No Antoran “Mapalalo a Makabat” a Pinalsa so Pakaaralan Tayo

AIR-CONDITIONING, kontra’d betel, panangekal na asin, tan sonar so imbensyon iran akabatan na katooan ed koma-20 siglo. Balet wala la itan ed mundo na ayayep nilibon taon ed asasakbay. On, nagugunggunaan so katooan diad panusisa ra ed saratan a “mapalalo a makabat” a pinalsa. (Uliran 30:24-28; Job 12:7-9) Ompatnag a walaray ayayep, a nagmaliw ya agmansasalitan managbangat ed katooan, tan nainteresan itayon tuloy ed pangusisa ed saraya.

Kasin nagunggunaan itayo ed pangonsidera ed saray kalareker na pigaran ayayep? Bueno, inyaliling nen Jesu-Kristo iray patumbok to ed saray karnero, serpienti, malapati, tan anggan ed saray doron. Anto so walad kanonotan sanen inkompara toray patumbok to ed sarayan pinalsa? Nengnengen tayo pa.

“Saray Karnerok Dengelen Da so Boses Ko”

Asalambit so karnero ed Bilbia ed masulok a 200 danay. A singa ed paliwawa na Smith’s Bible Dictionary, “saray karnero so manangisimbolo na kauyamoan, anos, tan panagpasakop.” Diad Isaias kapitulo 53, si Jesus a mismo so mapropetikon niyaliling ed sakey a karnero. Agaylan matukotukoy ya ikompara toray patumbok to ed parehon ayep! Balet antoran partikular a kalareker na karnero so walad kanonotan nen Jesus?

“Saray karnerok dengelen da so boses ko, et kabat ko ra, tan ontumbok ira ed siak,” inkuan nen Jesus. (Juan 10:27) Impabitar to sirin so kauyamoan na saray babangatan to tan say inkamagunaet dan ontumbok ed sikato. Say literal iran karnero so ontalineng ed pastol da tan sibubulos ya ontumbok ed sikato. Say pastol so walaan met na maapit a siglaotan ed pulok to.

Nayarin say sakey a pulok so nataytayak ed lawak sano mankakabkab, balet balang karnero et tuloytuloy so koneksion to ed grupo bilang interamenti. Kanian, sano saray ayep so agmaligen odino natatakot, “sikaray makapanapuran makapandaragup,” kuan na libron Alles für das Schaf (Everything for the Sheep). No saray karnero so ombatik ta pian naarawiay kapeligroan, gagawaen da itan bilang pulok, a tunggal paminsan ya ontunda ta pian amtaen so situasyon. “Say itataynan a panapanaon so mangiyabuloy ed saray kordero tan mas makapuy ya ayayep a makapibansag. Say kasimpukokan so mangitatarok ed sikara na nikaduman proteksion.” Anto so naaralan tayo manlapud sayan walna?

Saray tuan Kristiano natan so ag-ataytayak ed limog na saray denominasyon tan sekta na Kakristianoan. Imbes, sikaray nandaragup bilang sakey a pulok. Liknaen na balang Kristiano a sikatoy personal a maapit ed sayan pulok na Dios, tan saya so mamapakasakey ed organisasyon na Tastasi nen Jehova. Kapiganman a wala so problema​—balanglan satan so seryoson sakit, bakal, odino natural a desyang​—iner so pananapan na balang managdayew na panangigiya tan proteksion? Diad loob na organisasyon nen Jehova, a mangitatarok na espiritual a kaligenan.

Panon a nitarok so konseho na Biblia? Diad panamegley na saray palapagan a singa Say Panag-Bantayan tan say kaulop ton dyurnal ya Awake! Sarayan magasin tan Kristianon miting so nikaduman ontutulong ni ingen ed saramay mankaukolan na malaglaem a panangasikaso, a singa saray kordero tan mas makapuy a karnero ed pulok. Singa bilang, niiiter so imano ed mansusulon atateng tan ed saramay manasagmak na depresyon. Agaylan makabat sirin, a basaen so balang magasin, atendian so kada miting ed kongregasyon, tan iyaplika so naaaralan tayo! Diad ontan et nipapatnag tayo so kauyamoan tan malet ya inkaapit ed pulok na Dios.​—1 Pedro 5:2.

‘Mankalakal a Singa Saray Uleg tan Mauyamo a Singa Saray Malapati’

Oniay ibabaga na Smith’s Bible Dictionary: “Diad interon Bukig, say serpiente so inusar bilang simbolo na mauges a prinsipyo, ed espiritual ya itutunganga.” Diad biek a dapag, say “malapatik” so termino na pangarinyo. (Kanta nen Solomon 5:2) Anto so walad kanonotan nen Jesus, sirin, sanen pinaseseg toray patumbok ton “mankalakal . . . sirin a singa saray uleg, tan mauyamo kayo a singa saray malapati”?​—Mateo 10:16.

Si Jesus so mamibilin nipaakar ed panagpulong tan panagbangat. Nailaloan na saray babangatan so namparan paborabli tan agpaborablin kiwas. Pigpigara so mangipanengneng na interes, bangta say arum so agmalabay ed maong a balita. Arum ni ingen so mamasegsegang ed sarayan tuan ariripen na Dios. (Mateo 10:17-23) Panon kasi ikiwas na saray babangatan ed panamasegsegang?

Diad Das Evangelium des Matthäus (The Gospel of Matthew), oniay kuan nen Fritz Rienecker nipaakar ed Mateo 10:16: “Say inkasilib . . . so nepeg a tekepan na integridad, inkasimoon, tan inkaprangka, no bilang ta walay pangibasiyan na kakabusol a panreklamoan. Saray embahador nen Jesus so walad limog na saray maruksan sumusumpa, ya anggapoy konsiderasyon tan angataki ed apostoles ya andian na panangasi tan diad samet a pankanawnawa. Kanian, kapilitan​—singa sakey a serpiente​—ya alistoy mata ed saray sumusumpa, tan usisaen so situasyon ya atekepay inkaalisto na mata tan liknaan; a nakontrol so situasyon ya anggapoy pakana odino panamalikdo, a magmaliw a puro tan tua ed salita tan gawa tan diad ontan et napaneknekan day inkasikara a singa-malapati.”

Anto so naaralan na modernon ariripen na Dios manlapud saray salita nen Jesus ed Mateo 10:16? Natan, onkikiwas so totoo ed maong a balita a mipadparan tuloy ed ginawa ra ed inmunan siglo. Sano nipaarap ed panamasegsegang, kaukolan a pantekepen na saray tuan Kristiano so inkasilib na say serpiente ed inkapuro na malapati. Agbalot uusaren na Kristianos so panamalikdo odino ag-inkamatua noagta sikaray ag-abulok, puro, tan matua ed pangiyaabawag da na mensahe na Panarian ed arum.

Diad pangiyilustra: Saray katrabahoan, tobonbalo ed eskuelaan, odino anggan dilin kapamilyaan so mansalitay magasal nipaakar ed saray sisiaen mo bilang sakey a Tasi nen Jehova. Say tampol a reaksion so mipadpara met ya ansakit a salita ed saray sisiaen da. Balet satan ta so inosenti? Andin balot. No ipanengneng mo ed saray kritikom ya agnaaapektoay marakep a walnam, ompan sikaray ontunda ed pasiki ra. Diad ontan et sika so magmaliw a namparan masilib tan andiay kabalawan​—‘makalakal a singa uleg tan mauyamo a singa malapati.’

‘Say Nengneng na Saray Doron so Singa Saray Kabayo a Nitadia ed Bakal’

Irereport na magasin a GEO a nen 1784, say South Africa so adalanan na “sankakapalan ya ulop [na saray duron] a nirekord ed awaran diad kapiganman.” Say ulop so angobre na ngalngali liman libo duan lasus kuadrado kilometro, a ngalngali limaran danay so kaawang to ed Hong Kong. Oniay kuan na Smith’s Bible Dictionary, “terebli so penerdi [na saray duron] ed tantanaman ed saray adalanan toran bansa.”

Diad inter-Dios ya impangiparungtal to ed bengabengatlan nagawa legan na “agew na Katawan,” inusar nen Jesus so pasingawey na ulop na saray doron. Nipaakar ed saratan et nibagan: “Say nengneng na saray doron sikato so kapara na saray kabayo a nitadia ed bakal.” (Apocalipsis 1:1, 10; 9:3-7) Anto so makatantanda ed sayan simbolismo?

Abayag lan amta na Tastasi nen Jehova a saray doron na kapitulo 9 na Apocalipsis so mangililitrato ed alanaan ya ariripen na Dios ed dalin ed sayan siglo.a Sarayan Kristiano so apabtangan na sakey a trabaho​—pian ipulong so mensahe na Panarian ed sankadalinan tan manggawa na saray babangatan. (Mateo 24:14; 28:19, 20) Kakaukolanen na saya ed sikara so panalona ed saray babeng tan pansiansia ed kimey da. Anto ni magmaong a mangiyilustra ed saya nen say makpel iran doron?

Anggaman kulangkulang a limaran sintimetro ed dukey, kaslakan a say doron so manbiabiahe na distansyan 100-200 kilometro ed kada agew. Say doron na disierto so nayari ni ingen ya onsulok a 1,000 kilometro. Isasalaysay na GEO a “saray payak to so ompayagpag na 18 danay ed kada segundo tan anggad 17 oras ed sanagew​—bengatlan agnayarian na arum nin insekton gawaen.” Agaylan abalbaleg a kimey parad ontan a melanting a palsa!

Bilang sakey a grupo, matoor so Tastasi nen Jehova ed panangilaknab na maong a balita na say Panarian. Manpupulong ira natan ed masulok a 230 dalin. Sarayan ariripen na Dios so manatalona na dakel a kairapan ta pian makapibiang ed pakasumpal na kimey. Antoran nengneng na problema so kipapaarapan da? Say pigara labat ed saraya et say panangidumaduma, legal a panameget, sakit, pakadismaya, tan isusumpa manlapud kakanayon. Balet anggapo so akaamper ed inyabante ra. Mansiansia ra ed inter-Dios a kimey da.

Mantultuloy a Mangipatnag na Kristianon Kualidades

On, inyaliling nen Jesus so papatumbok to ed saray karnero, serpienti, malapati, tan saray doron. Saya so talagan matukotukoy natan ed agew tayo. Akin? Lapud asingsingger lay anggaan na sayan sistema na bengabengatla, tan saray problema so onloloor.

Sinononot ed saray manangiyilustran salita nen Jesus, mantultuloy a maapit iray tuan Kristiano ed pulok na Dios tan siuuyamon aawaten so simbawa manlapud organisasyon nen Jehova. Mansiansia iran manbabantay tan alerto ed saray situasyon a makaamper ed Kristianon aktibidades da, legan a mansiasiansia iran andiay kabalawan ed amin a bengatla. Niarum ni, mantultuloy dan susumpalen so linawa na Dios ed arap na saray babeng. Tan itultuloy day makaaral manlapud pigaran “mapalalo a makabat” iran pinalsa.

[Paimano ed leksab]