Mantinien so Pankakasakey ed Sarayan Kaunoran ya Agew
“Say panagbilay yo komon labat so gawaen yon makana ed evangelio . . . , a magnayon kayo komon ed sakey ya espiritu, pati pankakasakey yo na kamarerwa a manseet a nipaakar ed pananisia ed Evangelio.”—FILIPOS 1:27.
1. Anto so pandumaan na Tastasi nen Jehova tan say mundo?
SARAYA so “kaunoran ya agew.” Anggapoy suppiat, “saray panaon a maatap,” so wadia la. (2 Timoteo 3:1-5) Diad sayan “panaon na kasumpalan,” tekep na agmaligen ya atooan a sosyedad to, matalonggaring a tuloy so pidumaan na Tastasi nen Jehova lapud walaan ira na kareenan tan pankakasakey. (Daniel 12:4) Balet kada indibidual a kabiangan na englobon pamilya na saray managdayew nen Jehova so kakaukolanen a panbanikelan ton mantinien iyan pankakasakey.
2. Anto so imbaga nen Pablo nipaakar ed panmantini na pankakasakey, tan anton tepet so konsideraen tayo?
2 Sinimbawa nen apostol Pablo so kaparan Kristianos a mantinien so pankakasakey. Insulat to: “Say panagbilay yo komon labat so gawaen yon makana ed evangelio nen Kristo, ta anggan onla ak ditan tan nengnengen ta kayo odino andiak ditan, narengelan ko so kipapasen yo, a magnayon kayo ed sakey ya espiritu, pati pankakasakey yo na kamarerwa a manseet a nipaakar ed pananisia ed Evangelio; tan anggapon balot so takotan yo ed saray kabusol yo. A dia ed sikara so malinlinew a tanda na kabalang, balet dia ed sikayo tanda na kilalaban, tan satan manlapu ed Dios.” (Filipos 1:27, 28) Malinlinew ya ipapanengneng na saray salita nen Pablo a sikatayo so nepeg a mankimey a saniiba bilang Kristianos. Kanian, anto sirin so ontulong ed sikatayo pian namantini so Kristianon pankakasakey tayo ed sarayan mairap a panaon?
Manpasakop ed Madibinon Linawa
3. Kapigan tan panon a nagmaliw a papatumbok nen Kristo iray inmunan ag-agalsiman a Hentil?
3 Say sakey a paraan pian namantini so pankakasakey tayo et diad panpasakop ed madibinon linawa ed amin a panaon. Saya so mankakaukolan na panangiyarunsa ed panag-isip tayo. Konsideraen paray asakbay a Judion babangatan nen Jesu-Kristo. Sanen inmunan nampulong si apostol Pedro ed ag-agalsiman a Hentiles nen 36 K.P., pinagamoran na Dios irayan totoo na nasyones, na masanton espiritu tan sikaray abautismoan. (Gawa, kapitulo 10) Diad saman a panaon et saray Judio, proselitas ed Judaismo, tan Samaritanos so nagmaliw a papatumbok nen Jesu-Kristo.—Gawa 8:4-8, 26-38.
4. Kayari impangisalaysay ed inkagawan misiglaotan ed si Cornelio, anto so imbaga nen Pedro, tan antoy impakasubokan na saray Judion babangatan nen Jesus?
4 Sanen akabatan na apostoles tan arum niran agagi ed Jerusalem so inkakomberti nen Cornelio tan arum niran Hentil, interesado ran ondengel ed ibalita nen Pedro. Kayari impangipaliwawa ed agawan manasaglawi ed si Cornelio tan arum niran mananisian Hentil, sinampotan na apostol ed sarayan salita: “No ontan, sirin, a say Dios inter to ed sikara [saramay mananisian Hentil] so dilin palangkap [na masanton espiritu], singa ginawa to met ed sikatayo [Judios] nen anisia itayo ed Katawan a Jesu-Kristo, siopa ak nen saman a makayarin manebel ed Dios?” (Gawa 11:1-17) Anubok iya ed saray Judion patumbok nen Jesu-Kristo. Kasin manpasakop ira ed linawa na Dios tan awaten iray mananisian Hentil bilang kapara ran managdayew? Odino kasin nasigensigen so pankakasakey na ariripen nen Jehova ed dalin?
5. Panon so inkiwas na saray apostol tan arum niran agagi ed bengatlan pinagamoran na Dios na kaperdona iray Hentil, tan anto so naaralan tayo manlapud sayan awawey?
5 Oniay kuan na salaysay: “Et nen nadngel da [apostoles tan arum niran agagi] so sarayan bengatla, dinmeen ira, et ingalang da so Dios a kuan da: ‘Kanian initer met na Dios ed saray Gentiles so panagpataoli a kabilayan.’” (Gawa 11:18) Satan ya awawey so amasiansia tan amabulaslas ed inkasaksakey na saray patumbok nen Jesus. Diad antikey labat a panaon, inmabanti so panagpulong a kimey ed limog na Hentiles, odino totoo na nasyones, tan walay panamendisyon nen Jehova ed saratan ya aktibidades. Sikatayo met so kaukolan a mabulos ya ontumbok sano kakaukolanen so pikoopera tayo ed kaporma na balon kongregasyon odino sano pigaran teokratikon panangiyarunsa so agawa ed silong na panangigiya na masanton espiritu na Dios. Say interon-puson pikokoopera tayo so mamaliket ed si Jehova tan ontulong ed sikatayon namantini so inkasaksakey tayo ed sarayan kaunoran ya agew.
Ompeket ed Katuaan
6. Antoy epekto na katuaan ed pankakasakey na saray managdayew nen Jehova?
6 Bilang kabiangan na pamilya na saray managdayew nen Jehova, namantini so pankakasakey lapud sikatayo so ‘babangatan ya amin na Dios’ tan ompepeket a malet ed niparungtal a katuaan to. (Juan 6:45; Salmo 43:3) Lapud saray bangat tayo so nibased Salita na Dios, amin tayo so mansasalitan manpapakna. Sigagayaga tayon aawaten so espiritual a taganon iiter nen Jehova diad panamegley na “matoor tan makabat ya aripen.” (Mateo 24:45-47) Say ontan a pare-parehon bangat so mangaasisti ed sikatayon namantini so pankakasakey tayo ed sankamundoan.
7. No bilang indibidual et naiirapan a talosan so sakey a punto, anto so kaukolan tayon gawaen, tan anto so agtayo kaukolan a gawaen?
7 Anto no sikatayo bilang indibidual et naiirapan a talosan odino awaten so sakey a punto? Kaukolan tayon ipikasi a nawalaan na kakabatan tan sukimaten iray Kasulatan tan Kristianon palapagan. (Uliran 2:4, 5; Santiago 1:5-8) Makatulong so pitongtong ed sakey a matatken. No say punto et siansian agnatalosan, sankarakpan no agpanpagaan itan. Anganko nagkalalo nin impormasyon nipaakar ed satan a tema so nipalapag, diad ontan et napalaknab so pakatalos tayo. Anggaman ontan, makapuy so panalin kombinsien so arum ed kongregasyon ya awaten so duman opinyon tayo. Panangitanem iya na gutgut, ya agkikimeyan so pansiansia na pankakasakey. Agaylan magmaong so ‘panakar ed katuaan’ tan pasesegen so arum a gawaen itan!—3 Juan 4.
8. Anton awawey ed katuaan so matukoy?
8 Diad inmunan siglo, inkuan nen Pablo: “Ta natan onnengneng itayo ed sakey a salming ed mabilunget, balet insan lupalupaan. Natan amtak so arum, et no ontan kabaten ko a nagnap a singa met inpakapikabat ed siak a nagnap.” (1 Corinto 13:12) Anggaman ag-atebek na inmunan Kristianos so amin a detalye, sikaray nansiansian nankakasakey. Walaan tayo la natan na mas malinew a pakatalos ed gagala nen Jehova tan ed Salita ton katuaan. Pisalamatan tayo sirin so katuaan a nanaawat tayo diad panamegley na ‘matoor ya aripen.’ Tan pisalamatan tayo si Jehova ta naitotonton to itayo diad panamegley na organisasyon to. Manwarin agtayo lawas walaan na parehon sukat na pikakabat, agtayo naeerasan odino napepegaan ed espiritual a paraan. Imbes, say Pastol tayo, si Jehova, so lawas mamapakasakey tan mangaasikaso ed sikatayo.—Salmo 23:1-3.
Usaren so Dila a Mapmaptek!
9. Panon a nausar so dila ed ibulaslas na pankakasakey?
9 Say pangusar na dila ed pamaseseg ed arum so importantin dalan ed ibulaslas na pankakasakey tan espiritu na impanaagi. Say sulat a nanresolbi ed problema nipaakar ed panaggalsim, ya impawit na inmunan-siglon mananguley ya ulop, so lapuan na panamaseseg. Kayari impanbasa ed satan, saray babangatan a Hentil ed Antiokia so “akaliket ira lapu ed saray inpamaligliwa.” Si Judas tan Silas, a nibaki manlapud Jerusalem tekep na sulat, “niligliwa dara so agagi ed dakel a salita, tan pinaletan da ra.” Anggapoy duaruwan, say presensia nen Pablo tan Bernabe so amaseseg tan amabiskeg met ed saray kapananisiaan ed Antiokia. (Gawa 15:1-3, 23-32) Dakel met so nagawaan tayo sano mandaragup tayo ed saray Kristianon miting tan ‘manaayatan itayo’ diad panamegley na presensia tayo tan makapabiskeg iran komento.—Hebreos 10:24, 25.
10. Pian namantini so pankakasakey, anto so kaukolan a gawaen no say panag-ayew so nagawa?
10 Balet, say aliwan kauusar na dila so manigensigen ed pankakasakey tayo. “Ontan met na dila melmelag a kabiangan na laman, et manpasirayew ed ankakabaleg a nengneng,” insulat nen babangatan a Santiago. “Nia, alay kabaleg na takel so dangatan na melag ya apuy!” (Santiago 3:5) Kabusol nen Jehova iramay panlalapuan na gutgutan. (Uliran 6:16-19) Say ontan a tongtongan so pansengegay agpankakasakey. Kanian, sirin, anto no wala so panag-ayew, salanti, say pangipaarap na sakey ed abuso odino sikato so insultoen? Salien na mamatatken a sikatoy tulongan. Balet, say agmagbabawin manag-ayew so kaukolan a dispelosipen ta pian namantini so kareenan, uksoy, tan pankakasakey ed kongregasyon. Ta, insulat nen Pablo: “Agki miulop ed bengatlan too ya anggan tatawagen na agi no . . . managayew . . . , agkayo miulop a mangan.”—1 Corinto 5:11.
11. Akin ya importanti so inkamapaabeba no walay bengatlan pansengegan na tensyon ed baetan tayo tan ed kapananisiaan tayo?
11 Say pangyan na pakalat ed dila so ontutulong ed sikatayon namantini so pankakasakey. (Santiago 3:10-18) Balet panon to no walay nibaga tayon nansengegan na tensyon ed baetan tayo tan ed kaparan Kristiano. Agta matukoy ya unona tayo lan mikareenan ed agi tayo, mipulangan no kaukolan? (Mateo 5:23, 24) Tua, kakaukolanen na saya so inkamapaabeba, odino kaabebaan na nonot, balet insulat nen Pedro: “Balkesan yoy inkasikayo na panagpaabeba, a manlilingkoran so sinansakey, ta say Dios kaingli’to so saray atagey a linawa, et itdan to na gracia so saray mapaabeba.” (1 Pedro 5:5) Say inkamapaabeba so mamakiwas ed sikatayon ‘anapen so kareenan’ ed agagi tayo, aksobien iray lingo tayo tan manggawa na matukoy a pipulangan. Ontutulong iya ed panmantini na pankakasakey ed pamilya nen Jehova.—1 Pedro 3:10, 11.
12. Panon tayon nausar so dila pian napabulaslas tan namantini so pankakasakey na totoo nen Jehova?
12 Napaaligwas tayo ni espiritu na pamilya ed limog na saramay walad organisasyon nen Jehova no usaren tayon mapmaptek so dila tayo. Lapud ontan so ginawa nen Pablo, napanonotan toray taga Tesalonica: “Unong no kabat yo no panon so panangimano mi ed balang sakey ed sikayo, a singa sakey ya ama ed saray dilin anak to, a kakalaran mi kayo, tan pababayanien mi kayo, tan tatasian, ta pian komon mankurang kayo a makanakana ed Dios.” (1 Tesalonica 2:11, 12) Walan angipanengneng na maabig ya uliran ed sayan pamaakaran, sarag a pasesegen nen Pablo so kaparan Kristianos pian ‘ibalap so apunaw ed puso.’ (1 Tesalonica 5:14) Isipen pa so maong a nagawaan tayo diad pangusar na dila ed pantambayo, pamaseseg, tan pamabiskeg ed arum. On, “say salita ed kanepegan to, agay la so abig to!” (Uliran 15:23) Niarum ni, say ontan a panagsalita so mamapabulaslas tan mamapamantini ed pankakasakey na totoo nen Jehova.
Mamerdona!
13. Akin a magmaliw itayon manamerdona?
13 Say pamerdona ed akaopendi ya akipulangan so importanti no kaukolan tayon mantinien so Kristianon pankakasakey. Tan kaunongan kabetbet itayon mamerdona? Oniay imbaga nen Jesus ed si Pedro: “Agko ikuan ed sika, Angga ed maminpito, ingen, Angga ed maminpitomplo a pito.” (Mateo 18:22) No ag-itayo manamerdona, susumpaen tayoy inkasikatayo. Panon ya ontan? Bueno, say pamusol tan panimbel na linawa so mamawas na deen na nonot tayo. Tan no sikatayo so kabkabat la bilang makolkol tan agmanamerdona, nitarok tayoy inkasikatayo ed kaperdian tayo lanlamang. (Uliran 11:17) Say panimbel na linawa so agmakapaliket ed Dios tan nayarin mangipaarap itan ed graben kasalanan. (Levitico 19:18) Tandaan a si Juan a Managbautismo so pinototan na ulo diad pakana ya implano na marelmeng a Herodias, ya “intalaga toy inkasikato sumpa” ed sikato.—Marcos 6:19-28.
14. (a) Anto so ibabangat ed sikatayo na Mateo 6:14, 15 nipaakar ed panamerdona? (b) Lawas ta ya alagden tayo so pipulangan na sakey sakbay a perdonaen tayo?
14 Lalaktipen na modelon pikakasi nen Jesus irayan salita: “Tan paandien mo ed sikami so saray kasalanan mi, ta sikami met paandien mi so balang sakey ya akaotang ed sikami.” (Lucas 11:4) No sikatayo so agmamerdona, wala so kapeligroan ya onsabi agew ya agla perdonaen nen Jehova so kasalanan tayo, ta inkuan nen Jesus: “Ta no perdonaen yoray totoo ed kaugsan da, say Ama yon mangatatawen perdonaen to kayo met. Balet no agyo perdonaen so saray totoo ed saray kaugsan da, agto kayo met perdonaen nen Ama yo ed saray kaugsan yo.” (Mateo 6:14, 15) Kanian no peteg a labay tayon gawaen so biang tayo ed panmantini na pankakasakey ed pamilya na saray managdayew nen Jehova, magmaliw itayon manamerdona, anganko diad basta labat panlingwan ed impakalukson nisesengeg ed inkabengatbengat tan andiay mauges ya intensyon. Inkuan nen Pablo: “Mantetepelan so sakey tan sakey, tan manpeperdonaan so balang sakey, no say siopaman a too wala so pangidalman to ed siopaman; unong ed impamerdona na Katawan ed sikayo, ontan met so gawaen yo.” (Colosas 3:13) Sano sikatayo so manamerdona, makatulong tayo ed panmantini na mabmablin pankakasakey ed organisasyon nen Jehova.
Pankakasakey tan Personal a Desisyon
15. Anto so ontutulong ed totoo nen Jehova pian namantini so pankakasakey sano personal a mandesisyon?
15 Ginawa itayo na Dios a walaay kawayangan tekep na pribilihyo tan responsabilidad a personal a mandesisyon. (Deuteronomio 30:19, 20; Galacia 6:5) Ingen, namantini tayo so pankakasakey tayo lapud tutumboken tayoray ganggan tan prinsipyos ed Biblia. Ikokonsidera tayo iratan sano sikatayon mismo so mandedesisyon based suston pikakabat. (Gawa 5:29; 1 Juan 5:3) Iyan la bilang a wala so linmesan suppiat nipaakar ed neutralidad. Makapanggawa itayo na sakey ya inaral a personal a desisyon diad pakanonot tayon “ag [tayo] taga mundo” tan walan ‘pinitpit [tayo] iray kampilan a pinagmaliw a dingding na lukoy.’ (Juan 17:16; Isaias 2:2-4) Mipadpara, sano sikatayo so nepeg a personal a mandesisyon nipaakar ed siglaotan tayo ed Estado, ikokonsidera tayoy ibabaga na Biblia nipaakar ed panbayar “ed Dios so saray bengatla a betang na Dios,” legan a papauleyan itayo ed “saray atagtagey a pakauley” ed sekular iran pamaakaran. (Lucas 20:25; Roma 13:1-7; Tito 3:1, 2) On, diad panangonsidera ed saray ganggan tan prinsipyo ed Biblia sano personal a mandesisyon so manmantini ed Kristianon pankakasakey tayo.
16. Panon itayon makatulong ed panmantini na pankakasakey sano mandedesisyon ed bengatlan aliwan susto nisay aliwa unong ed Kasulatan? Iyilustra.
16 Makatulong itayo ed panmantini na Kristianon pankakasakey anggano diad dedesisyonan a personal tan aliwa met a susto nisay aliwa unong ed Kasulatan. Panon ya ontan? Diad pangipanengneng na maaron paga ed arum a naapektoan na desisyon tayo. Singa bilang: Diad kongregasyon ed kadaanan a Corinto, linmesa so problema nipaakar ed pangan ed nibagat a karne ed saray idolo. Siempre, say Kristiano so agmibiang ed idolatroson seremonya. Balet, agkasalanan so pangan na dugan aparalaan a nakekeraan a karne na onian klase ya inlako ed tindaan. (Gawa 15:28, 29; 1 Corinto 10:25) Anggaman kuan, saray konsiensia na pigaran Kristiano so nagogonigon ed pangan ed sayan karne. Pinaseseg sirin nen Pablo so arum niran Kristiano a paliisan so pakatiror ed arum. Diad tua et insulat to: “Kanian no say kanen so makalanor a katiroran na agik, agak mansira na asalian a balot anggan kapiganman, ta pian aliwan siak so sengeg na katiroran na agik.” (1 Corinto 8:13) Kanian anggano anggapoy ganggan odino prinsipyo ed Biblian nalalanor, agaylan panangipanengneng na aro so pangikuenta ed arum sano mandesisyon a makaapekta ed pankakasakey na pamilya na Dios!
17. Anto so manepeg a gawaen sano nepeg tayoy personal a mandesisyon?
17 No ag-itayo segurado no antoy alaen a kundang, maong so pandesisyon ed paraan a napansiansia tayon malinis so konsiensia tayo, tan kaukolan a respetoen met na arum so desisyon tayo. (Roma 14:10-12) Siempre, sano nepeg a personal tayon mandesisyon, kaukolan tayon anapen so panangigiya nen Jehova diad pikakasi. Singa say salmista, sitatalek tayon makapanpikasi: “Ikiling mo so layag mo ed siak. . . . Ta sika so batondampay ko, tan kutak; kanian nisengeg ed ngaran mo itabin moak tan ibasbas moak.”—Salmo 31:2, 3.
Lawas Mantinien so Kristianon Pankakasakey
18. Panon ya inyilustra nen Pablo so pankakasakey ed Kristianon kongregasyon?
18 Diad 1 Corinto kapitulo 12, inusar nen Pablo so laman na too pian iyilustra so pankakasakey ed loob na Kristianon kongregasyon. Indanet to so pandedependian tan say kaimportantian na balang membro. “Ta no amin da sakey iran kabiangan komon, iner so kawalaan na laman?” intepet nen Pablo. “Balet natan dakel iran kabiangan, balet sakey a laman. Tan say mata agto nayarian ya ibaga ed lima, Agta ka nakaukolan odino say ulo met ed saray sali, Agta kayo nakaukolan.” (1 Corinto 12:19-21) Mipadpara, aliwan amin ed sikatayo ed loob na pamilya na saray managdayew nen Jehova so manusumpal ed parehon inkabetang. Ingen, sikatayo so nankakasakey, tan kaukolan tayo so balang sakey.
19. Panon itayon nagunggunaan manlapud saray espiritual a probisyon na Dios, tan anto so imbaga na sakey a masiken ya agi nipaakar ed saya?
19 No panon a nakaukolan na laman so tagano, panangasikaso, tan direksyon, kaukolan tayo met iray espiritual a probisyon ya iter na Dios diad panamegley na Salita, espiritu, tan organisasyon to. Pian nagunggunaan ed sarayan probisyon, sikatayoy nepeg a magmaliw a kabiangan na pamilya nen Jehova ed dalin. Kayari na dakel a taon ed serbisyo ed Dios, oniay insulat na sakey ya agin laki: “Siak so misalsalamat a tuloy a siak so nambilay unong ed walan pikakabat ed saray gagala nen Jehova manlapud saraman ya asakbay ya agew na 1914 sanen amin so agni malinew . . . ya anggad sayan agew sano say katuaan so onsisinag a singa banwa na kaagwan. Say importantin tuloy ed siak, et say tuloytuloy a pagmaliw a maapit ed nanengneng ya organisasyon nen Jehova. Say eksperiensiak ed saman so angibangat ed siak ya agmanepeg so panmatalek ed panagkatunongay too. Bektan nigalet so kanonotan ko ed satan a punto, desidido ak a mansiansia ed matoor ya organisasyon. Iner ni pakagamoran na sakey na abobon tan bendisyon nen Jehova?”
20. Anto so kaukolan tayon determinadon gawaen nipaakar ed pankakasakey tayo bilang totoo nen Jehova?
20 Tinawag nen Jehova so totoo to manlapud minumundon kabilungetan tan agpankakasakey. (1 Pedro 2:9) Intarok to itayo ed abenditoan a pankakasakey a sikaton mismo so kaiba tan saray kapananisiaan tayo. Sayan pankakasakey so niwala diad balon sistema na bengabengatlan asingsingger la. Diad sarayan kaunoran ya agew, sirin, mantultuloy tayon ‘ikawes so aro’ tan gawaen tayoy anggaay nayarian tayon pabulaslasen tan mantinien so mabmablin pankakasakey tayo.—Colosas 3:14.
Panon Yon Ebatan?
◻ Akin a say panumpal ed linawa na Dios tan ipeket ed katuaan so ontulong ed sikatayon namantini so pankakasakey?
◻ Panon a say pankakasakey so nisisiglaot ed suston panangusar na dila?
◻ Anto so nalalanor ed pagmaliw a manamerdona?
◻ Panon tayon namantini so pankakasakey sano personal a mandesisyon?
◻ Akin a mantinien so Kristianon pankakasakey?
[Litrato ed pahina 16]
No panon a paniibaen na sayan pastol so pulok to, ontan met a pankakasakeyen nen Jehova so totoo to
[Saray litrato ed pahina 18]
Diad sipapaabeban pipulangan sano akaopendi itayo, napabiskeg tayo so pankakasakey