“Mangaro Itayo . . . Diad Gawa tan Katuaan”

1. Anto so sankaabigan ya klase na panangaro, tan akin ya nibagan ontan? (Nengnengen so litratod gapo na artikulo.)

SAY panangaro ya base ed duga iran prinsipyo (a·gaʹpe) et regalo nen Jehova, say Lapuan na aro. (1 Juan 4:7) Saya so sankaabigan ya klase na panangaro. Kaiba ed satan so panamabli tan maapit ya liknaan, balet manunan napatnagan itan ed saray agmakasarilin ikikiwas parad pankaabigan na arum. Base ed sakey ya reperensya, say a·gaʹpe so mamapakiwas ed sikatayo ya manggawa na maabig. No ipanengneng tayo so agmakasarilin aro odino ipanengneng itan ed sikatayo na arum, magmaliw ya maliket tan makabaliksan so bilay tayo.

2, 3. Panon ya impanengneng nen Jehova so agmakasarilin panangaro to ed totoo?

² Impanengneng nen Jehova so panangaro ed totoo antis to nin pinalsa si Adan tan Eva. Ginawa to so dalin pian magmaliw ya permanentin ayaman na totoo, ya ditan et aglabat ira manbilay noagta na-enjoy da met ya maong so bilay. Ginawa itan nen Jehova parad pankaabigan tayo, aliwan parad sarili to. Impanengneng to met so agmakasarilin panangaro to ed totoo nen inikdan to ra na ilalon manbilay ya anggapoy anggaan diad Paraison dalin ya imparaan to.

³ Kayari na impanrebelde nen Adan tan Eva, intarya nen Jehova so sankabalegan ya prueba na agmakasarilin panangaro to. Nanggaway paraan pian nadondon iray magmaliw ya ananak na sayan duaran rebelde, lapud amta to ya say arum ed sikara et napakiwas ya mangaro met ed Sikato. (Gen. 3:15; 1 Juan 4:10) Diad tua, manlapu nen insipan nen Jehova so onsabin Manangiliktar, impasen To ya nibayar la so dondon. Insan kayari 4,000 taon, nansakripisyo na baleg si Jehova nen imbagat to so bogbogtong ya Anak to parad totoo. (Juan 3:16) Talagan misalsalamat tayo ed agmakasarilin panangaro nen Jehova!

4. Antoy prueba ya sarag na agperpekton totoo ya ipanengneng so agmakasarilin panangaro?

⁴ Sarag tayon ipanengneng so agmakasarilin panangaro lapud pinalsa itayo na Dios unong ed indengan to. Anggano aliwan mainomay parad sikatayo ya ipanengneng so aro lapud atawir tayon kasalanan, nagawaan tayo nin siansia itan. Impanengneng nen Abel so panangaro ed Dios nen mabulbulos ton inyapay so sankaabigan ya walad sikato. (Gen. 4:3, 4) Impatnag nen Noe so agmakasarilin panangaro ed kapara ton too nen impulong toy mensahe na Dios ed dakel a taon anggano anggapoy dinmengel. (2 Ped. 2:5) Inyuna nen Abraham so panangaro to ed Dios nen say sarili ton liknaan nen niganggan ya iyapay toy anak ton si Isaac. (Sant. 2:21) Singa sarayan matoor ya lalaki, labay tayon ipanengneng so aro anggano aliwan mainomay itan.

TUA TAN ALIWAN TUA YA PANANGARO

5. Diad anto ran paraan ya nipanengneng tayoy tuan panangaro?

⁵ Ibabaga na Biblia ya say tuan panangaro et nipanengneng “aliwan diad salita odino diad dila, noagta diad gawa tan katuaan.” (1 Juan 3:18) Kasin say labay ton ibaga et agtayo nipatnag so panangaro panamegley na salita? Andi! (1 Tes. 4:18) Imbes, nepeg ya aliwan angangga labat ed salita so panangaro tayo, lalo la no kaukolan tayoy onkiwas. Singa bilang, no say sakey ya agi et mankaukolan na naakan o kawes, agtayo labat ibaga ed sikato ya nawalaan komon na saratan. (Sant. 2:15, 16) Ontan met, no inaro tayo si Jehova tan say kapara tayon too, agtayo labat ipikasi ed Dios ya “mangibaki na saray mankimey ed aanien” noagta mankuli tayo met ya mibiang ed panagpulong.​—Mat. 9:38.

6, 7. (a) Anto so “panangaro ya anggapoy pansimpisimpitan”? (b) Antoy pigaran alimbawa na aliwan tuan panangaro?

⁶ Insulat nen apostol Juan ya mangaro itayo “diad gawa tan katuaan.” Kanian nepeg ya say panangaro tayo et “andiay pansimpisimpitan” odino “anggapoy pansimpisimpitan.” (Roma 12:9; 2 Cor. 6:6) Labay ton ibaga et agtayo nipanengneng so tuan panangaro no mankunkunwari tayo labat, a singa tayo akamaskara. Nayarin isipen tayo, ‘Wala kasi tay panangaro ya mansimpisimpitan?’ Anggapo. Aliwa itan ya panangaro noagta peke tan anggapoy kakanaan.

⁷ Imanoen so pigaran alimbawa na aliwan tuan panangaro. Diad hardin na Eden, nankunkunwari si Satanas ya nononoten toy pankaabigan nen Eva, balet apatnagan ed inkiwas to ya sikatoy makasarili tan mansimpisimpitan. (Gen. 3:4, 5) Nen panaon nen David, impanengneng nen Ahitofel ya sikatoy aliwan tuan kaaro na ari. Nantraidor nen alikas to ya walay napinabangan to. (2 Sam. 15:31) Ontan met natan, saray apostata tan arum ni ya mamapawalay inkaapag-apag ed kongregasyon et manguusar na “malamuyot a panagsalita tan panaglarog” pian ompaway ya maaro ira, balet diad tua et makasarili ira.​—Roma 16:17, 18.

8. Antoy nepeg tayon itepet ed sarili tayo?

⁸ Say aron mansimpisimpitan et makapabaing ta kunkunwari labat itan ya panangipanengneng na masakripisyon aro. Nayarin napalikdo so too ed ontan ya pansimpisimpitan, balet si Jehova et andi. Diad tua, imbaga nen Jesus ya saray mansimpisimpitan et nadusa na “ambelabelat.” (Mat. 24:51) Siempre, agbalot labay na saray lingkor nen Jehova ya ipatnag so mansimpisimpitan ya panangaro. Balet, nayarin itepet tayod sarili tayo, ‘Kasin lanang ya tua so panangarok, ya ag-alaokan na inkamakasarili o panagpalikdo?’ Amtaen tayoy siameran paraan ya nipanengneng tayoy aro ya “anggapoy pansimpisimpitan.”

NO PANON SO “MANGARO . . . DIAD GAWA TAN KATUAAN”

9. Panon itayon papakiwasen na tuan panangaro?

⁹ Maliket ya manlingkor anggano anggapoy makakanengneng. Nepeg ya mabulos tayon manggawa na saray bengatlan pakapatnagan na panangaro ed agagi tayo ya “anggapoy makaamta” anggad posible. (Basaen so Mateo 6:1-4.) Ag-itan agawaan nen Ananias tan Safira. Labay dan naamtaan na arum so impandonasyon da, kanian nantila ra, ya imbaga dan inter dan amin so nanlakoan da, tan adusa ira lapud pansimpisimpitan da. (Gawa 5:1-10) Balet no tua so panangaro tayo, napakiwas itayon maliket ya manlingkor ed saray agagi, ya agtayo la itan ipapaamta ed arum. Singa bilang, saray agagi ya ontutulong ed Mananguley ya Ulop diad pangipaparaan na espiritual a naakan et agda itan ipapaamta ed arum, tan agda labay ya sikaray nadayew odino naamtaan na arum iray kinimeyan da.

10. Panon tayon nidaulo so pangipanengneng na galang ed arum?

¹⁰ Idaulo so pangipanengneng na galang ed arum. (Basaen so Roma 12:10.) Angitilak si Jesus na pangaligan no panon tayon nigalang so arum diad impanggawa to na sankaabebaan a kimey. (Juan 13:3-5, 12-15) Nayarin kaukolan tayoy mansagpot ya maong pian nipanengneng tayoy kapaabebaan tan nigalang tayoy arum ed ontan ya paraan. Anggan saray apostol et agda sigpot ya atalosan so ginawa nen Jesus anggad sanen akaawat ira na masanton espiritu. (Juan 13:7) Napagalangan tayo met so arum no agtayo iisipen ya mas maong itayo nen sikara lapud edukasyon, kaykayarian, odino pribilehyo tayo ed panaglingkor ed si Jehova. (Roma 12:3) Tan imbes ya nainggit ed saray makakaawat na panangirayew, miliket tayo ed sikara anggano pakalikna tayo et kanepegan tayo met so napagalangan o nirayew lapud kaiba itayon nansagpot ed sakey a kimey.

11. Akin a nepeg ya nanlapud puso so komendasyon tayo?

¹¹ Masimoon ya komendaan iray agagi. Nepeg ya mananap tayoy pankanawnawan komendaan so sakey tan sakey, ta “makapabiskeg” itan. (Efe. 4:29) Balet nepeg ya nanlapu itan ed puso. Ta no andi, singa tayo labat ira lalarogan odino papaliisan tayoy responsabilidad ya mangiter na nakaukolan ya simbawa. (Pro. 29:5) No komendaan tayoy sakey balet balbalawen tayo no akabeneg la, pansimpisimpitan itan. Pinaliisan itan nen apostol Pablo tan sikatoy maabig ya alimbawa no panon ya ipanengneng so tuan panangaro diad paraan na impangomenda to ed arum. Singa bilang, masimoon ton kinomendaan iray Kristiano ed Corinto ed saray maong ya kagagawa ra. (1 Cor. 11:2) Balet nen walay ginawa ra ya agnepeg ya komendaan, malinew ton imbaga ed sikara so rason diad maaron paraan.​—1 Cor. 11:20-22.

12. Panon tayon nipanengneng so tuan panangaro diad panagparawes tayo?

¹² Magmaliw ya maparawes. Igaganggan itayo nen Jehova ya magmaliw itayon maiter ed saray agagi tayo. (Basaen so 1 Juan 3:17.) Balet nepeg ya dugay motibo tayo ed panggawa ed satan, tan ag-alaokan na inkamakasarili. Tepetan tayoy sarili tayo: ‘Kasin say paparawesen ko labat et saray maapit ya kakaarok, saray kabkabat ed kongregasyon, odino saray makapangiter na pabor ed siak? Odino kasin manaanap ak na paraan pian nipanengneng koy inkamabunlok ed saray agagi ya agko masyadon kabat odino agmakabales ed siak?’ (Luc. 14:12-14) Odino panon to no say sakey ya agi et mankaukolan na tulong lapud makapuy ya impandesisyon to? Odino agbalot akisalamat so agi ya pinarawes tayo? Diad ontan iran situasyon, nepeg tayon iyaplika iyan simbawa: “Magmaliw kayon maparawes ed sakey tan sakey ya anggapoy reklamo.” (1 Ped. 4:9) No unoren mo itan, naliknam so liket diad panangiter ya dugay motibo.​—Gawa 20:35.

13. (a) Kapigan a nayarin aliwan mainomay so itulong ed saray makapuy? (b) Anto ray praktikal ya nitulong tayo ed saray makapuy?

¹³ Tulongan iramay makapuy. Nasubok no kasin tua so panangaro tayo panamegley na ganggan na Biblia ya “tulongan yo iramay makapuy, anosan yo so amin.” (1 Tes. 5:14) Anggaman dakel so agagi ya datin makapuy so pananisia ra insan binmiskeg, say arum balet et kaukolan day tuloytuloy ya tulong tan anos tayo. Nayarin kaiba ed saya so panginabang na saray makapabiskeg ya teksto ed Biblia, pangitagar ed sikara diad ministeryo, odino anggan say idengel ed sikara. Ontan met, imbes ya basta labat isipen ya say sakey ya agi et “mabiskeg” odino “makapuy,” nepeg tayon bidbiren ya wala ray kaksilan tan kakapuyan tayon amin. Anggan si apostol Pablo et binidbir to ya wala ray kakapuyan to. (2 Cor. 12:9, 10) Kanian nagunggonaan itayon amin ed tulong na saray agagi tayo.

14. Antoy mabulos tayon gawaen pian makapikareenan tayo ed saray agagi?

¹⁴ Mikareenan. Gagawaen tayo so amin a nayarian tayo ya mikareenan ed saray agagi, anggano say pakalikna tayo et aliway impakatalos o impantrato dad sikatayo. (Basaen so Roma 12:17, 18.) No asakitan tayoy liknaan na arum, makatulong so ikerew na dispensa, balet nepeg ya nanlapu itan ed puso. Singa bilang, imbes ya ibagan, “Sorry ta ontan so aliknam,” mas maong no aminen mon alingo ka met tan ibagam ya, “Sorry ta asakitan ta ka ed imbagak.” Lalon importante so kareenan diad sanasawa. Agnepeg ya mankunkunwari so sanasawa ya maong so aroan da no walay arum ya makakanengneng, balet ag-ira mantotongtong, aliwliway panagsalita ra, odino kakabilen day asawa ra no anggapoy arum ya makakanengneng.

15. Panon tayon nipanengneng ya tua so panamerdona tayo?

¹⁵ Mabulos ya mamerdona. No asakitan itayo na arum, perdonaen tayo tan lingwanan lay sakit na linawa tayo. No ‘itepel tayoy balang sakey lapud aro, tan gawaen tayoy anggaay nayarian tayon pansiansiaen so pankakasakey tayo,’ mabulos tayon naperdona iramay agda amta ya asakitan da itayo. (Efe. 4:2, 3) Pian nipanengneng ya tua so panamerdona tayo, nepeg tayon kontrolen so panagnonot tayo tan “agmanbibilang na impakasakitan.” (1 Cor. 13:4, 5) No manem-em tayoy sakit na linawa, aliwan say relasyon tayo labat ed saray agagi so nayarin naderal noagta pati say relasyon tayo ed si Jehova. (Mat. 6:14, 15) Nipanengneng tayo met ya impapuso tayon peperdonaen iray nankasalanan ed sikatayo no ipikasi tayo ra.​—Luc. 6:27, 28.

16. Antoy nepeg ya pangipasen tayo ed saray pribilehyo ed panaglingkor ed si Jehova?

¹⁶ Isakripisyo so sarilin pankaabigan. No makaawat tayo na saray pribilehyo ed panaglingkor ed si Jehova, ipasen tayon pankanawnawa iratan pian nipanengneng ya tua so panangaro tayo, ya “anapen [tayo] so pankaabigan na arum a too, aliwan say dilin pankaabigan [tayo].” (1 Cor. 10:24) Singa bilang, diad saray asemblea tan kombension, saray attendant et makakauna lan onloob ed pasilidad nen say arum. Imbes ya isipen dan pankanawnawa itan pian makapili ra na balibalin yurongan da tan say pamilya ra, pipilien na dakel ed sarayan brother iray aliwan masyadon marakep ya yurongan diad pasen ya akaasain ed sikara. Diad ontan ya pansasakripisyo da, ipapanengneng day aro ya ag-alaokan na inkamakasarili. Panon mon naalig so maabig ya alimbawa ra?

17. Panon ya pakiwasen na tuan panangaro so sakey ya akagawa na seryoson kasalanan?

¹⁷ Ipatua tan taynan iray inyamot ya kasalanan. Saray arum ya Kristianon akagawa na seryoson kasalanan et sasalien dan sakbongan itan pian ag-ira nabaingan odino agda nadismaya so arum. (Pro. 28:13) Balet aliwan maaro so ontan ya kagagawa, ta makaderal itan ed nankasalanan tan ed arum. Napugeran so iyagus na espiritu na Dios tan nayarin naandi so kareenan ed interon kongregasyon. (Efe. 4:30) Pakiwasen na tuan panangaro iray Kristianon akagawa na seryoson kasalanan ya mitongtong ed saray elder pian natulongan da ra.​—Sant. 5:14, 15.

18. Panon kaimportante so tuan panangaro?

¹⁸ Say aro so sankaimportantian ed amin ya kualidad. (1 Cor. 13:13) Satan so pakabidbiran ya papatumbok itayo nen Jesus tan aaligen tayo si Jehova, say Lapuan na aro. (Efe. 5:1, 2) ‘No anggapoy arok, anggapoy kakanaan ko,’ so insulat nen Pablo. (1 Cor. 13:2) Komon ta itultuloy tayon ipanengneng so aro aliwa labat ya “diad salita” noagta pati “diad gawa tan katuaan.”