Ginawa Ra so Linawa nen Jehova

Angusar na Panaon si Jesus ed Ugugaw

MANSAMPOSAMPOT lay talora tan kapalduan taon na impanministeryo nen Jesus. Agmanbayag et sikato lay onloob ed Jerusalem tan managmak na makapaot-ot ya ipapatey. Amta ton tuloy no antoy nagawa’d arapen, lapud imbaga to la’d saray babangatan to: “Say Anak na too niyawat ed lima na saray totoo, tan sikato so pateyen da.”​—Marcos 9:31.

Maseguron labay nen Jesus ya anamoten so kada agew, kada oras, kada bekta a nakekera. Siansian mankakaukolay panangasikaso iray babangatan to. Naimano nen Jesus a kaukolan da ni so mabiskeg a simbawa nipaakar ed pankaukolay inkamapaabeba tan say agnaaandin kapeligroan na pakatiroran. (Marcos 9:35-37, 42-48) Kaukolan da met so bilin nipaakar ed panangasawa, diborsyo, tan say inka-wala’d kasuloan. (Mateo 19:3-12) Lapud amta ton magano lan ompatey, andi-duaruwan nansalita si Jesus ed saray babangatan to diad mabelas a paraan tan tekep na inkaganatan. Say panaon so sankaimportantian​—say bengatlan nanggawan nagkalalon makatantanda so tinmumbok a ginawa nen Jesus.

Inaabrasa nen Jesus Iray Ugugaw

Oniay ibabaga na salaysay ed Biblia: “Inyakar da ed sikato so saray ankekelag ya ugugaw, pian diwiten to ra.” Sanen anengneng na saray babangatan iya, tampol ya imbesngaw day agda panlabay. Anganko et inrason dan si Jesus so importantin tuloy odino masyadon okupado pian asikasoen toray ugugaw. Isipen pa sirin so inkabigla na saray babangatan, sanen sinmanok si Jesus ed sikara! “Paulyan yo so saray ankekelag ya ugugaw ya ondago ed siak,” so inkuan to’d sikara. “Agyo ra sesebelan, ta sikara so makankien na panaria’y Dios.” Insan to inyarum: “Tua kuan ko ed sikayo, Siopaman ya agmangawat na panaria’y Dios a singa sakey a melag ya ugaw, agmakaloob a balot diman.”​—Marcos 10:13-15.

Naimano nen Jesus iray pandinayewan a kualidad ed ugugaw. Sikaray kaslakan a maupapet tan makompiyansa. Sisisiaen da ray ibabagay atateng da tan idepensa ra ni ingen ira ed arum ya ugugaw. Say inkamaawat, paibangat ya awawey da so manepeg ya aligen na amin a manpirawat a makaloob ed Panarian na Dios. Singa imbaga nen Jesus, “Sikara so makankien na panariay Dios.”​—Ikompara so Mateo 18:1-5.

Balet aglambengat inusar nen Jesus irayan ugugaw parad sakey ya ilustrasyon. Ipapalinew na salaysay a talagan labalabay nen Jesus so milimog ed sikara. Inreport nen Marcos a si Jesus “et inala tora [“so ugugaw,” NW] ed saray taklay to, tan binendisionan tora, ya intapew to so saray lima to ed sikara.” (Marcos 10:16) Diad salaysay labat nen Marcos so akalaktipay maligsan detalye a si Jesus “et inala tora so ugugaw ed saray taklay to.”a Diad ontan et apalumbasan nen Jesus iray iilaloan na saray wala la’d edad ya angaawit ed sarayan ugugaw a ‘manpadiwit’ lambengat ed sikato.

Anto so kabaliksan na “intapew [nen Jesus] so saray lima to” ed saray ugugaw? Anggapoy napatnagan dia a relihyoson seremonya, a singa say binyag. Bangta diad arum iran inkagawa et say panangitapew ed saray lima so mankabaliksan na pananuro, diad arum kabaliksan to lambengat so panamendision. (Genesis 48:14; Gawa 6:6) Kanian nayarin si Jesus so mamibendision lambengat ed saray ugugaw.

Dinanman ed saraya, si Marcos so angusar na mapuersan balikas parad “bendision” (ka·teu·lo·geʹo), a mangipapakabaliksan na mabiskeg a panangidanet. Saya so mangisusuherin si Jesus so masimsimoon, matamoy, tan maligligsan amendision ed ugugaw. Malinew ya agto minoria iray ugugaw bilang manangupot tan manangabala na panaon.

Leksion Parad Sikatayo

Say pidedeneng nen Jesus ed ugugaw tan ed saray wala la’d edad so aliwan makapakebbiew nisay manangipabpaabeba. Ibabaga na sakey a palapagan a “maseguron sikatoy maimis tan walaay magaygayagan elek.” Agpankelawan a saray totoo ed nanduruman edad so agnasisikig ed sikato. Diad panisip ed alimbawa nen Jesus, nayarin tepetan tayoy inkasikatayo, ‘Kasin mainomay ak ya asinggeran na arum?’ ‘Ompatnag kasin siak so okupado a tuloy pian imanoen iray aktibidad tan problema na arum?’ Say pamayubo na masimoon ya interes ed totoo so mamakiwas ed sikatayon asikasoen so arum, a singa ginawa nen Jesus. Nalikna na arum so puron interes tayo tan napaapit ira’d sikatayo.​—Uliran 11:25.

Singa ipapanengneng na salaysay nen Marcos, nanliketan nen Jesus so milimog ed ugugaw. Mapatnag, sikatoy angipanaon pian imatonan iran manggagalaw, lapud diad sakey ed saray ilustrasyon to et sinalambit to iray ay-ayam da. (Mateo 11:16-19) Anganko arum ed ugugaw a binendisionan to so ugaw nin tuloy pian natalosan no siopa si Jesus tan no antoy imbangat to. Balet ag-iya sengegay panliknan dadaraken to labat so panaon to. Sikatoy angusar na panaon parad ugugaw lapud inaro to ra. Maseguro, dakel ed saramay ugugaw a nabet nen Jesus leleg na ministeryo to so diad kaunoran et apakiwas lapud aro to diad impagmaliw dan babangatan to.

No si Jesus so angusar na panaon ed ugugaw leleg na importantin unor iran simba na bilay to, maseguron nayarian tayo met so mangipanaon parad sikara diad okupadon eskedyul tayo. Nakaukolan a nagkalautlan sinononot itayo ed saramay walaay nikadkaduma iran pankaukolan, a singa saray ulilan ugugaw a lalaki tan bibii. Peteg, amin ya ugugaw so ombulaslas sano sikara so naikdan na imano, tan kaliktan nen Jehova ya iter tayo’d sikara so amin ya aro tan tulong a nayarian tayo.​—Salmo 10:14.

[Paimano ed leksab]