“Agto Ra Akisalitaan a Balot Noag dia ed Alimbawa”

1-3. (a) Anton nikadkaduman pribilehyo so niwala ed saray babangatan ya akaiba nen Jesus ed panagbaroy, tan panon ton pinainomay so pakatanda ra ed saray bangat to? (b) Akin a mainomay a tandaan iray epektibon ilustrasyon?

SARAY babangatan ya akaiba nen Jesus ed panagbaroy et awalaan na nikadkaduman pribilehyo. Direkta iran akaaral ed Matalonggaring a Managbangat. Personal dan arengel so impangipaliwawa to ed Salita na Dios tan say impangibangat to ed makapaligsa iran katuaan. Diad saraman a panaon, kaukolan dan pansiansiaen a tariwa ed nonot tan kapusoan da iray importantin balikas to lapud aliwa nin panaon pian isulat iratan.a Anggaman ontan, pinainomay nen Jesus so pakatanda ra ed saray bangat to. Panon? Diad paraan na impanbangat to, nagkalautla ed alay dunong ya impangusar to ed saray ilustrasyon.

² Talagan agmainomay a nalingwanan iray epektibon ilustrasyon. Inkuan na sakey ya autor a saray ilustrasyon et “pagmaliwen dan nanengneng iray narerengel” tan “nilitrato ed nonot iray tatalinengen.” Lapud kaslakan lan mas natalosan tayo so sakey a punto no walaray panangilitrato, painomayen na saray ilustrasyon so anggan saray masoliwet ya ideya. Pagmaliwen na ilustrasyon a mabilabilay iray salita, diad ontan et natandaan tayon maong iray leksion ya ibabangat ed sikatayo.

³ Anggapo lay managbangat ed dalin a mas onsiano ed panangusar na saray ilustrasyon nen say si Jesu-Kristo. Anggad natan et mainomay a nanonotan iray ilustrasyon to. Akin a maparanay ya inusar nen Jesus iyan metodo na panagbangat? Akin ya epektibon maong iray ilustrasyon to? Panon tayon naaralan ya usaren iyan metodo na panagbangat?

No Akin a Tinekepan nen Jesus na Ilustrasyon so Panagbangat To

4, 5. Akin ya angusar si Jesus na saray ilustrasyon?

⁴ Naromog ed Biblia so duaran importantin rason no akin ya angusar si Jesus na saray ilustrasyon. Unona, diad impanggawa to ed satan et asumpal so impropesiya. Oniay nabasa tayo ed Mateo 13:34, 35: “Sinalita nen Jesus ed saray dakel a katooan [iray] al-alimbawa [odino ilustrasyon]; tan agto ra akisalitaan a balot noag dia ed alimbawa. Pian nasumpal so sinalita na propeta, a kuan to: Biswaten koy sangik naani ed saray al-alimbawa.” Say propeta a tinukoy dia nen Mateo et samay salmistan nansulat ed Salmo 78:2. Sikato so nansulat diad impangipuyan na espiritu na Dios pigay siglo antis a nianak si Jesus. Isipen pa no anto so kabaliksan na satan. Nilasus taon ni antis to, denesidi la nen Jehova a say Mesias et tekepan to na saray ilustrasyon so panagbangat to. No ontan sirin et seguradon papablien nen Jehova iyan metodo na panagbangat.

⁵ Komadua, impaliwawa nen Jesus a sikatoy angusar na saray ilustrasyon pian nibiig iramay “inmawet” so kapusoan da. (Mateo 13:10-15, Maung a Balita; Isaias 6:9, 10) Panon a niwalwal na saray ilustrasyon to so motibo na totoo? Walaray pankanawnawa a sikatoy angitekep na saray ilustrasyon pian napakiwas iray katongtong to ya onkerew na eksplinasyon, diad ontan et naala ray intiramintin kabaliksan na imbaga to. Saray mapaabeba so mabulos a mantepet, bangta ag-itan gawaen na saray mapaatagey odino agmangisengansengan. (Mateo 13:36; Marcos 4:34) Kanian, imparungtal na saray ilustrasyon nen Jesus so katuaan ed saramay say kapusoan da et manpilpilalek ed satan; bangta niyamot itan ed saramay say kapusoan da et mapaatagey.

6. Antoray makagunggonan gagala na saray ilustrasyon nen Jesus?

⁶ Wala niray pigaran makagunggonan gagala na saray ilustrasyon nen Jesus. Saratan so anagyat ed interes na totoo, kanian apakiwas iran ondengel. Mas atalosan da iray ideya lapud nililitrato da iratan ed nonot da. Unong ya inkuan la ed gapo, akatulong iray ilustrasyon nen Jesus pian natandaan na saray onderengel iray imbaga to. Say Sermon ed Palandey a walad Mateo 5:3–7:27 et sakey ya ekselentin alimbawa na aminpigapigan impangusar nen Jesus ed saray ilustrasyon. Unong ed sakey a kalkulasyon, walay 50 a mabunikew a balikas ed satan a sermon. Pian mas natalosan tayo so kabaliksan na satan, tandaan a satan a sermon et sabien to labat so manga 20 minuto no basaen a maksil. No ontan sirin, diad aberids, kada 20 segundo et walay nibabalikas ton mabunikew iran salita! Mabitar, natetebek nen Jesus so kakanaan na panangusar na saray ilustrasyon!

7. Akin ya aligen so panangusar nen Jesus ed saray ilustrasyon?

⁷ Bilang papatumbok nen Kristo, labay tayon aligen so paraan na panagbangat to, pati say panangusar to ed saray ilustrasyon. No iyaliling ed rekadon pampananam ed putahi, saray epektibon ilustrasyon et manpananam met ed panagbangat tayo. Painomayen na saray ninonot a maong ya ilustrasyon so pakatalos ed saray importantin katuaan. Usisaen tayo natan so pigaran aspekto no akin ya epektibo iray ilustrasyon nen Jesus. Diad ontan et natalosan tayo no panon tayon epektibon nausar iyan makanan metodo ed panagbangat.

Pangusar na Simpli Iran Panangikompara

8, 9. Panoy impangusar nen Jesus ed saray simplin panangikompara, tan akin ya epektibo iray panangikomparan inusar to?

⁸ Diad panagbangat nen Jesus, sikatoy mabetbet a manguusar na simpli iran panangikompara, a mankaukolan labat na pigaran salita. Anggaman simpli, saratan so mamapawala ed nonot na malinlinew iran litrato tan agmasoliwet a makapangibabangat na saray importantin espiritual a katuaan. Alimbawa, sanen binilin to ray babangatan to ya agmanpaga ed saray inagew-agew a pankaukolan da, impaimano to so “kamanokan ed tawen,” tan “lirios ed uma.” Agmantatanem tan agman-aani iray manok, tan agmet maniinaramey iray lirio. Balet, siansian aasikasoen ira na Dios. Mainomay a natebek so punto, salanti, no aasikasoen na Dios so kamanokan tan karosasan, seguradon asikasoen to met iray totoo a ‘manaanap nin unona ed panarian.’​—Mateo 6:26, 28-33.

⁹ Aminpigapiga met ya angusar si Jesus na saray metapora, say mas mapuersa a panangikompara. Say metapora et sakey a klase na panangiyilustra a say sakey a bengatla et singano sikato imay sananey. Diad saya lamet et pinansiansia ton simpli so panangikompara to. Diad sakey ya inkagawa, inkuan to ed saray babangatan to: “Sikayo so silew na mundo.” Seguradon atalo-talosan na saray babangatan to so punto na satan a metapora, salanti, diad panamegley na salita tan gawa ra et nisindag da so liwawa na espiritual a katuaan tan natulongan da so arum a mangidayew ed Dios. (Mateo 5:14-16) Imanoen ni irayan arum a metapora ya inusar nen Jesus: “Sikayo so asin na dalin” tan “Siak so ubas, sikayo so sangasanga.” (Mateo 5:13; Juan 15:5) Saratan a mabunikew a pananalita et mapuersa anggaman simsimpli.

10. Antoray pigaran alimbawa a mangipapanengneng ed no panon yon nausar iray ilustrasyon ed panagbangat yo?

¹⁰ Panon yon nausar iray ilustrasyon ed panagbangat yo? Agyo la kaukolan so mangimbento na andukey tan mairap iran istorya. Sali yo labat so mannonot na simpli iran panangikompara. Singa bilang, no isisingbat yo so nipaakar ed kioli tan labay yon iyilustra ya aliwan problema parad si Jehova so pamaoli ed inaatey, antoy nanonotan yon pangikomparaan ed satan? Inusar na Biblia so ugip bilang metapora na patey. Nayari yon ibaga so, “Say pamaoli na Dios ed saray inaatey et singa labat kainomay na panamangon tayo ed sakey a nanaugip.” (Juan 11:11-14) No bilbilang et iyilustra yo a kaukolan na ananak so panangaro tan panangasikaso pian ombulaslas ira. Anton alimbawa so nayari yon usaren? Angusar so Biblia na onian panangikompara: “Saray anak mo singa saray tanaman [balon simit] ya olibo.” (Salmo 128:3) Nayari yon ibaga, “Say anak so mankaukolan na panangaro tan panangasikaso a singa say tanaman et mankaukolan na sinag na agew tan danum.” No mas simpli so ilustrasyon, mas mainomay itan a natalosan na saray onderengel.

Inala’d Inagew-agew a Kabibilay

11. Mangiter na saray alimbawa no panon ya inusar nen Jesus ed saray ilustrasyon to iray seguradon naimano ton bengatla legay ibabaleg to ed Galilea.

¹¹ Si Jesus so onsiano ed panangusar na saray ilustrasyon ya inala’d kabibilay na totoo. Karaklan ed saray ilustrasyon to et nipaakar ed inagew-agew a kipapasen a naobserbaan to legay ibabaleg to ed Galilea. Nonot yo pan magano so impanugaw to. Aminpiga to kasin naimatonan so ina to a manggigiling na bukel, mangikakames na lebadura ed arina, maneselsel na lamparaan, odino manpapanis ed abung? (Mateo 13:33; 24:41; Lucas 15:8) Aminpiga to kasin abantayan iray sumisigay a mangipepelag na iket ed Dayat na Galilea? (Mateo 13:47) Aminpiga to kasin naimano so panggagalaw na ugugaw ed tindaan? (Mateo 11:16) Seguradon anengneng nen Jesus iray nambabangil ya ordinaryo labat iran bengatla ya asalambit ed dakel iran ilustrasyon to, a singa say isisibuag a bini, maliket a ponsia ed kasal, tan saray buke-bukel ya ontatakken ed uma.​—Mateo 13:3-8; 25:1-12; Marcos 4:26-29.

12, 13. Akin a makabkabaliksan so impangusar nen Jesus ed dalan a “nanlapu ed Jerusalem ya onla ed Jerico” pian ipabitar so punto to ed samay parabolo nipaakar ed matulong a Samaritano?

¹² Diad saray ilustrasyon nen Jesus, sinalambit to iray detalye a kabkabisado na saray onderengel ed sikato. Alimbawa, ginapoan to so parabolo nipaakar ed matulong a Samaritano diad impangikuan: “Sakey a too linmasur nanlapu ed Jerusalem ya onla ed Jerico; et naplag ed saray tulisan a sikato so namparpara a sinamsam tan kinabil da, . . . a sikatoy pinaulyan da a manpapanabos.” (Lucas 10:30) Diad saya et makabkabaliksan so impanukoy nen Jesus ed dalan a “nanlapu ed Jerusalem ya onla ed Jerico” pian ipabitar so punto to. Sanen ibibinsa-binsa to iyan parabolo, sikatoy walad Judea, ya asingger ed Jerusalem; kanian seguradon amta na saray onderengel ed sikato so asalambit a dalan. Kabisado ran satan a dalan et mapeligro, nagkalalo la no bukor na sakey so manakar ditan. Mataltalag so ondadalan ed satan a pakurba-kurban dalan, a labalabay a panambangan na matatakew.

¹³ Wala ni ray pamilyar a detalye ya inyarum nen Jesus nipaakar ed satan a dalan a “nanlapu ed Jerusalem ya onla ed Jerico.” Unong ed parabolo, inmunan dinmalan ditan so sakey a saserdote insan tinmumbok so sakey a Levita, balet ta anggapo ed sikaran dua so tinmunda pian tulongan so biktima. (Lucas 10:31, 32) Saray saserdote et manlilingkor diad templo ed Jerusalem, tan saray Levita so katulongan da. Sano anggapoy kimey na saray saserdote tan Levita ed templo, manpirmi ira ed Jerico a 23 kilometro labat kaarawi ed Jerusalem. Kanian, ondadalan ira ditan. Imanoen met ya imbaga nen Jesus a sikaray “linmasor,” aliwan tinmatdang, ed dalan a “nanlapu ed Jerusalem.” Seguradon miabobon ed saya iray onderengel ed sikato lapud say Jerusalem et mas atagey nen say Jerico. Kanian, sano say sakey a biahero et manaakar a “nanlapu ed Jerusalem,” talagan sikatoy ‘onlalasor.’b Malinew a lawas ikokonsidera nen Jesus iray onderengel ed sikato.

14. Sano manguusar na saray ilustrasyon, panon tayon nikonsidera iray katongtong tayo?

¹⁴ Sano mangusar itayo na saray ilustrasyon, kaukolan tayo met ya ikonsidera iray onderengel ed sikatayo. Antoray bengatlan naimano tayo ed sikara a napangibasiyan na usaren tayon ilustrasyon? Nayarin kaukolan tayo ya ikonsidera so edad, kultura odino binalegan a pamilya, tan say trabaho ra. Singa bilang, say ilustrasyon nipaakar ed panagdalus et mas natalosan na saray walad kaumaan nen saray walad baleg a syudad. Sarag tayo met so mangusar na matukoy iran ilustrasyon a base ed inagew-agew a kabibilay tan kimey na katongtong tayo, a singa saray anak da, kaabungan da, labalabay dan gawaen, tan tagano ra.

Inala’d Palsa

15. Akin ya agla pankelawan a kabkabisado nen Jesus iray palsa?

¹⁵ Ipapatnag na dakel ed saray ilustrasyon nen Jesus so kakabatan to nipaakar ed palsa, a singa say tantanaman, ayayep, tan tiempo. (Mateo 16:2, 3; Lucas 12:24, 27) Angalaan to na ontan a kakabatan? Legan ton ombabaleg ed Galilea, seguradon sikatoy awalaan na dakel a pankanawnawan mangobserba ed saray palsa. Nilikud ni ed satan balet et sikato so “panguloan ed amin a pinalsa,” tan inusar nen Jehova ya “uloen a komikimey” diad impamalsa ed amin a bengatla. (Colosas 1:15, 16; Uliran 8:30, 31) Kasin pankelawan ni no akin a kabkabisado nen Jesus iray palsa? Nengnengen tayo no panon ton marundunong ya inusar iyan kakabatan.

16, 17. (a) Anto so pakapatnagan a kabkabisado nen Jesus iray walna na karnero? (b) Anton alimbawa so mangipapanengneng a talagan dedengelen na saray karnero so boses na pastol da?

¹⁶ Tandaan a tinawag nen Jesus so inkasikato a “maong a pastol” tan saray patumbok to et tinawag toran “karnero.” Ipapabitar na satan a kabkabisado to so walna na saray karnero. Amta ton maasingger ed sakey tan sakey iray pastol tan karnero ra. Naimano to a sarayan makompiyansan ayayep so tampol a paiwanwan tan mauno-unor ed saray pastol da. Akin? “Ta sikara kabat da so boses to,” kuanen Jesus. (Juan 10:2-4, 11) Talaga kasin nabosesan na saray karnero so pastol da?

¹⁷ Unong ed personal ya obserbasyon nen George A. Smith, oniay insulat to ed libro ton The Historical Geography of the Holy Land: “No maminsan say pampapainawaan mi ed kaagwan et diad gilig na saray bobon na Judea, a ditan et talora odino apatiran managpastol so onlalasor kaiba iray pulok da. Makapanlalaok iratan, tan panumamengan mi no panon lamet a natipon na kada pastol so dili ran pulok. Balet kayari na inyinum tan impanggalaw na saray pulok, sansasakey a tinmatdang iray managpastol ed nanduruman gilig na patar, tan balang sakey so tinmawag ed dili ran paraan tan saray karnero ra so dinmago ed mismon pastol da tan matintinunos ya inmalis iray pulok a singa ed insabi ra.” Talagan apilipili nen Jesus so ekselentin ilustrasyon pian ipabitar so punto to, salanti, no bidbiren tan tuloken tayo so bangabangat to tan tumboken tayo so panangiwanwan to, sirin et naeksperiensya tayo so panangasikaso na say “maong a pastol.”

18. Iner so pakaromogan tayo na saray impormasyon nipaakar ed saray palsa nen Jehova?

¹⁸ Panon tayon naaral so pangusar ed saray ilustrasyon ya inala’d palsa? Nayari tayon gawaen a basiyan na simpli balet ta epektibo iran panangikompara iray nikaduman walna na ayayep. Iner so pakaromogan tayo na saray impormasyon nipaakar ed saray palsa nen Jehova? Dakel so naromog tayo nipaakar ed nanduruman ayayep diad Biblia, tan no maminsan et uusaren na satan iray walna na ayayep pian mangiyilustra. Tutukoyen na Biblia so pagmaliw a masiglat a singa ulsa odino leopardo, maalwar a singa uleg, tan inosente a singa malapati.c (1 Awaran 12:8; Habacuc 1:8; Mateo 10:16) Saray arum nin makanan napangalaan na impormasyon et Say Panag-Bantayan, Awake!, tan arum ni ran literatura ya impalapag na saray Tasi nen Jehova. Dakel so naaral yo diad pangimano ed no panon ya inusar na sarayan publikasyon so simplin panangikompara ya inala ed dakel a makapakelkelaw iran palsa nen Jehova.

Inala’d Pamilyar Iran Alimbawa

19, 20. (a) Pian iwalwal so lingon sisisiaen, panon ya epektibon inusar nen Jesus so sakey ya agano nin inkagawa? (b) Panon itayon makapangusar na peteg ya agawa iran alimbawa tan eksperiensya diad panagbangat tayo?

¹⁹ Epektibo iray ilustrasyon ya inala’d peteg ya agawa iran alimbawa. Aminsan et angusar si Jesus na agano nin inkagawa pian ipaamta ya aliwan tua so sisisiaen a saramay makakasagmak na trahedya et makanepegan ed satan. Inkuan to: “Saraman so labinwalo, a sikaray atapilan na ilang ed Siloe et pinatey to ra, isipen yo a sikara so akautang a labas nen saray amin a too a manaayam ed Jerusalem?” (Lucas 13:4) Siempre, saramay 18 a kakamarerwa et ag-inatey makasengeg ed ginawa ran kasalanan ya amasanok ed Dios. Noagta, say impatey da et resulta na “panaon tan ag-inilaloan a nagawa.” (Ecclesiastes 9:11, NW) Kanian, sinuppiat nen Jesus so sakey a palson bangat diad impanalambit ed sakey ya inkagawan kabkabat na saray katongtong to.

²⁰ Panon tayon nausar iray peteg ya agawan alimbawa tan eksperiensya diad panagbangat tayo? Bilbilang et sisingbaten yo so kasumpalan na propesiya nen Jesus nipaakar ed tanda na kiwawala to. (Mateo 24:3-14) Nayari yon salambiten so agano nin balita nipaakar ed guerra, eras, odino yegyeg pian ipanengneng a saray espisipikon tanda et nagagawa la. Odino bilbilang et labay yoy mangusar na sakey ya eksperiensya pian iyilustra iray nagawan pananguman sano isulong so balon personalidad. (Efeso 4:20-24) Iner so pakaromogan yo na ontan ya eksperiensya? Nayari yon usaren iray eksperiensya na saray kaparan mananisia, odino nayari yon usaren iray eksperiensyan walad sakey ed saray publikasyon na saray Tasi nen Jehova.

21. Antoray nagunggona ed pagmaliw ya epektibon managbangat na Salita na Dios?

²¹ Talagan Onsiano a Managbangat si Jesus! Unong a naaralan tayo ed sayan seksion, say ‘panagbangat tan panangipulong ed ebanghelyo’ so manunan kimey to. (Mateo 4:23) Satan met so manunan kimey tayo. Baleg so nagunggona ed pagmaliw ya epektibon managbangat. Sano manbabangat itayo, sikatayoy mangiiter ed arum, tan satan a panangiter et mamaliket ed sikatayo. (Gawa 20:35) Sikatayoy maliket lapud amta tayo a makapanginanabang itayo na bengatlan walaan na tudtua tan magnayon a kakanaan, salanti say katuaan nipaakar ed si Jehova. Nalikna tayo met so inkakontento diad pakaamtan tutumboken tayo so ehemplo nen Jesus, say sankatalonggaringan a Managbangat a nambilay ed dalin.