LEKSION 12
Antoy Makatulong Pian Tuloytuloy Mon Naaral so Biblia?
Baleg so nagawaan na panaral na Biblia. Pero no maminsan, ompan aliwan mainomay itan. Ompan isipen mon agmo sarag ya tuloytuloy ya aralen so Biblia. Akin et sulit so pansagpot mo? Anto ray makatulong ed sika ya makapan-anos anggano mairap so situasyon mo?
1. Akin et importante so panaral na Biblia?
“Say Salita na Dios et mabilay tan makapanyari.” (Hebreo 4:12) Importante so Biblia ta nabasa ditan so nononoten tan nalilikna na Dios ed sika. Makatulong met itan pian dakel so naaralan mo, magmaliw kan marunong, tan nawalaan kay ilalo. Tan say sankaimportantian, natulongan ka na Biblia ya nakaarom si Jehova. No aralen mo so Biblia, balibali epekto to ed sika ta maong so pansumpalan mo.
2. Akin et dapat tayon isipen ya mabmabli iray katuaan ya walad Biblia?
Saray katuaan ed Biblia et singa mabmablin kayamanan. Kanian ibabaga na Biblia ya “saliw moy katuaan tan agmon balot ilalako.” (Proverbio 23:23) No tandaan tayo itan, gawaen tayoy anggaay nayarian tayo ya tuloytuloy ya aralen so Biblia anggano wala ray makakasebel.—Basaen so Proverbio 2:4, 5.
3. Panon kan tulongan nen Jehova pian tuloytuloy so panaaral mo?
Labay kan tulongan nen Jehova, say makapanyarin Amalsa tan Kaarom, pian sikatoy lalom ya nakabat. Sarag to kan ikdan na “panlabay tan pakayarin onkiwas.” (Basaen so Filipos 2:13.) Kanian no bilang ta natatabangan ka lan manaral odino naiirapan kan unoren so nanaaralan mo, tulongan to ka. Tan ikdan to kay biskeg tan pakpel pian nakayam iray makakasebel odino onkokontra ed panaaral mo. Naynay mon kerewen ed si Jehova diad pikakasi ya tulongan to ka pian nituloy moy panaaral mo na Biblia.—1 Tesalonica 5:17.
DAKEL NI NAARALAN MO
Amtaen no panon mon nituloy so panaaral mo na Biblia anggano busy ka odino wala ray onkokontra. Amtaen met no panon kan tulongan nen Jehova ya makapan-anos.
4. Mas maabig no iyunam so panaaral mo na Biblia
No maminsan masyado tayon busy, kanian anggapo lay oras tayon aralen so Biblia. Antoy makatulong? Basaen so Filipos 1:10, insan ebatan iraya:
Parad sika, anto ray “mas importantin bengatla” ed bilay?
Antoy gawaen mo pian niyunam so panaaral mo na Biblia?
No iyunam ya ikarga so buer ed timba insan mo isublay iray bato, wala ray bato ya ag-onkarga
No iyunam ya ikarga iray bato, dakel so nikargam ya buer. Ontan met, no iyunam iray “mas importantin bengatla” ed bilay mo, nasumpal mo iratan tan wala ni oras mo parad arum ya bengatla
No aralen moy Biblia, niiter moy espiritual ya pankaukolan mo—say nakabat tan nadayew so Dios. Basaen so Mateo 5:3, insan ebatan iya:
Antoy maong ya resulta no iyuna tayod bilay tayo so panaral na Biblia?
5. Agka ontutunda anggano wala ray onkontra
No maminsan, ompan wala ray mandismaya odino manbalaw ed sika lapud panaaral mo na Biblia. Ontan so agawa ed si Francesco. I-play so VIDEO, insan ebatan iraya.
Diad video, antoy reaksion na saray kakaaro tan kapamilya nen Francesco nen imbaga tod sikara so nanaaralan to?
Anto ray bendisyon ed si Francesco lapud agsinmuko?
Basaen so 2 Timoteo 2:24, 25, insan ebatan iraya:
Antoy reaksion na saray kapamilyam tan kakaarom ed nanaaralan mo?
Base ed binasan teksto, antoy gawaen mo no wala ray agmalabay ed panaaral mo na Biblia? Akin ey?
6. Mantiwala ka ya tulongan ka nen Jehova
No mas nakakaaro tayo si Jehova, lalon labay tayon paliketen. Pero, ompan wala ray mairap tayon umanen pian nagawaan so panlabayan to. No ontan so situasyon mo, agka onsusuko. Tulongan ka nen Jehova. I-play so VIDEO, insan ebatan iraya.
Diad video, anto ray inuman nen Jim pian napaliket to si Jehova?
Antoy pambiliban mo ed ginawa nen Jim?
Basaen so Hebreo 11:6, insan ebatan iraya:
Antoy gawaen nen Jehova ed saramay “masimoon a manaanap ed sikato”—saramay gagawaen day anggaay nayarian da ya sikatoy kabaten tan paliketen?
Base ed binasan teksto, antoy nalilikna nen Jehova no nanenengneng ton gagawaen moy anggaay nayarian mo ya manaral na Biblia?
NO ITEPET NA ARUM: “Akin et manaaral ka na Biblia?”
Antoy ibagam ey?
SUMARYO
Anggano no maminsan et aliwan mainomay, ontulong so panaaral mo na Biblia pian nawalaan ka na bilay ya anggapoy anggaan. Itultuloy moy mantiwala ed si Jehova, tan bendisyonan to ka.
Rebyu
Akin et mabmabli ed sika iray katuaan ya wala ed Biblia?
Panon mon “seguroen . . . no anto ray mas importantin bengatla”?
Akin et kerewen mo ed si Jehova ya tulongan to ka pian nituloy moy panaaral mo na Biblia?
DISKOBRIEN
Amtaen so apatiran paraan ya akatulong ed arum pian dugay pangusar da ed oras da.
Amtaen no panon ya tinulongan nen Jehova so sakey ya bii ya say asawa to et kontra ed pansasagpot ton dayewen so Dios.
Papabiskegen Itayo nen Jehova Pian Nasarag Iray Pakakabelatan Tayo (5:05)
Nengnengen no panon ya abendisyonan so sakey ya laki lapud impan-anos na asawa to.
No maminsan, naaakusaan iray Tasi nen Jehova ya bubuyaken day pamilya. Tua kasi itan?
“Kasin Bubuyaken na Saray Tasi nen Jehova so Pamilya Odino Pankakasakeyen Da?” (Artikulo ed website)