliliknak ya singa kerakera labat so iiter ko’d Dios. Kayari min impikasi tan inaral a maong iya, nandesisyon kami nen Ruth ya kerewen ed superbaysor ko a diad sakey simba et gawaen labat lan apat agew so pantrabahok​—anggaman krisis ed bansa mi. Naaprobaan so kerew ko, tan diad loob na sakey bulan et ginapoan ko iyan balon eskedyul.” Anto la natay nibaga nen Richard?

¹⁵ “Abawasan na 20 porsiento so sueldok,” so inkuan to, “balet natan et awalaan ak la na ekstran 50 ya agew kada taon pian nakaibay pamilyak tan nibangat so ananak ko. Adoble so oras ko ed lawak na kimeyan, a-triple so iyaaralan koy Biblia, tan mas makapangidadaulo ak la’d kongregasyon. Tan lapud mas walay panaon ko’d saray ugugaw, panapanaon et makakapan-auxiliary payunir si Ruth. Labay kon nitultuloy iyan eskedyul anggad nayari.”

¹⁶ Si Roy tan Petina, a kaamong da ni sakey ya anak da, so amawas na trabaho ra pian makapibiang ed sigpot panaon a ministeryo. Inkuan nen Roy: “Mamitlo ak a mantratrabaho ed sakey simba, tan si Petina et mamidua. Tan inmalis kami ed sakey ya apartment, a mas mainomay a mantinien nen say abung. Antis kamin awalaan na ananak, nampayunir kami, tan agbalot naandi so pilalek min manpayunir. Kanian nen baleg la ray anak mi, nampayunir kami lamet. Agnaparaan na anggan anton karakel na kuarta iray bendisyon a naawat mi.”

Abuloyan so “Deen na Dios” a Manbantay ed Pusom

17. Lapud agtayo amtay nagawa nabuas, panon kan apaseseg na Kasulatan?

¹⁷ Anggapo’d sikatayo so makaamta no antoy nagawa naani odino nabuas, lapud say “panaon tan ag-iilaloan a nagawa” et nasasagmak tayon amin. (Ecl. 9:11, NW) Balet, agtayo kaukolan a panaburidoay arapen, a singa ed saramay agmakapikabat ed Dios. (Mat. 6:34) Oniay insulat nen apostol Pablo: “Agyo pampapagaan so antokaman, noagta diad amin a bengatla et ipaamta yo ed Dios iray kerew yo diad panamegley na pikakasi tan masimoon a pikekerew tekep na pisasalamat; tan say deen na Dios a palumbasan toy amin a kanonotan so manbantay ed saray puso tan nonot yo.”​—Fil. 4:6, 7.

18, 19. Panon itayon liligliwaen na Dios? Mangiter na alimbawa.

¹⁸ Naeksperiensya na dakel ya agagi so inkakalma tan deen na nonot a manlalapud si Jehova sanen asubok ira. Inkuan na sakey ya agin bii: “Aminpiga ak a tinaktakot tan pinilit na doktor a manpasaksak na dala. Say sankaunaan ya imbaga to et, ‘Akin et agka manpasaksak na dala? Kaambagelan!’ Diad saman tan diad arum ni ran pankanawnawa, mareen ak a nampikasi ed si Jehova, tan kinmalmado ak. Binmiskeg so linawak. Anggano makapkapuy ak lapud abebbebay dalak, ayarian kon indepensa so Makasulatan a talindeg ko.”

¹⁹ Nayarin iter na Dios so nakaukolan a suporta panamegley na panamaseseg na agagi odino panamegley na espiritual a naakan diad dugan panaon. Nayarin wala lay nadngel mon agi ya angibagan: “Dugaruga’d siak iyan artikulo. Insulat iya parad siak!” On, antokaman so sirkumstansya o pankaukolan tayo, ipanengneng nen Jehova so panangaro to ed sikatayo no manmatalek tayo’d sikato. Lalo la ta sikatayoy ‘karnero’ to, tan tinawag to itayo ed ngaran to.​—Sal. 100:3; Juan 10:16; Gawa 15:14, 17.

20. Akin et makapanayam ed kaligenan iray lingkor nen Jehova sano naderal la iyan mundo nen Satanas?

²⁰ Sano onsabi so asingsingger lan “agew na sanok nen Jehova,” amin a panmamatalkan na mundo nen Satanas et naderal. Agmakapangiter na anggan anton salimbeng so balitok, pilak, tan saray kayamanan. (Sof. 1:18; Uli. 11:4) Say ‘Batondampay ed ando lan ando’ so alenleneg a napansalimbengan tayo. (Isa. 26:4) Kanian ipanengneng tayoy sigpot a panagmatalek ed si Jehova natan diad pangunor ed maptek iran estandarte to, diad pangipulong ed mensahe na Panarian anggano ibabaliwala odino susumpaen da tayo, tan diad pangimatalek ti’d sikato ed saray kapagaan tayo. Legan tayon gagawaen iraya, seguradon sikatayoy “manayam ed kaligenan tan agnataktakot anggan walay mauges a nagawa.”​—Uli. 1:33.

[Paimano ed Leksab]

Kasin Nipaliwawam?

• Panon itayon makapanmatalek ed Dios

• sano natutukson manggaway mauges?

• sano ibabaliwala odino susumpaen?

• sano napapagaan ed panagbilay?

[Litrato ed pahina 13]

Say pambilay unong ed estandarte na Dios et parad pankaabigan tayo

[Litrato ed pahina 15]

‘Si Jehova so Batondampay ed ando lan ando’