Say Agew a “Mamool a Singa Apuy na Palbaan”
“Nia, say agew onsabi, sikato so mamool a singa apuy na palbaan.”—MALAQUIAS 4:1.
1. Antoran tepet so onlesa nipaakar ed Malaquias 4:1?
KALEGANAN na sarayan kaunoran ya agew, maliket iramay say kangaranan da et pilien nen Jehova ya isulat ed libro na pakanodnonotan to. Balet komusta iramay onsasaew ya onkualipika parad satan a pribilihyo? Balanglan sikaray manuley odino kabanyakan lambengat a totoo, anto so nagawa’d sikara no paugesen daray manangiyabawag na Panarian na Dios tan say mensahe ra? Sasaglawien nen Malaquias so agew na pikuekuentaan. Diad Mal kapitulo 4, bersikulo 1, nabasa tayo: “Ta, nia, say agew onsabi, sikato so mamool a singa apuy na palbaan; et saray amin a mapangta, tan saray amin a mangawa na mauges sikara naani dayami; et say agew ya onsabi poolan to ra naani, kuan nen Jehova na saray ejercito, ya agto naani ikera ed sikara angan lamut angan sanga.”
2. Anton malinew a panangiretrato na panangukom nen Jehova so inter nen Ezequiel?
2 Ipapareng met na arum a propeta so panangukom nen Jehova ed saray nasyon ed alay petang na sakey a palbaan. Agaylan matukoy ya onaaplika so Ezequiel 22:19-22 ed panangukom na Dios ed saray sekta na apostatan Kakristianoan! Nabasa tayo: “Kanian onia so kuan nen [Soberanon] Katawan a Jehova. Lapu ed nagmaliw kayo ya amin a lati, nia, sirin, tiponen takayo naani . . . Singa panipon da na pilak tan gansa tan balatyang tan ismay tan lata ed dalem na palbaan, a sibukan da so apuy ed tapew to, pian sikara so tunawen da; ontan so panipon ko ed sikayo ed sanok ko tan ed petang ko, tan igaton takayo naanid’man, tan tunawen takayo naani. On, tiponen takayo naani, tan sibukan ko naani tapew yo na apuy na sanok ko, et sikayo natunaw kayo naani dia ed pegley to. Singa say pilak natunaw ed pegley na palbaan, ontan naani so katunaw yo ed pegley to; et naamtaan yo naani a siak, si Jehova, inibung ko so sanok ko ed sikayo.”
3, 4. (a) Anton mansimpisimpitan a bibidbiren na saray kleron agawaan? (b) Anto so makapadimlan rekord na relihyon?
3 Talagan sakey a mabiskeg ya ilustrasyon! Saray kleron angipulisay a mangusar ed ngaran nen Jehova, a mangaayew ni ingen ed satan a masanton ngaran, so nepeg a nipaarap ed satan ya agew na pipapalinewan. Sipapasang dan ibabaga a sikara tan saray mapulitikan kaalyado ra so mangiletneg ed Panarian na Dios ed dalin, odino anggan panon et gawaen so dalin a matukoy a pasen parad Panarian.
4 Say apostatan Kakristianoan so akinonong ed mapulitikan manuley diad pilalaban ed teriblen baka-bakal. Irerekord na awaran iray Krusada ed kapegleyan iran panaon, say impaskar a panangumberti na Spanish Inquisition, say Talomplon Taon a Bakal ya aneral na baleg a kabiangan na Europa nen koma-17 siglo, tan say Spanish Civil War nen 1936 ya anggad 1939, say impanlaban parad panalimbeng ed posisyon na Iglesia Katolika ed España. Say sankabalgan ya impamaagos-na-dala so agawa’d duaran sankamundoan a bakal ed siglo tayo, sanen saray Katoliko tan Protestanti so akibiang ed labo-labon panlalaban, nanpapateyan iray sankapananisiaan tan arum a relihyon. Aganggano ni, wala so impanpapateyan ed baetan na saray Katoliko tan Protestanti ed Ireland, ed baetan na saray relihyoso iran ulop ed India, tan ed baetan na relihyoso iran grupo ed datin Yugoslavia. Saray pahina na relihyoson awaran so atalem met na dala na inkamartir na nilibon matoor a Tastasi nen Jehova.—Apocalipsis 6:9, 10.
5. Anton panangukom so manaalagar ed palson relihyon?
5 Naapresya tayon tuloy so inkahustisya na manasingger a paneral nen Jehova ed Babilonian Baleg, say sankamundoan ya imperyo na palson relihyon, pati saray managsuporta to. Sayan pananeral so nadedeskrebi diad Apocalipsis 18:21, 24: “Sakey ya angel a mabiskeg angala na sakey a bato a singa sakey a baleg a bato na gilingan, tan imbantak to ed dayat, a kuan to, unong na onia a siglat so kabagbag na Babilonia, say baleg a ciudad, et kapiganman ag la naromog a balot. Tan diad ed sikato aromog so dala na saray profeta tan saray sasantos, tan amin da a pinatey dia ed dalin.”
6. (a) Siopa so magmaliw a singa dayami, tan akin? (b) Anton panamaseguro so wala parad saramay walaay takot ed si Jehova?
6 Diad kaunoran, amin a kabusol na inkatunong, tan saramay patumbok da, so nepeg a magmaliw a singa “dayami.” Say agew nen Jehova so mamool ed sikara a singa palbaan. “Agto naani ikera ed sikara angan lamut angan sanga.” Diad satan ya agew na pikuekuentaan, saray ugugaw, odino simi-simit, so pidenengan tekep na inkahustisya unong ed panangikuenta nen Jehova ed saray lamut da, saray atateng da, a walaan na panangasikaso ed sarayan anak. Saray marelmeng ya ateng so andian na kailalakan pian onbayag iray marelmeng a dalan da. Balet saramay mangaagamil na pananisia ed sipasipan na Panarian na Dios so agnatenyeg. Ipapaseseg na Hebreos 12:28, 29: “Wala komon so gracia tayo a sikato so panlinkoran tayo ed Dios na makapaliket ed sikato a tokoyan na galang tan takot. Ta say Dios tayo sikato so sakey ya apuy a mangupot.”
Kasin si Jehova so Maruksan Dios?
7. Panon a linmoob so aro nen Jehova diad panangukom to?
7 Kasin kabaliksan na saya a si Jehova so masebeg, maruksan Dios? Arawin ontan! Diad 1 Juan 4:8, idadanet na apostol so importantin katuaan: “Say Dios sikato so aro.” Insan, diad 1Jn 4 bersikulo 16 iyaarum ton idadanet, ya ibabaga: “Say Dios sikato so aro; tan say mansiansia ed aro, mansiansian ed Dios, tan say Dios mansiansia ed sikato.” Lapud aro to’d katooan et gagala nen Jehova a linisan so dalin ed amin a karelmengan. Say maaro, mapangasin Dios tayo so mangiyaabawag: “Unong a siak mabilayak, . . . angapo so liket ko ed ipapatey na marelmeng; no ag ingen say marelmeng ompawil komon a manlapu ed dalan to tan manbilay. Ompawil kayo, ompawil kayo a manlapu ed saray dalan yo a mauges; ta akin et ompatey kayo?”—Ezequiel 33:11.
8. Panon ya indanet nen Juan so aro, ingen ta ipapanengneng met so inkasikaton Anak na Karol?
8 Tutukoyen nen Juan so a·gaʹpe, aprinsipyoan ya aro, a lalon mabetbet nen say arum a taloran managsulat na ebanghelyo, ingen diad Marcos 3:17, si Juan a mismo so adeskrebi bilang ‘Anak na Karol.’ Pinuyanan nen Jehova a sayan Anak na Karol so mangisulat ed apuyanan iran mensahe na kaunoran a libro na Biblia, say Apocalipsis, a mangipapanengneng ed si Jehova bilang say Dios a mangidadapo met na inkahustisya. Sayan libro so napno na manangukom iran balikas, a singa “say baleg a darapilan na alak na sanok na Dios,” “[say] pitora a copa na sanok na Dios,” tan “say sanok na Dios a Makapanyarin amin.”—Apocalipsis 14:19; 16:1; 19:15.
9. Antoray imbalikas nen Jesus nipaakar ed saray panangukom nen Jehova, tan panon ya asumpal iray propesiya to?
9 Say Katawan tayon Jesu-Kristo, a “sikato so talintao’y Dios ya ag nanengneng,” so makpel ya angiyabawag ed saray panangukom nen Jehova legan a wadia’d dalin. (Colosas 1:15) Alimbawa, wala so pitoran irap ed Mateo kapitulo 23 a diretsaan ton inyabawag sumpad saray relihyoson mansimpisimpitan ed agew to. Sinampotan to itan diad manangondenan panangukom tekep na sarayan balikas: “O Jerusalem, Jerusalem, ya mamatey ed saray profetas, tan tupaken to ray nibaki ed sikato! Aminpigapigan nilabay ko komon ya tiponen ya inpandaragup iray anak mo, a singa sakey a nganak ya tiponen to ray siwsiw to ed silong na saray payak to, et ag mo nilabay! Nia, say abung yo natainan ed sikayo ya andi lugan.” Talomplo-tan-piton taon ed saginonor, say panangukom so indapo na Romanon armada ed silong nen Heneral Titus. Saman so makapataktakot ya agew, mitukoyan ed no anto so magmaliw a sanka-makapataktakot ya agew ed amin a nasagmak na too—say agew nen Jehova, a magano lan ombetag.
“Say Banwa” so Onsindag
10. Panon a say “banwa na inkatunong” so mangitatarok na gayaga ed totoo na Dios?
10 Ipapaamta nen Jehova a walaray makaliktar ed agew to. Tutukoyen to iraya diad Malaquias 4:2, a kuanto: “Dia ed sikayo ya antakot ed ngaran ko ompaway naani so banwa na inkatunong a pati pananambal ed saray payak to.” Say banwa na inkatunong so anggapoy arum et si Jesu-Kristo a mismo. Sikatoy espiritual a ‘liwawa ed mundo.’ (Juan 8:12) Panon a sikatoy onsisinag? Sikatoy onpepelnak tekep na panamaabig a walad payapayak to—say ununa et say espiritual a panamaabig, a satan so naeeksperiensia tayo anggan natan, tan insan, diad balon mundon onsabi, say pisikal a katambal na totoo manlapud amin a nasyon. (Mateo 4:23; Apocalipsis 22:1, 2) Diad piguratibon paraan, a singa imbaga nen Malaquias, saray apaabig so “onla naani, tan manlokso naani a singa say kilaw na baka,” a singa nibulos manlapud kural. Agaylan gayaga so naeksperiensia na saray apaoli a walaan na ilalon makadampot ed atooan ya inkayadyari!
11, 12. (a) Anton pansumpalan so manaalagar ed saray marelmeng? (b) Panon ya ‘igatingatin [na totoo na Dios] iray marelmeng’?
11 Anggaman ontan, komusta iray marelmeng? Diad Malaquias 4:3, nabasa tayo: “Et sikayo igatin yo naani so marelmeng; ta sikara naani so dapodapol ed lepsag na dapan yo ed agew a siak gawaen ko, kuan nen Jehova na saray ejercito.” Legan a babantayan iramay mangaaro ed sikato, pagiten na Mibabakal-a-Dios tayo iramay maruksan kakabusol ed dalin, a deralen ira. Si Satanas tan saray demonyo to so napugeran.—Salmo 145:20; Apocalipsis 20:1-3.
12 Saray totoo na Dios so andian na pibibiang ed paneral ed saray marelmeng. Panon, sirin, ya ‘igatingatin daray marelmeng’? Gagawaen da iya ed piguratibon dalan diad panginabang ed baleg a selebrasyon na panbiktorya. Dedeskrebien na Exodo 15:1-21 itan a selebrasyon. Tinumbokan itan na impakaderal nen Paraon tan saray armada to ed Ambalangan Dayat. Diad kasumpalan na Isaias 25:3-9, say kaekal na “saray makapakebiew a totoo” so tumbokan na mabiktoryan piesta a nisisiglaot ed sipan na Dios: “Inakmon to so patey ed ando lan ando; et say Katawan a Jehova punasen to naani so saray lua ya onaagus ed saray amin a lupa. Et say kabalawan na baley to ekalen to naani manlapu ed amin a dalin, ta si Jehova sikato so sinalita to. Et nikuan ed saman ya agew, Nia, saya sikato so Dios tayo. . . . Sikato si Jehova. Sikato so inalagar tayo. Manliket tan mangayaga itayo dia ed panangilaban to.” Wala ed sayan gayaga, aliwan say panangibales odino pankantyaw, noagta panliket ed pakanengneng ed inkiyalangon na ngaran nen Jehova tan say inkalinisan na dalin parad mareen a panayaman na nankakasakey a katooan.
Engranden Edukasyonal a Programa
13. Anton edukasyon so nagawa ed “balon dalin”?
13 Diad Malaquias 4:4, asimbawa iray Judio a ‘nodnonoten so ganggan nen Moises.’ Kanian natan nakaukolan tayon tumboken so ‘ganggan nen Kristo,’ a singa asalambit diad Galacia 6:2. Saray niliktar ed Armagedon so andi-duaruwan natarokan na kaaruman iran instruksion base’d ganggan nen Kristo, tan sarayan kaaruman iran instruksion so nayarin nisulat a maong ed “saray lokot” ed Apocalipsis 20:12 a nilukas ed panaon na kioli. Agaylan engranden agew itan, unong a saramay napaoli manlapud patey so nabangatan a mangiyadapta’y kabibilay ed “balon dalin”!—Apocalipsis 21:1.
14, 15. (a) Panon ya abidbir so modernon-agew ya Elias? (b) Anton responsabilidad so susumpalen na klasen Elias?
14 Satan so kabiangan ni na edukasyonal a kimey a tinukoy nen Jehova, a singa nikurit diad Malaquias 4:5: “Nia, ibakik naani ed sikayo si Elias a profeta ed arapen ya onsabi so baleg tan makapataktakot ya agew nen Jehova.” Siopa so modernon-agew ya Elias? Unong a nipanengneng diad Mateo 16:27, 28, diad panutukoy ed ‘isasabi ed panarian to,’ inkuan nen Jesus: “Ta say Anak na too onla dia naani diad gloria na Ama to a pati saray angeles to; saman to tumangan naani so balang sakey a too onong ed saray gawa to.” Anemiran agew ed saginonor, diad sakey a palandey a kaibay Pedro, Santiago, tan Juan, “naoman so nengneng to ed arap da: et say lupa to sinminag a singa say banwa, tan saray kawes to nagmaliw ya amputi ya singa liwawa.” Kasin bokbokor to ed sayan pasingawey? Andi, ta “nia, pinmayawar ed sikara di Moises tan Elias a misasalita ed sikato.”—Mateo 17:2, 3.
15 Anto so kabaliksan na saya? Ituturo ton si Jesus so Babaleg a Moises diad panaon na isasabi to parad panangukom. (Deuteronomio 18:18, 19; Gawa 3:19-23) Sikatoy milimog ed modernon-agew ya Elias ta pian sumpalen so importantin kimey, say panangipulong ed sayan maong a balita na Panarian ed amin a dalin sakbay ya ondapo so baleg tan makapataktakot ya agew nen Jehova. Diad panedeskrebi ed kimey na sayan “Elias,” ibabaga na Malaquias 4:6: “Et sikato ipawil to naani so puso na saray atateng ed saray anak, tan say puso na saray anak ed saray atateng da; ompan lamang siak onsabi ak et kabilen ko so dalin ed pangayew.” Kanian si “Elias” so nipabidbir bilang say matoor tan makabat ya aripen a klase na alanaan iran Kristiano ya angimatalkan na Katawan, si Jesus, na amin a kayarian To. Lalaktipen na saya so panangitarya ed sankaabungan na pananisia tekep na nakakaukolan ya espiritual a “tagano ed suston panaon.”—Mateo 24:45, 46, NW.
16. Antoran makapaliket a resulta so napapawala ed kimey na klasen Elias?
16 Diad sankamundoan natan, nanenengneng tayo so makapaliket iran resulta na satan a programan panamakan. Say magasin a Panag-Bantayan, a niyiimprinta ed 16,100,000 ed kada isyu ed 120 a lenguahe, 97 ed saraya so nipapalapag a manbabansag, so manedelap ed dalin na “sayan maong a balita na Panarian.” (Mateo 24:14) Saray arum a palapagan ed dakel a lenguahe so nauusar ed nanduruman nengneng na panagpulong tan panagbangat a kimey na Tastasi nen Jehova. Say Elias a klase, say matoor tan makabat ya aripen, so alerto ed panangitarya na daakan parad amin na “saraman so mapaga ed espiritual a pankaukolan da.” (Mateo 5:3) Nagkalalo ni, saramay mangaawat ed sayan ilalon Panarian tan onkikiwas a mitukoyan ed satan so milinya ed makapakelkelaw a sankamundoan a pankakasakey. Sasayakupen to so baleg ya ulop a “nanlapud amin a nasyones tan tribo tan totoo tan pansasalita.” (Apocalipsis 7:9) Sano sayan kimey so nasumpal ed kalaknab a kakaukolanen nen Jehova, diad ontan et say anggaan so onsabi ed baleg tan makapataktakot ya agew to.
17. Kapigan so biglan igapo na makapataktakot ya agew nen Jehova?
17 Kapigan so biglan ibetag na satan a makapataktakot ya agew ed sikatayo? Oneebat si apostol Pablo: “Say agew na Katawan [Jehova, NW] onsabin singa matakew ed labi. Sano ibabagaray [anganko diad nikadkaduman paraan], Kareenan tan andi paga [kaligenan, NW], insan biglan kaderal so onsabi ed sikara, a singa pasakit na biin malokon; tan ag ira makaliktar.”—1 Tesalonica 5:2, 3.
18, 19. (a) Panon ya iyaabawag so “kareenan tan kaligenan”? (b) Kapigan a makaromog na inawa iray totoo nen Jehova?
18 Sioparay “sikara” ed sayan propesiya? Sikara so mapulitikan papangulo a mangibabagan makapangipaalagey na nankakasakey a balon uksoy manlapud ataytayak ya elemento na sayan marawal a mundo. Saray engranden produkto, say Liga na Nasyones tan Nasyones Unidas, so sinmaew ed saya. Unong ya impasakbay na propeta nen Jehova, sikara natan et “kuan da, ‘Walay kareenan! Walay kareenan!’ anta anggapo so kareenan.”—Jeremias 6:14, NW; 8:11; 14:13-16.
19 Kaleganan, susungdoan na totoo nen Jehova iray desdes tan panamasegsegang na sayan andiay-dios a mundo. Balet agla mabayag, a singa nibaga ed 2 Tesalonica 1:7, 8, makaromog iray pakainawaan “sano ompayawar so Katawan tayo a Jesus a manlapu ed tawen ya ibato so saray angeles na pakayari to, a dia ed mandarlang ya apuy. Iter to so panamales ed saray ag mikabat ed Dios, tan dia ed saray ag ontolok ed evangelio na Katawan tayon Jesus.”
20. (a) Anto so propesiya nen Sofonias tan Habacuc nipaakar ed agew a “mamool a singa apuy na palbaan”? (b) Anton simbawa tan panamaseseg so itatarok na sarayan propesiya?
20 Panon lan kagano itan? Dakel ed sikatayo so abayag lan manaalagar. Kaleganan to, dakel a maulimek a makaliktar so onkikiwas ed tawag diad Sofonias 2:2, 3: “Anapen si Jehova . . . anapen so inkatunong, anapen so kaoyamoan. Nayari a sikayo naani niyamot dia ed agew na sanok nen Jehova.” Insan, lugan na Sofonias 3:8 so simbawan: “Kanian manalagar kayo a nipaakar ed siak, kuan nen Jehova, anga ed agew ya yaalagey ko a mansamsam; ta say panangigeter ko sikato so panipon ed saray nacion, pian ikalbok ed sikara so sanok ko, salanti say masebeg a sanok ko; ta say amin a dalin naakmon naani ed apuy na imon ko.” Say anggaan so asingger la! Kabat nen Jehova so agew tan oras tan agto umanen so panag-orasan (timetable) to. Siaanos tayo sirin a mansungdo. “Ta say pasingawey sikato ni nipaakar ed nigetar a panaon, tan mansiglat ya onarap ed angaan, et ag naani mantila. Angan manabala, sikato so alagden mo; ta petepeteg ya onsabi, ya ag manbayag.” (Habacuc 2:3) Say makapataktakot ya agew nen Jehova so maples a manasingger. Tandaan, satan ya agew so agnaatrasado!
Bilang Repaso:
◻ Anto so nagawa ed saray manuley tan uuleyan diad makapataktakot ya agew nen Jehova?
◻ Anton klase na Dios si Jehova?
◻ Anton nengneng na edukasyon so dedeskribien parad totoo na Dios?
◻ Panon itayon sisimbawaen na saray propeta na Dios no nipaakar ed kinaasingger na anggaan?
[Litrato ed pahina 21]
Dakel so pinilit a kinumberte na Katolisismo ed panaon na Inkisisyon na Kastila
[Credit Line]
The Complete Encyclopedia of Illustration/J.G. Heck