Pagmaliw a Mauyamo—Pakapatnagay Karunongan
Si Toñi ya professional caregiver et nan-doorbell tan walay pinmaway ya medyo maedad lan bii. Nanlabiran tan nampasnokan na samay bii si Toñi ta agkuno asakbay ya sinmabi pian asikasoey akulaw lan nanay to. Agpa atrasado si Toñi. Balet kalmadon kinmerew na dispensa ed samay bii.
DIAD sinmublay ya inyakar nen Toñi, nampasnok lamet imay bii. Antoy reaksion to? “Mair-irap iman ya situasyon,” so imbaga to. “Anggapoy basiyan na pampapasnok to.” Balet siansian kinmerew lamet na dispensa si Toñi tan imbaga tod bii ya natatalosan toy irap ya dadalanen to.
No sika si Toñi, anto kasi ginawam? Kasin nansiansia kan mauyamo? Kasin akontrol moy pasnok mo? Siempre, mairap so mansiansian kalmado no nasalim imay agawad si Toñi. No nai-stress odino walay mamapapetang na ulom, mairap so mansiansian kalmado.
Balet, papasesegen na Biblia iray Kristiano ya magmaliw a mauyamo. Diad tua, satan ya ugali et inkonekta na Salitay Dios ed karunongan. “Siopa ed sikayo so marunong tan makatalos?” so intepet nen Santiago. “Komon ta diad panamegley na maabig a kagagawa to et ipanengneng to ray gawa ya atekepan na inkauyamo a resulta na karunongan.” (Sant. 3:13) Akin ya nibagan say pagmaliw ya mauyamo et resulta na karunongan a nanlapud Dios? Tan antoy makatulong ed sikatayo pian nipanengneng itan ya ugali?
SAY KARUNONGAN NA PAGMALIW YA MAUYAMO
No mauyamo ka, nabawasay tensyon. “Say mauyamo ya ebat et pakepaen toy pasnok, balet say ansakit a panagsalita et palooren toy sanok.”—Pro. 15:1, paimanod leksab.
No manpasnok ka, lalon onloor so situasyon ta singam susungloran so apoy. (Pro. 26:21) Balet no mauyamo so ebat mo, napakalmam so situasyon. Ompan onkalmado met pati samay toon mamapasnok.
Ontan so agawad si Toñi. Naimano na samay bii so mauyamon ebat nen Toñi, tan akaakis. Imbaga to ya nabebelatan ya maong ed saray problema to tan na pamilya ra. Apulongan nen Toñi tan nigapoy panangiyaral na Biblia—atan so resulta na kalmado tan mauyamon kakaebat to.
No mauyamo ka, maliket ka pati saray arum. “Maliket iray mauyamo, ta tawiren day dalin.”—Mat. 5:5.
Akin ya maliket iray mauyamo? Nen nagmaliw a mauyamo so dakel ya datin mapasnok, nagmaliw iran maliket. Inmaligwas so bilay da, tan amta dan walay balibalin ilalo ra ed arapen. (Col. 3:12) Nanonotan ni nen Adolfo, sakey ya manangasikaso na sirkito ed Spain, so bilay to antis ton naamtaay katuaan.
“Anggapoy direksion na bilay ko,” so imbaga nen Adolfo. “Misasanok ak, anggan saray kaarok et natatakot ira lapud arogante tan bayolenti ak. Anggad walay agawan sengegan na impanguman ko. Diad sakey a gulo, anemiray saksak ko tan inatey ak lawari.”
Balet natan, ibabangat la nen Adolfo so pagmaliw ya mauyamo diad panamegley na salita tan alimbawa to. Sikatoy labalabay lan asinggeran na dakel lapud makaaro tan balibali ugali to. Imbaga nen Adolfo ya sikatoy malikeliket ed impanguman to. Tan misalsalamat ed tulong nen Jehova ta sikatoy nagmaliw ya mauyamo.
No mauyamo ka, napaliket moy Jehova. “Ana’ko, magmaliw kan marunong tan paliket moy pusok, pian naebatan ko may mangakantiaw ed siak.”—Pro. 27:11.
Si Jehova et kakantiawan na manunan kabusol, say Diablo. Walay rason na Dios ya manpasnok ed saray panag-insulto na Diablo, balet ibabaga na Biblia ya si Jehova et “matantan a manpasnok.” (Exo. 34:6) No gawaen tayoy anggaay nayarian tayon aligen so Dios ya matantan a manpasnok tan mauyamo, ipapatnag tayoy karunongan tan napaliket tayoy Jehova.—Efe. 5:1.
Mauges so mundon pambibilayan tayo. Nayarin wala ray naabet tayon ‘mapasirayew, mapaatagey, managmudmora, anggapoy kontrol ed sarili, tan masesebeg.’ (2 Tim. 3:2, 3) Balet aliwan satan so rason ya agtayo la aralen so magmaliw ya mauyamo. Papanonotan itayo na Salitay Dios ya ‘say karunongan a manlalapud tagey et mareen, makatunongan.’ (Sant. 3:17) No mareen tan makatunongan itayo, papaneknekan tayon walad sikatayo so karunongan a manlalapud Dios. Satan ya karunongan so ontulong ed sikatayon mansiansian mauyamo no walay mamapasanok ed sikatayo tan mas onapit tayod Lapuan na agmanganggan karunongan, si Jehova.