Say Babaleg a Gloria na Abung nen Jehova

“‘Panoen ko naani so sayan abung ed gayaga [gloria, NW],’ kuan nen Jehova na saray ehersito.”​—AGGEO 2:7.

1. Panon a misiglaotan so masanton espiritu ed pananisia tan gawa?

LEGAN a manpupulong ed kabkaabungan, nabet na sakey a Tastasi nen Jehova so sakey a biin Pentecostal a nankuan, ‘Wala ed sikami so masanton espiritu, ingen sikayo so mankikimey.’ Diad mataktikan paraan, impaliwawa ed sikato a samay walaan na masanton espiritu et natural lambengat, a napakiwas a gawaen toy kimey na Dios. Onia so isasalaysay na Santiago 2:17: “Ontan met so pananisia, no anggapo so saray gawa to, inatey ed inkasikaton dili.” Lapud tulong na espiritu nen Jehova, nababayuboan na Tastasi to so mabiskeg a pananisia, tan ‘papanoen to so abung to na gloria’ diad impangipabtang to’d sikara a gawaen iray matunong a kimey​—manuna diad ‘panangipulong ed maong a balita na Panarian ed amin a panaayaman a dalin ya onkanan pantasi ed amin na saray nasyon.’ Sano nasumpal iyan kimey diad kapenek nen Jehova, “et saman la onsabi so anggaan.”​—Mateo 24:14.

2. (a) Say inkaokupado tayo ed kimey nen Jehova so mangitarok na anton bendisyon? (b) Akin a nepeg a sikatayo so maliket nipaakar ed antokaman ya ompatnag a ‘kaaabala’?

² Manlapud sarayan salita nen Jesus, naibaga tayo a say kimey tayo natan so nepeg ya akaapasakey ed pangipulong ed arum na “say evanghelio na gloria na bendito a Dios,” a nimatalek ed sikatayo. (1 Timoteo 1:11) No panon a mas maliket itayo ed pansusubsob tayo ed serbisyo nen Jehova, ompatnag a mas maples so isabi na anggaan. Diad Habacuc 2:2, 3, nabasa tayoray salita nen Jehova: “Isulat mo so pasingawey, tan sikato so gawaen a niusausa ed tapew na saray tapi, pian makabatik so manbasa ed sikato. Ta say pasingawey sikato ni nipaakar ed nigeter a panaon, tan mansiglat ya onarap ed anggaan, et agnaani mantila. Anggan manabala, sikato so alagden mo; ta petepeteg ya onsabi, ya agmanbayag.” On, “say pasingawey” so onsabin onsabi “anggan manabala.” Lapud wala tayo la’d koma-83 a taon na uley na Panarian nen Jesus, liknaen na pigara a wala tayo la natan ed peryodo na kaaabala. Balet, agta panliketan tayo ta agni sinmabi so anggaan? Legan na sayan dekada na 1990, inekal laray panameget ed panangipulong ed maong a balita, ya ompatnag a mamilagro, diad Mamabukig a Europa, pigaran parti na Aprika, tan arum a daldalin. Say ompatnag a ‘kaaabala’ so mangiyaabuloy na panaon parad dakel nin “karnero” a natipon manlapud sarayan teritorya ya agano nin alukasan.​—Juan 10:16.

3. Akin a nepeg a say nauman a pakatalos tayo ed “sayan kailalakan” so managdag ed sikatayon mangganat ed kimey na Dios?

³  “Agla manbayag,” so inkuan na propeta. Imbaga nen Jesus a sayan peles a marelmeng a kailalakan so agla napaso anggad “kagawa na sarayan bengatla.” (Mateo 24:34) Kasin say nauman a pakatalos tayo ed sarayan salita to so mankabaliksan a say panagpulong a kimey tayo so agtanton maganat?a Ipapanengneng na saray katuaan a duman tuloy so kipapasen! Onlelereg la so kapanaonan tayon kailalakan ed inkarelmeng tan inkabulok ed kipapasen ya agnaparaan na amin a linmabas ya awaran. (Ikompara so Gawa 2:40.) Nepeg itayon mangganat ed kimey tayo. (2 Timoteo 4:2) Ipapanengneng na amin a propesiya a say panaon na baleg a kairapan et onsabin bigla, tampol, agnataltalaranan​—singa sakey a matakew. (1 Tesalonica 5:1-4; Apocalipsis 3:3; 16:15) “Kanian manparaan kayo met komon, ta dia ed oras ya agyo isisipen onsabi Anak na too.” (Mateo 24:44) Legan a manasingger la’d tambib na kadederal iyan andiay-dios a kailalakan na katooan, maseguron agtayo labay ya ibantak so mablin ilalo tayo a magnayon a bilay diad ipawil a ‘mantiblak lamet’ ed minumundon pakagirogiroan!​—2 Pedro 2:22; 3:10; Lucas 21:32-36.

4. Anton situasyon so mankakaukolan na apadaak a suplay na “tagano ed panaon a kinepeg to,” tan panon a nakakapet iyan pankaukolan?

⁴ Tua ed say propesiya nen Jesus, nen 1914 wala so “gapo na kairapan” legan ya onloloob so katooan ed “anggaan na mundo.” Saray kaermenan, makadesyang iran ebento, tan kaugsan so ondarakel anggad sayan agew. (Mateo 24:3-8, 12) Diad parehon bekta, pinabtangan nen Jehova so alanaan a matoor tan makabat ya aripen a klase pian mangitarya na espiritual a “tagano ed panaon a kinepeg to” parad sankaabungan na Katawan da, si Kristo. (Mateo 24:45-47) Manlapud trono to ed katawenan, iwawanwan natan na sayan Mesianikon Ari so sakey a makapakelkelaw a programan espiritual a panamakan ed sankadalinan.

Daakan a “Tagano”

5. Say manunan bengatla ed “tagano” so mangaawat na anton imano?

⁵ Isipen pa so panangiparaan na “tagano.” (Lucas 12:42) Say manunaan ed Kristianon menu et say Salitay Dios, say Biblia. Pian epektibon naibangat so Biblia, say sakey a mainomay a basaen tan suston patalos so manunan pankaukolan. Diad loob na pigara lan taon sayan pankaukolan so progresibon napepenek, nagkalalo lan ginmapo nen 1950 sanen say New World Translation of the Christian Greek Scriptures et nipaway ed Ingles. Nen 1961 say New World Translation na intiron Biblia so niwala, tan ag-abayag et apawala iray edisyon ed arum a manunan lenguahe. Say 3 tomo so nipaway legan na 1996 serbisyon taon ya angitarok na dagup ya anggad 27, a diad satan et 14 so kompleton Biblia. Pian naasikaso iyan pankikimey nipaakar ed Biblia, ontan met ed saray katulongan na Biblia, ngalngali 1,174 a dedikadon Kristiano natan so sigpot-panaon a mankikimey ed panangipatalos diad 72 bansa.

6. Panon a nakakapet na Sosyedad so pankaukolan parad saray palapagan na Biblia?

⁶ Pian tulongan so kimey na sayan baleg a bilang na managpatalos, say 24 a panag-imprintaan a sanga na Watch Tower Society so mamapawala na saray palapagan a mas dakdakel ni nen kapiganman. Lapud sayan gagala a tuloytuloy so pangikakabit na kaaruman a high-speed rotary presses ed ankabaleg iran sanga. Say pangiyiimprinta na Panag-Bantayan tan Awake! iran magasin so ondarakel a binulan, nasasabi to so nantekep a dagup a 943,892,500 a kopya, sakey a 13.4-porsienton indaak ed loob na taon. Say dagup na apawala iran Biblia tan masekder-apis iran libro diad Estados Unidos, Brazil, Finland, Alemanya, Italya, Hapon, Korea tan Mexico labat so dinmaak na 40 a porsiento manlapud 1995 ya anggad 76,760,098 a kopya nen 1996. Arum a sanga so akapawala met na malaem a kontribusyon ed inkalapagan ya indaak diad pangiyiimprinta na literatura.

7. Panon a say Isaias 54:2 so walaan na babaleg ya inkaganatan natan?

⁷ Maslak ed sarayan indaak so agawan kapilitan legan na dekada na 1990 diad inpangekal ed panameget ed Tastasi nen Jehova diad Mamabukig ya Europa tan Aprika. Pirmi so kaeerasan ed espiritual a tagano diad sarayan pasen. Sirin nipapaknol so tawag tekep na babaleg ya inkaganatan: “Pabalegen mo so pasen na kobongkobong mo. Tan pabuskag mo ed sikara so saray sakbong na saray panayaman mo. Agka mangikera. Padukeyen mo so saray lubir mo, tan pasekderen mo so saray palitek mo.”​—Isaias 54:2.

8. Anton mabunlok a kiwas so ontutulong pian makapangitarya na pinansyal a suporta?

⁸ Kanian, kapilitan so pamaawang ed saray pasilidad na dakel ed 104 a sanga na Sosyedad. Lapud maslak ed balon lukas a teritorya et maniirap ed ekonomiya, say baleg a kabiangan na gastos ed sayan panamalaknab so kontribusyon ed sankamundoan a kimey a manlalapud mas maaligwas a daldalin. Makapaliket, onkikiwas a sigpot-puso iray kongregasyon tan indibidual, a mitunosan ed espiritu na Exodo 35:21: “Et sikara linma ra, balang sakey a dinagdag na puso to, tan balang sakey a pinalabay na espiritu to, et inyakar da a yapay ed kinen Jehova.” Anamoten mi iyan pankanawnawa a pisalamatan so amin a mibibiang ed sayan mabunlok a panangiter.​—2 Corinto 9:11.

9. Panon a nasusumpal natan so Roma 10:13, 18?

⁹ Legan na 1996 saray palapagan na Watch Tower Society so peteg ya angigloria ed ngaran tan gagala nen Jehova angga ed saray sampot na dalin. Satan so singa ed impasakbay nen apostol Pablo. Diad pangaon ed propesiya nen Joel tan koma-19 a Salmo, insulat to: “‘Siopaman ya ontawag ed ngaran na Katawan [Jehova, NW], nilaban.’ Bangbalet kuanko, Nadngel da, agta ontan? On, peteg, ‘dia ed ami dalin pinmaway so tanol da, tan saray salita ra angga ed saray sampot na mundo.’” (Roma 10:13, 18) Kanian diad panangitandoro ed mablin ngaran nen Jehova, saray totoo to so walaan na makabaliksan a betang diad pamapano ed abung to na panagdayew tekep na gloria. Balet, panon a sayan proklamasyon so inmaligwas nagkalalo la legan na 1996? Ipangasin usisaen so tsart a walad pahina 18 ya anggad 21.

Sankamundoan a Panagani

10. Antoran matalonggaring a nengneng so naimano yo ed kimey na totoo nen Jehova, unong a sinumaryo ed tsart ed pahina 18 ya anggad 21?

¹⁰ Agnin balot agawa ed babaleg a puersa iray salita nen Jesus a naromog ed Lucas 10:2: “Say anien peteg a daakan, ingen saray komikimey daiset. Pikasi yo sirin ed Katawan na anien, ta mangibaki komikimey ed anien to.” Kasin onkikiwas ka ed satan a tawag? Minilyon ed sankadalinan so onkikiwas. Saya so ipapanengneng na balon pantok a 5,413,769 a manangipalapag na Panarian a nanreport ed lawak a serbisyo legan na 1996. Niarum ni, 366,579 a balon agagi so abautismoan. Agaylan papablien tayo irayan “mabli a bengatla na saray amin a nasyon,” a mibibiang natan ed ‘pamapano ed abung nen Jehova na panagdayew tekep na gloria’!​— Aggeo 2:7.

11. Akin ya amin tayo so walaan na rason a manggayagan maong?

¹¹ Makatantanda iray report na inlalaknab ed balon alukasan iran lawak. Wala ta ed sikatayo so onibeg ed saraman so manggagayaga natan ed ontan ya ibubulaslas? Diad kasuniyan, mililiket itayo ed sikara. Amin a bansa so walaan na melag a gapoan. Insulat na kapanaonan nen Aggeo a propeta, si Zacarias: “Siopa so nanbalaw ed agew na saray ankekelag a bengatla?” (Zacarias 4:10) Panggagayagaan tayon maong a diad daldalin a niletneg a malet so panagtasin kimey, wala la natan so minilyon a manangipalapag na Panarian, tan say teritorya so mabetbet a nakokobrian, sinimba ni ingen ed dakel ya ankabaleg a syudad. Walaan itayo ta na rason ya ontayam legan ya inanatnat nen Jehova natan so pankanawnawa parad kilalaban ed saray lugar a datin apegetan? Andin balot! “Say uma sikatoy mundo,” inkuan nen Jesus. (Mateo 13:38) Sakey a sigpot a pantasi so nepeg a mantultuloy a niiter, no panon a saray inmunan babangatan so angiter na sigpot a pantasi diad kasampotan na Judion sistema na bengabengatla.​—Gawa 2:40; 10:42; 20:24; 28:23.

Lawas Onaabanti

12. Anto so managyat ed sikatayon onabanti a “maptek ed arap”? (Nengnengen met so kahon, “Panagani ‘Manlapu ed Sampot na Dalin.’”)

¹² On, nepeg itayon mansiansian mibabansag, onabanti a “maptek ed arap” a kaiba so anghelikon mangatatawen a karwahe nen Jehova. (Ezequiel 1:12) Nanonotan tayo iray salita nen Pedro: “Say Katawan agto bayagen so sipan to, a singa say arum igaton da a mabayag, noag ingen masungdo ed sikayo, agto labay a wala so siopaman a natawtaw noag ingen amin komon nagegemtan da so panagsibkel.” (2 Pedro 3:9) Komon ta sagyaten itayo na napanuliranan a seseg na agagi tayo diad pobri iran daldalin. Antokaman ya ompatnag a kaaabala ed ibetag na Armagedon so mangiyaabuloy ed nilasus nilibo a natipon diad sarayan dalin ontan met dakel ni manlapud natatayek iran teritorya. Agbalot nalilingo: “Say baleg ya agew nen Jehova asingger. Sikato so asingger tan masiglat a maomaong.” (Sofonias 1:14) Nepeg a walay inkaganatan ed biang tayo met diad pangiter na sigpot ya unor a pantasi!

13, 14. (a) Anto so naibaga ed panangibunog na saray palapagan legan na 1996? (b) Anton espisyal iran plano so nayarin gawaen na saray kongregasyon a tinaon, tan panon so panplaplanom pian makapibiang?

¹³ Anggaman saray detalye so ag-ompapatnag ed tsart na serbisyo, wala so makatantandan indaak diad panangibunog na saray Biblia, libro, tan magasin legan na apalabas a taon. Alimbawa, ipapanengneng na saray nipaliman magasin ed sankamundoan a wala so 19-porsienton indaak, sakey a dagup a 543,667,923 a kopya so nipalima. Papainomayen na saray magasin tayo so talyagom a panagpulong​—diad saray kalsada, parki, tundaan na bus, ed lugar na negosyo. Ipapanengneng na saray report a diad arum a teritoryan mabetbet a nakikimeyan, pandinayewan na propesyonal a totoo so kualidad na magasin tayo tan sikaray paiyaaralan ed Biblia.

¹⁴ Kada taon legan na bulan na Abril, gendagendat ya iyoorganisa na saray kongregasyon so espisyal a panagmagasin, lalaktipen toy sanagew a kampanya ed kabkaabungan tan diad publiko iran pasen. Mibiang ta so kongregasyon yo ed saya legan na Abril 1997? Saray matalonggaring a paway na Say Panag-Bantayan tan Awake! ed Abril so nipaparaan, tan say bansag a pangipresenta ed saratan ed sankamundoan so talagan makapasagyat! Diad isla na Cyprus, saray kongregasyon, ya uusaren day diparan dan “sabien so amin no posibli tekep na mensahe na Panarian,” so pinatumbokan ni ingen itan na binulan a niyeskedyul a panagmagasin, ya asabi toy sakey a balon pantok a 275,359 a nipalima ed satan a taon, sakey a 54-porsienton indaak.

Unor Iran Mensahe nen Aggeo

15. (a) Akin ya angipasabi si Jehova na kaaruman iran mensahe diad panamegley nen Aggeo? (b) Anton leksion so ipapasabi na komatlon mensahe nen Aggeo ed sikatayo?

¹⁵ Imbaki nen Jehova si Aggeo, 63 ya agew kayari na impangipasabi to na komaduan mensahe to, tekep na komatlon proklamasyon a nipapuso tayon maong natan. Nansalita si Aggeo a singano ileletneg na saray Judio so pundasyon na templo, a diad peteg et niletneg lan 17 taon ed asasakbay. Naimano lamet nen Jehova a matukoy so panlinis. Nagmaliw a mapaulyan iray saserdote tan totoo diad ontan et marutak ed imaton nen Jehova. Agta arum met ed totoo nen Jehova so tinmayam natan, mibabali ni ingen ira ed maabuloy tan materyalistiko iran dalan na mundo? Inkaganatan ya iyapasakey tayon amin so kapusoan tayo ‘manlapud saya ya agew tan manpatuloy’ diad pangigloria ed ngaran nen Jehova, a matalek ed sipan to: “Manlapu ed saya ya agew bendisyonan takayo naani.”​—Aggeo 2:10-19; Hebreos 6:11, 12.

16. Anton “panmayegmeg” so asingger la, tan anto so pansumpalan?

¹⁶ Diad saman lanlamang ya agew, sinmabi iray salita nen ‘Jehova na saray armada’ ed si Aggeo ed komapat tan unor a danay. Impaamta to so nasasaglawi diad “panmayegmeg [To] ed katawenan tan say dalin,” a kuanto: “Igebak naani so trono na saray panarian et deralen ko naani so biskeg na saray panarian na saray nasyon; et gaygayen ko naani ray luganan tan saray kabayo tan saray akakabayo ed sikara nipasag ira naani, balang sakey ed kampilan na agi to.” (Aggeo 2:6, 21, 22) Say “panmayegmeg” sirin so onsabi ed kapantokan to sano sigpot lan linisan nen Jehova so dalin diad Armagedon. Diad ontan “saray mabli a bengatla na saray amin a nasyon” so onloob, pian mamorma na sakey a grupo na sosyedad na too ed balon mundo. Agayla iran rason parad panliket tan pangidayew ed si Jehova!​—Aggeo 2:7; Apocalipsis 19:6, 7; 21:1-4.

17. Panon a niletneg si Jesus bilang sakey a ‘tatak a singsing’?

¹⁷ Diad pangisampot ed propesiya to, insulat nen Aggeo: “‘Dia ed satan ya agew,’ kuan nen Jehova na saray ehersito, ‘Alaen taka naani, O Zorobabel . . . , et gawaen taka naani a singa sakey a tatak, ta siak pinili taka,’ kuan nen Jehova na saray ehersito.” (Aggeo 2:23) Si Kristo Jesus natan so antitipikon Mesianikon Ari tan Atagey a Saserdote nen Jehova, a pantekepanen ed katawenan iray nanbiigan a betang nen Gobernador Zorobabel tan Atagey a Saserdoten Josue diad mangaraldalin a Jerusalem. Singa sakey ya opisyal a tatak a singsing ed nikawanan nen Jehova, si Jesus so sakey a magmamaliw ya “On” bilang instrumento nen Jehova diad pangitarok ed inkapeteg na dakel a ‘sipasipan na Dios.’ (2 Corinto 1:20; Efeso 3:10, 11; Apocalipsis 19:10) Say intiron mapropetikon mensahe na Biblia so mangiyaapasakey ed probisyon nen Jehova ed si Kristo bilang Ari tan makasaserdoten Mananondon.​—Juan 18:37; 1 Pedro 1:18, 19.

18. Panon a say pansaran ‘kuan nen Jehova na saray ehersito’ so nawalaan na makarepreskon kasumpalan?

¹⁸ Tua a diad sayan agew tayo, say sankabalgan a gloria so naromog ed masnag ya espiritual a templo nen Jehova! Tan agla mabayag, kayarin punasen nen Jehova so amin a sistema nen Satanas, walaan na nagkalalon makapaliket a kasumpalan so Aggeo 2:9: “‘Dia ed saya a pasen mangiter ak naani na deen,’ kuan nen Jehova na saray ehersito.” Kareenan a siansia!​—sakey a manbayag, sankatalbaan a kareenan, so ginarantiyaan na “tatak a singsing” nen Jehova, si Kristo Jesus, say “Prinsipe na Kareenan,” a diad sikato et onia so nisulat: “Ed ibaleg na panaguley to tan kareenan anggapo naani anggaan . . . Say paga nen Jehova na saray ehersito so nasumpal ed saya.” (Isaias 9:6, 7) Magnayon a say gloria na abung a panagdayewan ed si Jehova so napatnagan ed intiron mareen a lugar na sankatalbaan ya inkasoberano to. Komon ta mansiansia itayon maando ed satan ya abung!​—Salmo 27:4; 65:4; 84:10.

[Paimano ed leksab]

Kasin Nisalaysay Yo?

◻ Panon, natan, a say abung nen Jehova so ‘napapano na gloria’?

◻ Akin ya anggapo lay mas maganat nen say pangipulong ed maong a balita?

◻ Anton insentibo pian manpulong a magangganat so iiter na 1996 Serbisyon Taon a Report?

◻ Panon a manseserbi si Kristo bilang ‘tatak a singsing’ nen Jehova?

[Kahon ed pahina 15]

Panagani “Manlapu ed Sampot na Dalin”

DIAD Isaias 43:6, nabasa tayo so ganggan nen Jehova: “Agmo pokpokan. Yakar mo so saray anak [ko] a lalaki a manlapu ed arawi, tan saray anak [ko] a bibii a manlapu ed sampot na dalin.” Sayan teksto so walaan na nikadkaduman kasumpalan natan ed Mamabukig ya Europa. Alaen pan alimbawa, say datin Komunistan bansa a Moldova. Walaray purok a say kapalduay populasyon to et Tastasi la natan. Kaukolan a manbiahi ira na andukey pian makaromog na teritoryan panpulongan, balet sikaray mansasagpot! Dakel a manangipalapag ed sarayan kongregasyon so ananak na atateng a nibantak ed Siberia diad asasakbay a dekada na 1950. Natan say pamilya ra so mangiyuuna ed panagani. Diad 12,565 a manangipalapag, 1,917 so abautismoan ed apalabas a taon. Wala so 43 a kongregasyon a kada sakey et walaan na ngalngali 150 a manangipalapag, tan saray sirkiton apatira so nagmaliw a walora ed balon serbisyon taon.

akatantanda met et say ilalaknab ed Albania. Ditan et pigaran matoor a Tastasi et sinungdoan da so sankaruksaan a diktador ed loob na ngalngali 50 taon. Pigara ed sikara so pinatey. Ipapanonot na saya so sipan nen Jesus: “Agka ontakot na mogmo ed saray bengatla ya asingger la ya akuen mo. Nia! Say Diablo asingger lay pangyan to ed arum ed sikayo ed panangipangawan pian nasali kayo . . . Mansiansia ka angga ed patey, tan siak iter ko ed sika so balanget na bilay.” (Apocalipsis 2:10; nengnengen met so Juan 5:28, 29; 11:24, 25) Anto so naiimano tayo natan ed Albania? Tuan sankaimanoy kasumpalan na sipan nen Jehova a naromog ed Isaias 60:22: “Say daiset magmaliw naani a sanlibo”! Nen 1990 saksakey labat a manangipalapag so nanreport ed serbisyo diad Albania. Balet, dakel a “komikimey” manlapud Italya tan arum a daldalin so inmebat ed imbitasyon nen Jesus: “Onla kayo sirin tan manggawa kayo na saray babangatan ed amin . . . , a binyagan yo ra.” (Mateo 28:19; Lucas 10:2) Diad panaon na Memoryal na impatey nen Jesus nen 1996, 773 a manangipalapag so aktibo ed lawak, tan adagup na saraya so 6,523 a totoo ed saray tipon na Memoryal, masulok a maminwalo ed bilang na manangipalapag! Makapakelaw iran bilang na inmatendi so nireport manlapud nisulinek iran lugar. Anggaman anggaporay lokal a manangipalapag diman, saray syudad na Kukës tan Divjakë so walaay bilang na inmatendin 192 tan 230. Diad Krujë, a saksakey so manangipalapag to, say presenti et 212. Say 30 a manangipalapag ed Korçë so angabang na saray pasilidad parad masulok a 300. Kayarin akaloob itan a bilang ed auditoryum, pinapaway so kaaruman a 200 lapud anggapo lay puesto. Talagan aanien la so sakey ya uma!

Onia so report manlapud Romania: “Legan a sikami so mankakabkaabungan, akaabet kami na toon angibagan sikatoy sakey ed Tastasi nen Jehova tan manaayam ed melag a baley, ya unong ed pikakabat mi et anggapo so Tastasi. Inkuan to ed sikami a nilikud ed sikato wala ni so 15 a totoo a dakel lan taon a sikaray manmimiting kapag Huebes tan Simba tan ginapoan da met lay panpupulong ed kabkaabungan. Diad tinmumbok ya agew linma kami ed satan a baley. Manaalagar ed sikami duaran kuarto a wadman so 15 lalaki, bibii, ugugaw ya angawat na 20 a libro tan 20 ed sankabaloan iran magasin. Indemostra mi ed sikara so panangikondukta na panangiyaral na Biblia. Nankakasakey kamin angansion tan ineebatan iray sankaganatan a tepet da. Impatua na mangidadaulo na grupo: ‘Pigaran agew labat, akaluan nampikasi ak ed si Jehova a mangibaki na pastol, et naebatan so pikakasik.’ Agaylay liket mi, tan nen onsipot kami la, singa sakey ya ulilan aromog ton siansiay ama to, inkuanto: ‘Ipangasin agyo kami lilingwanan. Pawilen yo kami lamet!’ Ginawa mi itan, tan natan pitoran panangiyaral ed Biblia so nikokondukta ed satan a baley. Diad dakel a balon teritorya, nigagapo so kimey diad makapakelkelaw a paraan tekep na literatura ed Biblia, ya aapresiaen a tuloy, tan ipapanengneng na saya a say kimey so walaan na madibinon lapuan.”

[Tsart ed pahina 18-21]

1996 SERBISYON TAON A REPORT NA SARAY TASI NEN JEHOVAH ED SANKAMUNDOAN

(Nengnengen so tomo)

[Saray litrato ed pahina 16, 17]

‘Say mabli iran bengatla ed amin a nasyon’ so natitipon diad saray Isla ed Dayat (1), Abalaten ya Amerika (2), Aprika (3), Asia (4), Amianen ya Amerika (5), tan Europa (6)