Leksion Manlapud Saray Milagro nen Jesus

“ET nen komatlo’n agew wala so sakey a bansal ed Cana na Galilea; . . . si Jesus abagaan met, tan saray babangatan to, ed bansal. Et sanen kinmulang so alak, say ina nen Jesus kuan to ed sikato, Angapo’y alak da.” Saya so angitarok na sirkumstansya parad unaan a milagro nen Jesus.​—Juan 2:1-3.

Agta say ontan a problema so agtanton importanti, melag a tuloy, pian itarok ed imano nen Jesus? Isasalaysay na sakey ya iskolar ed Biblia: “Say panamarawes ed Oriente so sakey a sagradon obligasyon . . . Say peteg a panagparawes, nagkalautla ed bansal, so mankakaukolan na inkadaakan. No saray suplay a tagano tan iinumen [so naopotan] diad sakey a bansal, say reputasyon na pamilya tan say kalangweran a sanasawa so lawas namantsaan na sayan kababaingan.”

Kanian kinmiwas si Jesus. Anengneng to so “anem ira’n pasig a bato ya akapasen diman onong na ugali a panaggogol na saray Judios.” Say ritual a panag-oras na lima sakbay na saray panangan so kustombre ed limog na saray Judio, tan dakel a danum so kinaukolan pian serbian iray pankaukolan na saramay presenti. “Panoyo so saray pasig na danum,” inganggan nen Jesus ed saramay manseserbi’d bisita. Aliwan si Jesus so “manangoksoy na bansal,” balet sikatoy direktan nansalita tan tekep na autoridad. Kuan na salaysay: “Nen say manangoksoy na bansal tinawayan to so danum [satan so] a nagmaliw ya alak.”​—Juan 2:6-9; Marcos 7:3.

Ompatnag a niduma-dumay pakagawaan na inmunan milagro nen Jesus ed kasmak a lugar a singa say bansal, balet say agawa so mangipaparungtal na nagkalalo nipaakar ed si Jesus. Sikatoy sakey a balolaki, tan diad saginonor iran okasyon et siningbat to ed saray babangatan toray pankaabigan na walad kasuloan. (Mateo 19:12) Balet, say kiwawala to ed bansal so angiparungtal a sikatoy maseguron agsumpa ed panangasawa. Sikatoy asimbang, masuporta ed oksuyan na panamaley; minoria to itan bilang bengatlan galgalangen ed imaton na Dios.​—Ipareng so Hebreos 13:4.

Si Jesus so aliwan mapeget ya asetikon singa impangiretrato’d sikato diad saginonor na saray pintor na iglesia. Malinew a nangayagaan to so impidipongdipong ed totoo tan aliwan agpaborabli ed pisosyalan. (Ipareng so Lucas 5:29.) Saray kiwas to sirin so angiletneg na panumbokan na saray babangatan to. Personal ya indemostra nen Jesus a sikaray agnakaukolan ya akakuliseng odino akasibangot​—a singano say inkatunong et kabaliksan toy inkaandi-gayaga. Diad kasuniyan, diad saginonor et inganggan iray Kristiano: “Mangayaga kayo ed Katawan lawas.” (Filipos 4:4) Aasikasoen na saray Kristiano natan a pansiansiaey panligliwaan ed loob na makatunongan iran limitasyon. Pangagayagaan day serbisyo ed Dios, balet diad itumbok ed alimbawa nen Jesus, tunggal paminsan iran mangipanaon pian napangayagaan so pilimog ed balang sakey diad sosyal ya eksena.

Imanoen met so inkamatamoy na emosyon nen Jesus. Sikatoy ag-obligadon manggawa na milagro. Anggapo so propesiya nipaakar ed sayan pamaakaran a kaukolan a sumpalen. Diad tua, si Jesus so apakiwas na emosyon lapud kapagaan na ina to tan say kipapasen na sanparis ya asingger lan mankasal. Maasikaso’d liknaan da tan kaliktan ton ipaliis ira ed kababaingan. Agta satan so mamaalagey na talek mo a si Kristo et walaan na peteg ya interes ed sika​—anggan ed inagew-agew iran problemam?​—Ipareng so Hebreos 4:14-16.

Lapud “maniyan na duara ono talora a boyog a danum so balang sakey,” kakaukolanen na milagro nen Jesus so dakel ya alak​—anganko et 390 a litro (105 a galon)! (Juan 2:6) Akin ya ontanlan kinarakel so nakakaukolan? Ag-iyaalibansa nen Jesus so panagbuanges, bengatlan kokondenaen na Dios. (Efeso 5:18) Imbes, indemostra to so singa-dios ya inkamabunlok. Lapud say alak so kaslakan ya iinumen, antokaman a sobra so nausar ed arum iran okasyon.​—Ipareng so Mateo 14:14-20; 15:32-37.

Saray asakbay a Kristiano so angalig ed alimbawa nen Jesus ed inkamabunlok. (Ipareng so Gawa 4:34, 35.) Tan saray totoo nen Jehova natan so napapaseseg met a ‘mangagamil na panangiter.’ (Lucas 6:38) Anggaman ontan, say unaan a milagro nen Jesus so walaan met na mapropetikon kabaliksan. Mangipapaimano ed panaon diad arapen sano sibubunlok so Dios a mangitarok na “sakey a liket ed saray mataba a bengatla, sakey a liket na saray alak ed tapew na saray bolirek,” a kumpleton mamaandi’d eras.​—Isaias 25:6.

Anggaman ontan, komusta iray dakel a milagron ginawa nen Jesus a mangilalanor ed pisikal a panagtambal? Anto so naaralan tayo manlapud saratan?

Panggawa na Maong ed Sabaton

“Alagey ka, libit mo so dokolan mo, tan manakar ka.” Imbalikas nen Jesus irayan salita ed lakin mansasakit la’d loob na 38 a taon. Itutuloy na salaysay na Ebanghelyo: “Et tampol ya inmabig so too, tan nilibi’to so dokolan to, tan nanakar.” Makapakelaw, aliwan amin so aliketan ed sayan impanguman na situasyon. Kuan na salaysay: “Saray Judios pinasegsegang da si Jesus, lapu’d ginawa to so saraya’n bengatla ed agew a sabaton.”​—Juan 5:1-9, 16.

Say Sabaton so ginagalan agew parad panpainawa tan pangayaga parad amin. (Exodo 20:8-11) Balet, diad agew nen Jesus, satan so nagmaliw a maarti tan manamairap, ginaway-too iran totontonen. Insulat na iskolar a si Alfred Edersheim a diad andukey a tuloy iran seksion na ganggan-ed-Sabaton na Talmud, “saray pamaakaran so seryoson siningbat bilang makana ed relihyoson kaimportantian, pamaakaran iran imposiblin isipen na sakey a say toon walaan na mabunigas a kanonotan et seryoson mangunsidera ed satan.” (The Life and Times of Jesus the Messiah) Isisiglaot na saray rabi so kaimportantian na bilay-tan-patey ed agtanton importanti, mapeget iran totontonen ya angipakurang ed ngalngali amin ya aspektoy kabibilay na sakey a Judio​—mabetbet tekep na maruksan panangibaliwala’d liknaan na too. Impakseb na sakey a totontonen ed Sabaton: “No sakey a paalagey so akusbo ed sakey a too tan walay panduaruwa no kasin sikatoy talagan wadman odino andi, odino sikato so mabilay odino inatey, odino sikato so sakey a hentil odino Israelita, ekalen day tinmapil ed sikato. No naromog dan mabilay ni, nayari dan ekalen ni akatapiltapil ed sikato; balet no [sikatoy] inatey, taynan da.”​—Tractate Yoma 8:7, The Mishnah, impatalos nen Herbert Danby.

Panon nen Jesus a minoria itan a legalistikon panuppiat ed ankekelag a pamaakaran? Sanen binalaw ed impanambal diad Sabaton, inkuanto: “Si Amak mankikimey ni anga ed natan, tan siak mankimey ak.” (Juan 5:17) Si Jesus so agsusueldoan a komikimey ta pian manpayaman. Imbes, ginawa to so linaway Dios. No panon a saray Levita so naabuloyan a mantultuloy ed sagradon serbisyo ed Sabaton, si Jesus so makanepegan met a manumpal ed impabtang-na-Dios iran kimey bilang say Mesias ya agsusumlangey Ganggan na Dios.​—Mateo 12:5.

Saray impanambal nen Jesus ed agew-na-Sabaton so angiwalwal met ed saray Judion eskriba tan Pariseos bilang “alabas a matunong”​—mapeget tan ag-asimbang ed panagnonot da. (Eclesiastes 7:16, NW) Peteg, ya aggagala na Dios a saray maabig a gawa so nigeter lambengat ed pigaran agew ed sakey simba; nisay ginetma na Dios a say Sabaton et magmaliw ya agmakanan legalistikon panontonan. Inkuan nen Jesus ed Marcos 2:27: “Say sabaton agawa’n onkana’d too, et ag agawa so too ya onkana ed sabaton.” Inaro nen Jesus iray totoo, aliwan saray mapeget a totontonen.

Maabig parad Kristianos natan ya agmagmaliw a mapeget a tuloy odino uuleyan na totontonen iray kanonotan da. Saramay walad autoridad diad kongregasyon so agmamabelat ed arum ed alablabas a ginaway-toon totontonen tan pananontonan. Papasesegen itayo met na alimbawa nen Jesus ya anapen iray pankanawnawan manggawa na maong. Singa bilang, agbalot ikatunongan na sakey a Kristiano ya ipanabang to lambengat iray katuaan na Biblia sano sikatoy pormal a mibibiang ed kabkaabungan a ministeryo odino sano sikatoy manpapaliwawa. Saray Kristiano, kuan nen apostol Pablo, so nepeg a “manparaan lawas ya onebat ed siopakaman a mankaokolan ya ipaliwawa yo so gapo na satan ya ilalo ya wala ed sikayo.” (1 Pedro 3:15) Say panggawa na maong so anggad anton panaon.

Leksion ed Panangabagey

Sananey a matalonggaring a milagro et say nirekord ed Lucas 7:11-17. Unong ed salaysay, si Jesus so “linma ed sakey a ciudad a manngaran na Nain; et akiolop ed sikato so saray babangatan to, tan sakey a dakel a totoo.” Anggad natan, saray ponponan so nanengneng ed abalaten-bukig a parti na modernon purok na Arabia a Nein. “Bang nen akaasinger ed pinto na ciudad,” nabet to so maingal ya eksena. “Nia, ipapaway da so sakey ya inatey, a bugbugtong ya anak a laki nen ina to a balo ni nimet et dakel a totoo ed ciudad so akiolop ed sikato.” Inkuan nen H. B. Tristram a “say modo na panangiponpon so ag-anguman” manlapud inmunan panaon, ya iyaarum: “Anengneng koray bibiin walad unaan na longon, ya itotonton na propesyonal a mandageyem a bibii. Intagey daray taklay, a gogonotey buek da, ed sankabalgan a panangipatnag na ermen, tan ibabalikas so ngaran na inatey.”​—Eastern Customs in Bible Lands.

Diad pegley na ontan a maingal a gulo et wadtan so manaakar a maermen a balo a talagan ipapatnag na itsura toy agaylan ot-ot. Lapud naandi lay masiken to, moriaen ton say anak ton laki, diad saray salita na autor a si Herbert Lockyer a, “say suporta ed itatatken to, tan ligliwa ed kaermenan to​—say suporta tan say pinagkalusek na ayaman to. Diad impakaandi bogbogtong ya anak ton laki, say nakekeraan a suporta to so naandi.” (All the Miracles of the Bible) Anto so reaksion nen Jesus? Walad saray malinew a salita nen Lucas, “nen sikato’y anengneng na Katawan, sikato so inabagey to, et inkuan to ed sikato, Agka mannangis.” Say balikas ya “inabagey” so inala manlapud Griegon salita a literal a mankabaliksan na “balonbalonan.” Kabaliksan to so “pakasagyat na emosyon ed akindalem.” (Vine’s Expository Dictionary of Old and New Testament Words) On, apakiwas a tuloy so emosyon nen Jesus.

Say mismon ina nen Jesus so maseguron sakey a balo ed sayan bekta, kanian amta to anganko no panon kaot-ot so pakaandi anagibin ama to, si Jose. (Ipareng so Juan 19:25-27.) Agkaukolan na balo so mikasi’d Jesus. Bulos linawa ya, “inmasinger tan diniwi’to so lungon,” anggaman ed katuaan a diad silong na Mosaikon Ganggan et say pakadiwit ed bangkay so manggawa’d sakey a marumsis. (Numeros 19:11) Diad panamegley na saray mamilagron pakayari to, nayarian nen Jesus ya ekalen so mismon lapuay inkadumsis! “Et inkuan to, Balolaki, kuan ko ed sika, Bangon ka. Et samay inatey, binmangon, et ginmapo a nansalita. Et inyawa’to ed kinen ina to.”

Agaylan makapasagyat a leksion na panangabagey! Agkaukolan ya aligen na Kristianos iray ag-maaro, ambetel iran awawey a nipapatnag legan na sarayan “kaunoran iran agew.” (2 Timoteo 3:1-5) Diad kasuniyan to, isisimbawa na 1 Pedro 3:8: “Say kaonoran a salitak, mankakasakey komon so nonot yo, maabagey kayo komon, manaaroan kayo a singa sanaagi, masibeg tan mapaabeba ed kanonotan.” Sano sakey a kabkabat tayo so inateyan odino anagmak na seryoson sakit, agtayo makapanpaoli odino makatambal ed mansasakit. Balet sikatayoy makapangiter na praktikal a tulong tan ligliwa, anganko diad simplin kiwala diman tan pinangis a kaiba ra.​—Roma 12:15.

Sayan dramatikon panamaolin ginawa nen Jesus so mangituturo met ed arapen​—sakey a panaon sano “amin so saray wala ed saray lobok narengel da so voces to. Et ompaway ira”! (Juan 5:28, 29) Diad sankadalinan, saray inateyan so personal a makalikna ed panangabagey nen Jesus sano saray naandi-la’d-bilay a kainaan, kaamaan, ananak, tan kakaaro et ompawil manlapud lubok!

Saray Leksion ed Milagro

Malinew sirin, saray milagro nen Jesus so mas ni nen say makapaliket a panangipatnag na pakayari. Ingloria ra so Dios, ya angiletneg na padron parad saray Kristiano a napapaseseg ya ‘igloria so Dios.’ (Roma 15:6) Ipapaseseg da so panggawa na maong, pangipanengneng na inkamabunlok, panangipatnag na panangabagey. Nagkalalon importanti, onkakana iratan a panengneng ed saray makapanyarin gawa a nagawa legan na Sanlibon Uley nen Kristo.

Legan a wadiad dalin, nanggawa si Jesus na makapanyarin kimkimey ed loob na melag a tuloy a lugar. (Mateo 15:24) Bilang niglorian Ari, say uleyan to so onlaknab ed sankadalinan! (Salmo 72:8) Sanen wadiad dalin si Jesus, saramay akaawat na saray mamilagron panagtambal to tan panamaoli so diad kaunoran et inatey. Diad silong na mangatatawen ya inkaari to, say kasalanan tan patey so sigpot a naekal, a mangilukas ed andi-angaan a bilay. (Roma 6:23; Apocalipsis 21:3, 4) On, saray milagro so mangipapatnag ed isasabi na maglorian arapen. Saray Tasi nen Jehova so ontutulong ed minilyon a mamayubo na peteg ya ilalo ed pagmaliw a kabiangan na satan. Anggad agni isabi na satan, agaylan makapakelaw a sample ed asingger lan nagawa ya itatarok na saray milagro nen Jesu-Kristo!

[Litrato ed pahina 7]

Pinagmaliw nen Jesus so danum ya alak