-
Panon ya Naamtaan no Siopa ray Tuan Kristiano?Panliketan so Bilay ya Anggapoy Anggaan!—Panag-aral na Biblia
-
-
3. Antoy kimey na saray tuan Kristiano?
Inikdan nen Jesus na kimey iray disipulo to. “Imbaki to ran mangipulong ed Panarian na Dios.” (Lucas 9:2) Saray Kristiano nensaman et nampulong diad saray lugar ya pandadayewan da, diad publikon lugar, tan diad saray kaabungan. (Basaen so Gawa 5:42; 17:17.) Ontan met iray tuan Kristiano natan, ipupulong day katuaan ya walad Biblia ed anggan iner ya kawalaan na totoo. Inaro da ray kapara dan too, kanian makulikuli dan ipupulong so mensahe na Biblia ya mangiiter na ilalo tan ligliwa.—Marcos 12:31.
-
-
Panon ya Nipupulong so Maong a Balita?Panliketan so Bilay ya Anggapoy Anggaan!—Panag-aral na Biblia
-
-
Panon ya Nipupulong so Maong a Balita?
Magano lan usaren nen Jehova so Panarian to pian ekalen so amin ya problema tayo. Balibali iyan balita kanian agtayo labay ya sarilien. Labay nen Jesus ya ipaamta na saray disipulo to iyan mensahe ed amin. (Mateo 28:19, 20) Antoy ginawa na Saray Tasi nen Jehova pian naunor da iyan ganggan nen Jesus?
1. Panon ya nasusumpal natan so Mateo 24:14?
Abayag lan imbaga nen Jesus: “Sayan maong a balita na Panarian et nipulong ed interon dalin.” (Mateo 24:14) Malikeliket iray Tasi nen Jehova ya gawaen iyan importantin kimey. Ipupulong mi so maong a balita ed interon mundo diad masulok ya 1,000 lenguahe! Pian nagawaan iyan balbaleg a kimey, kailangan so pansagpot tan dapat organisado ya amin. Agmi iya nagawaan no anggapoy tulong nen Jehova.
2. Antoy gagawaen mi pian napulongan so totoo?
Manpupulong kami inerman so kawalaan na totoo. Singa saray Kristiano nensaman, manpupulong kami “diad kabkaabungan.” (Gawa 5:42) Lapud sayan sistematiko tan mauksoy ya paraan, nakakatongtong mi so minilyon ya totoo kada taon. No maminsan, agmi nasasabian iray totoo ed abung, kanian manpupulong kami met ed saray publikon lugar. Lanang min sasamboten so pankanawnawa ya ibaga ed arum so tungkol ed si Jehova tan say panlabayan to.
3. Siopay akanresponsabilidad ya ipulong so maong a balita?
Responsabilidad na amin ya tuan Kristiano ya ipaamta so maong a balita ed arum. Seseryosoen mi iyan responsabilidad mi. Manpupulong kami anggad sarag mi ta bilay so nalalanor. (Basaen so 1 Timoteo 4:16.) Anggapoy sueldo mi ed sayan kimey, ta ibabaga na Biblia: “Inawat yon anggapoy bayar, iter yon anggapoy bayar.” (Mateo 10:7, 8) Wala ray agmangawat ed mensahe mi. Pero manpupulong kami nin siansia ta parte itan na panagdayew mi tan napapaliket mi si Jehova.
DAKEL NI NAARALAN MO
Aralen no panon ya manpupulong ed interon mundo iray Tasi nen Jehova, tan amtaen no panon kamin tutulongan nen Jehova.
Panagpulong ed interon mundo: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Pansasagpotan mi ya pulongan so amin
Gagawaen na Saray Tasi nen Jehova so anggaay nayarian da ya ipulong so maong a balita ed anggan iner. I-play so VIDEO, insan ebatan iya.
Antoy panbiliban mo ed pansasakripisyo na Saray Tasi nen Jehova ya manpulong?
Basaen so Mateo 22:39 tan Roma 10:13-15, insan ebatan iraya:
Panon ya ipapanengneng na pampupulong mi ya inaro mi kapara min too?
Antoy nalilikna nen Jehova ed saray mangipupulong ed maong a balita?—Nengnengen so bersikulo 15.
5. Kakimeyan kami na Dios
Ipapanengneng na dakel ya eksperiensya ya si Jehova so mangigigiya ed kimey mi. Singa bilang diad New Zealand, walay sakey ya brother ya say ngaran to et Paul. Nen manpupulong diad bandad ngarem, walay akatongtong ton bii. Diad kabuasan to man, amay bii, nampikasi ed Dios tan inusar to so ngaran ya Jehova. Tan kinerew to ya wala komoy onlan manpulong ed sikato. “Kayari labat na taloy oras, wadman ak la,” so kuan nen Paul.
Basaen so 1 Corinto 3:9, insan ebatan iya:
Panon ya ipapanengneng na saray eksperiensya, ya singa amay agawa ed New Zealand, ya si Jehova so mangigigiya ed kimey ya panagpulong?
Basaen so Gawa 1:8, insan ebatan iya:
Akin et kailangan tayo so tulong nen Jehova pian nagawaan tayo so kimey ya panagpulong?
Kasin antam?
Diad saray aral mi ed midweek, ipapasal kamin manpulong. No asalim lay akiaral ed midweek, antoy nibagam ed sayan pangipapasal ed sikami?
6. Uunoren mi so ganggan na Dios ya manpulong
Nensaman, sinali na saray onkokontra ya patundaen iray papatumbok nen Jesus ya manpulong. Indepensa na saraman ya Kristiano so karapatan da pian makala ra na “legal a kanepegan a mangipulong na maong a balita.” (Filipos 1:7) Ontan met so gagawaen na Saray Tasi nen Jehova natan.a
Basaen so Gawa 5:27-42, insan ebatan iya:
Akin et agkami ontunda ya manpulong?—Nengnengen so bersikulo 29, 38, tan 39.
NO ITEPET NA ARUM: “Akin et oonlad kaabungan iray Tasi nen Jehova?”
Antoy ibagam ey?
SUMARYO
Ingganggan nen Jesus iray disipulo to ya ipulong so maong a balita diad amin ya bansa. Tutulongan nen Jehova iray totoo to ya gawaen iyan kimey.
Rebyu
Panon ya nipupulong so maong a balita diad interon mundo?
Panon ya ipapanengneng na pampupulong mi ya inaro mi kapara min too?
Parad sika, na-enjoy mo kasi manpulong? Akin ey?
DISKOBRIEN
Nengnengen no panon ya manpupulong iray Tasi nen Jehova diad angkabaleg iran syudad.
Panon ya tinulongan na Saray Tasi nen Jehova iray refugee?
Amtaen so istorya na sakey ya bii no akin ya malikeliket nen inusar to so bilay to ed panagpulong.
Amtaen iray agnalinglingwanan ya impanalo ed korte, ya akatulong pian mas mainomay ya ipulong so maong a balita.
“Angisegep na Kaso Iray Manangipulong ed Panarian” (Manuuley Lay Panarian na Dios!, kapitulo 13)
a Say Dios so angiganggan ya manpulong kami. Kanian, agla kailangan ya manpatanir ni ray Tasi nen Jehova ed saray totoon walaan na autoridad pian ipulong so maong a balita.
-