Ag-abayag kayari bautismo to, tinukso si Jesus na agnanengneng ya espiritun pinalsa a tinawag a Satanas a Diablo. Diad impangisitas na sakey ed saray tukso, kuan na Biblia: “Say diablo yakar to [si Jesus] lamet ed sakey a san katagyan a palandey, tan ipanengneng to ed sikato so saray amin a panarian na mundo, tan say dayew da.” (Mateo 4:8) Insan imbaga nen Satanas ed si Jesus: “Iter ko ed sika so saya ya amin a pakauley, tan say gloria ra, ta sikato so niiter ed siak; tan dia’d siopa a labay ko a pangiteran iter ko ed sikato. Kanian, no mikasika ed arap ko, sikato so kayarian mo ya amin.”​—Lucas 4:6, 7.

Ibabaga nen Satanas a sikatoy walaay autoridad ed amin a panarian, odino gobierno, ed sayan mundo. Kasin imburi nen Jesus iyan panangaksobi? Andi. Diad tua, pinekderan to itan ed sananey nin inkagawa diad impanukoy ed si Satanas bilang “say manuley na say mundo.”​—Juan 14:30, NW.

Unong ed Biblia, si Satanas so sakey a marelmeng ya anghel a walaay baleg a pakayari. Isisiglaot na Kristianon apostol a si Pablo si Satanas ed “saray mauges ya espiritu” tan sasaglawien ira bilang “saray manuley ed mundo na sayan kabilungtan.” (Efeso 6:11, 12) Niarum ni, inkuan nen apostol Juan a “say sankamundoan mandokdokol ed kaugsan.” (1 Juan 5:19) Sasalitaen na libro na Biblia ya Apocalipsis a si Satanas so “mantila ed lapag na sankamundoan.” (Apocalipsis 12:9) Diad simboliko iran termino, ililitrato met na Apocalipsis si Satanas bilang dragon a mangiiter ed mapulitikan sistema na mundo na “pakayari to, tan say trono to, tan say baleg a pakauley.”​—Apocalipsis 13:2.

Papaneknekan met na saray ebento ed mundo a walay sakey a mauges a pakayarin onkikiwas, a mangokontrol ed totoo diad kapasakitan da. Diad anto niran arum a rason ya onsasaew iray gobierno na too a mangiyalibansa na kareenan? Anto ni sengegan na panggugulaan tan panpapateyan? Lapud pakakakebbiew ed panamatey tan ipapatey ed sakey a guerra sibil, onia so inkuan na sakey ya akatasi: “Agkon balot naisip no panon iya agawa. Alabas ni nen say panggula. Sakey a marelmeng ya espiritu so manguusar ed sarayan totoo pian deralen so sakey tan sakey.”

No Akin a Papaulyanan a Manguley si Satanas

Kasin natandaan moy imbaga nen Satanas ed si Jesus nipaakar ed pananguley diad dalin? “Iter ko ed sika so saya ya amin a pakauley, . . . ta sikato so niiter [la] ed siak,” inkuan nen Satanas (Lucas 4:6) Ipapanengneng na satan a balikas a si Satanas a Diablo so mangaagamil na autoridad lapu lambengat ed panangiyabuloy na Dios. Balet akin a papaulyanan na Dios si Satanas?