Sano Onsabi Jesus Diad Gloria na Panarian

“Walaray arum ed saray wadia, ya . . . agda naani natawayan so patey anggad pakanengneng da ed Anak na too ya onsabi ed panarian to.”​—MATEO 16:28.

1, 2. Anto so agawa kayarin tuloy na Pentecostes 32 K.P., tan anto so gagala na ebento?

KAYARIN tuloy na Pentecostes 32 K.P., talora ed apostoles nen Jesu-Kristo so akanengneng na sakey a makatantandan pasingawey. Unong ed apuyanan a rekord, “si Jesus inala to ra di Pedro, tan Santiago, tan si Juan ya agi to, tan inyakar to ra ed sakey a palandey ya atagey ed arawi. Et nauman so nengneng to ed arap da.”​—Mateo 17:1, 2.

² Agawa so pasingawey a transpigurasyon ed importantin panaon. Inggapo la nen Jesus ya ibaga ed saray patumbok to a sikatoy napairap tan ompatey diad Jerusalem, balet ta mairap dan natukor so ibabaga to. (Mateo 16:21-23) Amabiskeg ed pananisia na taloran apostol nen Jesus so pasingawey a paraanan so onsabi lan ipapatey to tan ontan met ed ontumbok a matrabaho tan makapasubok iran taon a sagmaken na Kristianon kongregasyon. Wala ta so naaralan tayo manlapud pasingawey? On, lapud say iyaanino to et aktual a nagagawa ed panaon tayo.

3, 4. (a) Antoy imbaga nen Jesus anemiran agew sakbay na transpigurasyon? (b) Diskribiey agawa legan na transpigurasyon.

³ Anemiran agew sakbay na transpigurasyon, oniay imbaga nen Jesus ed saray patumbok to: “Ta say Anak na too onla dia naani diad gloria na Ama to a pati saray angheles to; saman to tumangan naani so balang sakey a too unong ed saray gawa to.” Sarayan salita so nagawa diad “anggaan na mundo [konklusyon na sistema na bengabengatla, NW].” Intuloy ni nen Jesus ya inkuan: “Tua kuanko’d sikayo, walaray arum ed saray wadia, ya anggan panon agda naani natawayan so patey anggad pakanengneng da ed Anak na too ya onsabi ed panarian to.” (Mateo 16:27, 28; 24:3; 25:31-34, 41; Daniel 12:4) Agawa so transpigurasyon bilang kasumpalan na onsasaginonor a salita.

⁴ Anton talaga so anengneng na taloran apostoles? Onia so deskripsion nen Lucas ed agawa: “Et nen manpipikasi [si Jesus] say nengneng na lupa to nauman et say kawes to nagmaliw ya amputi tan masnag. Et nia, wala so duaran lalaki a misasalita ed sikato, a sikara di Moises tan Elias. A pinmatnag ira ed sigogloria tan sinalita ra so itaynan to a ngalngali nasumpal ed Jerusalem.” Insan, “sinmabi sakey a lurem, ya anirum ed sikara. Et atakot ira nen asakop [iray apostoles] ed lurem. Et pinmaway so sakey a bosis ed lurem, a kuanto: ‘Saya sikato so Ana’ko, a pinilik. Sikato so denglen yo.’”​—Lucas 9:29-31, 34, 35.

Napapabiskeg so Pananisia Tayo

5. Anto so epekto na transpigurasyon ed si apostol Pedro?

⁵ Inaksobi la nen apostol Pedro a si Jesus et “Kristo, ya Anak na Dios a mabilay.” (Mateo 16:16) Pinekderan na salita nen Jehova manlapud katawenan itan a pakabidbiran, tan say pasingawey ya impantranspigurasyon nen Jesus so pataway [pagpauna] ed isabi̇̀ na Kristo ed pakayari tan gloria na Panarian, diad kaunoran pian mangukom ed katooan. Masulok a 30 taon kayari na transpigurasyon, oniay insulat nen Pedro: “Ta agmi impakabat ed sikayo so pakayari tan idateng na Katawan tayo a Jesu-Kristo, lapu ed impanumtumbok a sisisilib na palbuangen a salsalita, noag ingen lapud impakanengneng ed katagyan to. Ta inawa’to ed Dios Ama so galang tan gloria, nen sinmabi ed sikato a nanlapu ed Sankatagyan a gloria so sakey a bosis a nankuan: ‘Saya sikato so Ana’ko ya inararo, diad sikato apaliket ak a maong.’ Et sikami nadngel mi so sayan bosis a nanlapu ed tawen, nen iba to kami a wala ed masantos a palandey.”​—2 Pedro 1:16-18; 1 Pedro 4:17.

6. Panon a niparungtal iray ebento kayari na transpigurasyon?

⁶ Natan et napapabiskeg met so pananisia tayo ed walan anengneng na taloran apostoles. Siempre, kalkalnan agawa iray ebento nanlapulad 32 K.P. Diad tinmumbok a taon, inatey tan insan pinaoli si Jesus, a sinmegep ed nikawanan nen Ama to. (Gawa 2:29-36) Diad Pentecostes na saman a taon, say balon “Israel na Dios” so nianak, tan ginmapo met la’d satan so kampanyan panagpulong diad Jerusalem insan linmaknab diad kasampotan na dalin. (Galacia 6:16; Gawa 1:8) Ngalngali kabansag na satan et asubok so pananisia na papatumbok nen Jesus. Naaresto iray apostol tan pirmin pinepekpek lapud agda itunda so panpupulong da. Ag-abayag et pinatey day Esteban. Insan si Santiago, sakey ya akanengneng ed transpigurasyon, so pinatey met. (Gawa 5:17-40; 6:8–​7:60; 12:1, 2) Balet si Pedro tan Juan so akapantultuloy a sitotoor a nanlingkor ed si Jehova ed loob na dakel nin taon. Diad tua, diad pansamposampot na inmunan siglo K.P., inrekord nen Juan so kaaruman niran pasikmat na pasingawey nipaakar ed mangatatawen a gloria nen Jesus.​—Apocalipsis 1:12-20; 14:14; 19:11-16.

7. (a) Kapigan ginmapo so kasumpalay pasingawey a transpigurasyon? (b) Kapigan a tinumangan nen Jesus so pigara unong ed walna ra?

⁷ Nanlapulad gapo na “agew na Katawan” nen 1914, dakel ed saray pasingawey ya anengneng nen Juan so nasusumpal la. (Apocalipsis 1:10) Komusta balet so ‘isasabi [nen Jesus] ed gloria na Ama to,’ a singa inyanino na transpigurasyon? Ginmapon nasumpal iyan pasingawey diad inkianak na mangatatawen a Panarian na Dios nen 1914. Sanen si Jesus, a singa sakey a kabontatala ed kabuasan, so pinmelnak ed sankatalbaan ya eksena bilang balobalon nitronon Ari, satan so singa ipepelnak ed balon agew. (2 Pedro 1:19; Apocalipsis 11:15; 22:16) Kasin diad saman a panaon et tinumangan la nen Jesus so pigara unong ed walna ra? On. Wala so mabiskeg ya ebidensya a kayarin tuloy et ginmapo so mangatatawen a panamaoli ed alanaan a Kristianos.​—2 Timoteo 4:8; Apocalipsis 14:13.

8. Antoran ebento so mananda ed kapantokan a kasumpalan na pasingawey a transpigurasyon?

⁸ Balet, agmabayag et “onsabi [si Jesus] ed gloria to, tan kaulop toray amin ya angheles” ta pian ukomen so amin a katooan. (Mateo 25:31) Diad satan a panaon et iparungtal toy inkasikato ed amin ya engranden gloria to tan iter to ed “balang sakey” so kagkanepegan a tumang a misimbangan ed walna to. Tawiren na saray kinmarnero so andi-anggaan a bilay diad Panarian a nitarya parad sikara, tan saray kinmanding so ompatey ed “dusa ya andi-anggaan.” Alay dakep itan a konklusyon ed kasumpalan na pasingawey a transpigurasyon!​—Mateo 25:34, 41, 46; Marcos 8:38; 2 Tesalonica 1:6-10.

Niglorian Kakaulop nen Jesus

9. Nailaloan tayo ta a kaiba nen Jesus si Moises tan Elias ed kasumpalan na pasingawey a transpigurasyon? Ipaliwawa.

⁹ Agbukbokor nen Jesus ed transpigurasyon. Anengneng ira di Moises tan Elias a kaiba to. (Mateo 17:2, 3) Talaga ta’n presenti ira? Andi, ta abayag la ran inatey tan naugip ed dabok a manatalaran ed kikioli. (Eclesiastes 9:5, 10; Hebreos 11:35) Kasin ompayawar iran kaibay Jesus sano sikatoy onsabi’d mangatatawen a gloria? Andi, lapud nambilay si Moises tan Elias sakbay a nilukasan so mangatatawen ya ilalo parad totoo. Sikaray kabiangan na mangaraldalin a “kioli ed bilay na saray matunong.” (Gawa 24:15) Kanian say inyapireng da ed pasingawey a transpigurasyon et simboliko. Ed anto?

10, 11. Siopa so ililitrato di Elias tan Moises ed nanduruman kipapasen?

¹⁰ Diad arum a kipapasen, si Moises tan Elias so mapropetikon pigura. Bilang manamegley na Ganggan a sipanan, inyanino nen Moises si Jesus, say Manamegley na balon sipanan. (Deuteronomio 18:18; Galacia 3:19; Hebreos 8:6) Inyanino nen Elias si Juan a Bautista, say manangiparaan na dalan na Mesias. (Mateo 17:11-13) Sakey ni, diad konteksto na Apocalipsis kapitulo 11 et inyanino di Moises tan Elias iray alanaan a nakdaan ed panaon na anggaan. Panoy pakaamta tayo ed satan?

¹¹ Bueno, ibukay pa ed Apocalipsis 11:1-6. Diad bersikulo 3 et oniay nabasa: “Et itdan ko’ra so saray duara a tasik, tan manpropeta ra ed sanlibo duan-lasus tan anemaplo’y agew, a mankawes ira na supot.” Asumpal iyan propesiya ed saray nakdaan ya alanaan a Kristiano legay Guerra Mundial 1.a Akin a duaran tastasi? Lapud walay susumpalen na saray alanaan a nakdaan a kimey, diad espiritual a dalan et singa ed samay di Moises tan Elias. Ituloy ya ikuan na bersikulo 5 tan 6: “No siopaman a toon malabay a manduksa ed sikara [say duaran tastasi], ompaway so apuy ed sangi ra, tan akmonen da so kakabusol da; tan no wala so malabay a manduksa ed sikara, sikato so kaukolan ya ompatey ed ontan. Saray wala so pakayari ran mangikapot ed tawen, pian ag-onuran ed legay agew a pangipropeta ra; tan wala so pakayari ra ed saray danum pian bokboken da so dalin ed amin a panerya angga ed maminpigapiga a gabay da.” Kanian, napapanonotan itayo ed saray milagron ginawa di Elias tan Moises.​—Numeros 16:31-34; 1 Arari 17:1; 2 Arari 1:9-12.

12. Diad konteksto na transpigurasyon, siopa so ililitrato di Moises tan Elias?

¹² Siopa sirin so iyaanino di Moises tan Elias unong ed konteksto na transpigurasyon? Kuan nen Lucas a sikaray pinmayawar a kaibay Jesus a “sigogloria.” (Lucas 9:31) Malinew, iyaanino ray Kristianos a nilanaan na masanton espiritu bilang “mitatawir” a kaibay Jesus tan sirin et naawat day makapakelaw ya ilalo ed ‘piiba ed sikaton nigloria.’ (Roma 8:17) Nakaiba nen Jesus iray apaolin alanaan sano onsabi diad gloria nen Ama to pian “tumangan naani so balang sakey a too unong ed saray gawa to.”​—Mateo 16:27.

Tastasin Singa di Moises tan Elias

13. Antoran sengegan a natandaan si Moises tan Elias bilang matukoy a mapropetikon litrato na alanaan iran mitatawir nen Jesus a niglorian kaiba to?

¹³ Walaray makatantandan sengegan a mananda ed Moises tan Elias bilang matukotukoy a mapropetikon litrato na alanaan iran mitatawir nen Jesus. Namparan si Moises tan Elias so kinmana bilang sangiyan nen Jehova ed loob na dakel a taon. Sikaran dua so inmarap ed pananusa na manuley. Diad panaon na pankaukolan, balang sakey so tinulongan na agto kapamilya. Sipapakpel iran nampropesiya ed arari tan tinmalindeg a malet sumpad palson propetas. Anengneng di Moises tan Elias so pakapanyari nen Jehova ed Palandey Sinai (ya atawag met a Horeb). Namparan anuro ra na kasublayan da ed bandad bukig na Jordan. Legan na panaon di Moises (a kaibay Josue) tan Elias (a kaibay Eliseo) et agawa so dakel a milagro, nilikud ed saramay agawa legay impanbilay nen Jesus.b

14. Panon a kinmana iray alanaan bilang sangiyan nen Jehova, a singa di Moises tan Elias?

¹⁴ Agta ipapanonot na satan ya amin ed sikatayo so Israel na Dios? On, peteg. Imbaga nen Jesus ed matoor a papatumbok to: “Onla kayo sirin, tan manggawa kayo na saray babangatan ed amin a nasyones, a binyagan yo ra ed ngaray Ama tan say Anak tan say espiritu santo; ya ibangat yo ran mangunor na amin a bengabengatla ya inganggan ko ed sikayo. Tan nia, walaak a naynay ed sikayo, ya angga ed kasampotan na mundo.” (Mateo 28:19, 20) Bilang katutulok ed sarayan salita, kinmana iray alanaan a Kristiano bilang sangiyan nen Jehova nanlapulad Pentecostes 33 K.P. ya anggad natan. Singa di Moises tan Elias, nipapaarap ira ed pananusa na saray manuley tan pinupulongan da ra. Oniay imbaga nen Jesus ed 12 apostoles to: “Niakar kayo naani ed arap na saray makauley tan arari nisengeg ed siak, pian pamintuaan ed sikara tan ed saray Gentiles.” (Mateo 10:18) Aminpigan asumpal iray salita to ed awaran na Kristianon kongregasyon.​—Gawa 25:6, 11, 12, 24-27; 26:3.

15, 16. Antoray panpara ed baetan na saray alanaan ed sakey a dapag tan ed si Moises tan Elias ed sakey a banda diad pamaakaran na (a) andi-takot ya itatalindeg da parad katuaan? (b) pakakaawat na tulong manlapud saray aliwan Israelita?

¹⁵ Niarum ni, andiay takot iray alanaan a Kristiano a singa di Moises tan Elias diad itatalindeg parad katuaan sumpad relihyoson katilaan. Nonoten yo pa so impangakusa nen Pablo ed Judion palson propeta a Bar-Jesus tan ed mataktika balet mapekder ya impangiwalwal ed inkapalso na dirios na saray taga-Atenas. (Gawa 13:6-12; 17:16, 22-31) Tandaan met, a diad modernon panaon et saray alanaan a nakdaan so sipapakpel ya angiwalwal la’d Kakristianoan tan say ontan a panagtasi so amakbak ed sikato.​—Apocalipsis 8:7-12.c

¹⁶ Sanen imbatikan nen Moises so pananusa nen Faraon, nalmo toy salimbeng diad abung na sakey ya aliwan-Israelita, si Reuel, a tinawag met a Jethro. Diad bandad saginonor et nawat nen Moises ed si Reuel so makanakanan simbawa ed panangorganisa, a say ilalak ton Hobab so angigiya’d Israel diad kalawakan.d (Exodo 2:15-22; 18:5-27; Numeros 10:29) Kasin saray membro na Israel na Dios so natutulongan met [natan] na saray ag-alanaan? On, sikaray natutulongan na “baleg ya ulop” na “arum a karnero,” a pinmaway ed eksena legan na sarayan kaunoran ya agew. (Apocalipsis 7:9; Juan 10:16; Isaias 61:5) Diad pangipapasakbay ed maligsa tan maaron pananuporta na sarayan “karnero” ed alanaan ya agagi to, mapropetikon inkuan nen Jesus ed sikara: “Narasan ak nen saman et initdan yo ak na nakan; napgaan ak nen saman et initdan yo ak na inumen; Sangkailiak nen saman et pinarawes yo ak; lakseb ak, et kinawesan yo ak; Agmakayari ak et dinalaw yo ak; Nipangaw ak, et linma kayo ed siak. . . . Tua kuanko’d sikayo, Bangta sikatoy ginawa yo ed sakey ed sarayan agik, anggan saraya a kamelagan, sikatoy ginawa yo ed siak.”​—Mateo 25:35-40.

17. Panon a saray alanaan et walaan na eksperiensian mipadpara ed samay si Elias ed Palandey Horeb?

¹⁷ Sakey ni, akaeksperiensia so Israel na Dios a mipara ed samay naeksperiensia nen Elias ed Palandey Horeb.e Singa si Elias sanen ibabatikan toy Reyna Jezebel, inisip na atalagnaw iran matoor a nakdaan ya asumpal lay kimey da diad impanampot na Guerra Mundial I. Insan, singa si Elias, sikara so akiarapan ed si Jehova, a sinmabin angukom ed saramay organisasyon a mangibabagan sikaray “abung na Dios.” (1 Pedro 4:17; Malaquias 3:1-3) Bangta say Kakristianoan et aromog ya agmakakapet, saray alanaan a nakdaan so malinlinew ya atebek bilang “say matoor tan makabat ya aripen” et aturon mangasikaso’d amin a mangaraldalin a kayarian nen Jesus. (Mateo 24:45-47) Diad Horeb, nadngel nen Elias so “makalna a melag a bosis” ya apaneknekan a manlalapud si Jehova, a mangiiter ed sikato na dakel nin kimey a gawaen. Diad maligen a panaon kayari na bakal, nadngel na saray matoor ya alanaan ya ariripen nen Jehova so bosis to manlapud saray pahina na Biblia. Atebek da met a walaan ira na kimey a kaukolan dan sumpalen.​—1 Arari 19:4, 9-18; Apocalipsis 11:7-13.

18. Panon a say matalonggaring a pakapatnagay pakayari nen Jehova so nipaparalan ed Israel na Dios?

¹⁸ Diad kaunoran, kasin say matalonggaring a pakapatnagay pakayari nen Jehova so nipaparalan ed Israel na Dios? Kayari impatey nen Jesus, dakel a milagro so ginawa na apostoles, balet ta kalkalna iyan tinmunda. (1 Corinto 13:8-13) Natan et agtayo makakanengneng na saray milagro diad literal a paraan. Diad biek a dapag, inkuan nen Jesus ed papatumbok to: “Tua, kuanko ed sikayo, Say manisia ed siak, saray kimey a gawaen ko gawaen to met; tan ankakabaleg a kimkimey nen saraya so gawaen to.” (Juan 14:12) Asumpal iyan inmuna diad impangipulong na saray babangatan nen Jesus ed maong a balita diad panaoy Imperyo na Romano nen inmunan siglo. (Roma 10:18) Babaleg niran kimey so nagagawa natan legan ya iyuuna na alanaan a nakdaan so panangipulong na maong a balita “ed sankamundoan ya onkanan pamintuaan ed saray amin a nasyones.” (Mateo 24:14) Say resulta? Napapamintuan ed koma-20 siglo so idaragsa na sankabalgan a bilang na dedikado, matoor ya ariripen nen Jehova diad awaran. (Apocalipsis 5:9, 10; 7:9, 10) Agaylan sankaabigan ya ebidensya na pakayari nen Jehova!​—Isaias 60:22.

Sinmabi ed Gloria Iray Agagi nen Jesus

19. Kapigan ya anengneng a kaiba to ed gloria iray alanaan ya agagi nen Jesus?

¹⁹ Legan a nasusumpal na alanaan ya agagi nen Jesus so mangaraldalin a bilay da, niglogloria ra a kaiba to. (Roma 2:6, 7; 1 Corinto 15:53; 1 Tesalonica 4:14, 17) Diad ontan et sikaray magmamaliw ya imortal ya arari tan saserdote diad mangatatawen a Panarian. Kaiba si Jesus, a “panuleyan to’ra a mansetro na balatyang et nabetag ira a singa bangabanga na pomapalba a namisimisi.” (Apocalipsis 2:27; 20:4-6; Salmo 110:2, 5, 6) Kaiba si Jesus, onyurong ira ed saray trono a mangukom “ed saray labinduan kailalakan na Israel.” (Mateo 19:28) Saray mandageyem a palsa so sigugunaet a manatalaran ed sarayan ebento, a kabiangan na “kipatnag na saray anak na Dios.”​—Roma 8:19-21; 2 Tesalonica 1:6-8.

20. (a) Nipaakar ed anton ilalo a pinabiskeg na transpigurasyon so pananisia nen Pedro? (b) Panon a say transpigurasyon et mamapabiskeg ed saray Kristiano natan?

²⁰ Sinaglawi nen Pablo so kipatnag nen Jesus legan na say “baleg ya irap” sanen insulat to: “Sano sikato so onladia pian narayew ed saray sasantos to tan pian sikato so pankelawan ed amin ya anisia (ta say panamatua mi ed sikayo asisia) ed satan ya agew.” (Mateo 24:21; 2 Tesalonica 1:10) Agaylan marakep ya ilalo itan parad Pedro, Santiago, Juan, tan ed amin ya alanaay espiritun Kristianos! Pinabiskeg na transpigurasyon so pananisia nen Pedro. Segurado, say pakabasa nipaakar et satan so mamabiskeg met ed pananisia tayo tan mamaelet ed kompiyansa tayo ya agla mabayag et “tumangan [nen Jesus] naani so balang sakey unong ed saray gawa to.” Saray alanaan a Kristianos a mabilay ni natan so lalon apaseguroan a naiglorian kaibay Jesus. Napapabiskeg met so arum a karnero diad impakaamtan ilaban to ra ya onlabas ed anggaan na sayan marelmeng a sistema na bengabengatla ya anggad mamaarap ed maglorian balon mundo. (Apocalipsis 7:14) Agaylan panamaseseg ed italindeg a malet ya anggad anggaan! Tan dakel ni so ibangat na sayan pasingawey ed sikatayo, a singa naimano tayo ed ontumbok ya artikulo.

[Saray paimano ed leksab]

Kasin Natandaan Yo?

◻ Siopa so pinmayawar a kaiba nen Jesus ed transpigurasyon?

◻ Panon a say pananisia na apostoles so pinabiskeg na transpigurasyon?

◻ Sanen pinmayawar ira di Moises tan Elias a “sigogloria” a kaiba nen Jesus ed transpigurasyon, siopa so inrepresinta ra?

◻ Antoray panpara ed baetan di Moises tan Elias ed sakey a dapag tan ed Israel na Dios ed sakey a banda?

[Litrato ed pahina 10]

Papabiskegen na transpigurasyon so pananisia na saray Kristiano nensaman tan natan