“Tua a Sayan Too et Anak na Dios”

Diad saman et “komanem ya oras,” odino alas-12 na kaagwan. Binmilunget so “interon dalin anggad komasiam ya oras,” a manga alas-3 na ngarem. (Marcos 15:33) Sayan nikaduman bilunget et aliwan lapud eklipse. Maslak iyan nagagawa no balon bulan, balet natan et panaon na Paskua, a say bulan et tulaw. Tan mas binmayag iyan bilunget nen say pigaran minuto labat ya eklipse. Kanian nibagan say Dios so nanlapuan na sayan bilunget!

Isipen pay epekto na sayan agawa ed saramay manluludlurey ed si Jesus. Diad sarayan oras ya ambilbilunget, walay apatiran bibii ya inmasingger ed panamairapan a poste. Saraya et say ina nen Jesus, si Salome, si Maria Magdalena, tan si Maria ya ina nen apostol Santiago a Melag.

Si apostol Juan et kaiba na maneermen ya ina nen Jesus “diad asingger ed panamairapan a poste.” Banbantayan nen Maria imay inyanak to tan inasikaso to a walad poste a manpapairap. Pakalikna nen Maria et singa dinuyok na “andukey ya espada.” (Juan 19:25; Lucas 2:35) Si Jesus balet, anggaman makakaliknay pinasyan sakit, siansia nin inisip to so pankaabigan nen ina to. Pinilit toy onlingaw ed si Juan tan inkuan tod ina to: “Nia so anak mo!” Insan linmingaw ed si Maria tan inkuan tod si Juan: “Nia so inam!”​—Juan 19:26, 27.

Inmatalek nen Jesus ed inad-aro ton apostol so pangasikaso ed ina to, a mapatnag ya abalo la. Amta nen Jesus ya agni manisiad sikato iray arum ya agagi tod ina. Kanian seseguroen ton naasikasoy pisikal tan espiritual a pankaukolan nen ina to. Talagan alay abig ya alimbawa!

Sanen manampot lay bilunget, inkuan nen Jesus: “Makakainum ak.” Diad saya et sinumpal to so kasulatan. (Juan 19:28; Salmo 22:15) Atalosan nen Jesus a diad saman et singa inekal na Ama to so proteksion ed sikato pian nasubok no anggad iner so katooran na Anak to. Inmeyag si Jesus diad Aramaikon lenguahe na saray taga Galilea: “Eli, Eli, lama sabactani?” a say labay ton ibaga et “Dios ko, Dios ko, akin et pinaulyanan mo ak?” Saray arum ya akaalagey ed asingger et dumay atalosan da, kanian inkuan da: “Nengneng yo! Tatawagen toy Elias.” Walay sakey ed sikara a binmatik, insan angipasepsep na espongha ed anakseng ya alak tan inyan tod tanubong, insan ipapainum tod si Jesus. Balet inkuan na arum: “Paulyan yo! Nengnengen tayo no kasin onsabi si Elias a mangiyepas ed sikato.”​—Marcos 15:34-36.

Insan inyeyag nen Jesus: “Asumpal la!” (Juan 19:30) On, asumpal to so amin ya ipapagawa nen Ama to ed sikato diad dalin. Diad kaunoran et inkuan nen Jesus: “Ama, imamatalek kod sika so espirituk.” (Lucas 23:46) Diad ontan et impiya la nen Jesus ed si Jehova so puersa na bilay to, a matalek ya ipawil itan na Dios ed sikato. Diad saman et tinmuek si Kristo tan inatey, ya agbalot abawasan so talek tod Dios.

Insan walay maksil a yegyeg, a linmeletak iray bato. Diad kasil to, saray lubok ed paway na Jerusalem et alukaslukasan tan nibanbantak iray bangkay. Saramay ondadalan a makakanengneng ed saray bangkay et linmoob ed “masanton syudad” tan imbalita ra no antoy naimatonan da.​—Mateo 12:11; 27:51-53.

Nen inatey si Jesus, say andukey tan ambelat ya kurtina a mangibibiig ed Masanto tan Sankasantosan ed templo na Dios et nankadua, ya apilat manlapud tagey anggad leksab. Sayan makapakelaw ya agawa et pakapatnagan ya sinmanok so Dios ed saramay amatey ed Anak to tan mankabaliksan a nilukas la natan so dalan a paonlad Sankasantosan, say mismon tawen.​—Hebreo 9:2, 3; 10:19, 20.

Lapud satan et ataktakot a maong iray totoo. Samay opisyal na armada ya angidaulo ed pamatey et inkuan to: “Tua a sayan too et Anak na Dios.” (Marcos 15:39) Nayarin sikatoy wadman sanen binista si Jesus diad arapan nen Pilato, a nantongtongan da no kasin sikatoy anak na Dios. Natan et kombinsido la a si Jesus et matunong tan tua ya Anak na Dios.

Saray arum ya akanengneng ed sarayan nikadkaduman agawa et sinmempet a “tatapoktapoken day pagew da” lapud pinasyan ermen tan kababaingan. (Lucas 23:48) Kaibad saramay maniimaton a walad bandad arawi et saray dakel a bibiin disipulo nen Jesus a no maminsan et mimilad sikaton manbiahe. Naapektoan met iran maong ed sarayan makatantandan agawa.