Tepetepet Manlapud Managbasa
Kasin amta la natan nen Jesus so petsa na Armagedon?
Ompatnag a makatunongan a tuloy so panisian amta to.
Nayarin pankelawan na arum so inlesa ni na tepet. Nayarin lapud komento nen Jesus a naromog ed Mateo 24:36: “Balet satan ya agew tan oras anggapoy mikabat, anggan saray angheles ed tawen, anggan say Anak, noag say Ama lambengat.” Imanoen so balikas a “anggan say Anak.”
Kabiangan iyan bersikulo ed ebat nen Jesus ed tepet na saray apostol: “Kapigan so kagawa na sarayan bengatla, tan anto kasi so tanda ed isabim tan say anggaan na mundo?” (Mateo 24:3) Diad samay kabkabat natan a propesiya to nipaakar ed saray ebidensya a manitibukel ed “[say] tanda,” impropesiya to so bakabakal, kakisiran na tagano, yegyegyeg, kapasegsegang na tuan Kristianos, tan arum niran bengatla diad dalin a mangipatnag ed kiwawala to. Diad panamegley na sayan tanda nakabatan na papatumbok to a say anggaan et asingger la. Inyilustra to iyan kinaasingger diad panaon sano manluluglug la so kiew a higos, a mangipapatnag a say tiagew so asingger la. Inyarum to: “Ontan yo met, sano nanengneng yo so sarayan amin a bengabengatla amtaen yo a sikatoy asingger la, salanti, ed saray pinto.”—Mateo 24:33.
Balet ag-imbaga nen Jesus so eksakton isabi na anggaan. Ingen, imbaga to imay nabasa tayo ed Mateo 24:36. Ontan met so nabasa ed New World Translation of the Holy Scriptures tan dakel a modernon Biblia. Balet, arum ya akauna iran bersyon so agmankarga na “anggan say Anak.”
Alimbawa, onia so nabasa ed Catholic Douay Version: “Balet diad satan ya agew tan oras anggapo so mikabat, aliwan saray anghel ed tawen, noag say Ama lambengat.” Mipadpara met so King James Version. Akin a say “anggan [odino, nisay] say Anak” so inekal, anggaman naromog itan ed Marcos 13:32? Lapud diad gapo na koma-17 siglo sanen saraman a duaran bersyon so niparaan, saray manuskriton angibasiyan na saray managpatalos et agto karga itan a balikas. Anggaman ontan, ambegya, dakel ya akaunan Griegon manuskrito so nalmoan. Saraya, a mas asingger a tuloy ed panaon na orihinal a teksto nen Mateo, so mankarga na “anggan say Anak” diad Mateo 24:36.
Makapainteres, ilalaktip na Catholic Jerusalem Bible so balikas, diad paimanod-leksab a mangibabagan inekal na say Latin Vulgate so balikas “anganko lapud teolohikal iran rason.” Siempre! Saray managpatalos odino managkopya a manisia ed Trinidad so nayarin natukson mangekal na balikas ya angipatnag ya onkukulang si Jesus na pikakabat a walad kinen Ama to. Panon nen Jesus ya agnaamtaan so sakey a bengatla no sikaran san-Ama et kabiangan na taloran pinankasakey a Dios?
Mipadpara, onia so ibabaga na A Textual Commentary on the Greek New Testament, nen B. M. Metzger: “Saray salitan ‘anggan say Anak’ so anggapo ed karaklan a [manuskriton] tastasi nen Mateo, pati ed saginonor a tekston Byzantine. Diad biek a dapag, say sankaabigan a manangilaman na Alexandrian, Western, tan Caesarean iran klase na teksto so mankarga ed balikas. Say impangekal ed saray salita lapud kairapan a pinawala na bangat da so nagkalalon posibli nen say pangipasen a sarayan salita so niyarum ed” Marcos 13:32.—Kien miray italiko.
Saramay “sankaabigan a manangilaman” na akauna iran manuskrito so manuporta ed nabasa ya angipresenta na makatunongan ya iyaaligwas nipaakar ed pikakabat. Agkabat na angheles so oras na anggaan; nisay say Anak; noag say Ama lambengat. Tan saya so mitunosan ed salita nen Jesus a naromog ed Mateo 20:23, ya inaksobi ton anggapoy autoridad ton mangipagamor na prominenti iran pasen ed Panarian, noag say Ama.
Sirin, ipapanengneng na mismon salita nen Jesus a sanen walad dalin agto kabat so petsa na “anggaan na mundo.” Kasin akabatan to manlapud saman?
Dedeskribien na Apocalipsis 6:2, NW, si Jesus bilang akakabayo ed amputin kabayo tan pinmaway “a manasakop tan pian kompletoen to so pananakop to.” Insan wadtan laray managkabayon mangilalaman ed bakabakal, era-eras, tan saray salot, a singa naeksperiensia tayo la nanlapulad Guerra Mundial I a ginmapo nen 1914. Sisiaen na Tastasi nen Jehova a nen 1914, nitrono si Jesus bilang Ari ed mangatatawen a Panarian na Dios, say sakey a mangidaulo ed onsasabin bakal sumpad karelmengan ed dalin. (Apocalipsis 6:3-8; 19:11-16) Lapud inikdan lay pakayari si Jesus bilang sakey a manakop unong ed ngaran na Dios, ompapatnag a makatunongan ya imbaga la ed sikato nen Ama to no kapigan so isabi na anggaan, sano “kompletoen to so pananakop to.”
Agnibaga ed sikatayo so petsa na satan, kanian saray salita nen Jesus so siansia nin onaaplika ed sikatayo: “Manlikas kayo, manbantay tan mikasi kayo, ta agyo amta no kapigan a panaon. . . . Et no anto so kuan ko ed sikayo, kuan ko ed amin, Manpuyat kayo.”—Marcos 13:33-37.