Tepetepet Manlapud Managbasa

“Say Panag-Bantayan” na Agosto 15, 1996, kuanto: “Say pinal a kabiangan na kairapan, say ‘laman’ a binmatik ed dapag nen Jehova so nisalba.” Isusuheri ta na satan a kayari na unonan kabiangan na baleg a kairapan et dakel a balo ni so ondapag ed Dios?

Aliwan ontan so punto.

Saray salita nen Jesus a naromog diad Mateo 24:22 so manunan nasumpal ed arapen diad kisalba manlapud inmunan kabiangan na onsasabin baleg a kairapan, say pangataki ed relihyon. Onia so inkuan na artikulo: “Tandaan a say ‘laman,’ nampara ed alanaan a nakdaan tan ed ‘baleg ya ulop,’ so naisalba la sano say Babilonia a Baleg so maples tan sigpot a nageba ed inmunan kabiangan na kairapan.”

Saratan a matoor so agniiyan ed kapeligroan sano onkiwas si Jesus tan say mangatatawen ya armada to diad pinal a kabiangan na kairapan. Balet siopara sirin so makaliktar ed satan a kabiangan na kairapan? Ipapanengneng na Apocalipsis 7:9, 14 a sakey a baleg ya ulop a walaan na mangaraldalin ya ilalo so makaliktar. Komusta balet iray alanaan na espiritu a Kristianos? Siningbat na “Tepetepet Manlapud Managbasa” ed The Watchtower na Agosto 15, 1990, no akin ya ag-itayo dogmatiko no kapigan awiten ed tawen iray nakdaan na alanaan. Kanian say agano nin artikulo (Agosto 15, 1996) so ag-amiho ed pamaakaran, inkalapagan a kinomentoan to: “Ontan met say pinal a kabiangan na kairapan, say ‘laman’ a binmatik ed dapag nen Jehova so nisalba.”

Nipaakar ed no kasin wala niray balo a makaaral na katuaan tan ondapag ed Dios kayari kagapo na baleg a kairapan, imanoen iray salita nen Jesus a nirekord diad Mateo 24:29-31. Kayari ibetag na kairapan, ompatnag so tanda ed Anak na too. Inkuan nen Jesus ya amin a tribu ed dalin et kabilen day inkasikara tan mantagleey. Anggapoy imbaga ton antokaman nipaakar ed totoon naliing lapud kipapasen, manbabawi, ondapag ed Dios, tan magmaliw a tuan babangatan.

Mipadpara, diad parabolo na saray karnero tan saray kanding, say Anak na too so ompatnag tan mangukom pian ibiig toray totoo basi’d ginawa odino agda ginawa ed apalabas. Anggapoy imbaga nen Jesus nipaakar totoo ya abayag lan mangipapanengneng na kinmanding ya awawey a biglan manpataoli tan magmaliw a singa karnero. Sikatoy onsabi pian mangukom a basi ed pinaneknekan la na totoon pagmaliwan.​—Mateo 25:31-46.

Balet, lamet, anggapoy rason a magmaliw itayon dogmatiko nipaakar ed sayan punto. Saray totoo na Dios, namparan say alanaan tan say baleg ya ulop, so makaamta ed kaukolan dan gawaen natan​—panpulong tan panggaway babangatan. (Mateo 28:19, 20; Marcos 13:10) Natan la so panaon parad sikatayo ya ipapusoy simbawa: “Diad pankikimey min nikasakey ed sikato pikasi mi ed sikayo met ya agyo awaten so grasya na Dios ed andi-kakanaan. Ta kuanto: ‘Dia ed makanan panaon dinengel ta ka, tan dia ed agew na panangilaban tinulongan ta ka.’ Nia! natan so makanan panaon. Nia! Natan so agew na panangilaban.”​—2 Corinto 6:1, 2.