Inyawat tan Inerel si Kristo

Lampas lay pegley-labi. Nampapaknaan na saray saserdote a bayaran si Judas na 30 piraso na pilak pian iyawat toy Jesus. Kanian inibaan nen Judas so sakey a baleg a grupo na saray manunan saserdote tan Fariseo a mananap ed si Jesus. Kaiba ray grupo na saray armadon Romanon sundalo pati say komandante na militar.

Mapatnag a sanen pinaalis nen Jesus si Judas diad panseselebra day Paskua, sikatoy dinmiretso ed saray manunan saserdote. (Juan 13:27) Tinipon da ray opisyal da tan grupo na saray sundalo. Nayarin say akaunan angitagaran nen Judas ed sikara et diad kuarton nanselebraan nen Jesus tan saray apostol to na Paskua. Balet natan et dinmalan so grupo ed Lawak na Kidron tan amaarap irad hardin. Likud ed saray armas, wala met iray awit dan lamparaan tan silew, a pursigido iran anapen si Jesus.

Legan iran mamapaarap ed Palandey na Saray Olibo, si Judas a walad unaan na grupo et segurado no iner so pakaromogan dad si Jesus. Diad apalabas a sakey simba, nampawilpawil si Jesus tan saray apostol ed Betania tan Jerusalem, tan mabetbet iran onsasamar ed hardin na Getsemani. Balet natan et labi la, tan si Jesus et nayarin walad silong na saray kiew na olibo diad hardin. Kanian panon a nabidbir na saray sundalo si Jesus anta agda ni anengneng? Pian natulongan ira, angiter na tanda si Judas. Imbaga to: “No siopa may angoban ko, sikato man; erel yo tan bantayan yon maong sano awiten yo la.”​—Marcos 14:44.

Nen akasabi la rad hardin, anengneng nen Judas si Jesus a kaiba to ray apostol to tan dinago ton tampol. “Maabig a labi ed sika, Rabbi!” kuan nen Judas, insan inangoban toy Jesus. Tinepet nen Jesus: “Akin et wadia ka?” (Mateo 26:49, 50) Inebatan nen Jesus so mismon tepet to, a kuan to: “Judas, kasin inangoban moy Anak na too pian traidoren mo?” (Lucas 22:48) Balet natan et agla inimano nen Jesus iyan traidor!

Inmasingger si Jesus ed saray akabemben na silew tan lamparaan tan tinepetan to ra: “Siopay aanapen yo?” Walay inmebat: “Si Jesus a Nazareno.” Makmakpel ya imbaga nen Jesus: “Siak man.” (Juan 18:4, 5) Lapud abigla ra, sikaray atumba.

Imbes a samboten nen Jesus so ombatik ed bilunget, tinepetan to ra lamet no siopay aanapen da. Sanen imbaga da lamet, “Si Jesus a Nazareno,” sikatoy kalmadon nansalita: “Imbagak lad sikayo a siak iman. No siak sirin so aanapen yo, paulyan yo la rayan lalaki.” Anggan diad onian situasyon, sankanonot nen Jesus so imbaga to ya anggapoy anggan sakey a nabalang ed sikara. (Juan 6:39; 17:12) Prinotektaan nen Jesus iray matoor ya apostol to tan anggapoy anggan sakey ya abalang “nilikud ed samay anak na kadederal”​—si Judas. (Juan 18:7-9) Kanian kinerew ton paulyanan da la ray matoor a patumbok to.

Legan ya onaasingger iray sundalo ed si Jesus, amta la na saray apostol no antoy nagagawa. Tinepet da: “Katawan, usaren mi la ray espada mi?” (Lucas 22:49) Antis nin makaebat si Jesus, inusar nen Pedro so sakey ed saray duaran espada ya awit na saray apostol. Sinigbat toy Malco, ya aripen na atagey a saserdote, tan atapyas so kawanan a layag to.

Diniwit nen Jesus so layag nen Malco tan pinaabig to. Insan imbangat toy sakey ya importantin leksion, sanen ingganggan toy Pedro: “Ipawil moy espadam ed kaluban to, ta amin iramay mangusar na espada et ompatey ed espada.” Mabulos si Jesus a naerel, ta imbaga to: “Panon a nasumpal so Kasulatan a nepeg a nagawa ed onian paraan?” (Mateo 26:52, 54) Imbaga to ni: “Agta kaukolan kon inumen so kopa ya inter na Ama ed siak?” (Juan 18:11) Labay nen Jesus a gawaen so linawa na Dios parad sikato, anggano ompatey.

Tinepet nen Jesus ed saray totoo: “Kasin linma kayo dia pian erelen yo ak a singa sakey a matakew, a wala ni ray awit yon espada tan pekpek? Inagew-agew ak ya akayurong a manbabangat diad templo, balet agyo ak inerel. Ingen agawa iyan amin pian nasumpal iray sulat na saray propeta.”​—Mateo 26:55, 56.

Si Jesus et inerel tan binalor na saray sundalo, komandante na militar, tan saray opisyal na saray Judio. Sanen anengneng iya na saray apostol, batik ira. Balet, walay “kalangweran a laki”​—nayarin say disipulon si Marcos​—a nansiansia tan akiulop ed totoo pian ontumbok ed si Jesus. (Marcos 14:51) Abidbir da yan kalangweran a laki, tan sinalin erelen na saray totoo, kanian intilak toy kawes ton linen tan batik.