14. Akin a kombinsido si Pablo nipaakar ed panangaro na Dios anggaman ed saray irap a nayarin sagmaken na saray Kristiano?

¹⁴ Basaen so Roma 8:38, 39. Anto so angombinse ed si Pablo ya anggapon balot so makapangisian ed saray Kristiano manlapud aro na Dios? Andi-duaruwan saray personal ya eksperiensya nen Pablo legan a sikatoy walad ministeryo so amabiskeg ed kombiksion to a saray irap so agmakaapekto ed panangaro na Dios ed sikatayo. (2 Corinto 11:23-27; Filipos 4:13) Ontan met, si Pablo so walaan na pikakabat nipaakar ed magnayon a gagala tan apalabas ya impideneng nen Jehova ed totoo To. Kasin nadaeg na mismon ipapatey so panangaro na Dios ed saramay matoor a manlilingkor ed sikato? Andin balot! Saratan a matoor ya inaatey so manbilay ed naspot a memorya na Dios, tan paolien to ira ed dugan panaon.​—Lucas 20:37, 38; 1 Corinto 15:22-26.

¹⁶ Bilang Kristianos, agtayo nepeg a takotan ya antokaman ed tinawag nen Pablo a ‘saray bengatla natan’​—saray ebento, kipapasen, tan situasyon ed sayan peles a sistema na bengabengatla​—nisay ‘bengabengatla ya onsabi’ ed arapen so makabuyak ed panangaro na Dios ed totoo to. Anggaman babakalen itayo na saray mangaraldalin tan mangatatawen a puersa, wadtan so matoor a panangaro na Dios a manustuni ed sikatayo. Aliwan say “katagey, anggan say kaaralman,” so mamuger ed panangaro na Dios, unong ya indanet nen Pablo. On, anggapon balot so makapangimedmer ed sikatayo, nisay bengatlan ginetma a mangimpluensya ed sikatayo, so makapangisian ed sikatayo manlapud aro na Dios; nisay antokaman nin palsa a mamuyak ed siglaotan na Manamalsa ed saray matoor a lingkor to. Agbalot onsaew so panangaro na Dios; andi-anggaan itan.​—1 Corinto 13:8.