9. Akin et inkompara nen Pablo iray alanaan a Kristiano ed saray kabiangan na laman?

⁹ Basaen so Roma 12:4, 5, 9, 10. Inkompara nen Pablo iray alanaan a Kristiano ed saray kabiangan na laman, a mankakasakey a manlilingkor diad panangiwanwan na Ulo ra, si Kristo. (Col. 1:18) Pinanonotan to ray alanaan a Kristiano a say sakey a laman et walaan na dakel a kabiangan tan nandurumay usar na saratan. Ontan met ed sikara, ‘anggaman dakel ira, saksakey ira a laman ed Kristo.’ Onia met so impaseseg nen Pablo ed saray alanaan a Kristiano ed Efeso: “Diad panamegley na aro, . . . ombaleg itayo komon ed amin a bengatla a mitunosan ed samay ulo, si Kristo. Lapud sikato, say amin a kabiangan na laman, a mauk-uksoy ya atuop tan ginawan mantutulongan pian iter da no antoy nakaukolan, unong ed suston usar na kada sakey, so mankikimey parad ibaleg na laman pian ombiskeg iya ed aro.”​—Efe. 4:15, 16, NW.

11. Antoy akabasian na pankakasakey tayo, tan anto ni arum a simbawa nen Pablo?

¹¹ Satan a pankakasakey et base ed aro, say “ayadyarin bedber na pankakasakey.” (Col. 3:14) Indanet iya nen Pablo diad Roma kapitulo 12, ya inkuan ton say aro tayo et nepeg ya ‘ag-atekepan na pankunkunwari’ tan diad “aroan na sanaagi” et nepeg a “matamoy komon so aroan na sakey tan sakey.” Saya et manresulta ed panangipanengneng na respeto ed balang sakey. Oniay imbaga na apostol: “Dia ed galang manpapalabian [odino, mangidaulo] kayo.” Siempre, sayan aro et aliwan lapu labat ed emosyon odino pagmaliw a konsintidor. Nepeg a gawaen tayoy anggaay nayarian tayon pansiansiaen a malinis so kongregasyon. Sanen animbawa si Pablo nipaakar ed aro, oniay inyarum to: “Busol yo so mauges, ompeket kayo ed maong.”