Sankasaolan tan Sankaugesan Lan Bista

ANGGAPO lay kaso a kabkabat a singa saya. No bilang ta wala et mataltalag. Diad apatiran salaysay na Biblia a tatawagen ya Ebanghelyo, nabasa iray detalye na impan-aresto, impan-usay, tan impamatey ed si Jesu-Kristo. Akin et nepeg ya interesado ka ed saya? (1) Lapud inkuan nen Jesus ed saray disipulo to ya nodnonoten day impatey to, sirin et importante so bista odino impan-usay ed sikato ya angitonton ed impatey to; (2) lapud nepeg tayon amtaen no kasin tua iramay akusasyon ed si Jesus; tan (3) lapud say sakripisyo nen Jesus diad impangiter to’d bilay to et makagunggona ed sikatayo tan ed arapen tayo.​—Lucas 22:19; Juan 6:40.

Sanen uusayen si Jesus, say Palestina et uuleyan na Roma. Inabuloyan na saray Romano iray Judion lider na relihyon a mangukom ed saray kapara ran Judio base ed sarili ran ganggan, balet nayarin agda ra inikdan na kanepegan a mamatey ed saray kriminal. Kanian say angaresto ed si Jesus et saray Judion lider na relihyon a mamubusol ed sikato balet say amatey et saray Romano. Lapud abapbaingan irayan lider na relihyon ed impanpulong nen Jesus, labay dan sikatoy napapatey. Balet, labay dan papawayen ya legal so pamatey ed sikato. Sanen inusisa na sakey ya abogadon propesor itan ya ginawa ra, tinawag to itan ya “say sankaugesan a krimen ed amin.”a

Nantutumbokan ya Impansaol

Samay Ganggan ya inter ed Israel panamegley nen Moises et tinawag ya “sankaabigan tan sankapraktikalan a sistema na ganggan ed kapiganman.” Balet nen panaon nen Jesus, wala ray inyarum ed satan na saray istrikton Judion lider na relihyon, tan dakel ed saratan so insulat ed Talmud. (Nengnengen so walad kahon ya “Ley na Saray Judio nen Inmunan Siglo,” diad pahina 20.) Diad impan-usay ed si Jesus, kasin atumbok so ganggan na Biblia tan ganggan na saray Judio?

Sanen inaresto si Jesus, kasin walay duaran tasi ya parehoy testimonya ra ed korte? Pian nibagan legal so pan-aresto, kaukolan ya ontan. Diad Palestina nen inmunan siglo, no walay reklamo na sakey a Judio, idalem to itan ed korte legan na regular iran sesyon. Agnayarin mangisampa na reklamo so korte, say nagawaan to labat et imbestigaan so akusasyon. Tan saramay akatasi labat ed krimen so naabuloyan ya onapela. Onggapoy hearing sano walay anggan duaran tasi ya nampakna so ibabaga ra. Say testimonya ra et akusasyon lan mismo, a sengegay pan-aresto. No saksakey so mantasi, ag-itan naabuloyan. (Deuteronomio 19:15) Balet diad kaso nen Jesus, nananap labat na “epektibon paraan” iray Judion lider pian sikatoy napapatey. Tan inerel da sanen walay “maabig a pankanawnawa,” diad labi “ya anggapoy dakel a totoo.”​—Lucas 22:2, 5, 6, 53.

Sanen inarestoy Jesus, anggapo ni insegep ya kaso sumpad sikato. Saray saserdote tan say Sanhedrin, ya atagey a korte na saray Judio, so nananap labat na mantasi sanen naaresto da la. (Mateo 26:59) Agni ra ingen makalmo na duaran tasi ya nampaknay testimonya ra. Sakey ni, agkanepegan na korte so mananap na mantasi. “Say pangukom ed sakey, lalo la no nalalanor so bilay to, ya agda anggan ipaamtay krimen ya iyaakusa ed sikato et talagan makapasanok,” so inkuan na abogado tan author ya si A. Taylor Innes.

Inyakar day Jesus ed abung na datin Atagey a Saserdote a si Anas tan tinetepetan to. (Lucas 22:54; Juan 18:12, 13) Imbaliwala nen Anas so ganggan a saray ambelat ya kaso a patey so dusa, et nepeg ya usayen ed agew, aliwan diad labi. Sakey ni, kaukolan ya say imbestigasyon et gawaen ed publiko, aliwan diad amot. Lapud amta nen Jesus ya ilegal so paniimbestiga nen Anas, inkuan to: “Akin et tetepetan mo ak? Tepetan mo iramay akadngel ed sinalitak ed sikara. Nengneng mo! Amta ra no antoy imbagak.” (Juan 18:21) Say tinepetan to komon et saray akatasi, aliwan samay akusado. No matuan ukom si Anas, diad samay imbaga nen Jesus et apakiwas la komon ya tumboken so dugan proseso, balet ta anggapoy pibabali to ed hustisya.

Lapud saman ya ebat nen Jesus, sikatoy tinampal na sakey ya opisyal, tan aliwan saya labat so maltraton inanosan to ed saman ya labi. (Lucas 22:63; Juan 18:22) Say ganggan ya akarekord ed libro na Biblia a Numeros kapitulo 35 nipaakar ed syudad a salimbengan, so mangibabagan kaukolan a protektaan so akusado anggad agni apruebaan ya nankasalanan. Ontan komon so proteksion ya inter ed si Jesus.

Insan la inyakar si Jesus ed abung na Atagey a Saserdote a si Caifas, ya ditan intuloy so ilegal ya impan-usay diad labi. (Lucas 22:54; Juan 18:24) Talagan ag-intaltalek na saray saserdote so hustisya ta nananap ira na “tilatila a tasi sumpa ed Jesus, pian sikato so papatey da,” balet anggapoy namparan testimonya nipaakar ed imbaga nen Jesus. (Mateo 26:59; Marcos 14:56-59) Kanian, tinetepetan na atagey a saserdote si Jesus pian usarey ebat to ya pangakusa’d sikato. “Anggapoy iyebat mo? Antoy nibagam ed sarayan testimonya ra sumpad sika?” so intepet nen Caifas. (Marcos 14:60) Talagan mauge-uges iyan taktika. Oniay inkuan nen Innes ya abitla nen niman: “Say pantepet ed akusado, tan pananap na lingo ed saray iyebat to et kontra’d hustisya.”

Bilang ebat ed tepet ya: “Kasin sika so Kristo ya Anak na Samay Masanto?” inkuan nen Jesus: “On, siak; tan nanengneng yo so Anak na too ya akayurong diad kawanan na pakapanyari tan onsabi a walad saray lurem na tawen.” Akaromog iran siansia na ituklaw da’d si Jesus. Pinapaway na saray saserdote ya panag-ayew iya ed Dios tan “amin da so angukom ed sikato a manepeg ya ompatey.”​—Marcos 14:61-64.b

Base ed Mosaikon Ganggan, kaukolan a gawaen ed publiko iray panag-usay. (Deuteronomio 22:24; Rut 4:1) Balet say impan-usay da’d si Jesus et pasekreto. Anggapoy nampakpel ya angidepensa ed sikato tan agmet itan inabuloyan. Agda inimbestigaan no kasin tua so imbaga nen Jesus a sikato so Mesias. Agnaikday pankanawnawa ya mananap na mantasi parad sikato. Tan anggapoy botosan ya ginawa na saray ukom no kasin sikatoy nankasalanan odino inosente.

Diad si Pilato

Nayarin anggapoy kanepegan na saray Judio a pateyen si Jesus kanian sikatoy inyakar da’d si Poncio Pilato, say Romanon gobernador. Say unonan tepet nen Pilato et: “Anto so iyaakusa yo ed sayan too?” Lapud amta na saray Judio ya baliwala ed si Pilato so tilan akusasyon da ya panag-ayew, sikatoy sinali dan kombinsien ya sentensiaan si Jesus ya agla imbestigaan. “No sayan too et agmanggagawa na mauges, agmi komon iyawat ed sika,” so kuan da. (Juan 18:29, 30) Agda akombinse si Pilato ed satan ya argumento, kanian apilitan iran nanggaway balon akusasyon: “Aromogan mi iyan too a guguloen toy nasyon mi tan isesebel toy pambayar na saray buis ed Cesar, tan ibabaga to a sikaton mismo so Kristo ya ari.” (Lucas 23:2) Samay reklamo dan panag-ayew et agnaam-amtaan ya asalatay panagtraidor.

Say akusasyon ya “isesebel toy pambayar na saray buis” et katilaan, tan amta da itan. Ta diad tua et say kabaliktaran so imbangat nen Jesus. (Mateo 22:15-22) No diad samay akusasyon dan ipapasen to kunoy sarili ton ari, anengneng a tampol nen Pilato ya singa agmet nayarian na sayan too so manggaway mauges ed Roma. “Anggapoy aromog kon kasalanan to,” so indeklara nen Pilato. (Juan 18:38) Tan tinalindegan to itan sanlegay bista.

Sinali nin unona nen Pilato ya usaren imay tradisyon da ya pangibulos ed sakey a priso diad panaoy Paskua pian nibulos si Jesus. Balet say nansumpalan et si Barabas ya rebelde tan kriminal so nibulos to.​—Lucas 23:18, 19; Juan 18:39, 40.

Insan inuman na Romanon gobernador so taktika to. Ingganggan ton leweten day Jesus, insan da kinawesan na kolor purpura, kinoronaan na sabisabit, pinekpek, tan binalawbalaw. Et indeklara to lamet ya inosente si Jesus. Singa to ibabagan: ‘Agkayo ni kontento’d saya, sikayoran saserdote?’ Ompan say abaloan to et no nanengneng dan apairap si Jesus, nalikna dan akabawi la ra, odino nakasian da. (Lucas 23:22) Balet ta andi manaya.

‘Sineetan nen Pilato ya ibulos si Jesus. Balet inmakis iray Judio, a kuan da, No ibulos mo iyan too, agto ka kaaro nen Cesar. Balang sakey a manggawa ed inkasikato ya ari mansalita na sumpa ed Cesar.’ (Juan 19:12, Say Biblia) Say emperador ed saman et si Tiberio Cesar, a kabkabat a mamapatey ed saray agmatoor ed sikato anggan saramay atagey so posisyon da. Dati et apasyodot la nen Pilato iray Judio kanian agto la labay ya naulit lamet, ta ompan akusaan dan mantratraidor. Samay imbaga da et panag-blackmail, ya idalem da no agniiter so labay da, kanian ataktakot si Pilato. Sikatoy apilitan tan impaipasak to so inosentin too, si Jesus.​—Juan 19:16.

Impangusisa Lamet ed Ebidensya

Inusisa na dakel ya abogado so salaysay na Ebanghelyo ed bista nen Jesus. Say konklusyon da et aliwan patas tan anggapoy hustisya na impan-usay. Oniay insulat na sakey ya abogado: “No say sakey ya bista et ginmapo, asumpal, tan pormal ya indeklaray sentensia diad pegley labi ya anggad kabuasan, kontra itan ed Hebreon ganggan tan ed hustisya.” Tan inkuan na sakey ya abogadon propesor: “Say interon proseso et napno na ilegal tan masatsaol iran kagagawa kanian nayarin ipasen itan ya sakey a krimen.”

Anggapoy kasalanan nen Jesus. Balet amta ton say ipatey to et nakaukolan pian niliktar iray maunor ya totoo. (Mateo 20:28) Agaylay panagrespeto to ed hustisya kanian inanosan to anggan say sankagrabian ya ag-inkahustisya. Ginawa to itan parad saray makasalanan a singa sikatayo. Nepeg ya agtayon balot lilingwanan itan.

[Saray paimano ed leksab]

[Kahon/Litrato ed pahina 20]

Ley na Saray Judio nen Inmunan Siglo

Nia ray pigaran totontonen ed insalitan tradisyon na Judio ya insulat diad bandad gapo na saray siglo C.E. balet ta papanisiaan ya abayag lan wala antis nin nisulat:

▪ Diad saray kason say dusa et patey, kaukolan nin usayen no kasin nayarin absueltoen so akusado

▪ Gawaen na saray ukom so anggaay nayarian da pian idepensa so akusado

▪ Nayarin mansalita iray ukom a parad akusado, aliwan kontra’d sikato

▪ Papasakbayan iray mantasi ya seryoso so papel da

▪ Sansakey ya tetepetan iray akatasi, agnayarin saniiba

▪ Kaukolan ya manpapakna so testimonya ra ed amin ya importantin detalye a singa say petsa, pasen, oras, tan arum ni ra

▪ Say pan-usay ed saray kason say dusa et patey et kaukolan a diad agew tan mansumpal ed agew

▪ Agnayarin usayen iray kason say dusa et patey diad bisperas na Sabaton odino piesta

▪ Diad saray kason say dusa et patey, nayarin onggapo tan manampot so sesyon ed parehon agew no say desisyon et pabor ed akusado; balet no andi, nayarin sumpalen so kaso diad onsublay ya agew a ditan la iyanunsio so sentensian patey

▪ Diad saray kason say dusa et patey, kaukolan ya ag-onkulang ed 23 so ukom

▪ Mantutumbokan iray ukom a manbotos no kasin absueltoen odino sentensiaan na patey so akusado, ya onggapo’d sankaugawan; isusulat na saray eskriba so ibabaga na saray pabor ed pan-absuelto tan saray pabor ed pamatey

▪ Say akusado et idedeklaran naabsuelto no mas dakel na sakey so ukom ya pinmanig ed sikato, balet ta napapatey no mas dakel na duara so ukom ya agpinmanig ed sikato; no mas dakel labat na sakey ya ukom so angibotos ed sentensian patey, kaukolay mangarum na duaran ukom tan ulit-uliten itan ya proseso anggad naalay dugan desisyon

▪ No anggapoy anggan sakey ya ukom a mangidepensa ed akusado, ilegal so sentensia; no amin ya ukom et panig ed desisyon ya pateyen so akusado, ipapasen itan ya “pankokomplotan”

No Antoray Ilegal Diad Bista ed si Jesus

▪ Anggapoy dinengel na korte ya argumento odino tasi a parad pakaabsuelto to

▪ Anggapoy ukom ya angidepensa ed si Jesus ta sikatoy kabusol da

▪ Saray saserdote et nananap na tilatilan tasi pian nasentensiaan na ipapatey si Jesus

▪ Say hearing et agawa’d labi tan ed amot

▪ Ginmapo tan anampot so bista ed loob na sakey agew, diad bisperas na piesta

▪ Anggapoy angisegep na kaso antis na impangaresto ed si Jesus

▪ Samay imbaga nen Jesus a sikatoy Mesias, ya impasen a “panag-ayew,” et ag-inimbestigaan

▪ Sinalatan day akusasyon da sanen wala la ra’d si Pilato

▪ Tila iray akusasyon da

▪ Apaneknekan nen Pilato ya anggapoy kasalanan nen Jesus balet ta impapatey to nin siansia

[Kahon ed pahina 22]

Saray Mantestigo et Walay Eebatan Da’d Dala

No nipaakar ed kaimportantian na bilay, oniay impasakbay na korte na saray Judio ed saray mantestigo ed kason say dusa et patey:

“Ompan mantestigo kayo base ed abaloan, dengel-dengel, odino imbaga labat na sakey ya akatasi, odino iisipen yon, ‘Nadngel mi iya ed napanmatalkan a too.’ Odino ompan agyo amta ya tepetan mi kayo lanlamang pian nasubok no tuay ibabaga yo. Tandaan yo a saray ganggan ed bista a parad saray kaso nipaakar ed kaykayarian et duma ed saray ganggan a parad kason say dusa et patey. Diad saray kason nipaakar ed kaykayarian, kaukolan a manbayar so sakey pian naperdona. Diad saray kason patey so dusa, say dala na [akusadon apalsaan labat] tan dala na amin a nayarin magmaliw ya anak to et singilen ed sikato [say tilan nantasi] anggad angga.”​—Babylonian Talmud, Sanhedrin, 37a.

No say akusado et asentensiaan na patey, saray nantasi so mamatey.​—Levitico 24:14; Deuteronomio 17:6, 7.