Pinaabig nen Jesus so Ugaw ya Aselepay Demonyo

Nen oneepas lay Jesus, Pedro, Santiago, tan Juan manlapud palandey, walay asabat dan amayamay a totoo. Walay aliwan nagagawa. Pinaliberan na saray eskriba iray disipulo, tan misusuppiatan ira. Aliketan iray totoo nen anengneng day Jesus, tan inmasingger irad sikato. Tinepetan to ra: “Antoy pansusuppiatan yo?”​—Marcos 9:16.

Walay lakin tinmalimukor ed arap nen Jesus tan imbaga to: “Managbangat, inyakar kod sika so ana’kon laki ta sikatoy sinelepan na emel ya espiritu. Kapagno atakien na espiritu, sikatoy ibalsak na satan diad dalin, manburaburay sangi to tan manngalatenget iray ngipen to tan onkapuy. Kinerew kod saray disipulom a papawayen da itan, balet agda ayarian.”​—Marcos 9:17, 18.

Mapatnag ya krikritikoen na saray eskriba iray disipulo ta agda napaabig so ugaw, posiblin kakantiawan da ra. Kanian imbes ya ebatan nen Jesus imay mapagpagan ama, oniay imbaga to ed saray totoo: “O sikayo ran andiay pananisia tan mauges a henerasyon, anggad kapigan ni so pilimog kod sikayo? Anggad kapigan ni so pananos kod sikayo?” Sarayan salita et seguradon parad saray eskriba ya misusuppiatan ed saray disipulo to nen sikatoy agda kaiba. Nilingaw toy maer-ermen ya ama na ugaw tan inkuan to: “Iyakar yo dia.”​—Mateo 17:17.

Nen asingger la may ugaw ed si Jesus, sikatoy imbalsak na demonyon sinmelep ed sikato tan pinankayerker to. Mantulin-tulin ed dalin so ugaw tan manburaburay sangi to. Tinepetan nen Jesus so ama: “Kapigan ni iya nagagawad sikato?” Inmebat so ama: “Manlapu lad inkaugaw to, tan naynay a sikatoy itutumba tod apoy tan ed danum pian pateyen to.” Insan akikasi: “No walay nayarian mon gawaen, kasian mo kami tan tulongan mo kami.”​—Marcos 9:21, 22.

Singa naandian lay ilalo so ama ta anggan saray disipulo nen Jesus et agda asarag ya tulongan. Bilang ebat ed kekerewen na ama, oniay makapaseseg ya impaseguro nen Jesus: “Satan a balikas, ‘No nayarian mo’! Agayla, amin a bengatla et posible ed sakey a walaay pananisia.” Tampol ya inmeyag so ama: “Walay pananisiak! Tulongan mo ak no iner so pankukulangan koy pananisia!”​—Marcos 9:23, 24.

Anengneng nen Jesus ya nitan la ray totoon ombabatik paonlad sikato. Diad arapan da et nampasnokan nen Jesus so demonyo: “Sikan emel tan telek ya espiritu, iganggan kod sika ya ompaway kad sikato tan agka lan balot onloloob ed sikato!” Nen ompaway la may demonyo, pinaeyag to so ugaw tan pinankayerker ton aminpiga. Insan akarukol ya ag-onggagalaw. Nen anengneng iya na totoo, inkuan da: “Inatey la!” (Marcos 9:25, 26) Balet nen binembenan nen Jesus so lima na ugaw, sikatoy binmangon tan “manlapud saman ya oras et inmabig la.” (Mateo 17:18) Mankelaw iray totoo ed ginawa nen Jesus.

Antis na satan, nen imbaki nen Jesus iray disipulo to ya manpulong, apapaway da ray demonyo. Kanian nen siksikara labat la ed abung, intepet da: “Akin et agmi napapaway iman?” Impaliwawa nen Jesus ya kulang so pananisia ra. Kuan to: “Sayan klase na demonyo et napapaway labat diad panamegley na pikakasi.” (Marcos 9:28, 29) Kaukolan so mabiskeg a pananisia tan pampikasi pian iter na Dios so nakaukolan a tulong diad pamapaway na mabiskeg a demonyo.

Oniay konklusyon nen Jesus: “Lapud kulang so pananisia yo. Ibagak ed sikayoy tua, no walay pananisia yo a singa kamelag na bukel na mustasa, ibaga yo ed sayan palandey, ‘La kad man,’ et onalis itan, tan anggapo so imposible ed sikayo.” (Mateo 17:20) Talagan baleg so nagawaan na pananisia!

Saray problema tan kairapan ya mangaamper ed panaglingkor tayod si Jehova et ompan singa agaylay kabaleg odino agnagalaw ya singa palandey. Balet no pabiskegen tayoy pananisia tayo, nasarag tayo ray singa palandey ya problema tan kairapan.