Sakey a Panaon Pian Mansiansian Aliing
“Diad amin a nasyon kaukolan ya ipulong nin ununa so maong a balita. . . . Balet saman so nansungdo angga ed kasampotan sikato so nilaban.”—MARCOS 13:10, 13.
1. Akin a kaukolan tayo so mansungdo tan manpakpel?
NEPEG tayo so mansungdo—ed utel na sakey ya anggapoy pananisia tan pikewet a kailalakan! Nanlapulad 1914 sakey a kailalakan na totoo so onuuges, a singa ed agew nen Jesus. Tan natan say inkabulok so walad sankamundoan a laknab. Diad sayan “kaunoran iran agew,” say “maatap iran panaon a mairap a pidenegan” a deneskribe nen apostol Pablo so nasasagmak na katooan. ‘Say totoon marelmeng tan saray impostor so mantultuloy ya ompalalo manlapud mauges ed mas mauges.’ Malinlinew, “say interon mundo so walad pakayari na sakey a marelmeng,” si Satanas a Diablo, a natan et gagawaen toy kaunoran a sagpot ton deralen so dalin. Balet agnadidismaya! Walay onsabi a “baleg a kairapan” a mangitarok na permanentin pakainawaan ed amin a mangaaro na inkatunong.—2 Timoteo 3:1-5, 13; 1 Juan 5:19; Apocalipsis 7:14.
2. Panon a say propesiya so asumpal nen 1914?
2 Makapaliket, introno la natan nen Jehova so Katawan a Jesu-Kristo diad katawenan, bilang panangiparaan ed pamagit ed saray kabusol na katooan. (Apocalipsis 11:15) Singa ed inmunan insabi na Mesias, ontan met ed sayan siglo et nasusumpal so makapakelaw a propesiyan insulat nen Daniel. Diad Daniel 4:16, 17, 32, nibaga ed sikatayo so nipaakar ed itunda na makanepegan ya inkaari ed dalin ed loob na “pitoran panaon.” Diad babaleg a kasumpalan na saraya, sarayan pitoran panaon so kasimbang na pitoran Biblikon taon a 360 ‘iran agew’ so kada sakey, odino dagup na 2,520 a taon.a Saya so ginmapo nen 607 K.K.P., sanen ginatingatinan na Babilonia so panarian na Israel, angga nen 1914 K.P., say taon na inkitrono nen Jesus ed tawen bilang makanepegan ya Ari na katooan. Diad ontan et angangga so “aturon panaon na saray nasyon.” (Lucas 21:24) Balet inkaindan na nasyones so panpasakop ed onsasabin Mesianikon Panarian.—Salmo 2:1-6, 10-12; 110:1, 2.
3, 4. (a) Anton panangikompara so nayarin gawaen no nipaakar ed saray ebento ed inmunan-siglo tan ed saramay diad panaon tayo? (b) Antoran makabaliksan a tepet so nitepet?
3 Legan a manasingger so koma-70 simba na saray taon (29-36 K.P.), tan lamet legan a manasingger lay taon 1914, ilaloan na saray walaay takot ed Dios a totoo so isasabi na Mesias. Tan sinmabi met! Anggaman ontan, diad kada inkagawa, say paraan na ipapatnag to so miduma ed inilaloan da. Ontan met ed kada inkagawa, kayari na antikey a panaon, sakey a mauges a “kailalakan” so diad kaunoran et anagmak na kadederal unong ed madibinon ganggan.—Mateo 24:34.
4 Diad inmunan artikulo tayo, naimano tayo no panon ya anampot so marelmeng a Judion kailalakan ya amapatey ed si Jesus. Komusta met so managderal a kailalakan na katooan ya anggan natan et onsusumpa tan mangibabaliwala ed sikato? Kapigan ya ipakat so panangukom ed sayan andiay-pananisian kailalakan?
“Mansiansia Kayon Akabantay!”
5. (a) Diad anton makanan rason ya agtayo kaukolan ya amtaen so panaon na “agew tan oras” nen Jehova? (b) Unong ed si Marcos, diad panamegley na anton maabig a konseho a sinampotan nen Jesus so propesiya to?
5 Kayari impangipropesiya ed saray ebenton onsabi ed panaon na “baleg a kairapan,” inkuan ni nen Jesus: “Nipaakar ed satan ya agew tan oras et anggapoy siopaman a makaamta, anggan saray anghel ed katawenan nisay Anak, noagta say Ama lambengat.” (Mateo 24:3-36; Marcos 13:3-32) Agtayo kaukolan ya amtaen so eksakton panaon na saray ebento. Imbes, sikatayo so niyapasakey diad pagmaliw a mabantay, a bayuboan so mabiskeg a pananisia, tan mansiansian okupado ed serbisyo ed si Jehova—ya aliwan diad panagkalkula na petsa. Sinampotan nen Jesus so baleg a propesiya to diad impangibagan: “Mansiansian manimano, mansiansian aliing, ta agyo amta no kapigan so aturon panaon. . . . Mansiansia kayon akabantay . . . Say ikuanko ed sikayo so ikuanko ed amin, Mansiansia kayon akabantay.” (Marcos 13:33-37) Manisilib so kapeligroan diad kabilungetan na sayan mundo natan. Nepeg tayoy mansiansian aliing!—Roma 13:11-13.
6. (a) Diad anto so nepeg a pakakonektaan na pananisia tayo? (b) Panon tayon ‘bilangen iray agew tayo’? (c) Anto so manunan kabaliksan parad si Jesus na terminon “kailalakan”?
6 Agtayo lambengat nepeg a manimano ed saray impuyan a propesiya nipaakar ed sarayan pinal ya agew na marelmeng a sistema noagta nepeg tayon ipeket so pananisia tayo manuna ed mablin bagat nen Kristo Jesus tan ed makapakelkelaw iran sipan na Dios a nibase ditan. (Hebreos 6:17-19; 9:14; 1 Pedro 1:18, 19; 2 Pedro 1:16-19) Lapud magunaet a makanengneng ed anggaan na sayan mauges a sistema, no maminsan et saray totoo nen Jehova so mamapalbeng nipaakar ed panaon no kapigan so iterak na “baleg a kairapan,” ya ikokonekta ni ingen iya ed saray kalkulasyon no antoy dukey na bilay na sakey a kailalakan nanlapulad 1914. Anggaman ontan, sikatayo so “mangamor na puson walaay kakabatan,” aliwan diad panamegley na panagpalbeng no pigaran taon odino agew so tibukelen na sakey a kailalakan, noagta no panon tayon ‘bilangen iray agew tayo’ diad magayagan kirayewan nen Jehova. (Salmo 90:12) Imbes a mangitarok na totontonen parad pananukat na panaon, say terminon “kailalakan” unong ed impangusar nen Jesus so manunan manutukoy ed mankapanaonan a totoo na sakey a maawaran a peryodo, tekep na saray pakabidbiran ed sikara.b
7. Anto so insulat na sakey a propesor na awaran nipaakar ed “kailalakan na 1914,” tan panon a saya so mikonektaan ed propesiya nen Jesus?
7 Mitunosan ed asaglawi’d tagey, onia so insulat na propesor ed awaran a si Robert Wohl ed libro ton The Generation of 1914: “Say sakey a maawaran a kailalakan so aglimitado ed saray petsa . . . Aliwan sakey iman a sona na saray petsa.” Balet imbaga to a say Guerra Mundial I so amalesa na “sakey a nakalay-ilalon pantalos ya iyaarawi ed apalabas,” tan inkuanto ni: “Agnaekal ed kanonotan na saray akaliktar ed bakal a sakey a mundo so angangga tan sananey met so ginmapo nen Agosto 1914.” Agaylan tua itan! Idadanet na saya so pinagkasegek na pamaakaran. “Sayan kailalakan” na katooan nanlapulad 1914 so anagmak na makapataktakot iran pananguman. Anengneng na saya so dalin ya aleteb na dala na minilyon. Say panlalaban, palaspas a panagpatey, terorismo, krimen, tan kaugsan so onbebetag ed sankamundoan. Say eras, sakit, tan imoralidad so kinmayat ed globo tayo. Impropesiya nen Jesus: “Ontan yo met, sano nanengneng yo [saray babangatan to] irayan bengatlan nagagawa, amtaen yo a say panarian na Dios so asingger la. Tua kuan ko ed sikayo, Sayan kailalakan so ag-onlabas ed antokaman a paraan anggad kagawa na amin a bengatla.”—Lucas 21:31, 32.
8. Panon ya idadanet na saray propeta nen Jehova so pankaukolan na pansiansian aliing?
8 On, asingger lay sigpot ya itatalona na Mesianikon Panarian! No ontan, wala ta so antokaman a nagungguna ed pananap na saray petsa odino panagpalbeng nipaakar ed literal a dukey na bilay na sakey a “kailalakan”? Talagan anggapo! Malinlinew so ibabaga na Habakuk 2:3: “Say pasingawey et dia ni ed aturo a panaon, tan manaapura a mamaarap ed anggaan, tan agmantila. Anggaman napaleen, mantultuloy ya ilaloan itan; ta satan so seguradon onsabi. Agla manbayag.” Say agew na pikuekuentaan nen Jehova so lalo lan maples ya onsasabi.—Jeremias 25:31-33; Malaquias 4:1.
9. Antoran agawgawa nanlapulad 1914 so mangipapanengneng a say panaon et antikey la?
9 Sanen ginmapoy uley na Panarian nen Kristo nen 1914, si Satanas so nibasileng ed dalin. Kabaliksan na saya a “kasi la so dalin . . . lapud say Diablo so linmeksab la ed sikayo, a walaay baleg a sanok, ed impakaamtan antikey lay peryodo na panaon to.” (Apocalipsis 12:12) Satan a panaon so antikey, on, no ipareng ed nilibon taon a pananguley nen Satanas. Asingger la so Panarian, tan ontan met ed agew tan oras nen Jehova ed panangipakat na panangukom ed sayan marelmeng a kailalakan!—Uliran 3:25; 10:24, 25.
Say “Kailalakan” ya Onlalabas
10. Panon a “sayan kailalakan” so singa ed agew nen Noe?
10 Usisaen tayo pan maong so balikas nen Jesus ed Mateo 24:34, 35: “Tua kuan ko ed sikayo a sayan kailalakan so ag-onlabas ed antokaman a paraan anggad kagawa na amin na sarayan bengatla. Say tawen tan dalin so onlabas, balet saray salitak so aliwan diad antokaman a paraan et onlabas.” Ipapanengneng na onggendan iran salita nen Jesus ya ‘anggapoy siopaman a makaamta ed satan ya agew tan oras.’ Nagkalalo ed amin, ipapanengneng to a nepeg tayon paliisan iray kalot ya akapaliber ed sikatayo ed sayan kailalakan. Kanian imbaga ni nen Jesus: “Ta no panon a singa ed saray agew nen Noe, ontan met ed kiwawala na Anak na too. Lapud sikara ed saraman ya agew sakbay na delap, a mangakan tan uniinom, saray lalaki mangaasawa ira tan saray bibii so miaasawa, anggad agew a linmoob si Noe ed biong; tan ag-ira angimano anggad insabi na delap tan amunas ed sikaran amin, ontan met ed kiwawala na Anak na too.” (Mateo 24:36-39) Impareng dia nen Jesus so kailalakan ed agew to ed samay agew nen Noe.—Genesis 6:5, 9; paimano’d leksab [diad Ingles].
11. Anton panangikompara ed ‘saray kailalakan’ so ginawa nen Jesus, a singa inreport nen Mateo tan Lucas?
11 Aliwan saya so inmunan pankanawnawan nadngel na apostoles so impangikompara nen Jesus ed ‘saray kailalakan,’ ta pigaran agew ed asasakbay na saya et inkuanto nipaakar ed inkasikato: “Say Anak na too . . . so nepeg nin managmak na dakel a panirap tan ipulisay na sayan kailalakan. Niarum ni, no panon ya agawa ed saray agew nen Noe, ontan met ed saray agew na Anak na too.” (Lucas 17:24-26) Kanian, ontan met so panangikompara na Mateo kapitulo 24 tan Lucas kapitulo 17. Diad agew nen Noe “amin a laman [a] dineral na say kurang da ed dalin” tan aderal ed Delap so “sayan kailalakan.” Diad agew nen Jesus say apostatan Judion totoo ya angipulisay ed si Jesus et “sayan kailalakan.”—Genesis 6:11, 12; 7:1.
12, 13. (a) Anto natan so “sayan kailalakan” a nepeg ya onlabas? (b) Panon a tatalonaan na totoo nen Jehova natan iyan “pikelkel tan pikewet a kailalakan”?
12 Kanian, diad pinal a kasumpalan na propesiya nen Jesus natan, “sayan kailalakan” so malinew a manutukoy ed totoo ed dalin ya akanengneng na say tanda na kiwawala nen Kristo balet sinmaew a manguman ed saray dalan da. Misuniyan, sikatayo bilang babangatan nen Jesus so mangipupulisay ed kamoldi ed estiloy-kabibilay na “sayan kailalakan.” Anggaman wala tayo’d mundo, sikatayo so nepeg ya agkabiangan na satan, “ta asingger lay aturon panaon.” (Apocalipsis 1:3; Juan 17:16) Papasakbayan itayo nen apostol Pablo: “Mantultuloy yon gawaen ya amin a bengatlan bulos manlapud saray panmeremere tan saray argumento, pian sikayo so magmaliw ya andi-kabalawan tan inosente, ananak na Dios ya andi-dumsis ed limog na sakey a pikelkel tan pikewet a kailalakan, a diad limog da et onsisinag bilang silesilew ed mundo.”—Filipos 2:14, 15; Colosas 3:5-10; 1 Juan 2:15-17.
13 Aglambengat lalaktipen na ‘isisinag tayo bilang silesilew’ so panangipatnag na malinis a Kristianon personalidad noagta, nagkalalon importanti et say pananumpal ed mapropetikon asainmin nen Jesus: “Sayan maong a balita na panarian so ipulong ed amin ya atooan a dalin bilang pantasi ed amin a nasyon; tan diad ontan et onsabi so anggaan.” (Mateo 24:14) Anggapoy toon makapangibaga no kapigan itan ya anggaan, balet amta tayo a say anggaan na “sayan kailalakan” na marelmeng a totoo so onsabi bektan niiter lay pantasi unong ed kapenek na Dios “angga ed sankaarawian a parti na dalin.”—Gawa 1:8.
“Satan ya Agew tan Oras”
14. Anton simbawa so initer nen Jesus tan si Pablo no nipaakar ed “saray panaon tan panpanaon,” tan panon so ikiwas tayo?
14 Sano say sankamundoan a pantasi so nasumpal unong ed laknab a ginagala nen Jehova, satan so magmaliw ya “agew tan oras” to pian panganggaen la so sistema na mundo. Agtayo kaukolan a naamtaan nin unona so petsa. Diad ontan et bilang katutulok ed ehemplo nen Jesus, impasakbay nen apostol Pablo: “Natan no nipaakar ed saray panaon tan panpanaon, agagi, agyo kaukolan ya isulat ni antokaman ed sikayo. Ta sikayon mismo so makaamta a say agew nen Jehova so onsabi a kaparpara na sakey a matakew ed labi. Kapiganman ya ibabaga ran: ‘Kareenan tan kaligenan!’ insan biglan kadederal so onsabi ed sikara a singa pasakit na sakey a biin malukon; tan ag-ira ed antokaman a paraan et makataynan.” Imanoen so indanet nen Pablo: ‘Satan so sano ibabaga ra.’ On, sano pantotongtongan so “kareenan tan kaligenan,” no kapigan ya ag-iilaloan, say panangukom na Dios so biglan nipakat. Agaylan matukotukoy so simbawa nen Pablo: “Kanian, agtayo la nauugip a singa ed gagawaen na arum, noagta mansiansian aliing tan mansiansian malikas tayo”!—1 Tesalonica 5:1-3, 6; nengnengen met so bersikulo 7-11; Gawa 1:7.
15, 16. (a) Akin ya agtayo isipen a say Armagedon so arawi ni nen say sinisia tayo la? (b) Panon so nepeg a kitandoro na inkasoberano nen Jehova diad asingger ya arapen?
15 Kasin say nagkalalon pihon punto de bista tayo nipaakar ed “sayan kailalakan” so mankabaliksan a say Armagedon et mas arawi ni nen say abaloan tayo? Andin balot! Anggaman agtayon balot amta no kapigan so “agew tan oras,” lawas ya amta nen Jehova a Dios itan, tan ag-manguman. (Malaquias 3:6) Mapatnag, onlelereg lan onlelereg so mundo ed panaoy kadederal to. Say pankaukolan na pansiansian aliing so nagkalalon importanti nen kapiganman. Ipaparungtal la nen Jehova ed sikatayo so “saray bengatla a nepeg a magano lan nagawa,” tan kaukolan a sikatayo so onkiwas tekep na sigpot ya inkaganatan.—Apocalipsis 1:1; 11:18; 16:14, 16.
16 Legan a manasingger lay panaon, mansiansian aliing, ta paganigani lan itarok nen Jehova so kalamidad ed amin a sistema nen Satanas! (Jeremias 25:29-31) Kuan nen Jehova: “Maseguron itandorok so inkasiak tan pasantosen ko so inkasiak tan ipakabat ko so inkasiak ed arap na kamataan na dakel a nasyon; tan nakabatan da a siak si Jehova.” (Ezequiel 38:23) Satan a mapekder ya “agew nen Jehova” so manasingger la!—Joel 1:15; 2:1, 2; Amos 5:18-20; Sofonias 2:2, 3.
Say Matunong a “Balon Katawenan tan Sakey a Balon Dalin”
17, 18. (a) Unong ed si Jesus tan si Pedro, panon so ilabas na “sayan kailalakan”? (b) Akin a mansiansia tayon akabantay nipaakar ed kondukta tan saray gawa na maridios a debosyon?
17 Nipaakar ed ‘sarayan amin a bengatla a nepeg a nagawa’ inkuan nen Jesus: “Say tawen tan dalin so onlabas, balet saray salitak so aliwan diad antokaman a paraan et onlabas.” (Mateo 24:34, 35) Maseguron say walad kanonotan nen Jesus et say “tawen tan dalin”—saray manuley tan saray uuleyan—na “sayan kailalakan.” Inusar nen apostol Pedro so mipadpara iran salita diad panutukoy ed “katawenan tan say dalin a wala natan,” a “nitarya ed apuy tan nigana ed agew na panangukom tan ed kadederal na agmaridios a totoo.” Insan to dedeskribien no panon a say “agew nen Jehova so onsabi a singa sakey a matakew, a say [ginogobiernon] katawenan so onlabas” kaiba na say abulok a sosyedad na too, odino “dalin,” tan saray makasalanan a kimey to. Insan papasesegen itayo na apostol ed “masanto iran gawa na kondukta tan saray gawa na maridios a debosyon, [legan a sikatayo so] manatalaran tan mansiasiansian sinononot ed kiwawala na agew nen Jehova, a diad panamegley na satan et say napopoolan a katawenan so naupot tan saray elemento lapud manliub a petang so natunaw!” Anto so ontumbok? Ibaling nen Pedro so imano tayo ed ‘balon katawenan tan sakey a balon dalin a ditan et manayam so inkatunong.’—2 Pedro 3:7, 10-13.c
18 Saraman a “balon katawenan,” say Panarian ya uuleyan nen Kristo Jesus tan saray kaiba ton arari, so mangitarok na saray bendisyon ed matunong a “balon dalin” a sosyedad na katooan. Kasin sika so prospektibon membro na satan a sosyedad? No ontan, walaan ka na rason a manliket ed engranden arapen a nitatarya!—Isaias 65:17-19; Apocalipsis 21:1-5.
19. Anton baleg a pribilihyo so napanggagayagaan tayo la natan?
19 On, sakey a matunong a “kailalakan” na katoaan so natutugyop la natan. Natan say alanaan a “matoor tan makabat ya aripen” so mangitatarya na madibinon edukasyon a mitunosan ed saray salita na Salmo 78:1, 4: “Talineng ka, O totook, ed ganggan ko; ikiling mo so layag mo ed saray salita na sangik . . . , ya isalaysay iratan anggan ed onsabi nin kailalakan, saray dayew ed si Jehova tan say biskeg to tan makapakelaw toran bengatla a ginawgawa to la.” (Mateo 24:45-47) Nen Abril 14 na sayan taon, ed masulok a 75,500 a kongregasyon tan ed ag-onkulang a 230 daldalin, masulok a 12,000,000 totoo ed interon dalin so inmatendi ed Memoryal na impatey nen Kristo. Kasin sakey ka ed sikara? Isaral mo komon so pananisiam ed Kristo Jesus tan ‘ontawag ed ngaran nen Jehova parad kilalaban.’—Roma 10:10-13.
20. Lapud “say panaon a natitilak so pinatikeyan,” panon so pansiansia tayon aliing, tan tekep na anton panilalo?
20 “Say panaon a natitilak so pinatikeyan,” inkuan nen apostol Pablo. Panaon la sirin pian mansiansian naynay ya aliing tan okupado ed kimey nen Jehova, legan a susungdoan tayoray subok tan panamusol ya ipapakseb na marelmeng a kailalakan na katooan. (1 Corinto 7:29; Mateo 10:22; 24:13, 14) Mansiansia tayon akabantay, ya iimanoen so amin a bengatlan nipasakbay diad Biblia ya onsabi ed “sayan kailalakan.” (Lucas 21:31-33) Diad kiliktar ed amin na sarayan bengatla tan diad italindeg tekep na madibinon abobon ed arap na Anak na too, diad kaunoran et nayari tayon nagamoran so tumang ya andi-anggaan a bilay.
[Saray paimano ed leksab]
a Parad detalyadon impormasyon nipaakar ed “pitoran panaon,” nengnengen ed libron “Let Your Kingdom Come,” pahina 127-39, 186-9 ya impalapag na Watchtower Bible and Tract Society of New York, Inc.
b Nengnengen so Tomo 1, pahina 918, na Insight on the Scriptures, impalapag na Watchtower Bible and Tract Society of New York, Inc.
c Nengnengen so pahina 152-6 tan 180-1 na Our Incoming World Government—God’s Kingdom, ya impalapag na Watchtower Bible and Tract Society of New York, Inc.
Tepetepet Bilang Repaso:
◻ Walan naimano lay kasumpalan na Daniel 4:32, panon tayo natan a “mansiansian akabantay”?
◻ Panon ya ipapaamta na Saray Ebanghelyo nen Mateo tan Lucas so “sayan kailalakan”?
◻ Legan a tatalaranen tayo ‘itan ya agew tan oras,’ anto so naiimano tayo, tan panon so ikiwas tayo?
◻ Say panilalo ed matunong a “balon katawenan tan sakey a balon dalin” so mamaseseg ed sikatayon manggawa na anto?
[Saray litrato ed pahina 17]
Makainawa so maniirap a katooan sano sayan marawal tan marelmeng a kailalakan so onlabas la
[Credit Line]
Alexandra Boulat/Sipa Press
[Credit Line]
Kawigi tan leksab: Luc Delahaye/Sipa Press
[Litrato ed pahina 18]
Maglorian “balon katawenan tan sakey a balon dalin” so nabantag la parad amin a rasa na katooan