Akaparaan Ka ta la Parad Agew nen Jehova?

“Say baleg ya agew nen Jehova asingger, sikato so asingger tan masiglat a maomaong.”​—SOFONIAS 1:14.

1. Panon a dedeskribien na Kasulatan so agew nen Jehova?

MAGANO lan onsabi so “baleg tan makapataktakot ya agew” nen Jehova ed sayan marelmeng a sistema na bengabengatla. Dedeskribien na Kasulatan so agew nen Jehova bilang sakey a walaay bakal, kabilungetan, sanok, gonigon, ot-ot, talagnaw, tan kibalatar. Balet, walaray makaliktar, lapud “siopaman ya ontawag ed ngaran nen Jehova; nilaban naani.” (Joel 2:30-32; Amos 5:18-20) On, diad ontan et deralen na Dios so kakabusol to tan isalba toy totoo to.

2. Akin a kaukolan a liknaen tayon wala so inkaganatan nipaakar ed agew nen Jehova?

² Indanet na saray propeta na Dios so inkaganatan na agew nen Jehova. Singa bilang, onia so insulat nen Sofonias: “Say baleg ya agew nen Jehova asingger, sikato so asingger tan masiglat a maomaong.” (Sofonias 1:14) Say situasyon so lalon maganat natan lapud say Manunan Manangipaakseb na Dios, say Arin Jesu-Kristo, et pagani-gani to lan ‘ibalkes so ayura ed awak to, nisengeg ed katuaan tan kauyamoan tan inkatunong.’ (Salmo 45:3, 4) Akaparaan ka ta la parad satan ya agew?

Walaan Ira na Baleg ya Iilaloan

3. Antoran iilaloan so walad pigaran Kristianon taga-Tesalonica, tan sikaray alingo ed antoran duaran rason?

³ Dakel so walaan na ag-asumpal ya iilaloan nipaakar ed agew nen Jehova. Onia so inkuan na arum ya asasakbay a Kristianos diad Tesalonica, “say agew na Katawan et natan la!” (2 Tesalonica 2:2) Balet walay duaran manunan rason no akin a mabayag ni itan. Onia so inkuan nen apostol Pablo diad pangisisitas ed sakey ed saraya: “Sano ibabagaray, Kareenan tan andi paga, insan biglan kaderal so onsabi ed sikara.” (1 Tesalonica 5:1-6) Diad sayan “panaon na anggaan,” tatalaranan tayon mismo so kasumpalan na saratan a salita. (Daniel 12:4) Kinmulang met iray taga-Tesalonica na sananey ya ebidensya a sinmabi la so agew nen Jehova, lapud inkuan nen Pablo ed sikara: “Agni onsabi, noag say onsabi ya onuna so kapelag ed kasalanan [apostasya, NW].” (2 Tesalonica 2:3) Sanen insulat nen Pablo iratan a salita (ngalngali 51 K.P.), “say apostasya” manlapud tuan Inkakristiano so agni sigpot a pinmatnag. Natan, sankanengneng tayoy kapantokan na ibubulaslas to ed Kakristianoan. Balet, anggaman ed ag-asumpal ya iilaloan da, saraman a matoor ya alanaan ed Tesalonica, a sitotoor a nantultuloy a nanlingkor ed Dios anggad patey, so diad kaunoran et akaawat na mangatatawen a tumang. (Apocalipsis 2:10) Sikatayo met so natumangan no mansiansia itayon matoor legan a tatalaranan tayo so agew nen Jehova.

4. (a) Anto so akisiglaotan na agew nen Jehova diad 2 Tesalonica 2:1, 2? (b) Antoran panmoria so walad saray tatawagen ya Ama na Iglesia nipaakar ed ipapawil nen Kristo tan misiglaotan iran bengatla?

⁴ Isisiglaot na Biblia so “baleg ya agew nen Jehova” ed “kiwawala na Katawan tayon Jesu-Kristo.” (2 Tesalonica 2:1, 2, NW) Saray tatawagen ya Ama na Iglesia so walaan na nanduruman ideya nipaakar ed ipapawil nen Kristo, say kiwawala to, tan say Sanlibon Taon ya Uley to. (Apocalipsis 20:4) Nen komaduan siglo K.P., iilaloan nen Papias na Hierapolis so makapakelkelaw ya inkamabunga na dalin legan na Milenyon Uley nen Kristo. Paulit-ulit a sinalita nen Justin Martyr so nipaakar ed kiwawala nen Jesus tan nanilalo a say nipawil a Jerusalem so magmaliw a pasen na Panarian To. Imbangat nen Irenæus na Lyons a kayari inkaderal na Imperyo na Roma, et ompanengneng si Jesus, baloren si Satanas, tan manuley ed mangaraldalin a Jerusalem.

5. Antoy imbaga na pigaran iskolar nipaakar ed “Komaduan Isasabi” nen Kristo tan say Milenyon Uley to?

⁵ Inkuan nen manag-awaran a si Philip Schaff a “say sankamatalonggaringan a tema” ed panaon sakbay na Konsilyo na Nicaea nen 325 K.P. et “say sisiaen ed nanengneng a maglorian panuley nen Kristo ed dalin a kaibay apaolin sasantos ed loob na sanlibon taon, sakbay na inkalapagan a kikioli tan panangukom.” Onia so inkuan na A Dictionary of the Bible, ya inayos nen James Hastings: “Si Tertullian, Irenæus, tan Hippolytus so siansian nanilalo ed manasingger ya Isasabi [nen Jesu-Kristo]; balet diad saray Ama a nanlapud Alexandria et sikatayoy onloloob ed balon linya na kanonotan. . . . Lapud impareng nen Augustine so Milenyo ed panaon na panlalaban na Iglesia, say Komaduan Isasabi so impasen ni ed agmabayag nin arapen.”

Agew nen Jehova tan Kiwawala nen Jesus

6. Akin ya agtayo nepeg ya ikuan a say agew nen Jehova et mabayag ni?

⁶ Saray lingon abaloan so nansumpal ed pakadismayaan, balet agtayo komon iisipen a mabayag ni so agew nen Jehova. Isisiglaot itan na Kasulatan ed agnanengneng a kiwawala nen Jesus, a ginmapo la. Say Panag-Bantayan tan saray mitukoyan a publikasyon na Tastasi nen Jehova so mabetbet a mangitatarya na Makasulatan ya ebidensya a say kiwawala nen Kristo so ginmapo nen taon 1914.a Kanian, sirin, anto so inkuan nen Jesus nipaakar ed kiwawala to?

7. (a) Antoray pigaran kabiangan na tanda na kiwawala nen Jesus tan say konklusyon na sistema na bengabengatla? (b) Panon itayon nayarin nisalba?

⁷ Say kiwawala nen Jesus so nagmaliw a tema parad tongtongan ag-abayag sakbay na ipatey to. Kayari impakarengel ed sikaton angipasakbay ed kaderal na templo ed Jerusalem, tinmepet iray apostol ton di Pedro, Santiago, Juan, tan Andres: “Kapigan so kagawa na sarayan bengatla, tan anto kasi so tanda ed isabim tan say anggaan na mundo?” (Mateo 24:1-3; Marcos 13:3, 4) Diad ebat, impasakbay nen Jesus iray bakal, eras, yegyeg, tan arum a kabiangan na “tanda” na kiwawala to tan say konklusyon na sistema na bengabengatla. Inkuanto met: “Say misungdo ya angga ed kasampotan, sikato lamlamang so nilaban naani.” (Mateo 24:13) Nilaban itayo no sitotoor itayon mansungdo anggad anggaan na kaplesan a bilay tayo odino anggad anggaan na sayan marelmeng a sistema.

8. Sakbay na anggaan na Judion sistema, anto so kaukolan a nasumpal, tan anto so nagagawaan nipaakar ed saya natan?

⁸ Sakbay na anggaan, nasumpal so nagkalalo lan makabaliksan a kabiangan na kiwawala nen Jesus. Nipaakar ed satan, onia so inkuanto: “Saya ya ebanghelyo na panarian nipulong naani ed sankamundoan ya onkanan pamintuaan ed saray amin a nasyones; et saman la onsabi anggaan.” (Mateo 24:14) Sakbay a dineral na saray Romano so Jerusalem tan anampot so Judion sistema na bengabengatla nen 70 K.P., nayarian ya ibaga nen Pablo a say maong a balita so “nipulong ed amin a pinalsa ed leksab na tawen.” (Colosas 1:23) Balet, natan et mas malaknab a panagpulong so gagawaen na Tastasi nen Jehova “ed amin a panaayaman a dalin.” Diad apalabas a pigaran taon, nilukasan na Dios so dalan parad sakey a baleg a pantasi a kaukolan a niiter ed Mamabukig a Europa. Diad tulong na saray imprintaan tan arum a pasilidad ed sankamundoan, akaparaan so organisasyon nen Jehova parad apadaak ya aktibidad, anggan diad “agnakikimeyan a teritorya.” (Roma 15:22, 23, NW) Pakikiwasen ka ta na pusom a gawaen so anggaay nayarian mo ed pantasi sakbay ya onsabi anggaan? No ontan, pabiskegen ka na Dios a nawalaan na makatumang a betang ed kimey a walad arapen.​—Filipos 4:13; 2 Timoteo 4:17.

9. Antoy labay ya ibaga nen Jesus, unong a nirekord diad Mateo 24:36?

⁹ Say nipasakbay a panangipulong ed Panarian tan arum a kabiangan na tanda na kiwawala nen Jesus so nasusumpal la natan. Kanian, asingger la so anggaan na sayan marelmeng a sistema na bengabengatla. Tua, inkuan nen Jesus: “Balet satan ya agew tan oras anggapoy mikabat, anggan saray angheles ed tawen, anggan say Anak, noag say Ama lambengat.” (Mateo 24:4-14, 36) Balet natulongan itayo na propesiya nen Jesus a magmaliw ya akaparaan parad “satan ya agew tan oras.”

Akaparaan Ira

10. Panoy pakaamta tayo a posibli so pansiansian aliing ed espiritual?

¹⁰ Pian makaliktar ed baleg ya agew nen Jehova, nepeg itayon mansiansian aliing ed espiritual tan ontalindeg a malet parad tuan panagdayew. (1 Corinto 16:13) Kabat tayo a posibli so ontan a panagsungdo, lapud ontan so ginawa na sakey a maridios a pamilya tan akaliktar ed Delap ya aneral ed marelmeng a totoo nen 2370 K.K.P. Diad pangikompara ed satan a panaon ed kiwawala to, onia so inkuan nen Jesus: “Unong ed saray agew nen Noe, ontan naani so isabi na Anak na too. Ta singa diad saraman ya agew ed arapen na delap nankakakan ira tan naninum ira, angaasawa ra tan akiaasawa ra anggad agew ya inloob nen Noe ed biong; tan agda akabkabatan angga ed sinmabi delap, et inyanor to ra ya amin; ontan naani so isabi Anak na too.”​—Mateo 24:37-39.

11. Anton kurso so ginemtan nen Noe anggaman ed karawalan a niwala ed agew to?

¹¹ Singa sikatayo, si Noe tan say pamilya to so nanbilay ed sakey a marawal a mundo. Saray matungangan anghelikon ‘ananak na tuan Dios’ so nankinon too tan angaasawa a sikaray nanilalak na maruruksan Nefilim​—masisibeg ya andi-duaruwan lalon amarawal ed kipapasen. (Genesis 6:1, 2, 4; 1 Pedro 3:19, 20) Balet, “si Noe so akiolop-olop ed Dios” tekep na pananisia. ‘Pinaneknekan toy inkasikato a sakey a too a maptek tan nagnap ed saray kapolian to’​—say marelmeng a kailalakan ed saman a panaon. (Genesis 6:9-11) Tekep na sipipikasin isasaral ed Dios, nagawaan tayo met so ontan diad sayan marawal tan marelmeng a mundo legan tayon tatalaranan so agew nen Jehova.

12. (a) Nilikud ed panagpaalagey na biong, anton kimey so ginawa nen Noe? (b) Panon so inkiwas na totoo ed panagpulong nen Noe, tan antoray nansumpalan da?

¹² Kabkabat si Noe bilang managpaalagey na biong parad kipreserba na bilay manlapud Delubio. Sikato met so ‘managpulong na inkatunong,’ balet saray kapanaonan to so ‘ag-angimano’ ed inter-Dios a mensahe to. Sikaray nanaakan tan naniinom, angaasawa, nampamilya, tan angitultuloy ed normal a kurang na bilay anggad inyanor iran amin na Delap. (2 Pedro 2:5; Genesis 6:14) Agda labay a dengelen so nipaakar ed maptek a paliwawa tan kondukta, no panon a say marelmeng a kailalakan natan so ag-ondengel ed ibabaga na Tastasi nen Jehova a “panpataoli ed Dios,” pananisia ed Kristo, inkatunong, tan “say panangukom ya onsabi.” (Gawa 20:20, 21; 24:24, 25) Anggapoy naalan rekord no kaunongan karakel a totoo so nanbilay ed sayan dalin sanen inyabawag nen Noe so mensahe na Dios. Balet sakey a bengatla so segurado, say populasyon na mundo so talagan abawasan nen 2370 K.K.P.! Niyanep na Delubio iray marelmeng, ya intilak labat iraman so akaparaan ed satan a gawa na Dios​—si Noe tan say pitora ni ed pamilya to.​—Genesis 7:19-23; 2 Pedro 3:5, 6.

13. Diad anton hudisyal a dekreto a sigpot ya angikompiyansaan nen Noe, tan panon a sikatoy kinmiwas a mitunosan ed saya?

¹³ Ag-imbaga na Dios ed si Noe so eksakton agew tan oras ya isabi na Delap dakel a taon sakbay na kagawa na saya. Balet, sanen man-edad si Noe na 480, onia so impaakseb nen Jehova: “Say espirituk aglawas misumpaan ed too, ta sikato so laman met. Ingen ta saray agew to naani sanlasus tan duamplo a taon ira.” (Genesis 6:3) Sigpot a nankompiyansa si Noe ed sayan madibinon hudisyal a dekreto. Nen manedad la na 500, sikato so ‘nagmaliw ya ama nen Sem, Cam, tan Jafet,” tan isusuhiri na kustombri ed saraman ya agew a linmampas la so 50 ya anggad 60 taon sakbay ya angaasawa iray ilalak to. Sanen nibaga ed si Noe a mangipaalagey na biong parad kipreserba ed Delap, mapatnag a sikatoy tinulongan na sarayan ananak tan kaasawaan da ed satan a kimey. Say panagpaalagey na biong so maseguron akibansag ed serbisyo nen Noe bilang ‘managpulong na inkatunong,’ ya amasiansia ed sikaton okupado ed loob na 40 ya anggad 50 a taon sakbay na Delap. (Genesis 5:32; 6:13-22) Diad amin na saraman a taon, sikato tan say pamilya to so kinmiwas tekep na pananisia. Ipatnag tayo met komon so pananisia legan ya ipupulong tayo so maong a balita tan tatalaranay agew nen Jehova.​—Hebreos 11:7.

14. Antoy imbaga nen Jehova ed si Noe ed kaunoran, tan akin?

¹⁴ Nen asingger lan nasumpal so biong, ompan ninonot nen Noe a manasingger lay Delap, anggaman agto amtan talagan no kapigan itan nagawa. Diad kaunoran et inkuan nen Jehova ed sikato: “Wala so pitoy agew ni, insan ko pauranen ed dalin ya apataploy agew tan apataploy labi.” (Genesis 7:4) Satan so angiter ed si Noe tan say pamilya to na magenap a panaon pian niloob so amin a klase na ayep ed biong tan onloob iran mismo ed satan sakbay ya onggapoy Delap. Agtayo kaukolan ya amtaen so agew tan oras na igapoy kaderal na sayan sistema; say kililiktar na ayayep so agnimatalek ed sikatayo, tan saray totoon walaan na ilalon makaliktar so onloloob la ed simbolikon biong, say espiritual a paraiso na totooy Dios.

“Manpuyat”

15. (a) Diad dili yon salita, panon yon ipaliwawa iray salita nen Jesus a naromog diad Mateo 24:40-44? (b) Antoy epekto na agpakaamta ed eksakton panaon na isasabi nen Jesus pian ipaakseb so panangibales na Dios?

¹⁵ Nipaakar ed kiwawala to, onia so impaliwawa nen Jesus: “Saman la walara naani duaran lalaki ed uma; say sakey naala, et say sakey natilak. Wala ra naani duaran bibii a mangigiling ed gilingan, say sakey naala, et say sakey natilak. Manpuyat kayo sirin, ta agyo amta no anton agew so isabi Katawan yo. Balet amtaen yo so saya, a no say makan-abung akabatan to no anton oras ed panagbantay so isabi matakew, sikato komoy nanpuyat tan agto komon inabuloyan a nabungawan so abung to. Kanian manparaan kayo met komon, ta dia ed oras ya agyo isisipen onsabi Anak na too.” (Mateo 24:40-44; Lucas 17:34, 35) Say agpakaamta ed eksakton panaon na isasabi nen Jesus pian gawaen so panangibales na Dios so manggawa ed sikatayon mansiansian akabantay tan mangiter ed sikatayo na inagew-agew a pankanawnawa pian paneknekan a manlilingkor itayo ed si Jehova tekep na andi-siblet a motibo.

16. Antoy nagawa ed totoon “natilak” tan ed saraman so “naala”?

¹⁶ Saray indibidual a “natilak” ed kaderal na marelmeng so mangilaktip ed saraman so datin aliwawaan balet ta tinalonaan na sinisiblet a paraan na panagbilay. Komon ta kaiba itayo ed saraman so “naala,” saraman so sigpot a debotado ed si Jehova tan peteg a misalsalamat ed espiritual iran probisyon to ed panamegley na “[say] matoor tan makabat ya aripen.” (Mateo 24:45-47) Anggad anggaan, komon ta manlingkor itayo ed Dios tekep na “aro a nanlapu ed sakey a puso a malinis tan dia ed maabig a linawa tan dia ed pananisian aliwan kunwari.”​—1 Timoteo 1:5.

Makana Iray Masanton Gawa

17. (a) Antoy nipasakbay diad 2 Pedro 3:10? (b) Antoray pigaran kiwas tan gawa ya ipapaseseg na 2 Pedro 3:11?

¹⁷ Onia so insulat nen apostol Pedro: “Say agew na Katawan onsabi a singa matakew; a dia ed satan saray tawen mangangga ra a pati baleg ya ongol, tan say elemento natunaw ed manliob a petang, tan say dalin tan saray gawa a wala ed sikato napoolan ira.” (2 Pedro 3:10) Say simbolikon katawenan tan dalin so agmakaliktar ed petang na manliob a sanok na Dios. Kanian inyarum nen Pedro: “Saraya ya amin a bengatla naderal ira naani, anton nengneng na inkatoo so nepeg yon pagmaliwan ed amin a masantos a panagbilay tan kasimpitan!” (2 Pedro 3​:11) Kalaktip ed sarayan gawa tan kimey et say pagmaliw a regular ed saray Kristianon miting, panggawa na maong ed arum, tan pakawalaan na makabaliksan a biang ed panangipulong na maong a balita.​—Mateo 24:14; Hebreos 10:24, 25; 13:16.

18. No nababayuboan tayo so panlabay ed mundo, anto so nepeg tayon gawaen?

¹⁸ Kakaukolanen na “masantos a panagbilay tan kasimpitan” a sikatayoy ‘mansiansian andi mantsa ed mundo.’ (Santiago 1:27) Balet anto no nababayuboan tayo so panlabay ed sayan mundo? Ompan nasasagyat itayo ed sakey a mapeligron talindeg ed arap na Dios diad pankaliktan na agmalinis a panligliwaan odino diad italineng ed musika tan kankanta a mangidadalangirang na agmaridios ya espiritu na sayan mundo. (2 Corinto 6:14-18) No ontan so kipapasen, onkerew tayo na tulong ed Dios diad pikakasi ta pian ag-itayo napaso a kaibay mundo noagta makatalindeg bilang naabobonan ed arap na Anak na too. (Lucas 21:34-36; 1 Juan 2:15-17) No akapangidedika tayo la ed Dios, maseguron labay tayon gawaen so anggaay nayarian tayo pian nipaalagey tan mantinien so ampetang a siglaotan ed sikato tan diad ontan et akaparaan parad baleg tan makapataktakot ya agew nen Jehova.

19. Akin a nailaloan na dakel a karaklan na manangiproklama na Panarian so pakaliktar ed konklusyon na sayan marelmeng a sistema na bengabengatla?

¹⁹ Say maridios a Noe tan say pamilya to so akaliktar ed Delap ya aneral ed kadaanan a mundo. Saray maptek a totoo so akaliktar ed anggaan na Judion sistema na bengabengatla nen 70 K.P. Singa bilang, siansian aktibo si apostol Juan ed serbisyo na Dios nen manga 96-98 K.P., sanen insulat toy libro na Apocalipsis, say salaysay na Ebanghelyo to, tan say taloran apuyanan a sulat. Diad nilibon angabrasa ed tuan pananisia diad Pentecostes na 33 K.P., maseguron dakel so akaliktar ed anggaan na Judion sistema. (Gawa 1:15; 2:41, 47; 4:4) Baleg a karaklan natan na manangiproklama na Panarian so makapanilalon makaliktar ed konklusyon na peles a marelmeng a sistema na bengabengatla.

20. Akin a nepeg itayon magmaliw a maseseg a ‘managpulong na inkatunong’?

²⁰ Lapud walad arap tayo so kipreserba a mamaarap ed balon mundo, magmaliw tayo sirin a maseseg a ‘managpulong na inkatunong.’ Agaylan pribilihyo so panlingkor ed Dios ed sarayan kaunoran ya agew! Tan agaylan gayaga so pangipaarap ed totoo ed kaplesan-agew a “biong,” say espiritual a paraiso a panggagayagaan na totoo na Dios! Komon ta say minilyon a wadtan la natan so mansiansian matoor, aliing ed espiritual, tan akaparaan parad baleg ya agew nen Jehova. Balet anto so ontulong ed sikatayon amin a mansiansian aliing?

[Paimano ed leksab]

Panon Yon Ebatan?

◻ Antoray iilaloan na arum nipaakar ed agew nen Jehova tan ed kiwawala nen Kristo?

◻ Akin a nibaga tayo a si Noe tan say pamilya to so akaparaan parad Delap?

◻ Antoy nagawa ed saramay “manpuyat” tan saramay agmanpuyat?

◻ Akin a makana iray masanton gawa, nagkalalo la sano manasingger itayo ed baleg ya agew nen Jehova?