Kapitulo Onse

‘Itultuloy Yon Anapen ya Unona so Panarian’

1. (a) Akin a pinaseseg nen Jesus iray dumerengel ton anapen dan unona so Panarian? (b) Anton tepet so nepeg tayon itepet ed inkasikatayo?

MASULOK lan 1,900 taon so linmabas diad sakey a paliwawa ed Galilea, pinaseseg nen Jesus iray dumerengel to: “Itultuloy yo, sirin, ya anapen ya unona so panarian tan say inkatunong [na Dios].” Balet antoy rason ed ontan a pankaganatan? Agta say panaon na pangawat nen Kristo ed pakayari na Panarian et dia ni’d saginonor iran siglo? On, balet say Mesianikon Panarian so paraan a pangalangonan nen Jehova ed inkasoberano to tan panumpal to ed engranden gagala to a para ed dalin. Siopaman a peteg ya akatalos ed kaimportantian na saratan a bengatla so mangiyuna ed Panarian diad bilay to. No tua itan nen inmunan siglo, agaylan nagkalalo natan, ta si Kristo so nitrono lan Ari! Say tepet sirin et, Kasin ipapanengneng na paraan na panagbilay ko ya aanapen kon unona so Panarian?​—Mateo 6:33, NW.

2. Antoran bengatla so magunaet a pansasagpotan na totoo ed inkalapagan?

² Natan, minilyon a totoo ed sankamundoan so diad tua et manaanap ya unona ed Panarian. Ipapanengneng day suporta ra ed uley na Panarian diad pangisesentro ra’d bilay da ed pananumpal na linawa nen Jehova, diad impangidedika ra’d inkasikara ed sikato. Diad biek a dapag, karaklan ed katooan so interesado ed minumundon bengatla. Saray totoo so mansasagpot parad kuarta tan kaykayarian tan likeliket a nasaliw na kuarta. Odino isesekar day inkasikara diad pamalaknab na karera ra. Say paraan na panagbilay da so mangipapatnag na inka-okupado ra ed anapan, materyal iran bengatla, tan likeliket. Isesegunda da labat so Dios, no bilang ta manisia ni ra ed sikato.​—Mateo 6:31, 32.

3. (a) Anton nengneng na kayamanan so impaseseg nen Jesus ya anapen na saray babangatan to, tan akin? (b) Akin ya agnakaukolan ya alablabas a pampagaan iray materyal a bengatla?

³ Anggaman ontan, oniay insimbawa nen Jesus ed saray babangatan to: “Agkayo mantipon a nipaakar ed sikayo na kaykayamanan ed tapew na dalin,” lapud anggapo ed saratan a kaykayarian so magnayon. “Noag say,” inkuanto, “mantipon kayo a nipaakar ed sikayo na kaykayamanan ed tawen” diad panlingkor ed si Jehova. Pinaseseg nen Jesus iray patumbok ton pansiansiaen dan “maralus [“simple,” NW]” so mata ra diad pangiteen day imano tan biskeg da ed panumpal na linawa na Dios. “Agyo nayarian so manlingkor ed Dios tan saray kayamanan,” kuanto ed sikara. Balet komusta so nipaakar ed saray materyal a pankaukolan​—tagano, kawesen, tan ayaman? “Agkayo mapaga,” so insimbawa nen Jesus. Impaimano toray kamanokan​—tataganoen ira na Dios. Pinaseseg nen Jesus iray patumbok to a manaral ed saray karosasan—​kinawesan ira na Dios. Agta mas mabli iray matudion totoo a lingkor nen Jehova nen saratan? “Itultuloy yo, sirin, ya anapen ya unona so panarian tan say inkatunong to,” kuan nen Jesus, “tan amin na sarayan arum [a nakakaukolan] a bengatla so niarum la ed sikayo.” (Mateo 6:19-34, NW) Ipapatnag kasi na saray kiwas mo a sisiaen mo itan?

Ag-abuloyan a Napugeran so Katuaan na Panarian

4. No importante lan maong so pangipasen na sakey a too ed saray materyal a bengatla, anto so nayarin pansumpalan?

⁴ Manepeg labat so pampaga ed pakawalaan na magenap pian napenek iray materyal a pankaukolan na sakey tan nalegpet toy pamilya to. Balet, no mapaga lan maong so sakey a too ed materyal iran bengatla, makadesyang so pansumpalan. Anggaman nayarin ibabaga ton manisia ed Panarian, no diad puso to et manuna so arum a bengatla, napugeran so katuaan na Panarian. (Mateo 13:18-22) Alimbawa, diad sakey ya inkagawa et tinepetan na sakey a toon mayaman si Jesus: “Anto so gawaen ko pian natawir ko so bilay ya andi-anggaan?” Malinis so panagbilay to tan maong so pidedeneng to ed arum, balet ta papablien ton maong so materyal iran kayarian to. Agto nayarian ya italirak iray materyal a kayarian to ta pian magmaliw a patumbok nen Kristo. Sirin agto inawat so pankanawnawan mangitonton la komon ed pagmaliw ton kaiba nen Kristo ed mangatatawen a Panarian. Inkuan nen Jesus ed saman ya inkagawa: “Agaylay irap na saray walaan na kayamanan ya onloob ed panaria’y Dios!”​—Marcos 10:17-23.

5. (a) Diad antoran bengatla so impaseseg nen Pablo a pasaragen nen Timoteo, tan akin? (b) Panon ya uusaren nen Satanas so “aro ed pilak” bilang makadesyang a kalot?

⁵ Pigaran taon ed saginonor, sinulat nen apostol Pablo si Timoteo, a wala nensaman ed Efeso, sentro na maaligwas a komersyo. Sikato so pinanonotan nen Pablo: “Anggapo so intarok tayo dia ed mundo, et agtayo met nayariay mangala na antokaman a bengatla. No wala siri pantagano tayo tan kawesen tayo pasaragen tayo komon iya.” Manepeg labat so pankimey pian nitarya so ‘pantagano tan kawesen’ na sakey tan diad pamilya. Balet amasakbay si Pablo: “Saray manpirawat ya onyaman napelag ira ed sakey a katuksoan tan say kalot tan dia ed saray dakel ya agum a maksay tan makaderal a kaalakan, a mangipalereg ed saray totoo ed kagegeba tan kababalang.” Masilib si Satanas. Diad gapo et nayarin ayaten toy sakey a too ed melag iran paraan. Nayarin saya so tumbokan na babaleg a desdes, ya ompan sakey a pankanawnawa para ed promosyon odino magmaong a trabahon babaleg so sueldo balet ta samsamen toy panaon ya ingganan para ed espiritual a bengatla. No ag-itayo manbantay, nayarin napugeran na “aro ed pilak” so mas importantin bengatla a nisiglaot ed Panarian. Onia so impangibaga nen Pablo: “Sikato a sanen inaguman na saray arum, abalbalang ira ed pananisia, tan atalos ira na dakel a kaermenan.”​—1 Timoteo 6:7-10.

6. (a) Pian agnakalotan na materyalismo, anto so nepeg tayon gawaen? (b) Anton talek so niwala ed sikatayo anggaman ed kipapasen na ekonomya na mundo natan?

⁶ Lapud peteg a panangaro ed Kristianon agi to, pinaseseg nen Pablo si Timoteo: “Taynan mo so sarayan bengatla” tan, “Mibakal ka ed maabig a pibabakal na pananisia.” (1 Timoteo 6:11, 12) Nakaukolan so pansagpot pian ag-itayo itakos na materyalistikon paraan na panagbilay ed mundon walad kaliberliber tayo. Balet no italikarkar tayo so manbilay a tukoy ed pananisia tayo, sikatayo so agbalot ikaindan nen Jehova. Anggaman mabli so presyo na sasaliwen tan lapag ya agpakapantrabaho, seguroen to a walaan itayo na peteg a pankaukolan. Insulat nen Pablo: “Nabulos kayo komon a manlapu ed aro na pilak, panliketan yo so bengatla a wala ed sikayo: ta sikaton dili [say Dios] imbaga to: Agtaka naani taynan, tan agtaka naani ikaindan. Dia ed ontan nayarian tayo ya ibaga a mataletalek: ‘Say Katawan [“si Jehova,” NW] so mananulong ko; agak naani ontakot. Anto so nayarin gawaen ed siak na too?” (Hebreos 13:5, 6) Tan insulat nen Arin David: “Tobonbalo ak nensaman, et natan masiken ak la: agko nin balot anengneng a say matunong et apaulyan, nisay saray bini to mipabpayabol na nakan.”​—Salmo 37:25.

Angiter na Pangaligan Iray Inmunan Babangatan

7. Antoray imbilin nen Jesus ed saray babangatan to nipaakar ed panagpulong, tan akin a saraya so matukoy?

⁷ Kayarin impasal nen Jesus iray apostol to, sikara so imbaki to ed Israel a mangipulong ed maong a balita et inyabawag da: “Say panarian na tawen asingger la.” Agaylan makapalikliket iman a mensahe! Say Mesianikon Ari, si Jesu-Kristo so wala ed pegley da. Lapud iyaapasakey na saray apostol so serbisyo ed Dios, sikara so pinaseseg nen Jesus a manmatalek a say Dios so mangasikaso ed sikara. Kanian inkuanto: “Agkayo mangala na anggan anto nipaakar ed panakar yo, anggan tayukor, anggan supot, anggan tinapay, anggan pilak; et agkayo mangitarok na duara a kawes. Et dia ed bengatla ya abung a looban yo, ontilak kayod’man et diman so panlapuan yo.” (Mateo 10:5-10; Lucas 9:1-6) Seguroen nen Jehova a saray pankaukolan da so itarya na saray kapara ran Israelitas, a kaugalian da so panagparawes ed saray sankaili.

8. (a) Sakbay ni na impatey to, akin a si Jesus so angiter na duma lan bilin nipaakar ed panagpulong? (b) Anto nin siansia so nepeg a manuna ed bilay na saray patumbok nen Jesus?

⁸ Saginonor, sakbay ni na impatey to, pinasakbayan nen Jesus iray apostol to a diad arapen et mankimey ira diad duma la iran sirkumstansya. Bilang resulta na isusumpa na opisyal ed kimey da, nayarin agda la ra parawesen ed Israel. Ontan met, agmabayag et itarok da la so mensahe na Panarian ed daldalin a Gentil. Natan et sikara la so mangawit na ‘bulsaan’ tan “supot.” Anggaman kuan, itultuloy dan anapen ya unona so Panarian nen Jehova tan say inkatunong to, a matalek a bendisyonan na Dios iray sagpot da diad pananap ed nakaukolan a pantagano tan kawesen.​—Lucas 22:35-37.

9. Panon ya inyuna nen Pablo so Panarian ed bilay to legan ya aasikasoen toray nakakaukolan to ed pisikal, tan anto so insimbawa to ed sayan pamaakaran?

⁹ Si apostol Pablo so maabig ya ehemplo na sakey ya angiyaplika ed simbawa nen Jesus. Inyuna nen Pablo so ministeryo ed bilay to. (Gawa 20:24, 25) Sanen linman nampulong ed sakey a pasen, intarya to so dilin materyal a kakaukolan to, a nankimey ni bilang managgaway tolda. Sikatoy agnanilalo a sikatoy legpeten na arum. (Gawa 18:1-4; 1 Tesalonica 2:9) Balet, malikeliket ton inawat so panagparawes tan saray regalo sanen imbalikas na arum so ontan a panangaro ra. (Gawa 16:15, 34; Filipos 4:15-17) Pinaseseg nen Pablo iray Kristiano, ya agda papaulyan so obligasyon da ed pamilya ra ta pian manpulong, noagta simbangen da so nankakapigan responsabilidad da. Sikaray sinimbawa ton mantrabaho, aroen day pamilya ra, tan mangipanabang ed arum. (Efeso 4:28; 2 Tesalonica 3:7-12) Pinaseseg to ran manmatalek ed Dios, aliwan diad materyal a kaykayarian, tan usaren daray bilay da ed paraan a mangipanengneng a peteg dan natatalosan no antoray lalon importantin bengatla. Mitunosan ed saray bangat nen Jesus, kabaliksan na satan ya anapen dan unona so Panarian na Dios tan say inkatunong to.​—Filipos 1:9-11.

Itultuloy ya Iyuna so Panarian ed Bilay Mo

10. Antoy kabaliksan na anapen ya unona so Panarian?

¹⁰ Diad anton kalaknab so panginanabang tayon mismo ed maong a balita na Panarian ed arum? Mandepende itan, no maminsan, ed sirkumstansya tayo tan ed kaaralem na apresasyon tayo. Nodnonoten ya ag-imbaga nen Jesus ya, ‘Anapen so Panarian no anggapo la so arum a gawaen mo.’ Lapud kabat to so kaimportantian na Panarian, imbalikas to so linawa nen Ama to, a kuanto: “Itultuloy yon anapen so panarian to.” (Lucas 12:31, NW) Anggaman maslak ed sikatayo so kaukolan a mantrabaho ta pian nalegpet tayo iray pankaukolan tayo tan say pamilya tayo, nisentro so kabibilay tayo ed kimey na Panarian ya inter na Dios ed sikatayo no walaan itayo na pananisia. Ontan met, asikasoen tayo iray responsabilidad tayo ed pamilya.​—1 Timoteo 5:8.

11. (a) Panoy impangiyilustra nen Jesus ya aliwan amin et parepareho so nagawaan da diad panangilaknab ed mensahe na Panarian? (b) Antoran katuaan so mangapekta ed no panon karakel so nagawaan na sakey?

¹¹ Arum ed sikatayo so makapangideboto na malaem a panaon nen arum diad panangipulong ed maong a balita na Panarian. Balet diad parabolo to nipaakar ed nanduruman nengneng na dalin, impanengneng nen Jesus ya amin na saramay walaan na kapusoan a singa maabig a dalin so manbunga. Diad anton kalaknab so pambunga ra? Manduruma so sirkumstansya na balang sinansakey. Say edad, bunigas, tan saray responsabilidad ed pamilya so pigara ed saraya. Balet sano wala so peteg ya apresasyon, dakel so nagawaan.​—Mateo 13:23.

12. Anton maabig ya espiritual a kalat so nagkalalo lan nonoten na saray kalangweran?

¹² Maabig so pakawalaan na saray kalat ya ontulong ed sikatayon mamalaknab ed pibibiang tayo ed ministeryo na Panarian. Nepeg a seryoson nonoten na saray kalangweran so nipaakar ed sankaabigan ya ehemplo nen maseseg ya ugaw nin Kristiano a si Timoteo. (Filipos 2:19-22) Anto ni so mas maabig nen say iloob da ed sigpot-panaon a ministeryo kasumpal dan manaral? Nagunggonaan met iray matatatken diad pangiletneg da na maabig iran espiritual a kalat.

13. (a) Siopa so manetermina no anto so personal a nagawaan tayo diad serbisyo ed Panarian? (b) No tuan aanapen tayon unona so Panarian, anto so papaneknekan tayo?

¹³ Imbes a balawen iramay nayarin liknaen tayon makagawa komon na malaem, nepeg a sikatayo so napakiwas ed pananisian mankimey ed personal ya iyaaligwas tayo ta pian nalingkoran tayo so Dios ed malaklaknab a paraan ya iyabuloy na dili tayo iran sirkumstansya. (Roma 14:10-12; Galacia 6:4, 5) Singa nipanengneng ed kipapasen nen Job, isusuppiat nen Satanas a saray manunan interes tayo et saray materyal a kayarian tayo, say dilin pakainawaan tayo, tan say personal a pankaabigan tayo lapud satan et sinisiblet so motibo tayo diad panlilingkor ed Dios. Balet no tuan aanapen tayon unona so Panarian, mibibiang itayo diad pamapaneknek a say Diablo so matila-tila. Ipatnag tayo a say manuna ed bilay tayo et say serbisyo ed Dios. Diad ibabaga tan gagawaen tayo, papaneknekan tayo sirin so aralem a panangaro tayo ed si Jehova, say matoor a suporta tayo ed inkasoberano to, tan say panangaro tayo ed kaparan totoo.​—Job 1:9-11; 2:4, 5; Uliran 27:11.

14. (a) Akin a makagunggona so eskedyul para ed lawak na ministeryo? (b) Kaunongan kalaknab so pibibiang na dakel a Tastasi ed lawak na ministeryo?

¹⁴ Makatulong ed sikatayo so sakey ya eskedyul pian nagawaan ni so malaem. Si Jehova a mismo so walaan na “aturon panaon” diad panumpal ed gagala to. (Exodo 9:5; Marcos 1:15, NW) No nayari, maabig so pibiang ed lawak na ministeryo a maminsan odino onsulok niran aturon panaon ed kada simba. Nilasus nilibo ed saray Tastasi nen Jehova ed sankamundoan so nampalista bilang auxiliary payunir, a manguusar na manga duaran oras ed sakey agew diad pangipulong ed maong a balita. Nilasus nilibo nin arum so manseserbi bilang regular payunir, a manguusar na ngalngalin duara tan kapalduan oras ed kada agew diad pangiyabawag ed mensahe na Panarian. Saray espisyal payunir tan misionaryo so manguusar na malaglaem nin panaon diad serbisyo ed Panarian. Anamoten tayo met iray pankanawnawa pian manginabang na ilalo ed Panarian diad impormal a paraan ed anggan siopan ondengel. (Juan 4:7-15) Nepeg a say pilalek tayo et say sigpot a pibibiang ed satan a kimey kapiganman ya iyabuloy na saray sirkumstansya tayo, lapud impasakbay nen Jesus: “Sayan maong a balita na panarian so nipulong ed amin a panaayaman a dalin ya onkanan pantasi ed amin a nasyones; et insan onsabi so anggaan.”​—Mateo 24:14, NW; Efeso 5:15-17.

15. Misiglaotan ed ministeryo tayo, akin a liknaen mon nipanpanaon so simbawa ed 1 Corinto 15:58?

¹⁵ Nankakasakey, diad amin a pasen na dalin, anggan anton nasyon so panaayaman da, mibibiang iray Tastasi nen Jehova ed sayan pribilehyo na serbisyo. Iyaaplika ra so apuyanan a simbawa na Biblia: “Mansiansia kayo a malet, agkayo nagiing, lawas padaak yo so kimey yo ed Katawan, bangta amta yo a say kimey yo aliwa ya anggapo so kabaliksan to ed Katawan.”​—1 Corinto 15:58.

Repason Pantongtongan

• Sanen imbaga nen Jesus ya “anapen ya unona so panarian,” anto so ipapabitar ton nepeg ya ipasen a segundaryo?

• Anto so nepeg a punto-de-bista tayo diad pangaasikaso ed saray pankaukolan tayo tan ed pamilya tayo? Anton tulong so iter na Dios ed sikatayo?

• Diad antoran nengneng na serbisyo ed Panarian so napibiangan tayo?

[Litrato ed pahina 107]

Diad amin a daldalin, ipupulong natan na saray Tastasi nen Jehova so maong a balita, sakbay ya onsabi so anggaan