Erepen Mo ta so Onkukuyep a Pabilo?

INYABAWAG nen Jesu-Kristo so maong a balita na Panarian na Dios ed amin a klase na totoo. Dakel ed sikara so pinairap tan dismayado. Balet inikdan ira nen Jesus na makapasagyat a mensahe. Sikatoy walaan na panangabagey parad naiirapan a totoo.

Say managsulat na Ebanghelyo a si Mateo so angipabitar ed panangabagey nen Jesus diad impangipaimano ed propesiyan inrekord nen Isaias. Diad impangaon ed saray salitan sinumpal nen Kristo, insulat nen Mateo: “Anggapoy abalbal a tanubong a puteren to, tan anggapoy onkukuyep a pabilon linas ya erepen to, ya anggad pangibaki to na hustisyan walaay itatalona.” (Mateo 12:20; Isaias 42:3) Anto so kabaliksan na sarayan salita, tan panon a sinumpal nen Jesus iyan propesiya?

Sakey a Pasikmat ed Propesiya

Say sakey a tanubong so kaslakan ya ontutubo ed ambasan pasen tan saya so aliwan putel tan masekder a tanaman. Say sakey ya “abalbal a tanubong” so talagan magmaliw a makapuy. Ompatnag a saman sirin so mangililitrato ed saramay paiirapen odino naiirapan a totoo a singa say lakin amagaay lima to a tinambal nen Jesus ed Sabaton. (Mateo 12:10-14) Balet komusta so mapropetikon impanukoy ed sakey a pabilo na silewan?

Say kaslakan a silewan ed abung nen inmunan siglo K.P. et sakey a melag ya ohas-pitsel a ginawa ed pitek a walaay kinmurban benbenan. Naynay a say silewan so apano na larak na olibo. Diad panamegley na maimpis a tubo, sesepsepen a paatagey na pabilon ginawa ed linas so larak pian mansiansian mandarlang. Siempre, say ‘onkukuyep a pabilo’ et asingger lan naerep.

Improklama nen Jesus so makaligliwan mensahe to ed dakel a diad piguratibon paraan et singa ra abalbal a tanubong, linmupaypay tan sinipsipa. Sarayan totoo so singa met onkukuyep a pabilon linas lapud say kaunoran a liwaway bilay da so ngalngali la naerep. Sikaray talagan pinairap tan naandiay ilalo. Anggaman ontan, agpinuter nen Jesus so piguratibon abalbal a tanubong odino inerep so simbolikon onkukuyep a pabilo. Say maaro, matamoy, maabagey iran salita to so aglalon nandismaya tan amawalay depresyon ed totoon naiirapan. Imbes, sikaray abilayan na liknaan nisesengeg ed saray imbaga to tan pidedeneng to ed sikara.​—Mateo 11:28-30.

Ontan met, natan et dakel so mankaukolan na panangabagey tan panamaseseg lapud sikaray nipapaarap ed makapaletey iran problema. Anggan saray aripen nen Jehova so aliwan naynay a mabiskeg ed panaon na kairapan. No maminsan arum so singa saray onkukuyep a pabilo. Saray Kristiano sirin so kaukolan a magmaliw a makapaseseg​—mamapadalang, a singa panangibaga—​diad ontan et makapanpapabiskegan.​—Lucas 22:32; Gawa 11:23.

Bilang Kristiano labay tayo so magmaliw a makapabiskeg. Agtayo gagalaen a salien a pakapuyen so siopaman ya onkekerew na espiritual a tulong. On, pilalek tayon aligen so uliran nen Jesus diad impamabiskeg ed arum. (Hebreos 12:1-3; 1 Pedro 2:21) Say bengatlan agsiaalwar tayon napaletey so siopaman a maniilalo ed sikatayo pian napaseseg so maong a rason a seryoson nonotey paraan na pidedeneng tayo ed arum. Maseguron agtayo labay ya ‘erepen so sakey ya onkukuyep a pabilo.’ Antoran Makasulatan a panangigiya so makatulong ed sikatayo ed sayan pamaakaran?

Saray Epekto na Panagbalaw

No say sakey a Kristiano ‘so akagawa na lingon kundang, saramay walaan na saray espiritual a kualipikasyon so manalin mangipawil ed gendat to iman a too diad espiritu na kaumildian.’ (Galacia 6:1) Anggaman ontan, kasin manepeg so pananap na saray lingo ed arum tan anamoten so amin a pankanawnawan korihien ira? Odino kasin manepeg so panagdag ed sikara a manggawa na magmaong diad pangipasikin saray peles a sagpot da so kulang, anganko et pansengegay pakalikna ran nankasalanan? Anggapo so ebidensyan nanggawa na ontan si Jesus. Anggaman say intensyon tayo et say panulong ed arum ya onaligwas, nayarin saramay agsipapangasin binalaw so manliknan kinmapuy imbes a binmiskeg. Anggan saray makapaalagey a panagbalaw so makapadismayan tuloy no subra la. No saray sigpot-a-gunaet na sakey a matoor a Kristiano so abeten lambengat na agpanangabobon, ompan onsuko la tan ikuan, ‘Akin a salien ko ni?’ On, nayarin sikato lay ontunda.

Anggaman say panangiter na Makasulatan a konseho so importanti, aliwan satan komon so pakapatnagan ya awawey na aturon mamatatken odino arum ni ed kongregasyon. Saray Kristianon miting so aggagawaen a manuna lapud panangiter tan panangawat na konseho. Imbes, maparanay tayon mantitipon pian makapanpapabiskegan tan makapanpapasesegan ta pian panggayagaan na amin so pililimog tan sagradon serbisyo ra ed Dios. (Roma 1:11, 12; Hebreos 10:24, 25) Agaylay abig sano natetebek tayo so pandumaan na seryoson lingo ed sakey ya ag-inkayadyari a makabat tan maaro lan palampasen!​—Eclesiastes 3:1, 7; Colosas 3:13.

Onkiwas a tampol so totoo ed panamaseseg nen say diad panagbalaw. Diad tua, sano liknaen na saray sinansakey a sikaray agmakatunongan ya binalaw, ompan lalo iran onmedmer ed samay babalawen ya ugali ra! Balet sano sikaray makatunongan a kinomendaan, napaligsay espiritu ra, tan sikaray napakiwas ya onaligwas. (Uliran 12:18) Singa si Jesus, magmaliw tayo met sirin a makapaseseg tan agbalot ‘erepen so sakey ya onkukuyep a pabilo.’

Komusta Met so Panangikompara

Say pakarengel ed maabig iran eksperiensia na arum a Kristiano so talagan makapakiwas. Si Jesus a mismo so nanggayaga sanen nadngelan to so itatalona na saray babangatan to diad impangipulong ed mensahe na Panarian. (Lucas 10:17-21) Ontan met, sano narerengelan tayoy itatalona, marakep ya alimbawa, odino integridad na arum ed pananisia, napapaseseg itayo tan lalo itayon determinadon ompeket ed Kristianon kurang tayo.

Ingen, anto no sakey a report so niparungtal diad paraan a singa mangisusuherin, ‘Aliwa kan singa inkamaong na sarayan Kristiano, tan kaukolan mon gawaen so nagkalalo ni’? Kasin napakiwas so ontatalineng a mangigapo na maligsan programa na panamaaligwas? Posiblin sikato so nadismaya tan anganko et ontunda la, nagkalalo la no naynay ya ikokompara odino napapasikian. Saya so kaparpara na sakey ya ateng a tetepetan toy anak to, ‘Akin ya agmo naalig si agim?’ Say ontan a komento so nayarin pansengegan na embel na linawa tan kadismaya, balet maseguron agmamawala na mas marakep ya ugali. Saray panangikompara so nayarin walaan na parehon epekto ed saray wala la’d edad, a magmamaliw ni ingen iyan nawalaay embel na linawa ed saramay pangikokomparaan ed sikara.

Agtayo nailaloan a pareparehoy nagawaan na amin ed serbisyo ed Dios. Diad sakey ed saray ilustrasyon nen Jesus, say sakey ya amo so angiter ed ariripen to na sakey, duara, odino limaran talenton pilak. Saraya so inter “ed balang sakey unong ed dilin abilidad to.” Say duaran aripen a sikakabat ya anginegosyo tan akapanparakel ed talento ra so kinomendaan lapud sikaray matoor, anggaman say kimey da so amawala na nanduruman resulta.​—Mateo 25:14-30.

Matukotukoy so insulat nen apostol Pablo: “Paneknekan komon na balang sakey no antoy dilin kimey to, tan diad ontan et sikato so nawalaan na rason pian manliket nipaakar ed inkasikaton bukor, tan aliwan diad panangikompara ed arum a too.” (Galacia 6:4) Pian magmaliw a talagan makapaseseg ed arum, sirin, paliisan tayoy panggawa na negatibon panangikompara.

Pigaran Paraan Pian Makapabiskeg

Anto so nagawaan tayo pian napabiskeg so dismayado tan napaliisay ‘pangerep ed onkukuyep a pabilo’? Bueno, say pamaseseg so aliwan pamaakaran na itumbok ed sakey ya espisipikon pormula. Anggaman ontan, maseguron saray salita tayo so mamabiskeg ed arum no iyaplika tayoray prinsipyo na Biblia. Antoray arum ed saraya?

Magmaliw a mapaabeba. Diad Filipos 2:3, sinimbawa itayo nen Pablo ‘ya agmanggawa na antokaman lapud mitaloan odino ed egotismo.’ Imbes, sikatayo so nepeg a mansalita tan onkiwas a sipapaabeba. ‘Tekep na kaabebaan na nonot ya ipasen tayo so arum a superyor ed sikatayo.’ Agmet imbaga nen Pablo ya ibaliwala tayo lay inkasikatayo. Ingen, kaukolan tayon talosan a balang too et superyor ed sikatayo diad pigaran paraan. Say Griegon salita a nipatalos dia a “superyor” et mankabaliksan a say sakey a too et “mangiyaarawi ed pakanengneng to ed saray dilin pribilihyo to, tan siaalwar a dadalepdepen so dunong na arum a sikatoy superyor.” (New Testament Word Studies, nen John Albert Bengel, Tomo 2, pahina 432) No gagawaen tayo iya tan ipapasen so arum a superyor, napidenengan tayora diad mapaabeban paraan.

Mangipanengneng na respeto. Diad sisisimoon a pangibalikas tayo na inkasikatayo, malinew tayon nipanengneng a walaan tayoy kompiyansa ed saray matoor a kapananisian tayo, a momoriaen ira bilang totoon manpipilalek a napaliket so Dios. Balet ipasen pan sikaray mankakaukolan na espiritual a tulong. Sirin tarokan tayoray tulong ed marespeton paraan ya atekepay dignidad. Oniay impangibaga nen Pablo nipaakar ed saya: “Diad pangipanengneng na galang ed sakey tan sakey mangidaulo kayo.”​—Roma 12:10.

Magmaliw a maong a managtalineng. On, ta pian napaseseg iramay nipapaarap ed makapadismaya iran problema, kaukolan tayoy magmaliw a maong a managtalineng, aliwan managsermon. Imbes a mangiter na biglaan, ataptapew iran suhestion, mangusar tayo na nakakaukolan a panaon pian makapangitarok na Makasulatan iran panangigiya a peteg a makakapet ed peles iran pankaukolan. No agtayo amtay ibaga tayo, say pan-research ed Biblia so ontulong ed sikatayo a makapansalitan sililigsa tan makapabiskeg ed arum.

Magmaliw a maaro. Kaukolan tayon nalikna so aro ed saramay labay tayon pasesegen. Sano saya so iyaplika ed kapara tayon ariripen nen Jehova, say aro tayo so nepeg a mas ni nen say basta ikiwas lambengat ed pankaabigan dan tuloy. Nepeg a nasasaglawi dia so masimoon a liknaan. No walaan tayo na ontan ya aro parad amin a totoo nen Jehova, say panagsalita tayo so magmaliw a puron panamaseseg ed sikara. Anggano no kaukolan tayon mangisuheri parad iyaaligwas, maseguron napaliisan tayo so lingon pantalos ed ibabaga tayo odino makapanpasakit no say motibo tayo so aliwan say basta pangiter na ideya noagta say pangiter na maaron tulong. Singa ed matukoy ya imbaga nen Pablo, “say aro so makapabiskeg.”​—1 Corinto 8:1; Filipos 2:4; 1 Pedro 1:22.

Lawas Magmaliw a Makapabiskeg

Diad sarayan maatap a ‘kaunoran ya agew,’ nipapaarap so baley nen Jehova ed dakel a subok. (2 Timoteo 3:1-5) Agpankelawan a no maminsan et sikaray maniirap anggad punton ompatnag a kapantokan lay panagsungdo ra. Bilang ariripen nen Jehova, maseguron agtayo labay so makapansalita odino makagawa na bengabengatlan nayarin pansengegan a siopaman ed kapara tayon managdayew so makalikna a singa ed say onkukuyep a pabilo a ngalngali la naerep.

Kanian, importantin tuloy a sikatayoy manpapasesegan! Gawaen tayon amin so gunaet a makapabiskeg diad panamegley na pagmaliw a mapaabeba tan marespeto ed saray dismayadon kaparan managdayew. Komon ta ontalineng tayon maong sano sikaray mangipapatua ed sikatayo tan lawas panbanikelan a makatulong ed sikara diad pangipaimano ed Salita na Dios, say Biblia. Nagkalalo ed amin, ipanengneng tayo so aro, lapud sayan bunga na masanton espiritu nen Jehova so ontulong ed sikatayon makapanpapabiskegan. Komon ta agtayo mansalita odino onkiwas ed antokaman a paraan a nayarin ‘mangerep ed sakey ya onkukuyep a pabilo.’