Kapitulo Katorse

Panon so Pangiwawanwan nen Jehova ed Organisasyon To?

1. Anton impormasyon nipaakar ed organisasyon nen Jehova so ipaparungtal na Biblia, tan akin ya importante itan ed sikatayo?

KASIN walaan na organisasyon so Dios? Ibabaga na apuyanan a Kasulatan a wala. Diad Salita to, inikdan to itayo na saray pasimar ed makapakelaw a mangatatawen a kabiangan na satan ya organisasyon. (Ezequiel 1:1, 4-14; Daniel 7:9, 10, 13, 14) Anggaman agtayo nanengneng iyan agnanengneng a kabiangan, aapektaan ton tuloy iray tuan managdayew natan. (2 Arari 6:15-17) Say organisasyon nen Jehova so walaan met na nanengneng a kabiangan, diad dalin. Tulongan itayo na Biblia pian natalosan no anto itan tan no panon so pangiwawanwan nen Jehova ed satan.

Pakabidbiran ed Nanengneng a Kabiangan

2. Anton balon kongregasyon so pinawala na Dios?

² Say nasyon na Israel so kongregasyon na Dios ed loob na 1,545 a taon. (Gawa 7:38) Balet ta agsinumpal na Israel iray ganggan na Dios tan impulisay da so mismon Anak to. Bilang nansumpalan, impulisay nen Jehova itan a kongregasyon tan inkaindan to. Imbaga nen Jesus ed saray Judio: “Nia, say abung yo nataynan ed sikayo ya andi lugan.” (Mateo 23:38) Kanian pinawala na Dios so sakey a balon kongregasyon, ya akigawaan to na balon sipanan. Sayan kongregasyon so tibukelen na 144,000 a pinili na Dios a mikasakey ed Anak to diad tawen.​—Apocalipsis 14:1-4.

3. Anto so agawa nen Pentecostes 33 K.P. bilang mabitar ya ebidensyan uusaren la na Dios natan so sakey a balon kongregasyon?

³ Saray inmunan membro na satan a balon kongregasyon so nilanaan na masanton espiritu nen Jehova nen Pentecostes 33 K.P. Nipaakar ed saman a makatantandan agawa, nabasa tayo: “Et sanen sinmabi agew na Pentecostes, walara ya amin ya atipon ed saksakey a pasen, et kapagdakan sinmabi a nanlapu ed tawen so sakey a tanol a singa sakey a dagem a mabiskeg a sinmabi a maksil, et pinano to so sankaabungan a kawalaan dan akayurong. Et pinmatnag ed sikara so dila-dila na apoy a niutob, et dinmapo ed tapew na sinansakey ed sikara, et sikaray napno ya amin na espiritu santo.” (Gawa 2:1-4) Sirin say espiritu na Dios so angiter na mabitar ya ebidensya a saya natan so ulop na totoon usaren na Dios a manumpal ed gagala to diad panangiwanwan nen Jesu-Kristo ed tawen.

4. Siopa natan so manitibukel ed nanengneng ya organisasyon nen Jehova?

⁴ Natan, wala lambengat so nakdaan na 144,000 diad dalin. Balet bilang kasumpalan na propesiya na Biblia, “sakey a baleg ya ulop” na “arum a karnero,” a minilyon ira, so nikasakey a miulop ed alanaan a nakdaan. Si Jesus, say Maabig a Pastol, so angikasakey ed sarayan arum a karnero ed nakdaan ta pian tibukelen da so sakey labat a pulok a walad panangidaulo to bilang sakey a Pastol da. (Apocalipsis 7:9; Juan 10:11, 16) Sarayan amin so manibukel na sakey a nankakasakey a kongregasyon, say nanengneng ya organisasyon nen Jehova.

Teokratikon Inkasangal

5. Siopa so mangiwawanwan ed organisasyon na Dios, tan panon?

⁵ Say Makasulatan a balikas a “say kongregasyon na mabilay a Dios” so mangipapabitar no siopa so mangiwawanwan ed satan. Say organisasyon et teokratiko, odino uuleyan-na-Dios. Iwawanwan nen Jehova so totoo to diad panamegley nen Jesus, say sakey a tinuro To ya agnanengneng ya Ulo na kongregasyon, tan diad panamegley na impuyan To a Salita, say Biblia.​—1 Timoteo 3:14, 15, NW; Efeso 1:22, 23; 2 Timoteo 3:16, 17.

6. (a) Panon a nipatnag so mangatatawen a panangiwanwan ed kongregasyon nen inmunan siglo? (b) Antoy mangipapanengneng a si Jesus so siansia nin Ulo na kongregasyon?

⁶ Say ontan a panangiwanwan so mapatpatnag nen Pentecostes. (Gawa 2:14-18, 32, 33) Nipatnag itan sanen inwanwan na anghel nen Jehova so kilaknab na maong a balita ed Aprika, sanen inwanwan na boses nen Jesus so inkakomberte nen Saulo na Tarsus, tan sanen inggapo nen Pedro so kimey na panagpulong ed saray Gentiles. (Gawa 8:26, 27; 9:3-7; 10:9-16, 19-22) Anggaman ontan, sinmabi panaon, anggapo laray boses a narengel manlapud tawen, anggapo laray anghel ya anengneng, anggapo laray niiter a mamilagron langkap na espiritu. Ingen, insipan nen Jesus: “Nia! Wala ak ed sikayo dia ed amin a panaon ya angga ed kasampotan na sistema na bengabengatla.” (Mateo 28:20, NW; 1 Corinto 13:8) Natan, bibidbiren na saray Tastasi nen Jehova so panangiwanwan nen Jesus. No anggapo itan, imposible so kiyabawag na mensahe na Panarian ed arap na pirmin pambusol.

7. (a) Siopay tugyopen na “matoor tan makabat ya aripen,” tan akin? (b) Anton kimey so niiter ed “aripen”?

⁷ Sakbay ni na impatey to, imbaga nen Jesus ed saray babangatan to so nipaakar “ed matoor tan makabat ya aripen” a pangimatalkan to na nikaduman responsabilidad. Satan ya “aripen” so presente sanen say Katawan so nampatanir a linma’d tawen tan siansia nin mamasyan mankimey diad agnanengneng ya ipawil nen Kristo ed pakayari na Panarian. Say ontan a deskripsion so mairap ya ontukoy ed sakey, noagta talagan ontutukoy ed alanaan a kongregasyon nen Kristo. Lapud sikara so sinaliw to ed dala to, sikara so tinukoy nen Jesus bilang “aripen” to. Ginanggan to iray kabiangan na satan a manggawa na babangatan tan pakanen da iran mantultuloy, ya itaryaan da ira “na [espiritual] a tagano ed panaon a kinepeg to.”​—Mateo 24:45-47; 28:19; Isaias 43:10; Lucas 12:42; 1 Pedro 4:10.

8. (a) Antoray responsabilidad natan na aripen a klase? (b) Akin ya importante so ikiwas tayo ed bangat diad panamegley na paralanan na Dios?

⁸ Lapud matoor a gagawaen na aripen a klase so kimey na Katawan diad agnanengneng ya impawil to nen 1914, walay ebidensya a nimatalek ed sikara so apalaknab iran responsabilidad nen 1919. Diad inlabas na saray taon nanlapula’d saman et panaon a para ed sankagloboan a panagtasi ed Panarian, tan natitipon so baleg ya ulop na saray managdayew ed si Jehova parad kiliktar da ed baleg a kairapan. (Mateo 24:14, 21, 22; Apocalipsis 7:9, 10) Kaukolan met na saraya so espiritual a tagano, tan satan so ipaparungo ed sikara na aripen a klase. Pian napaliket si Jehova, kaukolan tayo sirin ya awaten so bangat a nitatarya ed panamegley na sayan paralanan tan onkiwas a mitunosan ed satan.

9, 10. (a) Nen inmunan siglo, anto so walan uksoyan diad panresolbi ed saray tepet nipaakar ed doktrina tan panangiwanwan ed panangipulong na maong a balita? (b) Anton uksoyan natan parad panangiwanwan ed saray kimey na saray Tastasi nen Jehova?

⁹ No maminsan, onlesa iray tepet nipaakar ed doktrina tan uksoyan. Antoy gawaen ey? Ibabaga ed sikatayo na Gawa kapitulo 15 no panon ya aresolbi so sakey ya isyu nipaakar ed saray akombertin Gentil. Say pamaakaran so impanon ed saray apostol tan mamasiken ed Jerusalem, a manseserbi bilang sentron mananguley ya ulop. Saraman a lalaki so nalilingo met, balet sikara so inusar na Dios. Inusisa ra so kasulatan a mitukoyan ed isyu pati say ebidensya na ikukurang na espiritu na Dios diad impangilukas ed lawak a Gentiles. Insan ira’d satan nandesisyon. Benendisyonan na Dios iman ya uksoyan. (Gawa 15:1-29; 16:4, 5) Saman a sentron mananguley ya ulop so anuro na saray indibidual ya imbaki pian mangilaknab na panangipulong ed Panarian.

¹⁰ Diad panaon tayo say Mananguley ya Ulop na nanengneng ya organisasyon nen Jehova so tinugyop na alanaan-na-espiritun agagin lalaki a nanlapud nanduruman daldalin tan atipon ira ed sankamundoan a hedkuarter na saray Tastasi nen Jehova. Diad silong na inkaulo nen Jesu-Kristo, ilalaknab na Mananguley ya Ulop so puron panagdayew ed amin a dalin, ya iwawanwan da so kimey na panagpulong na saray Tastasi nen Jehova diad pigamplon libulibon kongregasyon. Mipakna iray kabiangan na Mananguley ya Ulop ed kinen apostol Pablo, a nansulat ed saray kaparan Kristiano: “Aliwan say uleyan mi pananisia yo, noag ingen mananulong kami ed liket yo; ta lapu ed pananisia siaalagey kayo.”​—2 Corinto 1:24.

11. (a) Panon so inkaturo na saray mamatatken tan ministeryal a lingkor? (b) Akin a sikatayo so nepeg a mikooperan tuloy ed saray aturo?

¹¹ Saray Tastasi nen Jehova ed sankamundoan so paiwawanwan ed Mananguley ya Ulop diad pamili ed saray kualipikadon agagin lalaki a magmaliw met ya autorisadon manuro na mamatatken tan ministeryal a lingkor a mangasikaso ed saray kongregasyon. Saray kakaukolanen para ed saramay naturo so nidatak ed Biblia tan nodnonoten a saratan a lalaki so ag-ayadyari tan nalilingo. Saray mamatatken a mangirekomenda tan saramay manuro so manakbat na seryoson responsabilidad ed arap na Dios. (1 Timoteo 3:1-10, 12, 13; Tito 1:5-9) Kanian, sikara so manpikasi pian patulongan ed espiritu na Dios tan paiwanwan ira ed apuyanan a Salita to. (Gawa 6:2-4, 6; 14:23) Ipanengneng tayo so apresasyon ed sarayan ‘langkap a lalaki,’ ya ontutulong ed sikatayon amin a makarapat ed ‘inkasaksakey diad pananisia.’​—Efeso 4:8, 11-16.

12. Panon so panguusar nen Jehova ed saray bibii diad teokratikon uksoyan?

¹² Ididirihe na Kasulatan a say panangasikaso ed kongregasyon so nepeg a parad lalaki. Saya so aliwan panleglemew ed bibii, lapud arum ed sikara so mananawir ed mangatatawen a Panarian, tan malaem so nagagawaan da ed kimey na panagpulong. (Salmo 68:11) Ontan met, diad matoor a panangasikaso na bibii ed saray responsabilidad da ed pamilya, lalon magmaong so niiiter dan kagalangan ed kongregasyon. (Tito 2:3-5) Balet say panagbangat ed kongregasyon so parad saray lalaki ya aturo a manggawa ed satan.​—1 Timoteo 2:12, 13.

13. (a) Antoy ipapaseseg na Biblia a nepeg a panmoria na saray mamatatken nipaakar ed posisyon da? (b) Anton pribilehyo so nayarin pibiangan tayon amin?

¹³ Diad mundo, say sakey a mamebemben na prominentin posisyon so ipasen ya importante, balet diad organisasyon na Dios say totontonen et saya: “Say kamelagan ed sikayo ya amin, sikato lanlamang so baleg.” (Lucas 9:46-48; 22:24-26) Sisimbawaen na Kasulatan iray mamatatken ya ag-ira pakakatawan ed saramay tawir na Dios balet, imbes, magmaliw iran ehemplo ed pulok. (1 Pedro 5:2, 3) Aliwan diad pigara labat ya apili, noagta amin a Tastasi nen Jehova, lalaki tan bibii, so walaan na pribilehyon mangirepresenta ed Soberano na talba, a sipapaabeban mansalita ed ngaran to tan mangibaga ed totoo diad amin a pasen nipaakar ed Panarian to.

14. Diad pangusar ed nisita iran teksto, singbaten iray tepet a nilista diad sampot na parapo.

¹⁴ Maabig ya itepet tayo ed inkasikatayon dili: ‘Kasin tuan papablien ko so panangiwanwan nen Jehova ed nanengneng ya organisasyon to? Kasin saray awawey ko, panagsalitak, tan kiwakiwas ko so mangipapatnag ed satan?’ Say panmorekdek ed onggendan iran punto so makatulong ed balang sakey ed sikatayo a manggawa na ontan a panangusisa.

No tuan manpapasakop ak ed si Kristo bilang Ulo na kongregasyon, sirin, a singa nipanengneng ed onggendan iran teksto, anto so kaukolan kon gawaen? (Mateo 24:14; 28:19, 20; Juan 13:34, 35)

Sano papablien kon awaten iray espiritual a probisyon panamegley na aripen a klase tan say Mananguley ya Ulop to, siopa so narerespetok? (Lucas 10:16)

Panon so nepeg a pantrato na amin ed kongregasyon, nagkalalo la ed saray mamatatken, ed balang sinansakey? (Roma 12:10)

15. (a) Diad panamegley na awawey tayo ed nanengneng ya organisasyon nen Jehova, anto so ipapatnag tayo? (b) Antoray pankanawnawa a napaneknekan tayon say Diablo so matila tan napagayaga so puso nen Jehova?

¹⁵ Sikatayo so iwawanwan nen Jehova natan diad panamegley na nanengneng ya organisasyon ton idadauloan nen Kristo. Say awawey tayo ed sayan uksoyan so mangipanengneng no panon so liknaan tayo nipaakar ed isyu na inkasoberano. (Hebreos 13:17) Idudugdog nen Satanas a say manunan pampapagaan tayo et say laman tayon dili. Balet no sikatayo so manserbi ed anggan antokaman a paraan a kaukolan tan paliisan iray bengatlan agmanepeg a mangipaimano ed sikatayon dili, papaneknekan tayo a say Diablo so matila. No aroen tan respetoen tayo iramay mangidadaulo ed sikatayo balet ta agtayo ‘ipasirayew iray personalidad a para ed dilin pankaabigan tayo,’ napagayaga tayo so puso nen Jehova. (Judas 16; Hebreos 13:7) Diad pagmaliw a matoor ed organisasyon nen Jehova, ipapanengneng tayo a si Jehova so Dios tayo tan sikatayo so nankakasakey diad panagdayew ed sikato.​—1 Corinto 15:58.

Repason Pantongtongan

• Anto so nanengneng ya organisasyon nen Jehova natan? Anto so gagala to?

• Siopa so aturon Ulo na kongregasyon, tan diad panamegley na antoran nanengneng ya uksoyan so maaron pangiwawanwan to ed sikatayo?

• Antoran maabig ya awawey so nepeg tayon bayuboan para ed saramay wala ed organisasyon nen Jehova?

[Saray litrato ed pahina 133]

Iwawanwan itayo nen Jehova diad panamegley na nanengneng ya organisasyon to dia ed panangidaulo nen Kristo