Itarok nen Jehova so Dakel ya Anak ed Gloria

“Dia ed pangyakar to na dakel ya anak ed gloria, manepeg a gawaen to [Dios] ya ayadyari dia ed panamegley na irirap so makanggawa [Manunan Ahente, NW] na kilalaban da.”​—HEBREOS 2:10.

1. Akin a makaseguro tayon say gagala nen Jehova parad katooan et nasumpal?

PINALSA nen Jehova so dalin a magnayon a panayaman tan napanggayagaay andi-geter a bilay na ayadyarin atooan a pamilya. (Eclesiastes 1:4; Isaias 45:12, 18) Tua, nankasalanan so inmunan ateng tayon Adan tan sirin et nipasa toy kasalanan tan ipapatey ed ilalak to. Balet say gagala na Dios parad sankatooan so nasumpal diad panamegley na Insipan a Bini, si Jesu-Kristo. (Genesis 3:15; 22:18; Roma 5:12-21; Galacia 3:16) Say aro ed katooan so amakiwas ed si Jehova ya iter so “bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” (Juan 3:16) Tan say aro so amakiwas ed si Jesus ya “iter toy bilay to a panondon ed amayamay.” (Mateo 20:28) Sayan “[kasimbangan, NW] a dondon” so manaliw lamet ed saray kanepegan tan iilaloan ya abalang nen Adan tan pagmaliwen ton posibli so andi-anggaan a bilay.​—1 Timoteo 2:5, 6; Juan 17:3.

2. Panon a say kiyaplikaan na dondon bagat nen Jesus so niyanino ed tinaon ya Agew na Pananakbong na Israel?

² Say kiyaplikaan na dondon bagat nen Jesus so niyanino ed tinaon ya Agew na Pananakbong. Diad satan ya agew, say atagey a saserdote na Israel so mangibagat ya unona na baka a pinagka-apay ed kasalanan tan mangipresinta ed dala na satan ed sagradon Kaban diad Sankasantosan na tabernakulo, tan insan diad templo. Ginawa iya nisesengeg ed biang to, ed sankaabungan to, tan ed tribu nen Levi. Mipadpara, impresinta nen Jesu-Kristo ed Dios so kablian na dala ton sankaunaan pian sakbongan iray kasalanan na espiritual ya ‘agagi’ to. (Hebreos 2:12; 10:19-22; Levitico 16:6, 11-14) Diad Agew na Pananakbong, say atagey a saserdote so mangibagat met na kanding a pinagka-apay ed kasalanan tan mangipresinta ed dala na satan diad Sankasantosan, nagawa’d satan so pananakbong parad kasalanan na 12 aliwan-makasaserdoten tribu na Israel. Ontan met, say Atagey a Saserdoten Jesu-Kristo so mangikana ed bilay to diad biang na saramay kabiangay katooan a mangaagamil na pananisia, a kaekalan na saray kasalanan da.​—Levitico 16:15.

Nitarok ed Gloria

3. Unong ed Hebreos 2:9, 10, antoy gagawaen lay Dios ed loob na 1,900 taon?

³ Diad loob na 1,900 taon, walay bengatlan makatantandan gagawaen lay Dios mitukoyan ed ‘agagi’ nen Jesus. Nipaakar ed saya, oniay insulat nen apostol Pablo: “Nanengneng tayo ya abalangetan na gloria tan dayew, lapud impangitepel to na ipapatey, so samay Jesus ya agawa ya abebbebay daiset nen saray angheles pian lapud grasyay Dios natawayan to so ipapatey lapu ed amin a too. Ta saman so kipaakaran na saray amin a bengatla, tan lapu ed sikato walara so saray amin a bengatla, dia ed pangyakar to na dakel ya anak ed gloria, manepeg a gawaen to [Jehova a Dios] ya ayadyari dia ed panamegley na irirap so Manunan Ahente na kilalaban da.” (Hebreos 2:9, 10) Say Manunan Ahente na kilalaban et si Jesu-Kristo, a naaralan toy naspot a katutulok diad saray bengatlan nanirapan to legan na inpambilay to bilang sakey a too ed dalin. (Hebreos 5:7-10) Si Jesus so sanka-unaan ya inilalak bilang espiritual ya anak na Dios.

4. Kapigan tan panon ya inilalak si Jesus bilang espiritual ya Anak na Dios?

⁴ Inusar nen Jehova so masanton espiritu to, odino aktibon puersa, pian nailalak si Jesus bilang espiritual ya Anak to, ta pian itarok to’d mangatatawen a gloria. Bangta bukbukor da nen Juan a Managbautismo, dinalan nen Jesus so sigpot ya inkipalseb ed danum pian isimbolo so panangipresinta to’d inkasikato ed Dios. Oniay kuan na Ebanghelyo nen Lucas: “Sanen abinyagan so amin a totoo, a, si Jesus met nen abinyagan, tan nen nampikasi, say tawen nilukas, et inmakseb ed sikato so espiritu santo ed nengneng na laman, a singa malapati, tan sakey a bosis nanlapu ed tawen, a kuanto: ‘Sika so Ana’ko ya inad-aro, dia ed sika napaliketak a maong.’” (Lucas 3:21, 22) Anengneng nen Juan so indapoy masanton espiritu ed Jesus tan nadngel to so parungtalan ya impansalita nen Jehova na panangabobon ed sikato bilang inad-aron Anak To. Diad saman a panaon tan diad masanton espiritu, inilalak nen Jehova si Jesus bilang say sanka-unaan ed ‘iyaakar a dakel ya anak ed gloria.’

5. Siopa so inmuna-unan agunggunaan ed bagat nen Jesus, tan pigaray bilang da?

⁵ Saray ‘agagi’ nen Jesus so inmuna-unan nagunggunaan ed bagat to. (Hebreos 2:12-18) Diad pasingawey et anengneng la ira nen apostol Juan a nigloria ed mangatatawen a Palandey Sion a kaibay Kordero, say apaolin Katawan a Jesu-Kristo. Imparungtal met nen Juan so bilang da, a kuanto: “Ninmengneng ak, tan say Kordero manalalagey ed tapew na palandey na Sion, et niulop ira ed sikato so sanlasus apataplo tan apatalibo, a wala a nisulat so ngaran to tan ngaran nen Ama to ed saray moling da. . . . Saraya asaliw ira dia ed saray totoo, a panagka-unonan bungabunga ed Dios tan Kordero, tan dia ed saray sangi ra anggapo so aromog a tila; ta sikara anggapo so tilol da.” (Apocalipsis 14:1-5) Kanian say ‘niyakar a dakel ya anak ed gloria’ diad tawen so walaay dagup labat a 144,001​—si Jesus tan saray espiritual ya agagi to.

“Nianak ed Dios”

6, 7. Sioparay “nianak ed Dios,” tan antoy kabaliksan na saya parad sikara?

⁶ Saramay inilalak nen Jehova so “nianak ed Dios.” Diad panutukoy ed saratan a sinansakey, oniay insulat nen apostol Juan: “Anggan siopa a nianak ed Dios agmanggaway kasalanan, ta say bini [ed pananak a kien nen Jehova] mansiansia ed sikato; tan agnayari a mankasalanan ta nianak ed Dios.” (1 Juan 3:9) Sayan “bini ed pananak” et say masanton espiritu na Dios. Say masanton espiritu katekep na katuaay Dios so angiter ed kada sakey ed 144,000 a ‘pinabilay lamet’ diad mangatatawen ya ilalo.​—1 Pedro 1:3-5, 23.

⁷ Si Jesus so Anak na Dios manlapud atooan ya inkianak to, no panon a say ayadyarin toon Adan et “anak na Dios.” (Lucas 1:35; 3:38) Anggaman ontan, kabautismo nen Jesus, makabaliksan so impangideklara nen Jehova a: “Sika so inadarok ya Anak, napaliket ak a maong ed sika.” (Marcos 1:11) Diad sayan deklarasyon a katekep na inyagos na masanton espiritu, malinew a niyakar la’d satan na Dios si Jesus bilang say espiritual ya Anak To. Diad piguratibon paraan, naikdan la’d saman si Jesus a “pinabilay” pati say pribilihyon naawat so bilay lamet bilang espiritun Anak na Dios ed tawen. Singa sikato, say 144,000 ya espiritual ya agagi to so ‘nianak lamet.’ (Juan 3:1-8; nengnengen so Say Panag-Bantayan, Nobyembre 15, 1992, pahina 3-6.) Ontan met singa si Jesus, sikaray nilanaan na Dios tan niganggan a mangiproklamay maong a balita.​—Isaias 61:1, 2; Lucas 4:16-21; 1 Juan 2:20.

Prueba na Inka-ilalak

8. Anton prueba na inka-ilalak ed espiritu so wala ed kaso nen (a) Jesus (b) ed inmuna iran babangatan to?

⁸ Walay prueban si Jesus et nailalak ed espiritu. Anengneng nen Juan a Bautista so inleksab na espiritu ed si Jesus tan nadngel toy deklarasyon na Dios nipaakar ed kapkapan-lanan pinagmaliw ya espiritual ya anak a Mesias. Balet panon a naamtaan na saray babangatan a sikaray nailalak ed espiritu? Bueno, diad agew na intokotok to’d tawen, inkuan nen Jesus: “Si Juan peteg [ya] aminyag na danum; sikayo balet nabinyagan kayo na espiritu santo ed aliwa lan dakel ya agew a manlapu ed natan.” (Gawa 1:5) Saray babangatan nen Jesus so ‘abinyagan na espiritu santo’ ed agew na Pentecostes 33 K.P. Satan ya impangikalbo na espiritu so atekepay ‘tanol a nanlapu ed tawen a singa sakey a dagem a mabiskeg’ tan “dila-dila a singa apuy” ed balang sakey ed saray babangatan. Mas makatantanda et say abilidad na saray babangatan “a nansalita na salitan nagsikasikmat unong na impangiter ed sikara na espiritu a pakapansalita.” Kanian wala so nanengneng tan narengel ya ebidensia a say dalan a paarap ed mangatatawen a gloria bilang ananak na Dios so nilukas la parad saray patumbok nen Kristo.​—Gawa 2:1-4, 14-21; Joel 2:28, 29.

9. Antoy walan prueba a saray Samaritano, si Cornelio, tan arum nira ed inmunan siglo so nailalak ed espiritu?

⁹ Pigaran panaon kayari to, si Filipe ya ebanghelisador so nampulong ed Samaria. Anggaman inawat na saray Samaritano so mensahe to tan nampabautismo, kulang so pakapatnagan a pinagmaliw la ra na Dios ya ananak to. Diad impanpikasi di apostol Pedro tan Juan tan diad impangitapew day kalimaan da ed saraman a mananisia, “inako ra so espiritu santo” ed agnadeterminan paraan a napatnagan na saray mangiimaton. (Gawa 8:4-25) Saya so prueban saray mananisian Samaritano so nianak ed espiritu bilang ananak na Dios. Mipadpara, nen 36 K.P., inawat nen Cornelio tan arum niran Gentil so katuaan na Dios. Si Pedro tan saramay akiulop ed sikaton Judion mananisia so “nikelawan ira, ta niutob met ed saray Gentiles so palangkap na espiritu santo. Ta sikara so nadngel da a nansasalita na sankaili a salita, et inggalang da so Dios.” (Gawa 10:44-48) Dakel so akaawat ya inmunan-siglon Kristianos na “saray maespiritun langkap,” a singa say pansalita ed nanduruman pansasalita. (1 Corinto 14:12, 32) Kanian sarayan sinansakey so awalaan na mabitar ya ebidensia a sikaray nailalak ed espiritu. Balet panon a naamtaan na onsaginonor a Kristianos no kasin sikaray nailalak ed espiritu odino andi?

Say Pantasi na Masanton Espiritu

10, 11. Diad basiyan na Roma 8:15-17, panon mon nisalaysay a say espiritu et tasian to iramay kaiban minanawir nen Kristo?

¹⁰ Amin a 144,000 ya alanaan a Kristianos so awalaan na nagnap ya ebidensian walaan iray espiritu na Dios. Mitukoyan ed saya, insulat nen Pablo: “Inawat yo ingen so espiritu na inkipaanak, a lapud saya yakis tayo: ‘Abba, Ama!’ Say dilin espiritu so mamatua ed espiritu tayo, ya anak itayo na Dios. Tan no anak itayo, tomatawir itayo met; tomatawir na Dios, tan mitatawir ed Kristo; a no ontan a mantepel itayo pati sikato, pian iba to itayo a nigloria.” (Roma 8:15-17) Saray alanaan a Kristiano so walaay liknaan ya anak na mangatatawen ya Ama ra, mabiskeg a pakaliknan ananak ira. (Galacia 4:6, 7) Segsegurado ra a sikaray pinagmaliw na Dios ya espiritual ya ananak bilang tomatawir ed Kristo diad mangatatawen a Panarian. Onia so kikukurang na masanton espiritu nen Jehova ed pihon betang.

¹¹ Diad impluensia na masanton espiritu na Dios, say espiritu, odino mabiskeg ya awawey, na saray alanaan so mamilit ed sikaran onkiwas ed positibon dalan ed ibabaga na Salitay Dios nipaakar ed mangatatawen ya ilalo. Singa bilang, sano nabasa ray kuan na Kasulatan nipaakar ed espiritual ya ananak nen Jehova, nabidbir dan tampol ya onaaplika iratan a salita ed sikara. (1 Juan 3:2) Amta ran sikaray “abinyagan ed Jesu-Kristo” tan anggad ipapatey to. (Roma 6:3) Say mapekder a kombiksyon da et sikaray espiritual ya ananak na Dios, ya ompatey tan napaoli ed mangatatawen a gloria, a singa met si Jesus.

12. Antoy napapawala na espiritu na Dios ed alanaan a Kristianos?

¹² Say pagmaliw ya espiritual ya ananak so aliwan binayuboan a pilalek. Saray nailalak ed espiritu et agda labay so onla’d tawen lapud pakakadesdesan ed ir-irap natan ed dalin. (Job 14:1) Imbes, napapawala na espiritu nen Jehova ed tudtua iran alanaan so sakey ya ilalo tan pilalek ya agkaslakan ed inkalapagan a totoo. Amta na saratan a pinagmaliw ya ananak a say andi-anggaan a bilay ed paraison dalin a napnoy maliket a pamilya tan kakaaro so marakerakep. Balet, agnisentro’d kapusoan da so ontan a bilay. Saray alanaan so walaan na ontanlan mabiskeg a mangatatawen ya ilalo a mabulos dan isakripisyo so amin a mangaraldalin ya iilaloan tan siglaotan.​—2 Pedro 1:13, 14.

13. Unong ed 2 Corinto 5:1-5, anto so ‘panpilpilalekan’ nen Pablo, tan antoy ipanengneng na saya nipaakar ed saramay nailalak ed espiritu?

¹³ Say inter-Dios ya ilalon mangatatawen a bilay so ontanlan kabiskeg ed saratan a mipadparay liknaan da ed si Pablo, ya angisulat: “Amta tayo a no say abung dia ed dalin, say tabernakulo tayo, naderal, wala so sakey ya abung tayo ya agginawa na saray lima, maando, dia ed saray tawen. Ta tua dia ed saya maningel itayo, panpilalekan ti marlang a nakawesan so ayaman tayo a salanti manlapu ed tawen. No dia ed tua naalmo ra itayo a sikakawes dia ed saman ya agew tan aliwan lakseb. Ta tua sikatayon wala ed sayan tabernakulo maningel itayo a nabebelatan; aliwan pian nalakseban itayo noag ingen pian nakawesan itayo, pian say maipapatey sikato so akmonen na bilay. Et say nanggawa ed sikatayo ed sayan bengatla say Dios, sikato so angiter ed sikatayo na tanda na espiritu.” (2 Corinto 5:1-5) Say ‘panpilpilalekan’ nen Pablo et say kioli ed tawen bilang imortal ya espiritun pinalsa. Diad panasaglawi ed laman na too, inusar to so metapora a mikukusbon tabernakulo, a lupok tan agpermanentin napanayaman no ikompara’d abung. Anggaman manbibilay ed dalin tekep na ompatey a laman, saray Kristianon walaay masanton espiritu a pinagkasanla ed onsabin mangatatawen a bilay so maniilalo’d “sakey ya abung [a nanlapud Dios],” imortal, agnabulok ya espiritun laman. (1 Corinto 15:50-53) Singa si Pablo, masimoon dan nikuan: “Wala itayo ed malet ya ilalo, kuanko, tan lablabay tayoy andi ed laman, noag say wala itayo ed abung na Katawan.”​—2 Corinto 5:8.

Impibali ed Nikaduma Iran Sipanan

14. Sanen igagapo so panagselebra ed Memoryal, anton sipanan so inmunan sinalambit nen Jesus, tan antoy betang na satan mitukoyan ed saray espiritual ya Israelita?

¹⁴ Segurado iray nailalak ed espiritun Kristiano a sikaray kabiangay duaran nikaduman sipanan. Sinalambit nen Jesus so sakey ed saraya sanen inusar to so andi-lebaduran tinapay tan alak pian igapo so Memoryal na onsabin ipapatey to tan inkuanto nipaakar ed kopa na alak: “Saya a kopa sikato so balon sipan dia ed dalak, a naibung nisengeg ed sikayo.” (Lucas 22:20; 1 Corinto 11:25) Sioparay aktual a napibilang ed balon sipanan? Si Jehova a Dios tan saray membro na espiritual ya Israel—saramay ginagala nen Jehova ya inyakar ed mangatatawen a gloria. (Jeremias 31:31-34; Galacia 6:15, 16; Hebreos 12:22-24) Onkukurang diad nipaagos a dala nen Jesus, aalaen na balon sipanan ed amin a nasyon so totoo parad ngaran nen Jehova tan pagmamaliwen irayan nailalak ed espiritun Kristiano a kabiangan na “bini” nen Abraham. (Galacia 3:26-29; Gawa 15:14) Tataryaan na balon sipanan so amin ya espiritual ya Israelita a naigloria diad kioli ra ed imortal a bilay diad tawen. Lapud ‘maando a sipanan,’ saray gungguna to so maando. Nanengneng no kasin sayan sipanan et walaan met na betang ed arum niran dalan legan na Milenyo tan manpatuloy.​—Hebreos 13:20.

15. Mitunosan ed Lucas 22:28-30, saray alanaan a patumbok nen Jesus so ginmapon napibali ed anto nin sipanan, tan kapigan?

¹⁵ Say “dakel ya anak” a ginagala nen Jehova ya ‘iyakar ed gloria’ so sansasakey ya impibali ed sipanan parad mangatatawen a Panarian. Nipaakar ed sayan sipanan ed baetan to tan ed papatumbok na bakat to, inkuan nen Jesus: “Sikayo so nansiansia ed siak ed saray inkatuktuksok; et manuro ak ed sikayo na sakey a panarian, a singa say Amak anuro ed siak, pian makapikan tan makapiinum kayo ed dulang ko dia ed panarian ko; et onyurong kayo ed saray trono a mangukom ed labindua a poli na Israel.” (Lucas 22:28-30) Say sipanan parad Panarian so nigapo sanen saray babangatan nen Jesus so alanaan na masanton espiritu nen Pentecostes 33 K.P. Mansiansian nipakurang itan a sipanan ed baetan di Kristo tan ed kapara ton arari ed ando lan ando. (Apocalipsis 22:5) Kanian, sirin, segurado iray nailalak ed espiritun Kristiano a kabiangan ira diad balon sipanan tan diad sipanan parad Panarian. Diad panseselebra ed Pangdem na Katawan, sirin, say pigpigaran tuloy a nakekeraan ed saray alanaan a wala ni’d dalin so mibiang ed tinapay, a mangilalaman ed andiay kasalanan ya atooan a laman nen Jesus, tan ed alak, a mangililitrato ed ayadyarin dala to a niyibung ed ipapatey tan mamekder ed balon sipanan.​—1 Corinto 11:23-26; nengnengen so Say Panag-Bantayan, Pebrero 1, 1989, pahina 20-23.

Atawag, Apili, tan Matoor

16, 17. (a) Pian nitarok ed gloria, anto so nepeg a tua ed amin a 144,000? (b) Sioparay “samplora ya arari,” tan panon so pantratrato ra ed mangaraldalin a nakdaan ya “agagi” nen Kristo?

¹⁶ Say inmunan kiyaplikaan na dondon bagat nen Jesus so amaposibli parad 144,000 a natawag ed mangatatawen a bilay tan apili diad pagmaliw a nailalak na Dios ed espiritu. Pian nitarok ed gloria, siempre, ‘panpelengan da a paligenen so inkatawag tan inkapili ra,’ tan nepeg dan paneknekan a matoor ira anggad patey. (2 Pedro 1:10; Efeso 1:3-7; Apocalipsis 2:10) Say daiset lan nakdaan ed saray alanaan a wala ni’d dalin so manmamantini ed integridad da anggaman susumpaen na “samplora ya arari” a mangililitrato ed amin a mapolitikan pakayari. “Sikara mibakal ira sumpa ed Kordero,” inkuan na anghel, “et say Kordero sikara so taloen to, ta sikato so Katawan na saray kakatawan, tan Ari na saray arari; tan sikara naani taloen na saray ibiba to, ya atawag, tan apili, tan matoor.”​—Apocalipsis 17:12-14.

¹⁷ Anggapoy nagawaan na saray atooan a manuley sumpad si Jesus, say “Ari na saray arari,” ta sikatoy walad tawen. Balet nidedemostra ray inkaruksa ra ed nakdaan ya ‘agagi’ to a wala ni ed dalin. (Apocalipsis 12:17) Manampot itan diad bakal na Dios ya Armagedon, sano say panbiktoria so nipaseguro la ed “Ari na saray arari” tan ed ‘agagi’ to​—‘saramay atawag tan apili tan matoor.’ (Apocalipsis 16:14, 16) Ambegya, saray nailalak ed espiritun Kristiano so okupadon tuloy. Antoy gagawaen da natan, sakbay na pangigloria nen Jehova ed sikara?

Anto so Ebat Yo?

◻ Siopa so ‘iyakar [na Dios] ed mangatatawen a gloria’?

◻ Anto so labay ya ibaga na pagmaliw a “nianak ed Dios”?

◻ Panon a ‘say espiritu et mantasi’ ed pigaran Kristianos?

◻ Saray nailalak ed espiritu so apibali ed antoran sipanan?

[Litrato ed pahina 15]

Nen Pentecostes 33 K.P., apatnagan a say dalan a paarap ed mangatatawen a gloria so nilukas la