“Komon ta Usaren na Mambabasa so Pakatebek”

“Sano nanengneng yo so makapadimlan bengatla a sengegay pankibalatar . . . ya akaalagey ed sakey a masanton pasen, . . . saman la saramay wala ed Judea et ombatik ira komon ed kapalandeyan.”​—MATEO 24:15, 16, NW.

1. Anto so walan nansumpalan na impasakbay nen Jesus a naromog ed Lucas 19:43, 44?

MAKATULONG ed sikatayo so pakaalertoan ed manasingger lan desyang pian makapaliis ed satan. (Uliran 22:3) Kanian isipen pa so kipapasen na saray Kristiano ed Jerusalem kayari inyataki na saray Romano nen 66 K.P. Impasakbay la nen Jesus a satan a syudad so naliktob tan naderal. (Lucas 19:43, 44) Sikatoy imbaliwala na maslak iran Judio. Balet ta saray babangatan to so tinmalineng ed pasakbay to. Bilang resulta, sikaray nilaban manlapud desyang nen 70 K.P.

2, 3. Akin a kaukolan tayon paninteresan so propesiya nen Jesus a nikurit ed Mateo 24:15-21?

² Diad sakey a propesiyan walaay kabaliksan to ed sikatayo natan, indatak nen Jesus so tugyop na tanda ya angilaktip ed saray bakal, kakisiran na tagano, yegyeg, salot, tan panamasegsegang ed saray Kristianon mangipupulong ed Panarian na Dios. (Mateo 24:4-14; Lucas 21:10-19) Angiter met si Jesus na pakabidbiran a makatulong ed saray babangatan to pian naamtaan dan say anggaan et asingger la​—sakey a ‘makapadimlan bengatla a sengegay pankibalatar ya akaalagey ed sakey a masanton pasen.’ (Mateo 24:15) Usisaen tayo lamet iratan a makabaliksan a salita ta pian natalosan tayo no panon a naapektoan so kabibilay tayo natan tan ed arapen.

³ Kayari na impangidalatdat to’d tanda, inkuan nen Jesus: “Sano nanengneng yo so makapadimlan bengatla a sengegay pankibalatar, unong na sinalita nen Daniel a propeta, ya akaalagey ed sakey a masanton pasen (komon ta usaren na mambabasa so pakatebek), saman la saramay wala ed Judea et ombatik ira komon ed kapalandeyan. Say wala ed toktok na abung et agla komon onlasor pian mangalay bengabengatlan wala ed abung to; tan say wala ed kaumaan et agla komon ompawil ed abung pian mangala na pankulibemben to. Pakaskasi laray malukon tan saramay manpapasuso na ugaw ed saratan ya agew! Mantultuloy a manpikasi ta pian say ibatik yo et agnagawa ed panaon ya ambetel, nisay ed agew na sabaton; ta wala naani so baleg a kairapan, ya agni agawa nanlapula’d gapo na mundo.”​—Mateo 24:15-21, NW.

4. Anto so mangipabitar a walaan na kasumpalan so Mateo 24:15 nen inmunan-siglo?

⁴ Itatarya na saray salaysay na Marcos tan Lucas so kaaruman niran detalyi. No nausar ed Mateo so “akaalagey ed sakey a masanton pasen,” ibabaga na Marcos 13:14 a “manalalagey ed agto kanepegan.” Inyarum na Lucas 21:20 iray salita nen Jesus: “Sano nanengneng yo so Jerusalem a niliktob na saray ehersito, saman la amtaen yo a say kabagbag to asingger la.” Ontulong iya ed sikatayo pian natalosan so unonan kasumpalan ya anaglawi ed inlusob na saray Romano diad Jerusalem tan say templo to​—pasen a masanto parad saray Judio balet ta aliwa lan masanton pasen parad si Jehova​—a ginmapo nen 66 K.P. Agawa so kompleton pankibalatar sanen dineral na saray Romano so syudad tan say templo nen 70 K.P. Anto so “makapadimlan bengatla” nensaman? Tan panon itan ya ‘inmalagey ed sakey a masanton pasen’? Saray ebat ed sarayan tepet so mamalinew ed modernon-agew a kasumpalan.

5, 6. (a) Akin a nakaukolan na saray mambabasa na Daniel kapitulo 9 so pakatebek? (b) Panon ya asumpal so propesiya nen Jesus nipaakar ed “makapadimlan bengatla”?

⁵ Pinaseseg nen Jesus iray mambabasa ya usaren day pakatebek. Mambabasa ed anto? Nayarin saramay mambabasa ed Daniel kapitulo 9. Ditan et naromog tayo so sakey a propesiyan mangipapabitar no kapigan so ipatnag na Mesias tan mangipapasakbay a sikato so “naekal” kayari talora tan kapalduan taon. Ibabaga na propesiya: “Ed tapew na kadimlaan [“makapadimlan bengabengatla,” NW] onsabi naani so sakey a manggawa na pankibalatar: Et angga lanlamang ed ayadyari a kasampotan, tan satan ya inggeter, nikalbo naani so sanok ed tapew na mankibalatar.”​—Daniel 9:26, 27; nengnengen met so Daniel 11:31; 12:11.

⁶ Inisip na saray Judio ya inmaplika iya ed panamabanday nen Antiochus IV ed templo manga 200 taon ed asasakbay. Balet, duma so impabitar nen Jesus, a mangipapaseseg na pakatebek lapud “say makapadimlan bengatla” so ompatnag tan onalagey ni labat ed “sakey a masanton pasen.” Malinew a tutukoyen nen Jesus so Romanon armada ya onsabi ed 66 K.P. a walaan na saray nikadkaduman bandera. Saratan a bandera, ya abayaglan uusaren, et mangipapabitar na taltalintao kanian makapadimla iratan ed saray Judio.a Balet, kapigan so ‘iyalagey da ed masanton pasen’? Agawa itan sanen nilusob na Romanon armada, ya awit-awit daray bandera ra, so Jerusalem tan say templo to, ya impasen na saray Judio bilang masanto. Ginapoan ni ingen na saray Romano a bungawen so bakor na sular na templo. Peteg, say abayaglan makapadimlan bengatla so inmalagey la ed saman diad sakey a masanton pasen!​—Isaias 52:1; Mateo 4:5; 27:53; Gawa 6:13.

Say Modernon-Agew a “Makapadimlan Bengatla”

7. Anton propesiya nen Jesus so nasusumpal ed panaon tayo?

⁷ Nanlapula’d Guerra Mundial I, anengneng tayo la so babaleg a kasumpalan na tanda nen Jesus a nikurit ed Mateo kapitulo 24. Ingen, tandaan iray salita to: “Sano nanengneng yo so makapadimlan bengatla a sengegay pankibalatar . . . ya akaalagey ed sakey a masanton pasen, . . . saman la saramay wala ed Judea et ombatik ira komon ed kapalandeyan.” (Mateo 24:15, 16, NW) Sayan aspekto na propesiya so maseguron walaan met na kasumpalan ed panaon tayo.

8. Diad dakel lan taon, panon so impakabidbir na Tastasi nen Jehova ed “makapadimlan bengatla” ed moderno iran panaon?

⁸ Diad pangipapanengneng ed panmamatalek na saray lingkor nen Jehova a nasumpal iyan propesiya, say The Watchtower na Enero 1, 1921, so angiyapasakey ed satan a misiglaotan ed saray agawa ed Pegley Bukig. Diad sinmaginonor, diad Disyembre 15, 1929 a paway, diad pahina 374, pihon inkuan na The Watchtower: “Say sigpot a tendensia na Liga na Nasyones et say pamabeneg ed totoo manlapud Dios tan ed Kristo, tan satan sirin so bengatlan pankibalataran, say gawa nen Satanas, tan sakey a makapagulgula ed imaton na Dios.” Kanian nen 1919 pinmatnag so “makapadimlan bengatla.” Sinmabi panaon, say Nasyones Unidas so sinmalat ed Liga. Abayag lan inwalwal na Tastasi nen Jehova irayan organisasyon na too nipaakar ed kareenan bilang makapadimla ed imaton na Dios.

9, 10. Panon a makaimpluensia ed panmoria tayo so akadkaunan pakatalos ed baleg a kairapan nipaakar ed panaon sano onalagey so “makapadimlan bengatla” ed sakey a masanton pasen?

⁹ Sinegek na akadkaunan artikulo so apalinew a panmoria ed dakel a punto diad Mateo kapitulo 24 tan 25. Kasin matukoy met so pigaran panamalinew ed ‘makapadimlan bengatla ya akaalagey ed sakey a masanton pasen’? Mapatnag ya ontan. Maapit ya insiglaot na propesiya nen Jesus so “akaalagey ed sakey a masanton pasen” ed say ibetag na baleg ya “irap.” Kanian, anggano abayag lan niwala so “makapadimlan bengatla,” say siglaotan na “akaalagey ed sakey a masanton pasen” tan say baleg a kairapan so nepeg a mangapekta ed panag-isip tayo. Panon?

¹⁰ Say atalosan nensaman na totoo na Dios et ginmapo la so unonan kabiangan na baleg a kairapan nen 1914 tan say unor a kabiangan so nagawa diad bakal na Armagedon. (Apocalipsis 16:14, 16; ikompara so The Watchtower, Abril 1, 1939, pahina 110.) Kanian, natalosan tayo no akin ya inisip nensaman a say kaplesan a “makapadimlan bengatla” so talagan inmalagey la ed sakey a masanton pasen kayarin tuloy na Guerra Mundial I.

11, 12. Nen 1969, anto so niparungtal a nauman a panmoria nipaakar ed baleg a kairapan?

¹¹ Balet, diad sinmaginonor iran taon et dinmumay pakatalos tayo ed saray bengatla. Diad Huebes, Hulyo 10, 1969, ed “Peace on Earth” ya Internasyonal ya Asamblea diad New York City, makapasagsagyat a nampaliwawa si F. W. Franz, bise-presidenti ed saman na Watchtower Bible and Tract Society. Diad panrerepaso ed akadkaunan impakatalos ed propesiya nen Jesus, oniay inkuan nen Brother Franz: “Nipaliwawan say ‘baleg a kairapan’ so ginmapo la nen 1914 K.P. tan ag-itan naabuloyan a nasumpal ed saman noagta pinatunda na Dios so Guerra Mundial I nen Nobyembre na 1918. Manlapulad saman a manpatuloy inyabuloy na Dios so panat na panaon parad kimey na saray nilanaan ton nakdaan a kompuestoen na apilin Kristiano sakbay ton abuloyan a nagawa so unor lan kabiangan na ‘baleg a kairapan’ diad bakal na Armagedon.”

¹² Insan nipresenta so makabkabaliksan a nauman ya eksplinasyon: “Pian mipetekan ed saray ebento nen inmunan siglo, . . . agginmapo so antitipikon ‘baleg a kairapan’ nen 1914 K.P. Imbes, say agawa ed iyaaliling na Jerusalem ed modernon panaon nen 1914-1918 so ‘gapoan [lambengat] na ot-ot na gonigon’ . . . Say ‘baleg a kairapan’ ya agla nagawa lamet so wala ni’d arapen, ta mankabaliksan itan na kaderal na sankamundoan ya empiryo na palson relihyon (a mangilaktip ed Kakristianoan) a tumbokan na say ‘bakal na baleg ya agew na Dios a Makapanyarin-amin’ diad Armagedon. Kabaliksan na saya a say intiron baleg a kairapan so wala ni’d arapen.

13. Akin a makatunongan a nibagan wala so arapen ya ‘iyalagey [na makapadimlan bengatla] ed sakey a masanton pasen’?

¹³ Walaan iya na direktan pisiglaotan ed pakatebek no kapigan so iyalagey na “makapadimlan bengatla” ed sakey a masanton pasen. Nonoten pay agawa nen inmunan siglo. Inataki na saray Romano so Jerusalem nen 66 K.P., balet ta bigbigla iran inmatras, ya angiyabuloy ed Kristianon “laman” a nilaban. (Mateo 24:22) Mitunosan ed satan, iilaloan tayo ya agla manbayag et onggapo lay baleg a kairapan, balet ta napatikeyan itan nisesengeg ed saray pinili na Dios. Imanoen iyan importantin punto: Diad kadaanan a padron, ‘say makapadimlan bengatla ya akaalagey ed masanton pasen’ so nisiglaot ed impangataki na Roma ya indauloan nen Heneral Gallus nen 66 K.P. Say modernon-agew a piparaan na satan ya impangataki​—say ibetag na baleg a kairapan​—so dia ni’d arapen. Kanian ‘say makapadimlan bengatla a sengegay pankibalatar,’ a niwala la nanlapula’d 1919, so mabitabitar ya onalagey ni labat ed sakey a masanton pasen.b Panon iyan nagawa? Tan panon itayon naapektoan?

Sakey ya Iyaataki ed Arapen

14, 15. Panon a makatulong ed sikatayo so Apocalipsis kapitulo 17 pian natalosan iray ebento a mansumpal ed Armagedon?

¹⁴ Dedeskribien na libro na Apocalipsis so makadesyang a pangataki ed palson relihyon diad arapen. Indatak na kapitulo 17 so pangukom na Dios ed “Babilonia a Baleg, ina na saray balangkantis”​—say sankamundoan ya empiryo na palson relihyon. Say Kakristianoan so walaay manunan betang tan ibabaga ton sikatoy walaay sipanan a pisisiglaotan ed Dios. (Ikompara so Jeremias 7:4.) Saray palson relihyon, a laktip lay Kakristianoan, so abayag lan walaay agmanepeg a pirerelasyonan ed “saray arari ed dalin,” balet ta manampot itan diad pankibalatar na saratan a relihyon. (Apocalipsis 17:2, 5) Pankibalataren na siopa?

¹⁵ Ililitrato na Apocalipsis so “sakey ya ayep ya ambalanga” a niwala ed sakey a panaon, naandi, insan ompawil. (Apocalipsis 17:3, 8) Sayan ayep so susuportaan na saray manuley ed mundo. Saray detalyin intarya na propesiya so ontulong ed sikatayo pian nabidbir iyan simbolikon ayep a sakey ya organisasyon nipaakar ed kareenan a niwala nen 1919 bilang say Liga na Nasyones (sakey a “makapadimlan bengatla”) tan natan et satan so Nasyones Unidas. Ipapanengneng na Apocalipsis 17:16, 17 ya iyan ni labat itan na Dios ed kapusoan na pigaran toon manuley a prominentin kabiangan na sayan “ayep” pian pankibalataren so sankamundoan ya empiryo na palson relihyon. Satan a panangataki so mananda ed ibetag na baleg a kairapan.

16. Antoran makatantandan ebento so nagagawa la nipaakar ed relihyon?

¹⁶ Lapud say igapo na baleg a kairapan et wala ni’d arapen, kasin say ‘iyalagey ed sakey a masanton pasen’ so siansia nin walad arapen tayo? Mapatnag ya ontan. Anggaman pinmatnag so “makapadimlan bengatla” ed kasakbayan na sayan siglo tan sirin et niwala ed loob na saray dekada, diad asingger lan arapen et onalagey itan “ed sakey a masanton pasen” diad nikadkaduman dalan. No panon a nambantay a maong iray inmunan-siglon Kristiano pian nanengneng da no panon a nagawa so ‘iyalagey ed sakey a masanton pasen,’ ontan met iray Kristiano natan. Tua a talaranan tayo ni so aktual a kasumpalan pian naamtaan tayo so amin a detalyi. Ingen, makatantanda a diad pigaran dalin et wala lay naiimano tan ompapalalon panggula ed relihyon. Say arum iran mapolitikan elemento, ya akikomplotan na dati iran Kristiano a sinmuawi manlapud tuan pananisia, so mangiyaalibansay isusumpa ed relihyon diad inkalapagan tan nagkalautla ed saray tuan Kristiano. (Salmo 94:20, 21; 1 Timoteo 6:20, 21) Kanian, anggan natan la et saray mapolitikan pakayari so ‘mibabakal la sumpad Kordero,’ tan singa ipapabitar na Apocalipsis 17:14, ompalalo itan a panlalaban. Anggaman agda literal a nadegkem so Kordero na Dios​—si Jesu-Kristo a wala la’d nitandoro tan niglorian kipapasen to​—lalo ran ipangget so isusumpa ra ed saray tuan managdayew ed Dios, nagkalautla ed “sasanto” to. (Daniel 7:25; ikompara so Roma 8:27; Colosas 1:2; Apocalipsis 12:17.) Walaan itayoy panamaseguro na Dios a say Kordero tan saramay walad dapag to so manbiktorya.​—Apocalipsis 19:11-21.

17. Aliwan say pagmaliw a dogmatiko, anto so nayarin nikuan tayo nipaakar ed no panon so iyalagey na “makapadimlan bengatla” ed sakey a masanton pasen?

¹⁷ Amta tayon walay pankibalatar a manatalaran ed palson relihyon. Say Babilonia a Baleg so “abuanges ed dala na saray sasantos” tan inmakto bilang reyna, balet ta segurado lay kaderal to. Say marutak a pangiimpluensia to ed saray arari ed dalin so biglan manguman lapud satan a relasyon so magmaliw a maramsak a panggula ed biang na say ‘samploran saklor tan say atap ya ayep.’ (Apocalipsis 17:6, 16; 18:7, 8) Sano atakien na “ayep ya ambalanga” so relihyoson balangkantis, makapasesgan onalagey so “makapadimlan bengatla” diad tatawagen na Kakristianoan a masanton pasen.c Kanian onggapo so pankibalatar ed andiay-pananisian Kakristianoan, ya ililitrato toy inkasikato bilang masanto.

“Ombatik”​—Panon?

18, 19. Antoran rason so niiter a mangipanengneng a say ‘ibatik diad saray palandey’ so agmankabaliksan na panguman na relihyon?

¹⁸ Kayari ton impasakbay so ‘iyalagey na makapadimlan bengatla ed masanton pasen,’ pinasakbayan nen Jesus iray walaay pakatebek ya onkiwas ira. Labay to kasin ibaga a diad unor lan pankanawnawa​—sano “say makapadimlan bengatla” so “akaalagey ed sakey a masanton pasen”​—dakel a totoo so manaynan ed palson relihyon tan onkamang ed tuan panagdayew? Andin balot. Konsideraen pay inmunan kasumpalan. Inkuan nen Jesus: “Saray wala ed Judea ombatik ira angga ed saray palandey: Tan say wala ed toktok na abung ag-onlasor, ono onloob, a mangala na anggan anto ed abung to: Tan say wala ed uma agkomon ompawil a mangala na kulibemben to. Balet kasi la so saray mamalukon tan saray manpapasuso ed saratan ya agew! Et mikasi kayo ya agnagawa komon dia ed panaon na betel.”​—Marcos 13:14-18.

¹⁹ Ag-imbaga nen Jesus a saraman lambengat so walad Jerusalem so nakaukolan ya ontaynan, a singano say punto to et nakaukolan day onekal manlapud pasen na Judion panagdayew; nisay sinalambit to ed pasakbay to so panguman na relihyon​—ya ontaynan manlapud palso tan onkamang ed tua. Maseguron agla nakaukolan na saray babangatan nen Jesus so pasakbay nipaakar ed itaynan manlapud nanduruman relihyon; nagmaliw la iran tuan Kristiano. Tan say inyataki nen 66 K.P. so ag-amakiwas ed saray mangaagamil na Judaismo ed Jerusalem tan diad intiron Judea a mangitalirak ed satan a relihyon tan awaten day Inkakristiano. Imbaga nen Propesor Heinrich Graetz a saramay inmusil ed saray ombabatik a Romano so pinmawil ed syudad: “Saray Zealot, a mangikekelyaw na malikeliket a kanta ed bakal, so pinmawil ed Jerusalem (koma-8 na Oktubre), a manpatok iray kapusoan da tekep na magayagan ilalo na kibulos tan kawayangan. . . . Agta sikaray mapangasin tinulongan na Dios a singa impanulong To’d saray inmuunan atateng da? Ag-antakot iray Zealot ed no anto so nagawa ed arapen.”

20. Panon so inkiwas na inmuunan babangatan ed impasakbay nen Jesus ya ombatik ira ed kapalandeyan?

²⁰ Panon, sirin so inkiwas na saray dagdaiset ya apili nensaman ed bilin nen Jesus? Diad impanaynan ed Judea tan imbatik ed kapalandeyan diad basil na Jordan, impanengneng dan ag-ira kabiangan na Judion sistema, diad politika man odino relihyon. Tinaynan daray kaumaan tan kaabungan da, ya aglara anggan akapangibalkot na kaykayarian da ed kaabungan da. Lapud matalek ed proteksion tan suporta nen Jehova, inyuna ray panagdayew ed sikato nen say antokaman a bengatlan nayarin ompatnag ya importanti.​—Marcos 10:29, 30; Lucas 9:57-62.

21. Anton pansumpalan so agtayo nakaukolan ya ilaloan sano onataki so “makapadimlan bengatla”?

²¹ Konsideraen pa natan so babaleg a kasumpalan. Dekadekada lan papasesegen tayo so totoo ya ompaway ed palson relihyon tan onkamang ed tuan panagdayew. (Apocalipsis 18:4, 5) Ontan so ginawa la na minilyon. Ag-ipapabitar na propesiya nen Jesus a no binmetag lay baleg a kairapan et onkamang so karaklan ed puron panagdayew; maseguron anggapo so lapag ya inkakomberti na saray Judio nen 66 K.P. Ingen, saray tuan Kristiano so nawalaan na pirmin pakakiwasan dan mangiyaplika ed pasakbay nen Jesus tan ontaynan ira.

22. Anto so nayarin lalanoren na pangiyaplika ed bilin nen Jesus nipaakar ed ibatik ed kapalandeyan?

²² Diad kaplesan, agtayo nayarin nawalaan na kompleton detalyi nipaakar ed baleg a kairapan, balet makatunongan a nikuan tayo a parad sikatayo say itataynan a sinaglawi nen Jesus et aliwan nipaakar ed lugar. Say totoo na Dios so wala la’d intiron globo, diad amin lawarin sukong. Balet, makapanseguro itayo a no kapilitan so itataynan, saray Kristiano so mantultuloy a manmantini ed mabitar a pangibiig da’d inkasikaran dili manlapud palso iran relihyoson organisasyon. Makabaliksan met so impasakbay nen Jesus nipaakar ed agla ipawil ed abung a mangalay kawes odino arum nin bengabengatla. (Mateo 24:17, 18) Kanian nayarin walaray subok ed arapen nipaakar ed no panon tayon moriaen iray materyal a bengatla; kasin sankaimportantian iratan a bengatla, odino kasin say kilalaban a nagamoran na amin a walad dapag na Dios so lalon importanti? On, say itataynan tayo so mangilalanor ed pigaran panirap tan pakaandian. Kaukolan ya akaparaan tayon gawaen so antokaman a nakaukolan, a singa ed saray piul-ulibayan tayo nen inmunan-siglo a binmatik manlapud Judea ya inmarap ed Perea, diad basil na Jordan.

23, 24. (a) Iner so pakaromogan tayo lambengat na proteksion? (b) Anto so nepeg ya epekto ed sikatayo na pasakbay nen Jesus nipaakar ed ‘makapadimlan bengatla ya akaalagey ed sakey a masanton pasen’?

²³ Nepeg tayon seguroen a say tuloytuloy pansalimbengan tayo et si Jehova tan ed say singa palandey ya organisasyon to. (2 Samuel 22:2, 3; Salmo 18:2; Daniel 2:35, 44) Ditan so pakaromogan tayoy proteksion! Agtayo aligen so karaklan na katooan ya ombatik ed saray “ungib” tan onamot ed “utel na saray batobato na saray palandey”​—saray organisasyon tan institusyon na too a mansiansia labat ed loob na antiktikey a panaon kayari na pankibalatar na Babilonia a Baleg. (Apocalipsis 6:15; 18:9-11) Tua, lalon onirap so panaon​—a singa nen 66 K.P. parad saray malukon a tinmaynan ed Judea odino siopaman a kaukolan a manbiahe ed panaon ya ambetel tan nepnep. Balet makaseguro itayon pagmaliwen na Dios a posibli so kililiktar. Komon ta lalon pabiskegen tayo so panagmatalek tayo ed si Jehova tan ed Anak to, a manuuley la natan bilang Ari na Panarian.

²⁴ Anggapoy rason a manbilay itayon natatakot ed no anto so nagawa. Aglabay nen Jesus ya ontalaw iray babangatan to nensaman, tan agto labay ya ontakot tayo, balanglan natan odino ed saray agew ya onsabi. Pinasakbayan to itayo ta pian nipaaran tayo iray kapusoan tan kanonotan tayo. Tutal, agnadusa iray matulok a Kristianos sano ondapo so kaderal na palson relihyon tan say arum a kabiangan na sayan marelmeng a sistema. Sikara so manebek tan ontalineng ed pasakbay nipaakar ed ‘say makapadimlan bengatla ya akaalagey ed sakey a masanton pasen.’ Tan determinado iran onkiwas unong ed agnagiing a pananisia ra. Agtayon balot komon lilingwanan so insipan nen Jesus: “Say mansungdo ya angga ed kasampotan, sikato lanlamang so nilaban naani.”​—Marcos 13:13.

[Saray paimano ed leksab]

Kasin Natandaan Yo?

◻ Panon a pinmatnag a mismo so “makapadimlan bengatla a sengegay pankibalatar” nen inmunan-siglo?

◻ Akin a makatunongan ya isipen a say modernon-agew a “makapadimlan bengatla” so onalagey ed sakey a masanton pasen ed arapen a panaon?

◻ Anton panangataki na “makapadimlan bengatla” so nipasakbay ed Apocalipsis?

◻ Anton nengneng na ‘itataynan’ so kakaukolanen ni ed biang tayo?

[Litrato ed pahina 16]

Say Babilonia a Baleg so tinawag ya “ina na saray balangkantis”

[Litrato ed pahina 17]

Samay eskarlatan-kolor ya atap ya ayep diad Apocalipsis kapitulo 17 et samay “makapadimlan bengatla” a tinukoy nen Jesus

[Litrato ed pahina 18]

Makapadesyang ya atakien na eskarlatan-kolor ya atap ya ayep so relihyon