-
Pagmaliw ya Neutral—Anto Itan?Panliketan so Bilay ya Anggapoy Anggaan!—Panag-aral na Biblia
-
-
LEKSION 45
Pagmaliw ya Neutral—Anto Itan?
Imbaga nen Jesus ed saray papatumbok to: “Agkayo kabiangay mundo.” (Juan 15:19) Kanian, neutral ira—anggapoy papanigan da ed politika tan guerra. Siempre, no maminsan, aliwan mainomay so magmaliw ya neutral ta ompan balawen itayo na arum. Panon tayon mansiansian neutral tan matoor ed si Jehova a Dios?
1. Antoy pangipapasen na saray tuan Kristiano ed saray gobierno na totoo?
Rerespetoen na saray Kristiano so gobierno. Uunoren tayo so imbaga nen Jesus ya “iter yod Cesar iray bengatlan kien na Cesar.” (Marcos 12:17) Labay ton ibaga, uunoren tayo iray ganggan na bansa, singa say pambayar na buis. Ibabangat na Biblia ya saray gobierno na totoo et manuuley labat lapud aabuloyan ira nen Jehova. (Roma 13:1) Kanian amta tayo ya saray gobierno na totoo et relatibo labat odino limitado so autoridad da. Mantitiwala tayo ed Dios tayo tan say Panarian to ed tawen ya mangekal ed saray problema tayo.
2. Panon tayon nipanengneng ya neutral tayo?
Singa si Jesus, agtayo mibabali ed politika. Nen anengneng na totoo ya nanggaway milagro si Jesus tan labay dan gawaen ya ari diad dalin, agpinmayag. (Juan 6:15) Akin ey? Ta oniay imbaga to: “Say Panarian ko et agkabiangan na sayan mundo.” (Juan 18:36) Lapud disipulo itayo nen Jesus, ipapanengneng tayon neutral tayo. Singa bilang, agtayo migueguerra. (Basaen so Miqueas 4:3.) Tua, rerespetoen tayo ray simbolo na bansa, singa saray bandira. Pero, agtayo iratan sasambaen. (1 Juan 5:21) Tan agtayo onkakampi odino onkokontra ed anggan anton partido na politika o kandidato. Diad sarayan abitla tan ed arum ni ran paraan, nipapanengneng tayo ya talagan matoor tayo ed gobierno na Dios—say Panarian to.
DAKEL NI NAARALAN MO
Amtaen iray situasyon ya nayarin mairap so mansiansian neutral, tan no panon kan makagawa na saray desisyon ya makapaliket ed si Jehova.
3. Neutral iray tuan Kristiano
Angiter na balibalin alimbawa si Jesus tan saray papatumbok to. Basaen so Roma 13:1, 5-7 tan 1 Pedro 2:13, 14. Tan i-play so VIDEO, insan ebatan iraya.
Akin et respetoen tayoy gobierno na too?
Panon tayon nipanengneng ya manpapasakop tayod sikara?
No walay guerra, ibabaga na arum ya bansa ya neutral ira, pero susuportaan da so parehon panig. Anton talagay labay ya ibaga na pagmaliw ya neutral? Basaen so Juan 17:16. Tan i-play so VIDEO insan ebatan iya.
Antoy labay ya ibaga na pagmaliw ya neutral?
Panon to no walay iganggan na gobierno ya kontra ed ganggan na Dios? Basaen so Gawa 5:28, 29. Tan i-play so VIDEO insan ebatan iraya.
No mankontraan so ganggan na too tan ganggan na Dios, dinan so unoren tayo?
Wala ray naisip mon situasyon ya agnepeg ya unoren na saray Kristiano so gobierno? Mangibaga ka pa.
4. Mansiansian neutral diad isip tan gawa
Basaen so 1 Juan 5:21. Tan i-play so VIDEO insan ebatan iraya.
Diad video, akin et nandesisyon si Ayenge ya agmibiang ed partido na politika odino diad saray seremonya na bansa ya singa say pansaludo ed bandira?
Parad sika, duga kasi so desisyon to?
Anto ni ray situasyon ya nayarin nairapan tayon mansiansian neutral? I-play so VIDEO, insan ebatan iraya.
Panon tayon mansiansian neutral no walay sports competition na nanduruman bansa?
Panon tayon mansiansian neutral no nairapan odino agunggonaan tayo ed desisyon na saray politiko?
Akin et nayarin nairapan tayon mansiansian neutral lapud media odino saray kaulop tayo?
Anto ray situasyon ya kailangan na sakey ya Kristiano so mansiansian neutral diad isip tan gawa?
NO ITEPET NA ARUM: “Akin et agkayo mansasaludo ed bandira tan mangakansion na national anthem?”
Antoy ibagam ey?
SUMARYO
Gagawaen na saray Kristiano so anggaay nayarian dan mansiansian neutral ed politika diad isip, salita, tan gawa.
Rebyu
Antoy obligasyon tayo ed gobierno na too?
Akin et mansiasiansia tayon neutral ed politika?
Anto ray situasyon ya nayarin nairapan tayon mansiansian neutral?
DISKOBRIEN
Anto ray nayarin isakripisyo tayo pian mansiansian neutral?
Antoy gawaen na saray pamilya pian makapanparaan la ra ed saray situasyon ya nasubok so pagmaliw dan neutral?
Akin et aliwan say pangidepensa ed bansa so sankaabigan a galang ya naawat na sakey?
Amtaen no panon kan mansiansian agkabiangan na mundo no mandedesisyon nipaakar ed trabaho.
“Nakaukolan a Sakbaten na Balang Sakey so Dilin Awit To” (Say Panag-bantayan, Marso 15, 2006)
-
-
Nasarag Moy PanamasegsegangPanliketan so Bilay ya Anggapoy Anggaan!—Panag-aral na Biblia
-
-
Walan wala ray onkontra, manpairap, odino manpasegsegang ni ingen ed amin ya Kristiano. Nataktakot tayo kasi?
1. Akin et agtayo la nabigla ya walay panamasegsegang?
Malinew so ibabaga na Biblia: “Amin a malabay a manbilay a walaay debosyon ed Dios bilang disipulo nen Kristo Jesus et napasegsegang met.” (2 Timoteo 3:12) Binusol tan pinairap si Jesus ta agkabiangan na mundo nen Satanas. Ag-itayo met kabiangan na mundo, kanian agti la pankelawan no busolen tan pairapen itayo na saray gobierno tan organisasyon na relihyon.—Juan 15:18, 19.
2. Panon tayon naparaanan so panamasegsegang?
Pabiskegen tayo la natan so tiwala tayod si Jehova. Inagew-agew tayon manpikasi, basaen so Salita to, tan regular tayon miaral. Ontulong iratan pian makpel tayon arapen so anggan anton panamasegsegang, anggano mismon kapamilya ti ni so manggawad satan. Oniay insulat nen apostol Pablo, ya aminpigan pinairap: “Si Jehova so mananulong ko; agak ontakot.”—Hebreo 13:6.
No regular tayo met ya manpupulong, magmaliw tayon makpel, naaralan tayoy mantiwala ed si Jehova, tan nalabanan so takot ed too. (Proverbio 29:25) No makpel kan manpulong natan, akaparaan kan manpulong anggano ibawal na gobierno so kimey tayo.—1 Tesalonica 2:2.
3. Anto ray gunggona no anosan tayo so panamasegsegang?
Siempre, agtayo labay so napairap. Pero no anosan tayo, ombiskeg so pananisia tayo. Mas onapit tayo ed si Jehova tan nalikna tayoy tulong to, lalo la no singa agti la kaya. (Basaen so Santiago 1:2-4.) Nasasakitan si Jehova no nanenengneng ton maniirap tayo, pero naliliketan no manaanos tayo. Ibabaga na Biblia: “No itetepel yoy irap lapud panggagawa yoy maong, makapaliket iya ed Dios.” (1 Pedro 2:20) No mansiansia tayon matoor, ikdan itayo nen Jehova na bilay ya anggapoy anggaan diad balon mundo, ya anggapo lay onkontra ed dugan panagdayew.—Mateo 24:13.
DAKEL NI NAARALAN MO
Amtaen no akin ya posiblin makapanmatoor tayo ed si Jehova anggano pasegsegangen itayo na arum. Amtaen met no panon to itayon bendisyonan.
4. Makapan-anos ka no kontraen ka na pamilyam
Amta nen Jesus ya ompan aglabay na pamilya tayo so desisyon tayon mandayew ed si Jehova. Basaen so Mateo 10:34-36, insan ebatan iya:
Antoy nayarin nagawa no mandesisyon so sakey ya membro na pamilya ya mandayew ed si Jehova?
Pian nanengneng so sakey ya alimbawa, i-play so VIDEO, insan ebatan iya.
Antoy gawaen mo no patundaen ka na kapamilyam o kaarom ya mandayew ed si Jehova?
Basaen so Salmo 27:10 tan Marcos 10:29, 30. Kayarin basaen so kada teksto, ebatan iya:
No kontra so pamilyam o kakaarom, panon kan natulongan na sayan promisa?
5. Itultuloy mon dayewen si Jehova anggano walay panamasegsegang
Kailangan tayoy manpakpel no patundaen itayo na arum ya dayewen si Jehova. I-play so VIDEO, insan ebatan iya.
Diad video, panon kan apabiskeg ed alimbawa na saray agagi?
Basaen so Gawa 5:27-29 tan Hebreo 10:24, 25. Kayarin basaen so kada teksto, ebatan iya:
Akin et importantin tuloytuloy tayon dayewen si Jehova anggano bawalan itayo na gobierno ya manpulong o miaral?
6. Tulongan ka nen Jehova ya makapan-anos
Saray Tasi nen Jehova ed nanduruman bansa, ugaw man o matatken, et matoor ya manlilingkor ed si Jehova anggano pinasegsegang ira. Pian nanengneng no antoy akatulong ed sikara, i-play so VIDEO. Insan ebatan iya.
Diad video, antoy akatulong ed sarayan Tasi ya mananos?
Basaen so Roma 8:35, 37-39 tan Filipos 4:13. Kayarin basaen so kada teksto, ebatan iya:
Panon kan natulongan na sayan teksto pian naanosan mo so anggan anton subok?
Basaen so Mateo 5:10-12, insan ebatan iya:
Akin et maliket ka nin siansia anggano napasegsegang ka?
Asarag na minilyon ya Tasi nen Jehova so panagpairap tan isusumpa. Nasarag mo met!
IBABAGA NA ARUM: “Singa agko kaya no pairapen da ak.”
Anton teksto so makatulong ed sikara pian ag-ira natatakot?
SUMARYO
No manlingkor tayo ed si Jehova anggano napasegsegang itayo, pabpablien to itan. Diad tulong to, makapan-anos tayo!
Rebyu
Akin et agla pankelawan na saray Kristiano ya walay panamasegsegang?
Antoy gawaen mo natan pian naparaanan mo so panamasegsegang?
Antoy makatulong pian makapanpakpel kan mandayew ed si Jehova ed anggan anton subok?
DISKOBRIEN
Bantayan so eksperiensya na sakey ya kabataan a brother no panon ya tinulongan nen Jehova ya makapan-anos nen nansiansian neutral.
Amtaen no antoy akatulong ed sakey ya sanasawa pian matoor ya makapandayew ed si Jehova diad dakel a taon anggano wala ray onsusumpa.
Aralen no panon tayon makpel ya arapen so panamasegsegang.
“Manparaan La Natan Parad Panamasegsegang” (Say Panag-bantayan, Hulyo 2019)
Akin et agtayo la nabigla no wala ray kapamilya tayon onkontra, tan panon tayon nakaya itan?
“Say Katuaan et Mangiyakar na ‘Espada, Aliwan Kareenan’” (Say Panag-bantayan, Oktubre 2017)
-