SARAY mananisia ed bangat ya impierno et uusaren dan pinagkabasian so balikas nen Jesus a walad Marcos 9:48 (odino bersikulo 44 tan 46). Ditan et asaglawi toy nipaakar ed ag-ompatey a bigibigis tan apoy ya agnaerep. No bilang ta walay nantepet ed sika nipaakar ed saratan, panon mo itan ya ebatan?

Depende ed bersion na Biblian uusaren da, nayarin ibasa ra so bersikulo 44, 46, odino 48 lapud ta parepareho met so ibabaga na saraya ed arum iran bersion.a Diad Biblia a New World Translation et oniay nabasa tayo: “No say matam so sengegay pankakasalanan mo, sukit mo itan; magmaong nin makaloob ka ed panarian na Dios a saksakey so matam, nen say duaran tuay matam, nibantak ka balet ed Gehenna, a ditan saray bigibigis et ag-ompatey tan say apoy et agnaerep.”​—Mar. 9:47, 48.