Bidbiren Mo Kasi so Mesias?
INUSAR nen Jesu-Kristo so talora tan kapalduan taon ed impangipulong na Salitay Dios ed limog na Israelitas. Balet sanen mansumpasumpal lay ministeryo to ed dalin, dakel ed kapanaonan to so angipulisay ed sikato bilang say Mesias, odino say insipan ya “Alanaan a Sakey” na Dios. Akin?
Tutulongan itayo na Biblia pian amtaen so pigaran rason no akin ya ag-inaksobi na saray inmunan-siglon Judio si Jesus bilang say Mesias. Talora ed sarayan rason so mangaamper ed dakel diad pamidbir ed kaplesan a posisyon nen Jesus bilang say manuuley a Mesianikon Ari.
‘Labay Mi so Makanengneng na Sakey a Tanda’
Say sakey a rason no akin a saray inmunan-siglon Judio so ag-akabidbir ed say Mesias et say agda pangawat ed Makasulatan iran tanda a mangituturo ed inka-Mesias to. Panapanaon, pinilit na totoon ontatalineng ed si Jesus a sikatoy manggawa na sakey a tanda pian paneknekan a sikatoy nanlapud Dios. Singa bilang, irereport na Mateo 12:38 a pigara ed saray eskriba tan Fariseos so nankuan: “Managbangat, labay mi komon so makanengneng na sakey a tanda a manlapud sika.” Agta pinanengnengan lara nen Jesus na saray tanda? Siempre angipanengneng la.
Diad saman a panaon et dakel lay ginawa nen Jesus a milagro. Pinagmaliw ton alak so danum, pinaabig to so sakey a manpapanabos ya ugaw a laki, tinambal to so mansasakit a katulangan a bii nen Pedro, nilinisan to so sakey a lakin akating, pinaakar to so sakey a lakin paralitiko, pinaabig to so sakey a lakin mansasakit ed loob la na 38 taon, impawil to ed dati so amagan lima na sakey a too, pinaabig to so dakel a totoo manlapud makapaot-ot iran sakit da, tinambal to so aripen na sakey ya opisyal na armada, pinaoli to so anak a laki na sakey a balo, tan pinaabig to so sakey a lakin bulag tan emel. Agawa irayan milagro ed Cana, Capernaum, Jerusalem, tan ed Nain. Sakey ni, kinmayat so balita nipaakar ed saratan a milagro ed interon Judea tan kabangibang iran baley.—Juan 2:1-12; 4:46-54; Mateo 8:14-17; 8:1-4; 9:1-8; Juan 5:1-9; Mateo 12:9-14; Marcos 3:7-12; Lucas 7:1-10; 7:11-17; Mateo 12:22.
Malinlinew, daakan so tanda a mamapaneknek a si Jesus so Mesias. Anggaman dakerakel so tandan ginawa to ed arap na totoo, ag-ira anisia ed sikato. Bulag ed espiritual iramay akanengneng ed prueba a si Jesus so imbaki na Dios balet ag-angaksobi ed sikato bilang say Mesias. Agtinmanek ed kapusoan da so katuaan.—Juan 12:37-41.
Komusta met ed panaon tayo? Ibabaga na arum a totoo, “Manisia ak labat ed nanengneng na matak.” Balet satan ta so talagan sakey a makabat a kurang? Ipapanengneng na propesiya ed Biblia a si Jesus so nitrono la bilang mangatatawen ya Ari ed Mesianikon Panarian. Lapud sikatoy agnanengneng, kaukolan tayo so sakey a tanda pian natebek so pananguley to, a satan so pakatandaan na igapo na saray kaunoran ya agew na sayan marelmeng a sistema na bengabengatla. Nabibidbir mo ta so tanda?—Mateo 24:3.
Unong ed Biblia, say igapo na pananguley nen Kristo bilang say Mesianikon Ari so pakanengnengan na saray bakal, yegyegyeg, kakisiray tagano, tan saray salot ed agnaparaan a kalaknab. Diad “saray kaunoran ya agew,” saray relasyon na too so pakanengnengan na inkasiblet, agum, tan anggapoy dangka. (2 Timoteo 3:1-5; Mateo 24:6, 7; Lucas 21:10, 11) Nilikud ni ed kronolohikal a paneknek, masulok a 20 nanduruman pakatandaan ed kaunoran iran agew so mangituturo ed gapoan na uley na Mesias nen 1914.—Nengnengen so Say Panag-Bantayan na Marso 1, 1993, pahina 5.
“Maaro Ra ed Kuarta”
Say materyalismo so sananey nin rason no akin ya impulisay na saray Judio si Jesus bilang say Mesias. Say alabas a panangiter na importansia ed kayamanan so makasbel ed dakel diad panumbok ed si Jesus. Singa bilang, kabkabat iray Fariseo a “maaro ra ed kuarta.” (Lucas 16:14) Imanoen pay kipapasen na sakey a mayaman tan malangwer a manuley ya inmasingger ed si Jesus tan tinepetan to no panon a nagamoray andi-anggaan a bilay. “Unoren mo so saray ganggan,” so ebat nen Jesus. “Amin so saraya inunor ko ra; dinan ni kakulangan ko?” so tepet na malangwer a laki, ya alikas ton mas ni so nakakaukolan nilikud ed panumpal ed pigaran ganggan. “Ilakom so walad sika tan iter mo’d saray duruka et wala naani kayamanan mo ed tawen, et gala tumbok mo ak,” so inkuan nen Jesus ed sikato. Agaylan pankanawnawa—pagmaliw a babangatan na Mesias! Balet inmalis so manuley, a naermenan. Akin? Lapud mas importanti ed sikato so kayamanan ed dalin nen say kayamanan ed tawen.—Mateo 19:16-22.
Agnauuman so situasyon. Say pagmaliw a tuan patumbok na Mesianikon Ari so mankabaliksan na panangiyuna ed saray espiritual ya interes sakbay na amin niran bengatla, pati kaykayarian ed dalin. Parad siopaman a walaay materyalistikon panmoria, saya so sakey ya angat. Alimbawa, akatongtong na sakey a sanasawan misionero ed Mamabukig a dalin so sakey a bii nipaakar ed Biblia. Diad panisian labay ton naaralay nagkalalo ni nipaakar ed si Jehova a Dios tan ed Anak to, si Jesu-Kristo, sikatoy inopresian na sanasawa na Say Panag-Bantayan tan Awake! Panon so inkiwas to? “Natulongan ak ta na sarayan magasin pian makalmo ni na baleg a kuarta?” so tepet to. Mas interesado so bii ed materyal nen saray espiritual a bengatla.
Saman met lanlamang a sanasawa so angiyaral na Biblia ed sakey a malangwer a laki a ginmapo lan inmatendi ed saray miting ed Kingdom Hall. “Dadaraken mo labat so panaon mo,” kuan ed sikato na atateng to. “Nepeg moy mananap na onkomaduan trabaho a para labi pian baleg so naanap mon kuarta.” Agaylan makapaermen sano pasesegen na atateng iray anak da ya iyuna iray materyal a bengatla nen say pakaaral nipaakar ed Mesianikon Ari! “Anggaman dakel so kayamanan to say manuley so agmakapangaliw na samplon libon taon na bilay,” so kuan na sakey a proverbio na saray Intsik.
Amoria na dakel a say aro ed kuarta so andian na pasen ed panagaral tan pananumbok ed Mesianikon Ari. Onia so kuan na sakey a Tasi nen Jehova a datin walaay negosyo a makakaalmo na baleg: “Say pakawalaan na dakel a kuarta so makapaliket balet ta ag-importanti. Aliwan say kuarta so mamapaliket ed sakey a too.” Sikato natan so sakey a membro na pamilyan Bethel ed sakey a sanga na Watch Tower Society ed Europa.
“Takot ed Saray Judios”
Say takot ed too so sakey nin rason no akin ya ag-inawat na saray Judio si Jesus bilang say Mesias. Say parungtalan a pamidbir ed inka-Mesias to so mankabaliksan na pakapeligroay reputasyon da. Parad arum et importantin tuloy itan. Konsideraen pay Nicodemo, sakey a membro na atagey a korti na Judio a tatawagen a Sanhedrin. Lapud pandinayew to ed saray tanda tan bangat nen Jesus, inaksobi to: “Rabbi, amta min sakey ka a managbangat a nanlapu ed Dios; ta anggapo so too a makagawa ed sarayan tanda a gagawaen mo, likud no wala ed sikato so Dios.” Balet ta labi so inyakar ed saman nen Nicodemo ed si Jesus, anganko pian napaliisan a nabidbiran na arum a Judio.—Juan 3:1, 2.
Parad dakel ya akadngel ed si Jesus, mas importanti so panangabobon na too nen say panangabobon na Dios. (Juan 5:44) Sanen walad Jerusalem si Jesus parad Piesta na Kobongkobong nen 32 K.P., “wala so dalamurom ed saray karaklan nipaakar ed sikato.” Anggapo so siopaman a nansalitan parungtalan nipaakar ed si Jesus “lapu ed takot ed saray Judios.” (Juan 7:10-13) Masuyat a bidbiren na anggan saramay atateng na toon bulag, a pinaabig nen Jesus, so milagro bilang nanlapud manangilaman na Dios. Anggan sikara met et “tinakotan da so saray Judios.”—Juan 9:13-23.
Diad kaplesan, natebek na arum a si Jesus so manuuley la bilang Mesianikon Ari ed tawen, balet ta natatakot dan bidbiren iya a parungtalan. Parad sikara et baleg a tuloy so kasalat ed pakabalang na talindeg da ed arap na arum. Singa bilang, sakey a Tasi nen Jehova ed Alemanya so akitongtong nipaakar ed Biblia ed sakey a lakin angadmitin onia: “Tua so ipupulong yon Tastasi nipaakar ed Biblia. Balet no magmaliw ak a Tasi natan, nabuas et naamtaan itan na amin. Anto la kasi isipen na katrabahoan ko, kakaabay ko, tan saray totoo ed klub a pimemembroan ko tan say pamilyak? Agko nayarian ya arapen itan.”
Anto so sengegan na katatakotay too? Say kinon, ikiling ed pagmaliw a popular ed pamilya tan kakaaro, pakasesga ed pakamudmora tan pakabaingan, kapagaan ed pagmaliw a duma manlapud dakel. Saratan a liknaan so apaneknekan a pakasubokan nagkalautla ed saramay onggapo nin iyaralan na Tastasi nen Jehova na Biblia. Alimbawa, aliketan so sakey a malangwer a biin naamtaan so nipaakar ed Paraison iletneg na Mesianikon Panarian ed dalin ed silong na pananguley nen Jesu-Kristo. Balet ta alay hilig ton man-disco, tan say takot ed too so mangaamper ed sikaton mangibaga ed arum nipaakar ed sayan ilalo. Diad kaunoran, akapantipon na pakpel a parungtalan a mansalita nipaakar ed Biblia. Sikatoy inarawian na kakaaro to ed disco, balet angipanengneng na interes so masiken to tan atateng to. Say bii tan say ina to so diad kaunoran et abautismoan, tan say asawa tan atateng to so ginmapon manaral na Biblia. Agaylan tumang ed pakadaeg ed takot ed too!
Talaga Ta’n Bibidbiren Mo so Mesias?
Sanen manpapanabos si Jesus ed panamairapan a kiew, wadman so pigara ed babangatan to. Abidbir da bilang say nipasakbay a Mesias. Wadman met iray Judion manuley, a, singa panangibaga et onkekerew ni na tanda. “Ilaban to komon so inkasikato, no sikato ya so Kristo [odino Mesias] na Dios, a pinili to.” (Lucas 23:35) Aglara ta ontunda ed ikekerew na tanda? Dakerakel lan milagro so ginawa nen Jesus. Niarum ni, say inkianak to, ministeryo, bista, impatey, tan inkioli to so anumpal ed dakel a propesiya ed Hebreon Kasulatan.—Nengnengen so “All Scripture Is Inspired of God and Beneficial,” impalapag na Watchtower Bible and Tract Society of New York, Inc., pahina 343-4.
Pinabaingan na saray ondadalan si Jesus, ya impulisay so ebidensia na inka-Mesias to. (Mateo 27:39, 40) Walay inkamateryalistikon inapag-apag na saray sundalo so kawes nen Jesus, a nanpapalaranan da so pandalem a kawes to. (Juan 19:23, 24) Diad pigaran kaso et walaay papel so takot ed too. Singa bilang, konsideraen pay Jose na Arimatea, sakey a membro na Sanhedrin. Sikato so “babangatan nen Jesus ingen maamot lapu’d takot ed saray Judios.” Kayari impatey na Mesias, inasikaso di Jose tan Nicodemo so laman nen Jesus. Diad ontan et adaeg nen Jose so takot to ed too.—Juan 19:38-40.
No mabilay ka nen inmunan siglo, bidbiren mo kasi si Jesus bilang say Mesias? Diad panggawa na ontan et kaukolan mon awaten so Makasulatan ya ebidensia, ipulisay so materyalistikon kanonotan, tan agpadadaeg ed takot ed too. Diad sarayan kaunoran ya agew, nepeg a tepetan na balang sakey ed sikatayo so inkasikato, ‘Bibidbiren ko ta si Jesus natan bilang say Mesianikon Ari ed tawen?’ Asingger to lan uleyan iray bengatla ed dalin. Sano nagawa la itan, napibilang ka ta ed saray talagan mamibidbir ed si Jesu-Kristo bilang say insipan a Mesias?
[Saray litrato ed pahina 28]
Agmo ibabaliwala so ebidensia a si Jesus so Mesianikon Ari
[Litrato ed pahina 31]
Say pakaamta nipaakar ed Mesias so mabetbet a mankabaliksan na panaeg ed takot nipaakar ed nayarin ibaga na arum