Pilim so Panagligliwaan ya Makapaliket ed si Jehova

Si Jehova et “maliket a Dios.” (1 Timoteo 1:11) Labay to ya maliket tayo met tan na-enjoy tayoy bilay. Naliliketan no walay panaon tayon manrelaks kayari trabaho. Diad sayan leksion, pantongtongan ta no panon tayon na-enjoy so panaon na panagrelaks. Pantongtongan ta met no panon tayon napaliket si Jehova.

1. Antoy tandaan tayo no manpipili na panagligliwaan?

Antoy gagawaen mo pian narelaks ka? Say arum et wala labat ed abung—manbabasa, manpapatogtog, manbabantay na pelikula, odino manba-browse ed internet. Say arum balet, mas labay day ompasyar kaibay kakaaro da—man-hiking, man-swimming, odino manggalaw. Antokaman so labay tayo, kailangan tayon seguradoen ya say pipilien tayon panagligliwaan o libangan et “makapaliket ed Katawan.” (Efeso 5:10) Importante ya natatalosan tayo itan ta dakel natan iray uson panagligliwaan ya kabusol nen Jehova lapud walay laok dan pateyan, seksual ya imoralidad, odino espiritismo. (Basaen so Salmo 11:5.) Antoy makatulong pian duga iray napili tayon panagligliwaan?

Dapat inaro na kakaaro tayo si Jehova. Ta no ontan, maong so impluensya da ed sikatayo tan ed saray pipilien tayon panagligliwaan. Naaralan ta la ed apalabas ya “samay miuulop ed marunong et magmaliw a marunong.” Pero, no lanang tayon miuulop ed totoon agda uunoren so estandarte na Dios, “aliwliway pansumpalan” tayo.—Proverbio 13:20.

2. Akin et kontrolen tayoy karakel na oras ya uusaren tayod panagligliwaan?

Anggano aliwa met ya makapuy so apili tayon panagligliwaan, siansia nin manalwar tayo ompan naupot lay oras tayo ed satan. Ta no ontan, anggapo lay panaon tayo ed saray mas importantin kimey. Bibilinen itayo na Biblia: “Usar yod sankaabigan so panaon yo.”—Basaen so Efeso 5:15, 16.

DAKEL NI NAARALAN MO

Amtaen no panon kan makapampili na dugan panagligliwaan.

3. Iwasan so makapuy ya panagligliwaan

Akin et pilien tayon maong iray panagligliwaan tayo? I-play so VIDEO, insan ebatan iraya.

VIDEO: Anton Panagligliwaan so Nepeg Kon Pilien? (4:39)

• Antoy pamparehoan na saray pagalaw nensaman ed arum ya games natan?

• Diad video, antoy atalosan nen Danny tungkol ed panagligliwaan?

Basaen so Roma 12:9, insan ebatan iya:

• Panon ya makatulong iyan teksto pian makapampili kay dugan panagligliwaan?

Antoy arum ed saray kabusol nen Jehova? Basaen so Proverbio 6:16, 17 tan Galacia 5:19-21. Kayarin basaen so kada teksto, ebatan iya:

• Dinan ed saraya so uso natan ed saray panagligliwaan?

No panon kan makapampili na dugan panagligliwaan

Tepetay sarilim:

• Anto? Kasin walay laok ton kabusol nen Jehova?

• Kapigan? Kasin naala to lay oras ya para komon ed mas importantin kimey?

• Siopa? Kasin lapud satan et lanang kon nakaiba tan naka-close iray totoon agda inaro si Jehova?

Talagan safe no arawian tayo iray peligro. Kanian arawian tayo so anggan anton panagligliwaan ya alanganin tayo

4. Magmaliw ya wais ed pangusar na oras

VIDEO: Antoy Manguupot na Oras Mo? (2:45)

• Diad video, anggano aliwa met ya makapuy so babantayan na brother, antoy nagmaliw ya problema?

Basaen so Filipos 1:10, insan ebatan iya:

• Panon ya makatulong iyan teksto pian amta tayon kontrolen so karakel na oras parad panagligliwaan?

5. Pilim iray maong ya panagligliwaan

Anggano wala ray panagligliwaan ya aglabay nen Jehova, dakel nin siansia iray na-enjoy tayo ya labay to. Basaen so Eclesiastes 8:15 tan Filipos 4:8, insan ebatan iya:

• Anto ray aliwan makapuy ya panagligliwaan ya nai-enjoy mo?

SUMARYO

Labay nen Jehova ya pilien tayoy dugan panagligliwaan tan enjoyen itan.

Rebyu

• Anto ran panagligliwaan so iwasan na saray Kristiano?

• Akin et manalwar tayo ed karakel na oras ya uusaren tayo parad panagligliwaan?

• Akin et pilien mo ray panagligliwaan ya makapaliket ed si Jehova?

DISKOBRIEN

Amtaen no siopay mandesisyon ya manpili na panagligliwaan.

“Kasin Ibabawal na Saray Tasi nen Jehova Iray Arum ya Pelikula, Libro, o Kansion?” (Artikulo ed website)

Amtaen no panon kan makapampili na dugan panagligliwaan tan panagrelaks.

“Kasin Makagunggona so Pipilien Mon Panagligliwaan?” (Say Panag-bantayan, Oktubre 15, 2011)

Diad istorya ya say title to et “Adaeg Ko ni Ingen so Diskriminasyon,” nengnengen no akin ya sinalatan na sakey ya laki iray libangan to.

“Uumanen na Biblia so Bilay” (Say Panag-bantayan-E, Pebrero 1, 2010)

Amtaen no panon ya akagaway dugan desisyon so sakey ya ina ya agmanbantay na palabas ya walay laok ton espiritismo.

Paliisan Iray Panagligliwaan ya Walay Laok Ton Espiritismo (2:02)