Manlingkor ed Dios Tekep na Mabulos ya Espiritu

“SILILIKET ak a mangusar tan sigpot a pausar parad saray kamarerwa yo,” so insulat nen apostol Pablo. (2 Corinto 12:15, NW) Antoy labay ya ibaga na sarayan salita ed sika nipaakar ed panmoria tan awawey a nepeg a panggunaetan a bayuboan na saray lingkor nen Jehova? Unong ed sakey ya iskolar na Biblia, sanen insulat nen Pablo iratan a salita ed saray Kristiano ed Corinto, ibabaga ton: “Mabulos ak a mangusar ed biskeg ko, tan panaon, tan bilay, tan amin a walad siak parad pankaabigan yo, a singa malikeliket a gagawaen na sakey ya ama parad ananak to.” Si Pablo so akaparaan a “sigpot a pausar,” odino “mangibunek tan mangiyupot ed biskeg to,” no satan so kakaukolanen pian nasumpal toy Kristianon ministeryo to.

Nagkalalo ni, ginawa nen Pablo iyan amin a “sililiket.” Sikatoy “nagnap a mabulos” a manggawa ed satan, so impangikuan na The Jerusalem Bible. Komusta ka met? Kasin mabulos mon usaren so panaon, biskeg, saray abilidad, tan kayamanan mo diad panlingkor ed si Jehova a Dios tan ed saray pankaabigan na arum, anggano say panggawa ed satan et mankabaliksan na ‘pangibunek tan pangiyupot ed biskeg mo’ no maminsan? Tan kasin gawaen mo itan a “sililiket”?

Agdan Balot Labay so Manlingkor

Maslak ya indibidual so aglabat masuyat a manlingkor ed Dios noagta sigpot ya agda labay a gawaen itan. Sikaray walaay awawey ya andiay-otang a linawa, masiblet a panagbukbukor, rebelyoso ni ingen. Sinagyat nen Satanas si Adan tan Eva ed ontan a paraan na panag-isip. Lingon inkuanto a sikaray ‘magmaliw a singa Dios, ya amta ra so maong tan mauges’​—a makapandesisyon iran bukor ed no antoy duga tan aliwa. (Genesis 3:1-5) Saramay walaan met na ontan ya awawey natan so manisip a kaukolan a nawalaan ira na sigpot a kawayangan pian gawaen da so labalabay da ya anggapoy antokaman ya obligasyon ed Dios odino pibabali to. (Salmo 81:11, 12) Labay dan usaren so amin a walad sikara pian gegemtanen iray pankaabigan dan dili.​—Uliran 18:1.

Anganko et aliwan onia so panmoriam. Nayarin masimoon mon aapresiaen so regalon bilay a panggagayagaan mo natan tan nagkalalo la say makapakelkelaw ya ilalon andi-anggaan a bilay diad paraison dalin. (Salmo 37:10, 11; Apocalipsis 21:1-4) Nayarin misalsalamat kan maong ed si Jehova lapud kaabigan to ed sika. Balet kaukolan tayon amin so manalerto ed kapeligroan a nayarian nen Satanas a pikeweten so kaisipan tayo diad paraan a say serbisyo tayo et agla abobonan na Dios. (2 Corinto 11:3) Panon iyan nagawa?

Kakaukolanen so Mabulos a Panaglingkor

Kaukolan nen Jehova so mabulos, intiron-puson panaglingkor. Agto itayon balot pipiliten a manggaway linawa to. Si Satanas so manggaway anggaay nayarian to a desdesen odino sagyaten iray totoo a manggaway panlabayan to. Nipaakar ed panaglingkor ed Dios, sasalambiten na Biblia so obligasyon, saray ganggan, kakaukolanen, tan arum nira. (Eclesiastes 12:13; Lucas 1:6) Ingen, say manunan motibo tayo ed panlingkor ed Dios et lapud sikatoy inaro tayo.​—Exodo 35:21; Deuteronomio 11:1.

Anggan panon lay impangusar nen Pablo ed inkasikato ed serbisyo’d Dios, kabat ton magmaliw ya anggapoy kakanaan na saya ‘no anggapoy aro to.’ (1 Corinto 13:1-3) Sano tutukoyen na saray managsulat na Biblia iray Kristiano bilang ariripen na Dios, agda tutukoyen so andiay-ligsan serbisyo lapud napapaskar labat. (Roma 12:11; Colosas 3:24) Say kabaliksan na satan et mabulos a panagpasakop lapud aralem, impapuson panangaro ed Dios tan ed Anak to, si Jesu-Kristo.​—Mateo 22:37; 2 Corinto 5:14; 1 Juan 4:10, 11.

Say panaglingkor tayo ed Dios so nepeg a pakapatnagan na aralem a panangaro ed totoo. Onia so insulat nen Pablo ed kongregasyon na Tesalonica: “Mauyamo kami ed pegley yo, a singa sakey a sigsiwa a managano na dilin anak to.” (1 Tesalonica 2:7) Diad dakel a daldalin natan, saray kainaan so walaan na legal ya obligasyon a mangasikaso ed ananak da. Balet seguradon aggagawaen iya na maslak a kainaan pian natulok labat so ganggan. Imbes, gagawaen da itan lapud papablien daray anak da. Siempre, say sakey a mangaasikason ina so malikeliket a mangisakripisyo na baleg parad ananak to! Lapud walaan si Pablo na miparan “matamoy a panangaro” ed saraman so pinulongan to, sikatoy “aliketan a maong” (“mabulos,” King James Version; “nanliket,” New International Version) a mangusar ed mismon bilay to diad panulong ed sikara. (1 Tesalonica 2:8, NW) Say aro so mamapakiwas ed sikatayo a mangalig ed ehemplo nen Pablo.​—Mateo 22:39.

Komusta Balet so Masuyat a Serbisyo?

Siempre, agtayo nepeg ya abuloyan a nadaeg na aro’d dili so panangaro tayo’d Dios tan ed totoo. Ta no andi, wala so peteg a kapeligroan a nayarin paspasaray tan masuyat so serbisyo tayo. Nabayuboan tayo ni ingen so panimbel na linawa, paningongot lapud agtayo nayariay manbilay a sigpot a mitunosan ed dili iran pilalek tayo. Onia so agawa ed pigaran Israelita a naandi aro ra’d Dios balet ta siansian mangisasaklang na panaglingkor ed sikato bilang obligasyon labat la. Antoy resulta ey? Say panlingkor ed Dios so nagmaliw a “makapakesaw” parad sikara.​—Malaquias 1:13, NW.

Antokaman ya iyapay ed Dios so nepeg a lawas ya “anggapo so pamalawan,” anggapoy depekto, samay “sankaabigan.” (Levitico 22:17-20; Exodo 23:19, NW) Balet, imbes ya iter da ed si Jehova so sankalimgasan ed ayayep da, saray totoo ed panaon nen Malaquias so angiyapay ed saramay agda labalabay. Antoy reaksion nen Jehova? Inkuan to ed saray saserdote: “No sikayo mangibagat kayo na bulag a nipaakar a bagat [ikuan yo], sikato so aliwan mauges! Et no mangibagat kayo na piley tan mabeblay, sikato so aliwan mauges! Sikato natan so ipatnag mo ed makauley mo; napaliket naani ta ed sika? . . . Et inyakar yo so nala ed panamegley na duksa, tan say piley, tan say mabeblay; dia ed ontan yakar yo so bagat: awaten ko ta so saya ed lima yo?”​—Malaquias 1:8, 13.

Panon a nayarin nagawa iya ed siopaman ed sikatayo? Saray bagat tayo so nayarin magmaliw a “makapakesaw” ed sikatayo no andian itayo na peteg a mabulbulos a puso tan espiritu. (Exodo 35:5, 21, 22; Levitico 1:3; Salmo 54:6; Hebreos 13:15, 16) Alimbawa, kasin aawaten nen Jehova iray kera-kera tayon oras?

Kasin naisip na siopaman ya awaten na Dios itan no say walaan na maong ya intension a membro na pamilya odino maseseg a Levita et pinaskar toy agmabulos ya Israelita a mamili ed sankalimgasan ya ayep to pian ibagat anta agto talagan labay ya iyapay itan? (Isaias 29:13; Mateo 15:7, 8) Impulisay nen Jehova so ontan iran bagat pati met iray totoon angiyapay ed saratan.​—Oseas 4:6; Mateo 21:43.

Maliket a Panggawa ed Linawa na Dios

Pian niyapay ed Dios so serbisyon awaten to, nepeg tayon tumboken so ehemplo nen Jesu-Kristo. Inkuanto: “Agko anapen so linawak a dili, noag say linawa na saman so angibaki dia ed siak.” (Juan 5:30) Agamoran nen Jesus so baleg a liket diad mabulos a panaglingkor ed Dios. Sinumpal nen Jesus so mapropetiko iran salita nen David: “Makaliket ak a mangunor na linawam, O Dios ko.”​—Salmo 40:8.

Anggaman maliket si Jesus a manggawa na linawa nen Jehova, aliwan naynay a mainomay iya. Nonoten pa so agawa sakbay na kaerel, kasubok, tan ipatey to. Legan a walad hardin na Getsemani, si Jesus so “maermen a tuloy” tan ‘nanirap a pirmi.’ Agayla so desdes ed emosyon to lapud, legan a sikatoy manpipikasi, “say linge’to singa angkakabaleg a tedter na dala a sinmaklayat angga ed dalin.”​— Mateo 26:38; Lucas 22:44.

Akin ya asagmak nen Jesus so ontan ya ot-ot? Seguradon aliwan lapud dilin-interes odino antokaman ya inkamasuyat to ed panggaway linawa na Dios. Sikatoy akaparaan ya ompatey, a pirmi ni ingen so reaksion to ed saray salita nen Pedro a: “Sikato so niarawi komon ed sika, Katawan; saya agkomon nagawa anggan kapigan ed sika.” (Mateo 16:21-23) Say kapapagaan nen Jesus et say epekto na ipatey to bilang mabanbanday a kriminal ed si Jehova tan ed masanton ngaran To. Amta nen Jesus a nasakitan a maong si Ama to diad pakanengneng to’d inadaro ton Anak a tratoen ed ontan a marukruksan paraan.

Atalosan met nen Jesus a manasingger lay makabaliksan a panaon diad pakasumpal na gagala nen Jehova. Say matoor a katutulok ed saray ganggan na Dios so mamaneknek a seguradon nayarian komon nen Adan a gawaen met itan. Say katooran nen Jesus so mangiwalwal ya intiramintin palsoy panangipilit nen Satanas a saray totoon nasusubok so agmabulos tan agmatoor a manlingkor ed Dios. Diad panamegley nen Jesus, deralen nen Jehova si Satanas tan ekalen toray epekto na impanrebeldi to.​—Genesis 3:15.

Agaylan abalbaleg a responsabilidad so nipasakbat ed si Jesus! Say ngaran na Ama to, say sankatalbaan a kareenan, tan say kilalaban na sankatooan so akapapeg ya amin ed katooran nen Jesus. Lapud impakamoria ed saya, sikatoy nampikasi: “O Amak, no nayari onlabas komon so sayan kopa ed siak; anggaman ontan, aliwan unong ed kaliktan ko, ingen unong ed kaliktan mo.” (Mateo 26:39) Anggan diad silong na pirmin pananesdes, agbalot sinmaew si Jesus ed inkamabulos ton manpasakop ed linawa nen Ama to.

‘Say Espiritu so Malikeliket, Balet say Laman Makapuy’

Lapud anagmak si Jesus na pirmin gonigon ed emosyon legan a manlilingkor ed si Jehova, nailaloan tayo met si Satanas so manesdes ed sikatayo bilang lingkor na Dios. (Juan 15:20; 1 Pedro 5:8) Sakey ni, ag-itayo ayadyari. Kanian anggano mabulos itayon manlingkor ed Dios, aliwan mainomay parad sikatayo a gawaen itan. Anengneng nen Jesus no panon a saray apostol to so akipuligesgesan a manggawa ed amin ya ipapagawa to ed sikara. Kanian no akin ya inkuanto: “Say espiritu tua a sikatoy malikeliket, balet say laman makapuy.” (Mateo 26:41) Anggapoy atawir ton kaleteyan lapud ayadyarin laman to bilang too. Balet, walad kanonotan to so kaleteyan ed laman na saray babangatan to, say ag-inkayadyari ya atawir da ed ag-ayadyarin Adan. Kabat nen Jesus a lapud atawir ya ag-inkayadyari tan resulta na saray limitasyon na too et kaukolan iran mipuligesgesan a manggawa ed amin a labay da diad panaglingkor ed si Jehova.

Kanian nayarin nalikna tayo met so singa alikna nen apostol Pablo, a pirmin agonigon sanen say ag-inkayadyari so angamper ed sigpot a pakapanlingkor to ed Dios. “Wala ed siak so panlabay,” so insulat nen Pablo, “bangbalet say panggawa na kaabigan andi.” (Roma 7:18) Naimano tayo met ya agtayo sigpot a nasumpal so amin a maong iran bengatla a pirawat tayon gawaen. (Roma 7:19) Aliwan lapud masuyat itayo. Satan et lapud kaleteyan na laman a mangamper ni ingen ed saray sankaabigan a sagpot tayo.

Agtayo komon naekalan na ilalo. No walaan itayo na masimoon tan inkamabulos a manggawa ed anggaay nayarian tayo, maseguron abobonan na Dios so serbisyo tayo. (2 Corinto 8:12) Komon ta ‘gawaen tayoy anggaay nayarian tayo’ ya aligen so awawey nen Kristo diad sigpot a pampasakop ed linawa na Dios. (2 Timoteo 2:15, NW; Filipos 2:5-7; 1 Pedro 4:1, 2) Tumangan tan tulongan nen Jehova so ontan a mabulos ya espiritu. Ikdan to itayo na “say pakayari ed labas na gendat” pian natalonaan iray kaleteyan tayo. (2 Corinto 4:7-10, NW) Diad tulong nen Jehova, singa itayo si Pablo a ‘sililiket a mangusar tan sigpot a pausar’ ed mablin serbisyo ed Sikato.

[Litrato ed pahina 21]

Mabulos a nanlingkor si Pablo ed Dios diad anggaay nayarian to

[Litrato ed pahina 23]

Anggan diad silong na pirmin pananesdes, ginawa nen Jesus so linawa nen Ama to