Panagmatalek Diad Agnaspot a Mundo

“AGKO gawaen so kaabigan a labay ko komon, sabalet so mauges ya agko labay, sikato ya so gawaen ko.” Tua met ta iya ed kipapasen mo? Napaseseg ed pakaamtan ontan met so problema nen apostol Pablo; anta sakey a lakin matalonggaring ed Kristianon integridad. Agta saya so mansumlangan? Diad sulat to ed saray Kristiano ed Roma, inamta nen Pablo so problema: “Et no gawaen ko so agko labay, aliwa la a siak so manggawa na saya, noag say kasalanan a manayam ed siak.” Anton kasalanan so tutukoyen to, tan panon ton atalonaan itan pian magmaliw a too na integridad?​—Roma 7:19, 20.

Oniay insulat nen Pablo ed banda’d unaan na sulat to: “Unong a say kasalanan linmoob ed mundo lapu ed sakey a too, tan say patey lapu ed kasalanan; et say patey ed satan linma ed amin a too, ta amin nankasalanan.” Samay “sakey a too” et si Adan. (Roma 5:12, 14) Adamikon kasalanan​—say kasalanan na inmunan too, si Adan​—so sengegay tawir ya ag-inkayadyari na rasay katooan tan manunan rason itan no akin a peteg ya angat so pamasiansia na integridad.

Say panmoria nen Pablo ed “orihinal a kasalanan,” a singa datin tawag, so agmalaknab ya aawaten natan lapud say salaysay na Biblia nipaakar ed palsa so ipupulisay na saray sirkulo na teologon mapalabo’d saray teorya na ebolusyon. “Ag-inawat na saray iskolar so intiron makatantandan punto” so kuan na sakey a modernon komentaryo nipaakar ed Roma 5:12-14. Balet diad apalabas a sanlasus taon et anggapoy impanguman ya insalaysay na saray komentarista na Biblia a “nen nankasalanan si Adan et . . . dinutakan ton amin so ilalak to na satan a kasalanan pati ed saray pansumpalan to.”a

Orihinal ya Impakabalang na Integridad

No panon a say inkiwala nen Adan, say inmunan too et ibuburi na dakel natan, ontan met ed si Satanas, say Diablo, so itatalirak bilang sakey a mito.b Balet say matalonggaring ya autoridad, si Jesus-Kristo so mangibabaga ed sikatayo a sayan sakey so “agtinmalindeg ed katuaan,” diad arum a salita et sikatoy agnapanmatalkan. (Juan 8:44) Tan diad sugsog nen Satanas a si Adan tan say asawa to, si Eva et nanrebildi ed si Jehova tan binuyak day integridad da ed silong na subok.​—Genesis 3:1-19.

Lapud amin tayo et nanlapud si Adan, atawir tayon amin so tendensyan mankasalanan. Inkuan nen makabat a Solomon: “Anggapo so maptek a too ed tapew na dalin a manggawa na maong, tan agmankasalanan.” (Eclesiastes 7:20) Siansia ni, siopaman a too so nayarin napanmatalkan. Panon iyan posibli? Lapud agkaukolan ya ayadyari so sakey pian napansiansiay integridad.

Say Basiyan na Integridad

Dakel so lingo nen Arin David na Israel, pati saray dokumentadon impikalugoran to’d si Bat-seba. (2 Samuel 11:1-27) Say dakel ya impakalukso nen David so angipabitar ed kaarawi to’d inkayadyari. Anto, sirin, so naimano nen Jehova ed saman a too? Inkuan a direkta nen Jehova ed ilalak nen David, si Solomon: “Manakar ka ed arap ko, a singa impanakar nen David ya amam, dia ed katooran na puso, tan dia ed inkatunong.” (1 Arari 9:4) Anggaman ed dakel ya impakalukso to, say pinagkalamut na inkanapanmatalkan nen David so binidbir nen Jehova. Akin?

Initer nen David so ebat sanen imbaga to ed Solomon: “Si Jehova usisaen to so saray amin a puso, tan natalosan to so saray amin a panisip na saray nonot.” (1 Awaran 28:9) Alingo si David, balet sikato so nampaabeba, tan labay ton gawaen so maptek. Tuloytuloy ton inawat so panamaat tan panangorihi​—on, kinerew to itan. “Sumal moak, O Jehova, tan subok moak; salim so pusok tan linawak” so kerew to. (Salmo 26:2) Tan talagan adalisay si David. Alimbawa, saray panamuger a nansumpalay impankasalanan to’d si Bat-seba et nambayag ya anggad impatey to. Balet, agbalot inkatunongan nen David so gawa ton mauges. (2 Samuel 12:1-12) Lalon importanti et agbalot sinmuawi manlapud tuan panagdayew. Nisesengeg ed saya, tan lapud puro, impapuson panagpataoli tan panagbabawi nen David, mabulos a pinerdona nen Jehova iray kasalanan to tan binidbir to bilang too na integridad.​—Nengnengen met so Salmo 51.

Nasusubok so Inkanapanmatalkan

Sinubok nen Satanas a Diablo si Jesus diad gunaet ton buyakey integridad to. Kaukolan ton mantinien so integridad to ed silong na saray panamairap tan panirap, midumaan ed si Adan, a say katutulok to bilang ayadyarin too et asubok labat diad impamilin ed sikaton ontulok ed madibinon ganggan. Niarum ni et nadedetdetan si Jesus ed pakaamtan say integridad to so basiay pakarondon na atooan a pamilya.​—Hebreos 5:8, 9.

Lapud determinadoy Satanas a mamuyak ed integridad to, inasinggeran toy Jesus sanen sikatoy makapkapoy​—kayari 40 agew ya impandalepdep tan impan-ayunal ed kalawakan. Amitlo ton tinukso si Jesus—a pagmaliwen a tinapay iray bato; ya ontaboy manlapud templo, a mataletalek a sikatoy isalba na anghil tan diad ontan et makapangiter na mamilagron tanda a mamaneknek ed inka-Mesias to; tan pian awatey pananguley ed amin a panarian na sayan mundo a kasalat na sakey labat a ‘pangigalang’ to’d si Satanas. Balet intalirak nen Jesus so balang pananukso, a mamantiniey integridad to’d si Jehova.​—Mateo 4:1-11; Lucas 4:1-13.

Say Integridad nen Job

Say talindeg nen Job, a minantini toy integridad to ed silong na subok, so kabkabat a maong. Makapainteres, agnatatalosan nen Job no akin ya asagmak toy desyang. Agto amta a pinalesa nen Satanas ed sikato iray palson motibo, ya ibabagan si Job so manlilingkor ed Dios lapud sinisiblet a rason tan kuanton pian isalbay dilin baog to et mabulos nen Job a buyakey integridad to. Inabuloyan na Dios a sagmaken nen Job so pigaran makapairap ya eksperiensia pian nipanengneng ya aliwa si Satanas.​—Job 1:6-12; 2:1-8.

Linmoob ed eksena iray taloran palson kaaro. Sigagalan aliway impangipresenta ra’d saray estandarte tan gagala na Dios. Anggan say asawa nen Job et agto met ayarian a talosan so isyu, agto apaseseg so masiken to ed panaon na pirmin pankaukolan. (Job 2:9-13) Balet tinmalindeg a malet si Job: “Angga ed ompatey ak agko ekalen so inkaskey ko a manlapu ed siak. Say inkatunong ko benbenan ko, tan agko paulyan ya onla; say pusok agtoak pooten leleg a manbilay ak.”​—Job 27:5, 6.

Say naspot ya alimbawa nen Job, tekep na integridad na dakel nin matoor a lalaki tan bibii, a singa nirekord ed Biblia, so mamapaneknek a matila si Satanas.

Integridad tan say Kristianon Ministeryo

Kasin say integridad so sakey kualidad ya ikuekuenta labat nen Jehova parad dilin pakapenek to? Andi. Say integridad so walaan na importantin kablian parad sikatayon totoo. Parad kagunggunaan tayo a sinimbawa itayo nen Jesus ya ‘aroen so Katawan a Dios ed masimoon a puso, tan dia ed masimoon a kamarerwa, tan dia ed masimoon a nonot.’ Talagan saya so “baleg tan unonan ganggan,” tan kaukolan na sakey a laki, bii, odino ugaw so integridad pian natulok iyan ganggan. (Mateo 22:36-38) Antoy nasasaglawi, tan antoray tumang?

Say too na integridad so napanmatalkan na aliwa labat a kapara ton totoo noagta, lalon importanti, say Dios. Say inkadalisay na puso to so naiimano ed kiwakiwas to; sikatoy bulos manlapud pansimpisimpitan. Aliwan makapalikdo odino mauges. Oniay impangidalatdat nen Pablo: “Impulisay mi so saray maamot a bengatla ran makapabaing; ya ag kami manakar ed kasiliban tan agmi pikeweten so salita na Dios; noag ingen diad inkipaliwawa na katuaan imatalek mi sikamin dili ed konsiensia na balang too ed imaton na Dios.”​—2 Corinto 4:2.

Imanoen a sasalambiten nen Pablo iray awawey a sasaglawien toy Kristianon ministeryo. Panon a nalingkoran na Kristianon ministro so arum no say kakikiwas to et aliwan maptek, no sikatoy aliwan too na integridad? Say uloen na sakey a relihyoson ulop na Irish ya ag-abayag et inmekal so malinlinew a mangiyiilustra ed punto. Inaksobi ton “inabuloyan ton mantultuloy so paedophile a pari a mangasikaso’d ugugaw a nambayag ni kayarin akabatan so impangabuso to’d ugugaw,” unong ed peryodikon The Independent. Nisalaysay a say panangabuso et binmayag ni na masulok a 24 taon. Nipriso so pari ed loob na apatiran taon, balet isipen pay pasakit a sinagmak na inataki ton ugugaw legan na saraman a taon lapud say manangasikaso to et andian na integridad ed moralidad pian sikatoy onkiwas!

Integridad​—Saray Tumang

Si apostol Juan so andiay-takot a too. Nisesengeg ed pirmin entusiasmo ra, sikato tan say agi to so tinawag nen Jesus ya “Anak na Karol.” (Marcos 3:17) Si Juan, toon matalonggaring ed integridad, pati si Pedro, so angisalaysay ed Judio iran manuley ya ‘agto nayarin agsalitaen’ so nipaakar ed saray bengatlan anengneng tan nadngel to legan a kaiba toy Jesus. Si Juan so sakey met ed apostoles a nankuan: “Nakaukolan ya unoren mi so Dios, nen saray totoo.”​—Gawa 4:19, 20; 5:27-32.

Ompapatnag a sanen si Juan so manedad lay 90, sikatoy akautibo ed Isla na Patmos “lapu ed salita na Dios tan say inpantasi nen Jesu-Kristo.” (Apocalipsis 1:9) Diad edad to, nayarin isipen to a say ministeryo to et angangga la. Balet say too labat a walaay integridad so napangimatalekan na asainmin a mangisulat ed makapasagyat a pasingawey ed Apocalipsis. Ditan et nanmatoor si Juan. Agaylan pribilihyo iman parad sikato! Tan dakel ni sinmabin pribilihyo. Saginonor, mapatnag diad asingger na Efeso, insulat toray salaysay na Ebanghelyo to tan ed taloran sulsulat. Napatnagay sukat na satan a kualidad ed saray engranden pribilihyon amantok ed 70 taon na matoor, napanmatalkan ya impanserbi to!

Say pagmaliw a napanmatalkan a too et mangiiter na aralem a kapenek. Say pagmaliw a napanmatalkan ed imaton na Dios et mangitatarok na andi-anggaan iran tumang. Natan, “sakey a baleg ya ulop” na tuan managdayew so nipaparaan ya onloob ed sakey a balon mundo na kareenan tan pantutunosan, tekep na ilalon andi-anggaan a bilay. (Apocalipsis 7:9) Say integridad ed makana iran pamaakaran a singa say moralidad tan panagdayew so nepeg a nitandoro, anggaman ed saray subok na sayan sistemay bengabengatla tan ed dakel nin angat nen Satanas a nayarin itarok to’d ariripen na Dios. Napaseguroan a diad pakayarin iiter nen Jehova, ontalona ka!​—Filipos 4:13.

Diad panasaglawi ed kaplesan tan arapen, ipapaseguro na salmistan David ed amin tayo sanen kuanto, diad sakey a pikakasi na pisasalamat ed si Jehova: “Unong na nipaakar ed siak, sika ampayaen moak ed inkamatuak, tan ipasen moak lawas ed arapan na lupam. Nagalang si Jehova, . . . Ontan pa komon, tan Ontan pa komon.”​—Salmo 41:12, 13.

[Saray paimano ed leksab]

[Litrato ed pahina 4]

Anggaman ed saray impakalukso, pinaneknekan nen David a sikatoy napanmatalkan

[Litrato ed pahina 5]

Intilakan itayo nen Jesus na sankaabigan ya alimbawa na inkanapanmatalkan

[Saray litrato ed pahina 7]

Say pagmaliw a napanmatalkan so mangitatarok na pirmin kapenek