Manpatatken ed Espiritual Ta ‘Asingger Lay Baleg ya Agew nen Jehova’
“Onaligwas itayo ed inkatatken.”—HEB. 6:1, NW.
1, 2. Antoy ag-iilaloan ya agawa a sengegay ‘pakabatik’ na saray Kristiano ed Jerusalem tan Judea ‘diad kapalandeyan’?
SANEN wadiad dalin si Jesus, sikatoy inasinggeran na saray disipulo to tan tinepetan da: “Anto kasi so tanda ed isabim tan say anggaan na [sistema na] mundo?” Bilang ebat, sikatoy angiter na propesiya a say unonan kasumpalan et agawa nen inmunan siglo. Sinalambit nen Jesus so nipaakar ed nikadkaduman nagawa a pakapatnagan ya asingger lay anggaan. Sano nanengneng da la iyan nagagawa, nepeg a “saray wala ed Judea ombatik ira . . . ed saray palandey.” (Mat. 24:1-3, 15-22) Kasin nabidbir na saray disipulo nen Jesus so tanda, tan ontulok ira ed saray instruksion to?
2 Kayari na taloran dekada, salanti, nen 61 C.E., walay prangka tan seryoson mensahe ya insulat nen apostol Pablo ed saray Hebreon Kristiano a manaayam ed Jerusalem tan ed kaliberliber na satan. Say ag-amta balet nen Pablo tan saray kaagian to et limay taon labat la, onggapo lay “baleg ya irap.” (Mat. 24:21) Nen 66 C.E., say Jerusalem et segurado la komon a nakubkob na Romanon heneral a si Cestius Gallus tan say armada to. Balet ta bigla iran inmatras, kanian pankanawnawa la natan na saray Kristiano so ombatik.
3. Antoy insimbawa nen Pablo ed saray Hebreon Kristiano, tan akin?
3 Kaukolan na saraman a Kristiano so pakatebek pian namoria ran saraman ya agawgawa et kasumpalan na impropesiya nen Jesus, tan nepeg day ontakas. Balet arum ed sikara et ‘matewet ed kadedengel.’ Singa ra ugugaw a mankaukolan na “gatas.” (Basaen so Hebreos 5:11-13.) Anggan arum ed saray abayag la’d katuaan et napatnagan a ‘makakaarawi ed Dios a mabilay.’ (Heb. 3:12) Walaray arum a ‘niyugali’ da lay onliwat ed saray Kristianon pantitipon, diad samay panaon a “manasingger [lay] agew” na desyang. (Heb. 10:24, 25) Oniay nipanpanaon ya insimbawa nen Pablo ed sikara: “Natan ta tinaynan tayo la ray manunan bangat nipaakar ed Kristo, onaligwas itayo ed inkatatken.”—Heb. 6:1, NW.
4. Akin et importante so pansiansian alerto tan mabiskeg ed espiritual, tan anto so ontulong ed sikatayo pian nagawaan itan?
4 Manbibilay itayo ed panaon na kaunoran lan kasumpalan na propesiya nen Jesus. “Say baleg ya agew nen Jehova,” salanti, say agew a mangangga lay interon sistema nen Satanas et “asingger” la. (Sof. 1:14) Natan sirin so panaon a kaukolan itayon lalon manalerto tan manpabiskeg ed espiritual. (1 Ped. 5:8) Talaga kasin gagawaen tayo itan? Say inkatatken ed espiritual so ontulong pian niyapasakey so imano tayo ed no anto lan peryodo na panaon so pambibilayan tayo.
No Anto so Inkatatken ed Espiritual
5, 6. (a) Anto so kabaliksan na inkatatken ed espiritual? (b) Anton duaran bengatla so kaukolan tayon gawaen pian onaligwas ed inkatatken?
5 Aglabat pinaseseg nen Pablo iray unonan siglon Hebreon Kristiano ya onaligwas ed inkatatken, noagta imbaga to met ed sikara no antoy kabaliksan na satan. (Basaen so Hebreos 5:14.a) “Saray totoon matatken” ed espiritual et ag-ira napepesel ed “gatas” labat. Mamangan ira na “anawet a tagano.” Kanian amta ra so ‘manuna’ iran bangat tan ontan met ed ‘saray aralem a bengatla’ na katuaan. (1 Cor. 2:10) Niarum ni, nipasal so pakatebek da panamegley na panangusar odino panangiyaplika ed amta ra. Diad ontan et natulongan iran nibiig so maong tan mauges. Sano kaukolan iran mandesisyon, makatulong iyan panangipasal pian natebek da no antoray nalalanor a prinsipyo ed Kasulatan tan no panon dan iyaplika iratan.
6 Oniay insulat nen Pablo: “Nepeg ya imatleken tayo ed baleg a seseg so saray bengatlan nadngel tayo, ta ompan lamang no niagus itayo a manlapu ed sikara.” (Heb. 2:1) Ompan agtayo naam-amtaan et ‘niyaagus’ odino niyaarawi itayo la’d pananisia. Napaliisan tayo itan no kaleganay personal a panagaral odino diad saray Kristianon pantitipon et “imatleken tayo ed baleg a seseg” iray espiritual a katuaan. Kanian, oniay kaukolan ya itepet na balang sakey ed sikatayo: ‘Kasin angga labat la’d saray manunan bangat so aaralen ko? Rotina labat kasi so pandadayew ko ed si Jehova, ya agko ipapapuso so katuaan? Panon kon peteg a napaaligwas so espiritualidad ko? Pian onaligwas itayo ed inkatatken, walay duaran bengatla a kaukolan tayon gawaen. Unona, nepeg a kabkabisado tayoy Salita na Dios. Komadua, kaukolan tayon aralen so pagmaliw a matulok.
Kabisadoen a Maong so Kasulatan
7. Panon tayon nagunggonaan no lalo tayon kabisadoen so Salita na Dios?
7 Insulat nen Pablo: “Balang sakey a managamil na gatas anggapo so asalsali to ed [odino, agto kabisado so] salita na katunongan; ta sikato so sakey ya ugaw.” (Heb. 5:13) Pian ontatken itayo ed espiritual, kaukolan a kabisado tayon maong so mensahe na Dios ed sikatayo. Sayan mensahe et walad Salita to, say Biblia, kanian kaukolan a makuli tayon aralen so Kasulatan tan saray publikasyon a manlalapud “matoor tan makabat ya aripen.” (Mat. 24:45-47) No ontan so gawaen tayon panagaral, naamtaan tayoy kanonotan na Dios tan nipasal so pakayari tayon ontebek. Imanoen pay alimbawa na sakey a Kristianon manngaran na Orchid.b Oniay inkuan to: “Say panonot a walaan na sankabalgan ya epekto ed bilay ko et samay nipaakar ed regular a panagbasa’d Biblia. Ngalngali duaran taon kon binasa so interon Biblia, balet say pakaliknak et kakabaten ko ni labat so Manamalsak. Naaralan ko iray panlabayan tan agto panlabayan, say kabaleg na pakayari to, tan kaaralem na kakabatan to. Tinmulong ed siak so inagew-agew a panagbasa ed Biblia diad saray sankairapan a panaon na bilay ko.”
8. Panon ya “ontalos” ed kapusoan tayo so Salita na Dios?
8 No regular tayon basaen so Salita na Dios, say mensahe na satan et walaan na ‘biskeg’ ya “ontalos” ed kapusoan tayo. (Basaen so Hebreos 4:12.) Diad ontan et naimpluensiaan na satan so personalidad tayo tan mas napaliket tayoy Jehova. Wala tay inyeskedyul mon mas malaem a panaon parad panagbasa na Biblia tan pandalepdep ed abasam?
9, 10. Antoy kabaliksan na pangabisado ed Salita na Dios? Mangiter na alimbawa.
9 Agto labay ya ibagan no antam lay karga na Biblia et kabisadom la itan. Nen panaon nen Pablo, anggan saramay nibagan ugaw ed espiritual et amta da pa met so ibabaga na pinuyanan a Salita na Dios. Balet agda itan iyaaplika tan agda amtay gunggona na pangiyaplika ed satan. Sano mandedesisyon ira et ag-ira paigigiya ed mensahe na Biblia, sirin et nibagan agda itan kabisado.
10 Say pangabisado ed Salita na Dios et kabaliksan toy pangamta tayo ed mensahe na satan tan pangiyaplika ed satan diad bilay tayo. Ipapanengneng na eksperiensya na sakey ya agi a si Kyle no panon itan a nagawaan. Sikatoy akapisiblangan ed katrabaho to. Antoy ginawa to pian naresolbe so problema? Oniay inkuan to: “Say teksto a tampol ya anonotan ko et say Roma 12:18, a kuan to: ‘Dia ed anggaan na nayarian yo manayam kayo ed kareenan ed ganaganay totoo.’ Kanian, imbagak ed samay katrabahok a mantongtong kami kayari na trabaho.” Marakep so resulta na impantongtong da, tan pandinayewan na katrabaho nen Kyle so ginawa to. “Naaralan kon lawas maabig so pansumpalan tayo no iyaplika tayo iray prinsipyo na Biblia,” so kuan nen Kyle.
Aralen so Pagmaliw a Matulok
11. Antoy mangipapanengneng ya aliwan mainomay so itulok sano mairap iray kipapasen?
11 Nayarin aliwan mainomay so pangiyaplika ed saray naaaralan tayo ed Biblia, nagkalalo la no mairap iray kipapasen. Alimbawa, kayarin tuloy na impangibulos nen Jehova ed saray Israelita manlapud panangaripen na saray Ehipsio, “iningalan da si Moises” tan ‘sinubsubok day Jehova.’ Akin? Lapud anggapoy nainum dan danum. (Exo. 17:1-4) Anggapo ni duay bulan kayari ran akisipan ed Dios tan inmabobon a ‘gawaen so amin a sinalita nen Jehova,’ sinumlang day ganggan to sanen nandayew ira’d talintao. (Exo. 24:3, 12-18; 32:1, 2, 7-9) Kasin agawaan da itan lapud apagaan ira sanen abayagan si Moises diman ed Palandey Horeb? Kasin inisip dan onataki lamet iray Amalekita tan anggapoy nagawaan da no agda kaiba si Moises? Posible itan, lapud diad apalabas et tinalo da iray Amalekita diad impangitagey nen Moises na lima to. (Exo. 17:8-16) Antokaman so rason, ‘agnilabay na saray Israelita so ontulok.’ (Gawa 7:39-41) Pinakiwas nen Pablo iray Kristiano a ‘gawaen day anggaay nayarian da ya ag-aligen so insumlang’ na saray Israelita a tinmakot ya onloob ed Insipan a Dalin.—Heb. 4:3, 11, Maung a Balita.
12. Panon a naaralan nen Jesus so katutulok, tan antoy tumang ed sikato?
12 Kakaukolanen na iyaligwas ed inkatatken so panggaway anggaay nayarian tayon tuloken si Jehova. Unong ed alimbawa nen Jesu-Kristo, kaslakan lan naaral tayoy katutulok diad saray itetepel tayon irap. (Basaen so Hebreos 5:8, 9.) Antis a linma ed dalin si Jesus, sikato lay matulok ed Ama to. Balet pian nagawaan to so linawa nen Ama to legan a sikatoy wadia ed dalin, kaukolan a sagmaken toy panirap ed laman tan pakagonigon na nonot. Diad intulok nen Jesus anggan diad agaylan irap a kipapasen, sikatoy “agawa ya ayadyari” diad ontan et makanepegan ed balon posisyon ya intalaga na Dios parad sikato, salanti, say pagmaliw ya Ari tan Atagey a Saserdote.
13. Antoy pakapatnagan a naaral tayo lay ontulok?
13 Sikatayo met balet ey? Kasin determinado tayon tuloken si Jehova anggan sano walaray ambelat a problema tayo? (Basaen so 1 Pedro 1:6, 7.) Malinlinew so simbawa na Dios nipaakar ed moral, inkamatua, panagsalita, personal a panagbasa tan panagaral na Biblia, iyaatendi ed saray Kristianon pantitipon, tan pibibiang ed panagpulong. (Jos. 1:8; Mat. 28:19, 20; Efe. 4:25, 28, 29; 5:3-5; Heb. 10:24, 25) Kasin matulok itayo ed si Jehova ed saratan a pamaakaran anggan sano naproproblema itayo? Say katutulok tayo et pakapatnagan a tinmakken itayo la’d espiritual.
Akin a Makagunggona so Inkatatken ed Espiritual?
14. Panon a say iyaaligwas ed inkatatken et sakey a proteksion? Mangiter na alimbawa.
14 Diad sayan mundo ya “anggapo lan balot so kababaingan” na totoo, talagan proteksion parad sakey a Kristiano so pakawalaay pakatebek a dugay inkipasal to pian nibiig so maong tan mauges. (Efe. 4:19, MB) Alaen pan alimbawa si James, sakey ya agin regular a manbabasa tan mamapabli ed saray publikasyon tayo. Inawat to so trabaho a puros bibii so katrabaho to. Oniay inkuan nen James: “Anggaman kaslakan ed saray katrabahoan ko et abebay moral da, walay sakey ed sikaran singa masimpit met tan interesado ni ingen ed Biblia. Balet, sanen nibanan bukbukor mi ed opisina, bigla met lan nagmaliw a makarinyo. Say abaloan ko et manlulurey labat, balet ta agko met la napatunda. Diad saman a bekta et anonotan ko imay eksperiensyan abasak ed Say Panag-Bantayan nipaakar ed sakey ya agin tinukso met ed lugar na trabaho to. Inusar na satan ya artikulo so salaysay nipaakar ed si Jose tan asawa nen Potifar.c Intulak kon tampol imay bii, tan sikatoy binmatik.” (Gen. 39:7-12) Misalsalamat si James ya anggapo lay arum ya agawa tan apansiansia ton malinis so konsiensia to.—1 Tim. 1:5.
15. Panon a say iyaaligwas ed inkatatken et pabiskegen toy puso tayo?
15 Say inkatatken ed espiritual et makagunggona met lapud napabiskeg na satan so puso tayo tan ag-itayo naibalang na “saray nambabangil a bangat.” (Basaen so Hebreos 13:9.) Sano pampepelengan tayoy onaligwas ed espiritual, niyapasakey tayoy nonot tayo ed saray “mas importantin bengatla.” (Fil. 1:9, 10, NW) Sirin et lalon onaralem so apresasyon tayo ed Dios tan ed amin ya inter ton pakagunggonaan tayo. (Roma 3:24) No say sakey a Kristiano et ‘matatken ed isip,’ nabayuboan toy ontan a panangapresya tan onelet so pikakaaro to ed si Jehova.—1 Cor. 14:20.
16. Antoy akatulong ed sakey ya agin bii pian ‘ombiskeg so linawa’ to?
16 Inaksobi na sakey ya agin bii a manngaran na Louise a sanen sikatoy abautismoan, say pampapagaan ton maong et no antoy panmoria na arum a too ed sikato. Oniay inkuan to: “Anggapo met so gagawaen kon mauges, balet ta singa matabtabang so pilalek kon panlingkoray Jehova. Amoriak a kaukolan koy manguman pian nagawaan koy anggaay nayarian kon sikatoy lingkoran. Say sankabalgan a pananguman a ginawak et say pandayew ko’d sikato ya interon puso.” Diad impansagpot nen Louise, ‘binmiskeg so linawa’ odino puso to tan satan so akatulong sanen sikatoy nansakit na grabe. (Sant. 5:8, MB) “Nanirap ak a maong, balet ta mas inmapit ak ed si Jehova,” so inkuan to.
‘Magmaliw a Maunor Manlapud Puso’
17. Akin et nagkalalo lan importante so katutulok nen inmunan siglo?
17 Say simbawa nen Pablo ya ‘onaligwas ed inkatatken’ so akatulong pian niliktar iray inmunan siglon Kristiano a taga Jerusalem tan Judea. Saramay angunor ed satan et walaay espiritual a pakatebek, kanian abidbir da imay tanda ya inter nen Jesus tan ‘binmabatik ira ed kapalandeyan.’ Sanen anengneng da so ‘makapadimlan bengatla a manal-alagey ed masanto a pasen,’ salanti, say armada na Roma a ngalngali la makaloob ed Jerusalem, amta ran panaon la iman pian ontakas ira. (Mat. 24:15, 16) Lapud dinengel na saray Kristiano so pasakbay nen Jesus, tinaynan day Jerusalem antis itan a naderal. Tan unong ed historyador a si Eusebius, nanayam la ra’d syudad na Pella diad kapalandeyan a rehyon na Gilead. Diad ontan et aliktaran day sankagrabian a desyang ya agawa ed Jerusalem.
18, 19. (a) Akin ya importante so katutulok natan? (b) Anto so aralen ed onsublay ya artikulo?
18 Ontan met natan, say katutulok tayo a resulta na itatatken ed espiritual so mangiliktar ed sikatayo sano nagawa la so kaunoran a kasumpalan na propesiya nen Jesus a “baleg ya irap” ya agnin balot agawa anggan kapigan. (Mat. 24:21) Kasin magmaliw itayo met a matulok ed anggan anton ganggan a manlalapud “managpaga a napanmatalkan”? (Luc. 12:42) Im-importante sirin ya aralen tayoy ‘magmaliw a maunor manlapud puso’!—Roma 6:17.
19 Pian ontatken tayo ed espiritual, kaukolan ya ipasal tayoy pakatebek tayo. Nagawaan tayo iya no pansagpotan tayon kabisadoen so Salita na Dios tan no aralen tayoy katutulok. Lalo lan mairap parad saray kalangweran so manpatatken ed espiritual. Aralen tayo’d onsublay ya artikulo no panon iran ontalona.
[Saray paimano ed leksab]
a Hebreos 5:14 (NW): “Balet say anawet a tagano et parad saray totoon matatken, diad saramay lapud panangusar et nipasal so pakayari ran ontebek pian nibiig so maong tan mauges.”
b Sinalatan so arum a kangaranan.
c Nengnengen so artikulo ya apauloan na “Apabiskeg ya Ag-onabuloy ed Gawan Mauges,” na Oktubre 1, 1999, ya isyu na Say Panag-Bantayan.
Antoy Naaralan Mo?
• Anto so inkatatken ed espiritual, tan panon tayon nadampot itan?
• Antoy nagawaan na pikabisado ed Salita na Dios pian onaligwas itayo’d espiritual?
• Panon tayon naaralan so katutulok?
• Panon itayon nagunggonaan na inkatatken ed espiritual?
[Litrato ed pahina 10]
Sano walaray problema, nipanengneng tayoy inkatatken ed espiritual no iyaplika tayo iray simbawa na Biblia
[Litrato ed pahina 12, 13]
Say impangunor na saray Kristiano nensaman ed simbawa nen Jesus so angiliktar ed sikara