Panon Mon Napaliket si Jehova Diad Panagsalitam?

Nen pinalsa itayo nen Jehova, inikdan to tayoy marakdakep ya regalo—say abilidad ya makapansalita. Importante kasi ed sikato no panon tayon usaren itan? On siempre! (Basaen so Santiago 1:26.) Kanian, panon tayon napaliket si Jehova diad panagsalita tayo?

1. Panon tayon usaren so regalo ya makapansalita?

Ibabaga na Biblia: “Itultuloy yon pasesegen tan pabiskegen so sakey tan sakey.” (1 Tesalonica 5:11) Walay kabat mon kailangan toy napabiskeg? Antoy gawaen mo ey? Ibagam ya importante ira ed sika. Ompan sarag mon ibaga no anto ray balibalin ugali da ya labalabay mo. Walay nanonotan mon teksto ya makapabiskeg ed kaarom? Dakdakel so teksto ya napampilian mo. Tandaan mo met ya aliwan say ibagam labat so makapabiskeg, pati say paraan na pangibagam. Kanian lanang kan mansalita ya maaro tan mauyamo.—Proverbio 15:1.

2. Anton klase na panagsalita so iwasan tayo?

Oniay ibabaga na Biblia: “Agkomon ompaway ed sangi yo so abulok a salita.” (Basaen so Efeso 4:29.) Labay ton ibaga, agtayo manaayew tan agtayo manguusar na makaopendi, bastos, tan makapainsulto iran salita ya makapasakit ed arum. Agtayo met itsi-tsismis tan dederalan so arum.—Basaen so Proverbio 16:28.

3. Antoy ontulong pian makapabiskeg so panagsalita tayo?

No antoy walad puso tan nonot tayo, atan so bungay sangi tayo. (Lucas 6:45) Kanian ipasal tayoy sarili tayo ya manpokus ed saray bengatlan matunong, malinis, maaro, tan makapadinayew. (Filipos 4:8) Nagawaan tayo iratan no pilien tayon maong iray libangan, panagrelaks, tan kakaaro tayo. (Proverbio 13:20) Makatulong met no manisip tayo ni antis ya mansalita. Isip mo met no antoy epekto ed arum na ibagam. Ibabaga na Biblia: “Say salitan agla ninonot et singa saray saksak na espada, balet say dila na marunong et mamaabig.”—Proverbio 12:18.

DAKEL NI NAARALAN MO

4. Kontrol moy panagsalitam

No maminsan, wala ray nibabaga tayon pagbabawian ti lanlamang. (Santiago 3:2) Basaen so Galacia 5:22, 23, insan ebatan iraya:

• Dinan ed sarayan kualidad so labay mon kerewen ed pikakasim pian nakontrol moy panagsalitam? Panon ya makatulong ed sika irayan kualidad?

Basaen so 1 Corinto 15:33, insan ebatan iya:

• Antoy epekto na saray kakaarom tan pipilien mon panagrelaks ed panagsalitam?

Basaen so Eclesiastes 3:1, 7, insan ebatan iya:

• Kapigan tayo dapat ag-onesel odino manalagar na dugan panaon antis ya mansalita?

5. Say kamaongan na arum so ibaga

VIDEO: Mansalita na Maabig Pian Napabiskeg so Arum (4:07)

• Diad video, akin et naisip na brother ya umaney ibabaga to tungkol ed arum?

• Antoy ginawa to pian nauman to?

Basaen so Eclesiastes 7:16, insan ebatan iya:

• Antoy tandaan tayo no ngalngali ti la ilabir so kakapuyan na arum?

Basaen so Eclesiastes 7:21, 22, insan ebatan iya:

• Panon kan natulongan na sarayan bersikulo pian agka ombarong no asakitan kad imbaga na arum?

6. Maaron mitongtong ed pamilyam

VIDEO: Pankasakeyen na Panangaro tan Respeto so Pamilya (3:08)

• Antoy makatulong pian maaro tan mauyamo kan mitongtong ed pamilyam?

Basaen so Efeso 4:31, 32, insan ebatan iya:

• Anton klase panagsalita so makapabiskeg ed pamilya?

Imbaga nen Jehova ya inar-aro toy Anak to, si Jesus. Basaen so Mateo 17:5, insan ebatan iya:

• Panon mon naalig si Jehova no mitotongtong kad pamilyam?

SUMARYO

Baleg so epekto na ibabaga tayo. Kanian manalwar tayo ed ibabaga tayo, no kapigan tan no panon tayon ibaga iratan.

Rebyu

• Panon mon natulongan so arum diad panagsalitam?

• Anton klase na panagsalita so iwasan mo?

• Antoy makatulong pian lanang ya maaro tan makapabiskeg iray ibabaga tayo?

DISKOBRIEN

Antoy makatulong pian makapabiskeg iray ibabaga tayo?

Ipasal Moy Dilam ya Magmaliw ya Marunong (8:04)

Amtaen no panon mon naiwasan so man-ayew.

“Talaga Kasin Mauges so Man-ayew?” (Artikulo ed website)

Amtaen no panon mon naiwasan so man-tsismis.

Panon Kon Napatunda so Tsismis? (2:36)

Nengnengen no panon ya tinulongan nen Jehova so sakey a laki pian nitunda toy man-ayew.

“Ninonot Ko no Anto Kasi Pansumpalan na Bilay Ko” (Say Panag-bantayan-E, Agosto 1, 2013)