Kapitulo 5
Siopan Panagdayew so Aabobonan na Dios?
1. Antoy labay a naamtaan na sakey a Samaritana nipaakar ed panagdayew?
KASIN naumameng yo la so tepet a, ‘Siopan panagdayew so aabobonan na Dios?’ Nayarin ontan a tepet so walad kanonotan na sakey a bii sanen akitongtong ed si Jesu-Kristo asingger ed Palandey Gerizim diad Samaria. Diad pangipapaimano ed pandumaan na panagdayew na saray Samaritano tan saramay Judio, inkuanto: “Saray kaamaan mi angigalang ira dia ed saya’n palandey; et sikayo kuan yo, ya dia ed Jerusalem so pasen a nepeg day totoo’n pangigalangan.” (Juan 4:20) Kasin imbaga nen Jesus ed Samaritana ya aabobonan na Dios so amin a panagdayew? Odino kasin inkuanton walaray kakaukolanen ya espisipikon bengatla pian napaliket so Dios?
2. Bilang ebat ed Samaritana, antoy imbaga nen Jesus?
2 Say makapabiglan ebat nen Jesus et: “Say horas onsabi, sano angan dia ed saya’n palandey, ni say dia ed Jerusalem, agyo igalang so Ama.” (Juan 4:21) Abayag lan tatakotan na saray Samaritano si Jehova tan nandayew ed arum a dirios ed Palandey Gerizim. (2 Arari 17:33) Natan et inkuan nen Jesus ya ag-importanti itan a pasen nisay Jerusalem ed tuan panagdayew.
DAYEWEN ED ESPIRITU TAN KATUAAN
3. (a) Akin ya agtalagan kabat na saray Samaritano so Dios? (b) Panon ya akabatan na matoor a Judios tan arum so Dios?
3 Intuloy nen Jesus ya imbaga ed Samaritana: “Sikayo igalang yo so agyo amta, sikami igalang mi so amta mi, ta say kilabanan manlapu ed saray Judios.” (Juan 4:22) Saray Samaritano so walaan na palso iran relihyoson ideya tan inawat da lambengat so ununan limaran libro na Biblia bilang apuyanan—tan saraya lambengat so walad dili ran rebisyon ya akabatan bilang say Samaritanon Pentateuch. Sirin, agdan talaga kabat so Dios. Bangbalet, saray Judio so nimatalekanan na Makasulatan a pikakabat. (Roma 3:1, 2) Saray Kasulatan so angiiter ed matoor a Judios tan arum niran ontalineng ed nakakaukolan da ta pian nakabatan so Dios.
4. Unong ed si Jesus, antoy kaukolan a gawaen na namparan Judios tan Samaritanos no labay dan abobonan na Dios so panagdayew da?
4 Diad tua, impanengneng nen Jesus a namparan saray Judio tan Samaritano so kaukolan a manguman ed paraan na panagdayew da ta pian napaliket so Dios. Inkuanto: “Say horas onsabi, tan natan la, sano saray tua a manangigalang igalang da so Ama dia ed espiritu tan katuaan; ta saray ontan so anapen na Ama a manangigalang ed sikato. Say Dios sikato’y sakey ya espiritu, et saray mangigalang ed sikato nepeg da’n igalang ed espiritu tan katuaan.” (Juan 4:23, 24) Kaukolan tayon dayewen so Dios “ed espiritu,” a pinakiwas na kapusoan a napnoy pananisia tan aro. Posiblin dayewen so Dios ‘ed katuaan’ diad panaral ed Salita to, say Biblia, tan diad pangidayew ed sikato unong ed niparungtal a katuaan to. Kasin magunaet yon gawaen itan?
5. (a) Antoy kabaliksan na “panagdayew”? (b) Antoy nepeg tayon gawaen no labay tayon abobonan na Dios so panagdayew tayo?
5 Indanet nen Jesus a kaliktan na Dios so tuan panagdayew. Saya so mangipapanengneng a walaray porma na panagdayew ya ag-aabobonan nen Jehova. Say pandayew ed Dios et kabaliksan toy pangiter ed sikato na aralem a panangigalang tan pangisaklang na sagradon serbisyo ed sikato. No kaliktan yo so mangipanengneng na galang ed sakey a makapanyarin manuley, maseguron magunaet kayon manlingkor ed sikato tan gawaen so antokaman a makapaliket ed sikato. Sirin, maseguron kaliktan tayon paliketen so Dios. Imbes a basta pangibagay, ‘Say relihyon ko so mamapaliket ed siak,’ kaukolan tayo sirin a seguroen a say panagdayew tayo so makakapet ed saray kakaukolanen na Dios.
PANGGAWAY LINAWA NA AMA
6, 7. Akin ya agbibidbiren nen Jesus so arum a mankuan a babangatan to?
6 Basaen tayoy Mateo 7:21-23 tan nengnengen no napiho tayo so sakey a makabaliksan a sengegan a manidetermina no kasin aabobonan na Dios so amin a panagdayew odino andi. Inkuan nen Jesus: “Aliwa’n balang sakey a mankuan ed siak na, Katawan, Katawan, et onloob naani ed panaria’y tawen; noag ingen say [manggagawa, NW] ed linawa nen Amak ya wala ed tawen. Dakel naani ray mankuan ed siak no saman ya agew, Katawan, Katawan, agkami ta angipropeta lapu ed ngaran mo, tan dia’d ngaran mo pinapaway mi ray demonio [marelmeng iran espiritun pinalsa], tan lapud ngaran mo nangawa kami [makapanyari, NW] ira’n gawa? Et saman ko la ipaliwawa naani ed sikara, Agta kayo apikabkabatan a balot! Arawi kayo’d siak, sikayo ya managgawa na kaugsan.”
7 Say pamidbir ed si Jesu-Kristo bilang Katawan so makana ed tuan panagdayew. Balet walay bengatlan nasasaew ed panagdayew na dakel ed saramay mankuan a babangatan nen Jesus. Inkuan ton arum so manggawa na “makapanyari ira’n gawa,” a singa say kuan a mamilagron panagtambal. Bangbalet, sikaray onsaew a manggawa ed inkuan nen Jesus ya importanti. Agda ‘nagawa so linawa na Ama to.’ No labay tayon paliketen so Dios, nepeg tayon aralen so linawa na Ama tan insan gawaen itan.
SUSTON PIKAKABAT—SAKEY A PROTEKSION
8. No gawaen tayo so linawa na Dios, antoy kakaukolanen, tan anton lingo iran panmoria so nepeg tayon paliisan?
8 Kakaukolanen na panggaway linawa na Dios so pakawalaay suston pikakabat nipaakar ed si Jehova a Dios tan si Jesu-Kristo. Say ontan a pikakabat so mangitonton ed andi-anggaan a bilay. No ontan, maseguron amin tayo so malabay a magmaliw a seryoso ed pangamor na suston pikakabat manlapud Salitay Dios, say Biblia. Ikuan na arum ya agla kaukolan a panpagaan itan, basta sikatayo so masimoon tan maseseg ed panagdayew tayo. Kuan na arum, ‘No samet so amtam, samet met so nailaloan ed sika.’ Ingen, papasesegen itayo na Biblia a palaknaben ni pikakabat ed Dios tan ed saray gagala to.—Efeso 4:13; Filipos 1:9; Colosas 1:9.
9. Panon itayon proproteksionan na suston pikakabat, tan akin a nakaukolan tayo so ontan a proteksion?
9 Say ontan a pikakabat so sakey a proteksion pian agnarutakan so panagdayew tayo. Sinaglawi nen apostol Pablo so sakey ya espiritun pinalsa a mankunkunwarin “angel na liwawa.” (2 Corinto 11:14) Diad onian pankuankuanan, sayan espiritun pinalsa—si Satanas—so manggugunaet a mamalikdo ed sikatayon manggawa na bengabengatlan sumlang ed linaway Dios. Dudumsisan met na arum ya espiritun pinalsan kaiba nen Satanas so panagdayew na totoo, lapud inkuan nen Pablo: “Saray bengatla ya ibagat na saray Gentiles, ibagat da ed saray demonios, ya aliwan dia ed Dios.” (1 Corinto 10:20) Maseguro, dakel so maniisip a sikaray mandadayew ed suston paraan, anggaman agda gagawaen so kaliktan na Dios. Sikaray napapalikdo ed marutak tan palson panagdayew. Wala ni naaralan tayo ed saginonor nipaakar ed si Satanas tan saray demonyo to, balet pihon manudutak irayan kabusol na Dios ed panagdayew na katooan.
10. Antoy gawaen yo no walay sigagalan nansamal ed panangalaan yoy inumen, tan kikinlongan itayo na suston pikakabat ed Salitay Dios pian gawaen so anto?
10 No naamtaan yon walay sigagalan nansamal ed panangalaay inumen yo, kasin ituloy yo ni uninum manlapud satan? Maseguro, onkiwas kayon tampol a mananap na pakaalaay malinis a danum. Bueno, kikinlongan itayo na suston pikakabat ed Salitay Dios pian nabidbiran so tuan relihyon tan nipulisay iray makarutak a manggawan ag-abobonan na Dios so panagdayew tayo.
SARAY GANGGAN NA TOTOO BILANG DOKTRINAS
11. Antoy aliwa ed panagdayew na dakel a Judios?
11 Sanen wadiad dalin si Jesus, dakel a Judios so agkinmiwas unong ed suston pikakabat ed Dios. Kanian abalang da so pankanawnawan nawalaan na malinis a talindeg ed imaton nen Jehova. Nipaakar ed sikara, insulat nen Pablo: “Itdan kora na panamintuaan ya wala so seseg da ed Dios, bangbalet aliwa ya onong ed [suston] kakabatan.” (Roma 10:2) Deniside ra ed inkasikara no panon so pandayew ed Dios imbes ya ontalineng ed imbabaga to.
12. Antoy nandutak ed panagdayew na Israel, tan tekep na anton resulta?
12 Diad inmuna et inagamil na saray Israelita so inter-Dios a dalisay a relihyon, dinudutakan na saray bangat tan pilosopiya na totoo. (Jeremias 8:8, 9; Malaquias 2:8, 9; Lucas 11:52) Anggaman inisip na Judion relihyoson papangulo a kabkabat bilang Pariseos a say panagdayew da et aabobonan na Dios, inkuan nen Jesus ed sikara: “Maong so inpangiprofeta nen Isaias ed sikayo ya masimpisimpitan, onong na nisulat, Saya’n baley galangen to ak ed saray bibil da, bangbalet say puso ra arawi ed siak. Balet dia ed kaapaan so panangigalang da ed siak, a ibabangat da’n singa [doktrinas iray ganggan, NW] na saray totoo.”—Marcos 7:6, 7.
13. Panon a posiblin nagawaan tayo so singa ginawa na saray Pariseo?
13 Posibli kasin nagawaan tayo so singa ed ginawa na saray Pariseo? Saya so nagawa no tumboken tayoray relihyoson tradisyon a nipabangon ed sikatayo imbes ya usisaen so imbaga na Dios nipaakar ed panagdayew. Diad pangipapasakbay ed sayan pete-peteg a kapeligroan, insulat nen Pablo: “Say Espiritu kuan to ed maliwawa, a dia ed saray arapen a panaon saray arum onsian ira ed pananisia, a denglen da so saray espiritu a manangilawan tan saray bangat na saray demonio.” (1 Timoteo 4:1) Kanian aliwan magenap so basta pangipasen a say panagdayew tayo so mamapaliket ed Dios. Singa say Samaritana ya akapiabet ed si Jesus, ompan atawir tayo labat ed atateng tayo so paraan na panagdayew tayo. Balet kaukolan a naseguro tayo a say gagawaen tayoran bengatla et abobonan na Dios.
MANBANTAY SUMPAD PAKAOPENDI’D DIOS
14, 15. Anggan walaan tayo na samet a pikakabat ed linawa na Dios, akin a kaukolan tayo ni manalwar?
14 No ag-itayo manalwar, ompan makagawa tayoy bengatlan agmakapaliket ed Dios. Alimbawa, si apostol Juan so tinmalimokor ed salian na sakey ya anghel “pian sikatoy dayewen.” Balet pinasakbayan na anghel: “Manalwar ka! Agmo gagawaen itan! Aripen ak labat a kaparam tan ed agagim a walaan na kimey a panagtasi ed si Jesus. Idayew moy Dios.” (Apocalipsis 19:10, NW) Kasin nanenengneng yo so pankaukolan ed paneguron say panagdayew yo so ag-arutakan na antokaman a nengneng na panagtalintao?—1 Corinto 10:14.
15 Sanen ginmaporay arum a Kristiano a mangagamil na relihyoso iran kustombre ya ag-amaliket ed Dios, intepet nen Pablo: “Panon so ipawil yo lamet ed saray [makapuy, NW] tan duka a bangat, a sikara so gaba’yo a pawilen a paaripen? Ngilinan yo so saray agew, tan saray bulan, tan saray panaon, tan saray taon. Natatakot ak ed sikayo, onpan lamang maapa so inpankesawkesaw ko ed sikayo.” (Galacia 4:8-11) Saraman ya indibidual so akagamor la na pikakabat ed Dios balet diad saginonor et nankasalanan lapud impanngilin ed relihyoso iran kustombre tan saray piestan agmakapaliket ed si Jehova. A singa inkuan nen Pablo, nakaukolan tayon “mantultuloy a seguroen no anto so makapaliket ed Katawan.”—Efeso 5:10, NW.
16. Panon a say Juan 17:16 tan 1 Pedro 4:3 so ontutulong ed sikatayon mandeside no kasin saray piesta tan kustombre so mamaliket ed Dios?
16 Nepeg a seguroen tayo a paliisan tayoray relihyoson piesta tan arum iran kustombre ya onsusumlang ed saray prinsipyo na Dios. (1 Tesalonica 5:21) Alimbawa, inkuan nen Jesus ed saray patumbok to: “Ag ira taga mundo, salanti onong ya ag ak taga mundo.” (Juan 17:16) Kasin say relihyon yo so nalalanor ed saray seremonya tan piestan onsusumlang ed prinsipyo na neutralidad nipaakar ed kura-kurang na sayan mundo? Odino kasin saray patumbok na relihyon yo so tunggal paminsan a mibibiang ed saray kustombre tan saray piesta a tinekepan na konduktan mipara ed deneskribe nen apostol Pedro? Insulat to: “Masarag la a dia ed apalabas a panaon ginawa yo so linawa na saray Gentiles, tan nanakar kayo ed [malukak a kondukta, NW], lawan, panaginum na alak, kasibaan, deneng, tan saray makapabaing ya ananito.”—1 Pedro 4:3.
17. Akin a nepeg tayon paliisan so antokaman a bengatlan mangisisindag na espirituy mundo?
17 Indanet nen apostol Juan so pankaukolay ipaliis ed antokaman ya agagamil a mangisisindag na espirituy agmaridios a mundon walad kaliberliber tayo. Insulat nen Juan: “Aleg ya aroen yo so mundo, ni saray bengatla ya wala ed mundo. No siopaman a too aroen to so mundo say aro na Ama andi ed sikato. Ta amin ya wala ed mundo, kilalawan na laman tan kilalawan na mata tan maapan gloria na bilay, aliwa a kien na Ama no ag kien na mundo. Et say mundo mangan-ga, tan saray penel to, sabalet so mangonor ed linawa na Dios onsiansia lawas.” (1 Juan 2:15-17) Kasin naimano yo a saramay ‘mangoonor ed linawa na Dios’ so mansiansia ed ando lan ando? On, no gawaen tayo so linawa na Dios tan paliisay aktibidades a mangisisindag ed espiritu na sayan mundo, nawalaan tayo na ilalon andi-anggaan a bilay!
SUMPALEN IRAY ATAGEY YA ESTANDARTE NA DIOS
18. Panon ya alingo so arum a Kristiano nipaakar ed kondukta ra, tan antoy nepeg tayon naaralan manlapud saya?
18 Labay na Dios bilang managdayew to iramay manusumpal ed saray atagey ya estandarte to ed moral. Arum ed kadaanan a Corinto so sililingon nanisip ya abuloyan na Dios so imoral a kagagawa. Nanengneng tayo so kabaleg na lingo ra no basaen tayo so 1 Corinto 6:9, 10. No labay tayon abobonan na Dios so panagdayew tayo, nepeg tayon paliketen ed salita tan gawa. Kasin say porma na panagdayew yo so ontutulong ed sikayon gawaen itan?—Mateo 15:8; 23:1-3.
19. Panon a say tuan panagdayew so mangaapekta ed panagtrato tayo ed arum?
19 Say pidedeneng tayo ed arum a too so nepeg met a mangisindag ed saray estandarte na Dios. Pinaseseg itayo nen Jesu-Kristo a tratoen so arum diad paraan a labay tayon pantrato ra ed sikatayo, lapud saya so kabiangan na tuan panagdayew. (Mateo 7:12) Imanoen met so inkuanto nipaakar ed panangipanengneng na inaagin panangaro: “Lapu ed saya amin a too nabirbiran da’ya sikayo ray babangatan ko, no wala so aro yo ed sakey tan sakey.” (Juan 13:35) Saray babangatan nen Jesus so nepeg a manaaroan tan manggawa na maong ed saray kaparan managdayew tan ed arum.—Galacia 6:10.
SIGPOT-KAMARERWAN PANAGDAYEW
20, 21. (a) Anton nengneng na panagdayew so kakaukolanen na Dios? (b) Akin ya impulisay nen Jehova so panagdayew na Israel ed agew nen Malaquias?
20 Diad kaaralman na puso yo, nayarin kaliktan yon dayewen so Dios diad makapaliket a paraan. No ontan, nepeg yoy nawalaan na panmoria nen Jehova ed panagdayew. Indanet nen babangatan a Santiago a say importanti et say panmoria na Dios, aliwan say panmoria tayo. Kuan nen Santiago: “Say religion a malinew tan andi tilol ed arap na Dios tayo tan Ama sikato ya: Dalawen so saray ulila tan babalo a bibii ed kaermenan da, tan say pansiansia ya andi mancha to ed mundo.” (Santiago 1:27) Tekep na pilalek a napaliket so Dios, balang sakey ed sikatayo so nakaukolan a mangusisa ed panagdayew tayo pian seguroen ya agnarurutakan iya na agmaridios ya agagamil odino pian anggapoy nalabsanan tayon importantin bengatlan ikukunsidera to.—Santiago 1:26.
21 Say malinis lambengat, sigpot-kamarerwan panagdayew so mamapaliket ed si Jehova. (Mateo 22:37; Colosas 3:23) Sanen ag-inter iya na nasyon na Israel ed Dios, inkuanto: “Say anak a laki igalang to so ama to, et say aripen say katawan to. No siak sirin so ama, iner so kawalaan na kigalang ko? Et no siak so manonaan iner so kawalaan na itakot ed siak?” Naoopendi ray Dios diad pangiyaapay ed sikato na bulag, piley, tan mansasakit ya ayayep bilang bagat, tan impulisay to so ontan iran gawa na panagdayew. (Malaquias 1:6-8) Makanepegan si Jehova ed sankadalisayan a pormay panagdayew tan anggapo lay abobonan to noagta say nikabkabiig a debosyon.—Exodo 20:5; Uliran 3:9; Apocalipsis 4:11.
22. No labay tayon abobonan na Dios so panagdayew tayo, antoy paliisan tayo, tan antoy gawaen tayo?
22 Say Samaritanan akitongtong ed si Jesus so pinmatnag ya interesadon mandayew ed Dios diad paraan a madibinon naabobonan. No ontan so pilalek tayo, paliisan tayo so amin a makarutak a bangabangat tan agagamil. (2 Corinto 6:14-18) Imbes, isekar tayoy inkasikatayon makagamor na suston pikakabat ed Dios tan gawaen so linawa to. Tumboken tayon maapit iray kakaukolanen to parad makapaliket a panagdayew. (1 Timoteo 2:3, 4) Pihon ontan so panbabanikelan na Tastasi nen Jehova, tan sikaray sisisimoon a mamapaseseg ed sikayo a mibiang ed sikara diad pandayew ed Dios “ed espiritu tan katuaan.” (Juan 4:24) Inkuan nen Jesus: “Ta saray ontan so anapen na Ama a manangigalang ed sikato.” (Juan 4:23) Komon ta ontan kayon nengneng na too. Singa saman a Samaritana, andi-duaruwan labay yo so nawalaan na andi-anggaan a bilay. (Juan 4:13-15) Balet ta naiimano yon ontatatken tan ompapatey so totoo. Ipapaliwawa na ontumbok a kapitulo no akin.
SUBOKEN SO PIKAKABAT YO
Singa nipapanengneng diad Juan 4:23, 24, anton panagdayew so aabobonan na Dios?
Panon tayon nadetermina no kasin say Dios so naliliketan odino andi ed pigaran kustombre tan piesta?
Antoray arum a kakaukolanen parad makapaliket a panagdayew?
[Interon-pahina a litrato ed pahina 44]