“Inarok so Ama”

1, 2. Antoy imparungtal nen apostol Juan nipaakar ed samay unor lan labi ya akaiba na saray apostol si Jesus?

SAKEY a masiken so mangidedelnet na panagsulat to ed tinta. Napnoy nonot to na saray agawgawa ed apalabas. Say ngaran to et Juan, tan bukbukor to lay mabilay ya apostol nen Jesu-Kristo. Diad saman a panaon et ngalngali la 100 años nen Juan, tan sankanonot to imay agnalinglingwanan a labi ya agawa manga pitoran dekada lay apalabas, salanti, samay unor lan impakapiulop da ran apostol ed si Jesus antis ya inatey. Lapud panangiwanwan na masanton espiritu na Dios, anonotan tan detalyadon nisulat nen Juan iray agawgawa.

² Diad saman a labi, impaliwawan maong nen Jesus a sikatoy magano lan pateyen. Tan si Juan labat so angiparungtal ed rason no akin ya inkuan nen Jesus a sikatoy mabulos a managmak na teriblin ipapatey. Inkuan to: “Pian nakabatan na mundo ya inarok so Ama, tan unong a say Ama initdan to ak na ganggan, ontan so gawaen ko. Alagey kayo, onalis itayo dia.”​—Juan 14:31.

3. Panon ya impanengneng nen Jesus so panangaro to ed Ama to?

³ “Inarok so Ama.” Parad si Jesus, anggapo lay mas makana nen say satan. Ingen ta agto inulit-ulit ya imbaga itan. Diad tua, say Juan 14:31 so alenleneg a rekord ed Biblia a pakaromogan tayo ed direktan impangibalikas nen Jesus ed panangaro to’d Ama to. Anggaman ontan, pinaneknekan to itan diad paraan na impanbilay to. Diad inagew-agew et impatnag to so panangaro to ed si Jehova. Say pakpel to, katutulok to, tan panagsungdo to et paneknek ya amin na panangaro to ed Dios. Say interon ministeryo to et papakiwasen na sayan aro.

4, 5. Anton klase na aro so ipapaseseg na Biblia, tan antoy nibaga tayo nipaakar ed panangaro nen Jesus ed si Jehova?

⁴ Diad sarayan panaon, nayarin ipasen na arum a say panangaro et sakey a kakapuyan. On ta nayarin say walad nonot da et saray anlong tan kansion nipaakar ed panangaro, odino ompan pati say pampappatey lapud romantikon panangaro. Tua, sisingbaten na Biblia so nipaakar ed romantikon panangaro, balet ta diad mas mapagalang a paraan nen say nagagawa natan. (Uliran 5:15-21) Say nagkalalon iikday importansia na Biblia et say sananey a klase na aro. Sayan aro et aliwan basta pantindek labat odino onkupas a liknaan; aliwa met iyan ambetebetel a pisisiglaotan, ya utek labat so pagaganaen. Parehon nalalanor ed saya so puso tan nonot. Sayan panangaro et manlalapu ed utel na puso, ya igigiya tan mitunosan ed atagey iran prinsipyo, tan satan so nipapatnag ed positibon kiwas. Seguradon aliwa labat itan a ludlurey a liknaan. Inkuan na Salita na Dios a say “aro agbalot mangangga.”​—1 Corinto 13:8.

⁵ Diad amin na saray totoo a nambilay, si Jesus so manunan angaro ed si Jehova. Anggapoy makadaeg ed si Jesus no nipaakar ed pananoor ed inaon ton mismo a sankatalonggaringan a ganggan na Dios: “Sika aroen mo so Katawan a Dios mo ed amin a pusom, tan ed amin a kamarerwam, tan ed amin a nonot mo, tan ed amin a biskeg mo.” (Marcos 12:30) Panon ya abayuboan nen Jesus so ontan a panangaro? Panon ton apansiansian mabiskeg so panangaro to ed Dios leleg ton wadiad dalin? Tan panon tayon naalig si Jesus?

Say Sankabayagan tan Sankaeletan a Bedber na Aro

6, 7. Panon tayon amta a say dedeskribien ed Uliran 8:22-31 et say Anak na Dios, ya aliwan basta say kalidad a kakabatan?

⁶ Asali yo ta lay aki-kimeyan ed sakey a kaaro tan legan yon gagawaen so sakey a proyekto et naiimano yon ondarakep tan oneelet so impankaaro yo? Satan ya alay abig ya eksperiensya et makatulong pian natalosan tayo so aroan ya abayuboan nen Jehova tan say bogbogtong ya Anak to. Mabetbet tayon sasalambiten so Uliran 8:30, balet usisaen tayo pa natan itan a bersikulo unong ed konteksto na satan. Diad bersikulo 22 anggad 31, say kakabatan so niyaliling ed sakey a persona. Panon tayon amta a say tutukoyen na sarayan pinuyanan a salita et say Anak na Dios?

⁷ Diad bersikulo 22, et inkuan na kakabatan: “Si Jehova kinayarian [“pinalsa,” Maung a Balita] to ak dia ed gapo na dalan to, arapen na saray gawa to nen inmuna.” Napatnagan a mas nen say kakabatan so nadedeskribe dia, lapud satan a kalidad et agbalot “pinalsa.” Anggapoy gapoan na satan lapud si Jehova et lawas lan wala tan lawas makabat. (Salmo 90:2) Balet, say Anak na Dios et “panguloan ed amin a pinalsa.” Sikatoy pinawala odino pinalsa; sikatoy sankaunaan ed amin a ginawa nen Jehova. (Colosas 1:15) Unong a deneskribe ed Uliran, say Anak so apalsa la antis nin ginawa so dalin tan katawenan. Tan bilang Salita, a Representantin Managsalita na Dios a mismo, sikatoy nagnap a pakapatnagan na kakabatan nen Jehova.​—Juan 1:1.

8. Antoy gagawaen na Anak antis ton nagmaliw a too, tan anto so nayarin nanonotan tayo met sano idadayew tayo so palsa?

⁸ Antoy gagawaen na Anak legan na samay andukerukey a panaon antis ton linma diad dalin? Inkuan na bersikulo 30 a sikatoy kaiba na Dios bilang “uloen a komikimey.” Antoy labay ya ibaga na satan? Ipapaliwawa na Colosas 1:16: “Dia ed sikato apalesa so amin a bengatla, dia ed katawenan tan tapew na dalin . . . Amin a bengatla apalsa ed panamegley to tan nipaakar ed sikato.” Kanian, inusar na Manamalsa a si Jehova so Anak to, say Uloen a Komikimey, pian palsaen so arum niran pinalsa, salanti, saray espiritun pinalsa ed tawen, say maawaawang ya uniberso, say dalin, saray makapadinayew a nanduruman tantanaman tan ayayep, ontan met ed say obra maestra ed amin a palsa ed dalin: say katooan. Diad arum ya aspekto, nayari tayon iyaliling iyan impantulongan na Sanama ed sakey ya arkitekto a mikikimeyan ed sakey a managkontrata ya eksperto ed panagpaalagey na saray alay dakep a desinyo na arkitekto. Sano pandinayewan tayo so antokaman ya aspekto na palsa, diad tua et nidadayew tayo so Sankamaongan ya Arkitekto. (Salmo 19:1) Balet, nayarin nanonotan tayo met so maliket tan abayag ya impantulongan na Manamalsa tan say “uloen a komikimey” to.

9, 10. (a) Anto so amaelet ed bedber na aroan nen Jehova tan say Anak to? (b) Anto so mamaelet na siglaotan yo ed mangatatawen ya Ama yo?

⁹ Sano maniban mankimey so duaran ag-ayadyarin too, no maminsan et ag-ira makapantunosan. Aliwan ontan si Jehova tan say Anak to! Andukerukey lan panaon a mikikimeyan so Anak ed Ama to, tan sikatoy “malikeliket lawas ed arap to.” (Uliran 8:30) On, labalabay ton nakaulop so Ama to, tan ontan met nen Jehova. Kanian, natural labat a lalon nagmaliw a kaulibay na Anak so Ama to, a naaral ton aligen iray kalidad To. Kanian, agla pankelawan no akin ya ontan lay elet na aroan dan Sanama! Manepeg labat a nibagan satan la so sankabayagan tan sankaeletan a bedber na aroan ed interon uniberso.

¹⁰ Balet, antoy labay ya ibaga na satan ed sikatayo? Nayarin iisipen yon agkayon balot nawalaan na ontan a siglaotan ed si Jehova. Tua, anggapo’d sikatayo so walaay atagey a posisyon a singa say Anak. Balet, walaan itayo na alay abig a pankanawnawa. Tandaan, apaapit si Jesus ed Ama to diad impikimeyan to ed Sikato. Maad-aron iyoopresi nen Jehova ed sikatayo so pankanawnawan magmaliw a “kakimeyan” to. (1 Corinto 3:9) Legan tayon aaligen so ehemplo nen Jesus diad ministeryo, nepeg a lawas tayon tandaan a kakimeyan itayo na Dios. Diad ontan et mas onelet so panaaroan a mamebedber ed sikatayo tan si Jehova. Wala ta ni mas maabig nen say satan a pribilehyo?

No Panon ya Apansiansia nen Jesus a Mabiskeg so Panangaro To ed si Jehova

11-13. (a) Akin a makatulong no ipasen tayon singa mabilay a bengatla so panangaro, tan sanen ugaw ni si Jesus, panon ton pinansiansia a mabiskeg so panangaro to ed si Jehova? (b) Panon ya impanengneng na Anak na Dios a sikatoy interesadon makaaral ed si Jehova antis ton linma ed dalin tan ontan met sanen nagmaliw a too?

¹¹ Diad dakel a paraan, makatulong no moriaen tayo a say panangaron nalilikna tayo et singa mabilay a bengatla. Singa say balibalin masitas, kaukolan a bayuboan tan asikasoen so panangaro pian ombaleg tan ombulaslas. No napaulyan tan agtayo limenglimengen itan, satan so onletey tan ompatey. Si Jesus et agto nileglemew so panangaro to ed si Jehova. Pinansiansia to itan a mabiskeg tan mabulaslas legan ton wadiad dalin. Nengnengen tayo no panon ton ginawa itan.

¹² Nonot yo pa lamet imay inkagawa sanen si Jesus so akisingbatan diad templo ed Jerusalem. Oniay inkuan to ed saray aburido lan atateng to: “Panon ya inaanap yo ak? Agyo amta a nakaukolan ko so wala ed abung nen Amak?” (Lucas 2:49) Lapud ugaw ni ed saman si Jesus, mapatnag ya agto ni amta so nipaakar ed impanayam to ed tawen. Anggaman ontan, pirmi la so panangaro to ed Ama ton si Jehova. Amta ton nipatnag to itan a panangaro panamegley na pandayew ed Ama to. Kanian anggapo lay arum a pasen ed dalin a mas labay ton laen noag say abung nen Ama to a parad tuan panagdayew. Pilalek toy onla ditan tan agto labay so onalis. Sakey ni, sikatoy aglabat wadman a mamanbantay. Sikatoy magunaet a makaaral nipaakar ed si Jehova tan ibalikas iray amta to. Tan satan a nalilikna to et agginmapo tan agmet anampot sanen sikatoy 12 años.

¹³ Antis a nagmaliw a too so Anak, sikatoy magunaet a nanaral ed Ama to. Ipaparungtal na propesiya ed Isaias 50:4-6 ya impasal a maong nen Jehova so Anak to parad pagmaliw ton Mesias. Anggaman kabiangan ed satan ya espisyal ya edukasyon so pangamta ed pigaran irap a sagmaken na sayan Anak a Lanaan nen Jehova, sikatoy magunaet a nanaral. Diad saginonor, sanen wadia la’d dalin si Jesus tan wala la’d edad, siansia nin labalabay toy onla ed abung nen Ama to tan akibiang ed panagdayew tan ed panagaral a kaliktan nen Jehova a nagawa ditan. Kanian, akarekord ed Biblia so nipaakar ed andi-saew ya inyakar nen Jesus ed templo tan ed sinagoga. (Lucas 4:16; 19:47) No labay tayon mantultuloy a mabilay tan mabulaslas so panangaro tayo ed si Jehova, kaukolan a makuli tayon atendian iray Kristianon pantitipon. Lapud ditan tayo idadayew si Jehova tan papaaralemen so kakabatan tan panangapresya tayo ed sikato.

14, 15. (a) Akin a kinaliktan nen Jesus so manbukbukor? (b) Panon ya ipaparungtal na saray pikakasi nen Jesus so inkaapit tan respeto to ed Ama to?

¹⁴ Pinansiansia met nen Jesus a mabiskeg so panangaro to ed si Jehova panamegley na regular a panagpikasi. Anggaman sikatoy makaaron too tan mididipong-dipong, mapatnag a labay to met so manbukbukor. Alimbawa, inkuan na Lucas 5:16 a “sikato so inmarawi a linma ed kalawakan tan nampikasi.” Mipadpara, inkuan na Mateo 14:23: “Sanen apasipo’to so katooan tinmatdang ed palandey a nampikasi a bukbukor; tan sanen onlalabi la, wadman a bukbukor to.” Diad saraman a bekta tan ed arum ni ra et nilabay nen Jesus so manbukbukor, aliwan lapud ibibiig toy inkasikato odino lapud kabusol toy miulop ed arum, noag lapud labay to so manbukbukor kaiba si Jehova, pian nipikasi to ed Ama to so walad puso to.

¹⁵ Sano sikatoy manpipikasi, no maminsan et uusaren to so balikas ya “Abba, Ama.” (Marcos 14:36) Nen panaon nen Jesus, say “Abba” et maaron pananawag ed tatay, ya uusaren labat na mankapamilya. Kaslakan lan sakey itan ed saray sankaunaan a salitan naaral a nibalikas na sakey ya ugaw. Balet, satan so marespeto. Anggaman ipapatnag na satan a salita so inkaapit na Anak sano mitotongtong ed maaron Ama to, ipapabitar met na satan so baleg a respeto to ed makaaman autoridad nen Jehova. Natebek tayo itan ya inkaapit tan respeto nen Jesus ed Ama to diad saray nisulat a pikakasi to. Alimbawa, diad Juan kapitulo 17, insulat nen apostol Juan imay andukey tan impapuson pikakasi nen Jesus diad samay unor lan labi To. Talagan milay liknaan tayo no aralen tayo itan a pikakasi, tan importantin aligen tayo itan. Balet siempre, aliwan diad pangulit tayo ed saray salita nen Jesus, noagta diad pananap tayo na saray paraan pian mabetbet tan impapuso itayon makapitongtong ed mangatatawen ya Ama tayo. Ta diad panggawa tayo ed satan, mansiansian mabilay tan mabiskeg so panangaro tayo ed sikato.

16, 17. (a) Panon ya imbalikas nen Jesus so panangaro to ed Ama to? (b) Panoy impaneskribe nen Jesus ed inkamabunlok na Ama to?

¹⁶ Unong a naimano tayo la, ag-inulit-ulit nen Jesus iray salitan “inarok so Ama.” Balet, diad saray balikas to et aminpiga ton impatnag so panangaro to ed Ama to. Panon? Inkuan a mismo nen Jesus: “Misalamat ak ed sika [“idayew ta ka ed lapag,” NW], O Ama, Katawan na tawen tan dalin.” (Mateo 11:25) Sanen aaralen tayo so Seksion 2 na sayan libro, naamtaan tayo a kalkaliktan nen Jesus ya idayew so Ama to panamegley na impanulong to ed totoo a makapikabat ed Ama to. Alimbawa, inyaliling toy Jehova ed sakey ya ama a mabulbulos a mamerdona ed matungangan ilalak to, a pitalaran ton ompawil. Sanen sikatoy abantag to, sikatoy binatik ton nilakap. (Lucas 15:20) Siopa so agnatenyeg so liknaan to diad pakabasa ed satan ya impangilitrato nen Jesus ed panangaro tan panamerdona nen Jehova?

¹⁷ Mabetbet ya idadayew nen Jesus so inkamabunlok na Ama to. Inusar to so gagawaen na saray ag-ayadyarin atateng pian ipabitar a talagan seguradon ikdan itayo na Ama na masanton espiritu a nakaukolan tayo. (Lucas 11:13) Sinalambit met nen Jesus so ilalo a mabunbunlok ya iyoopresi na Ama. Deneskribe nen Jesus, tekep na pampilpilalek, so ilalo ton kipawil ed dikingan na Ama to diad tawen. (Juan 14:28; 17:5) Imbaga to ed saray patumbok to so nipaakar ed ilalon ipagamor nen Jehova ed saray “daiset a papastolan” to, salanti, say panayam da ed tawen tan say panuley da a kaiba so Mesianikon Ari. (Lucas 12:32; Juan 14:2) Tan tinambayo to so sakey a makasalanan ya asingger lan ompatey, panamegley na ilalon bilay ed Paraiso. (Lucas 23:43) Say impangitongtong to nipaakar ed agaylan inkamabunlok na Ama to so seguradon akatulong ed sikaton napansiansia a mabiskeg so panangaro to ed si Jehova. Amta na dakel ed saray patumbok nen Kristo ya anggapo lay mas mamaelet ed panangaro odino pananisia ra ed si Jehova nen say pangitongtong nipaakar ed sikato tan ed say ilalon iter to ed saray mangaaro ed sikato.

Kasin Aligen Yo so Panangaro nen Jesus ed si Jehova?

18. Anto so sankaimportantian a dalan a diad satan et kaukolan tayon tumboken si Jesus, tan akin?

¹⁸ Diad amin na saray bengatlan nepeg tayon tumboken ed si Jesus, anggapo lay mas importante nen say saya: Kaukolan tayon aroen si Jehova ed interon puso, kamarerwa, nonot, tan biskeg. (Lucas 10:27) Satan a panangaro et aglabat nasukat diad kaaralem na nalilikna tayo noagta ontan met ed aktual a gagawaen tayo. Si Jesus et agnankontento ed pakalikna lambengat na panangaro ed Ama to, tan agto lambengat inkuan ya “inarok so Ama.” Noagta inkuan ton: “Pian nakabatan na mundo ya inarok so Ama, tan unong a say Ama initdan to ak na ganggan, ontan so gawaen ko.” (Juan 14:31) Inyakusa nen Satanas ya anggapoy toon manlingkor ed si Jehova lapud puron panangaro. (Job 2:4, 5) Pian iter so sankaabigan lan ebat ed satan a panamauges nen Satanas, makmakpel a kinmiwas si Jesus tan impanengneng to ed mundo no kaunongay panangaro to ed Ama to. Sikatoy tinmulok anggad punton insuko toy bilay to. Kasin tumboken moy Jesus? Kasin ipanengneng mo met ed lapag a talagan inarom si Jehova a Dios?

19, 20. (a) Lapud antoran importantin rason a labay tayoy regular a makaatendi ed saray aral? (b) Panon so nayarin pangipasen tayo ed personal a panagaral, panagdalepdep, tan pikakasi?

¹⁹ Nisipor ed sikatayo so pankaukolan ya ipanengneng so ontan ya aro. Kanian inyuksoy nen Jehova so sakey a paraan na panagdayew a mamabaleg tan mamabiskeg ed satan a panangaro. Sano miaaral kayo, tandaan yo a wadtan kayo pian idayew so Dios. Kabiangan ed satan a panagdayew so impapuson pikakasi, pangansion na saray panangidayew, atentibon idengel, tan sano posible et say pibiang. Diad saratan met a pantitipon et pankanawnawa yon pasesegen iray kaparan Kristiano. (Hebreos 10:24, 25) Say regular a pangidayew ed si Jehova diad saray aral et ontulong ed sikayo pian lalon ombiskeg so panangaro yo ed Dios.

²⁰ Ontan met, napaelet so panangaro tayo ed Dios panamegley na personal a panagaral, panagdalepdep, tan panagpikasi. Ipasen a paraan iraya pian nakaiba yon bukor si Jehova. Legan yon aaralen so Biblia, tan dadalepdepen itan, inanabang nen Jehova ed sikayo so walad kanonotan to. Legan kayon manpipikasi, ibebesngaw yo met ed sikato so walad puso yo. Tandaan, say pikakasi et aliwa labat lan pikekerew ed Dios. Say pikakasi et pankanawnawa met pian pisalamatan si Jehova lapud saray naawat tayon bendisyon tan sikatoy nidayew lapud makapakelkelaw iran gawa to. (Salmo 146:1) Niarum ni, say maliket tan maligsan panangidayew ed si Jehova ed publiko so sankaabigan a paraan pian makapisalamat tan nipanengneng yo so panangaro yo ed sikato.

21. Panoy kaimportante na pangaro ed si Jehova, tan antoray aralen ed saray onsaginonor a kapitulo?

²¹ Say pangaro ed Dios so sekreto na magnayon a panliket yo. Satan labat komon so kaukolan di Adan tan Eva pian ag-ira atukso, balet ta satan met a bengatla so apaulyanan da. Satan so sankaimportantian a bengatla a nakaukolan yo pian nipasa yo so antokaman a subok ed pananisia, nipulisay so antokaman a tukso, tan nasungdoan so antokaman a subok. Satan so interamentin kabaliksan na pagmaliw a patumbok nen Jesus. Siempre, walay pikoneksionan na panangaro ed Dios tan panangaro ed kaparan too. (1 Juan 4:20) Diad saray onsaginonor a kapitulo, usisaen tayo so impangipatnag nen Jesus na panangaro ed totoo. Diad onsublay a kapitulo, aralen tayo no akin a dakerakel so akaimano a si Jesus et mainomay ya asinggeran.