‘Motektek Yo Imay Nansungdo’

1-3. (a) Panon kagrabe so impakagonigon nen Jesus diad hardin na Getsemani, tan antoy sengegan? (b) Antoy nibaga tayo ed napanuliranan a panagsungdo nen Jesus, tan antoray tepet ya onlelesa?

PINASYAN tensyon so nalilikna nen Jesus. Natan to labat naeksperiensya so ontan a pakakagonigon ed nonot tan emosyon. Diad saman et unor la ran oras na bilay to diad dalin. Sikato tan saray apostol to so linma ed sakey a kabisado ran pasen, say hardin na Getsemani. Mabetbet iran manbabana ditan. Balet, diad saman a labi, kaukolan toy pigaran bekta a manbukbukor. Legan dan wala’d hardin, sikatoy inmarawi na daiset ed saray apostol to, tan tinmalimukor pian manpikasi. Ontan lay inkasimoon na pikakasi to tan inkapirmi na pakakagonigon to kanian say linget to et nagmaliw a “singa angkakabaleg a tedter na dala a sinmaklayat angga ed dalin.”​—Lucas 22:39-44.

² Akin a pinasyay pakagogonigon nen Jesus? Tua, amta to a magano to lan sagmaken so graben panirap ed pisikal, balet aliwan satan so pakagogonigonan to. Wala ni ray mas importantin pamaakaran a nononoten to. Pampapagaan ton maong so reputasyon na Ama to tan amta ton akadepende so arapen na katooan ed pansiansia ton matoor. Amta nen Jesus no panon kaimportante so pansungdo to. No sikatoy onsaew, sikatoy mangiter na baleg a kabalawan ed ngaran nen Jehova. Balet ta ag-onsasaew si Jesus, sikatoy tinmalona ingen. Diad tua, diad saginonor na saman ya agew, sanen ngalngali la nauyos so bilay to, onia so maksil ya inyakis na sayan too ya angiletneg na sankaabigan ya ehemplo na panagsungdo ed dalin: “Asumpal la!”​—Juan 19:30.

³ Say Biblia so mamapaseseg ed sikatayo a “motekteken [imay] nansungdo,” salanti, si Jesus. (Hebreos 12:3) Kanian, walaray importantin tepetepet ya onlelesa: Antoray pigaran subsubok a sinungdoan nen Jesus? Antoy akatulong ed sikato a makapansungdo? Panon tayon natumbok so ehemplo to? Balet, antis tayon ebatan irayan tepet, usisaen tayo no anto so kabaliksan na panagsungdo.

Anto so Panagsungdo?

4, 5. (a) Anto so kabaliksan na “panagsungdo”? (b) Panon tayon niyilustra a say panagsungdo et mas ni so lalanoren to nen say basta pakaeksperiensya na agnapaliisan ya irap?

⁴ Panapanaon, amin tayo so ‘nagogonigon na nambabangil a katuksoan [odino subsubok].’ (1 Pedro 1:6) Sano nasusubok itayo, kasin kabaliksan na satan a mansusungdo itayo la? Andi. Say Griegon noun parad “panagsungdo” et kabaliksan toy “pakasarag ya itepel odino agsukoan so kairapan.” Oniay impangipaliwawa na sakey ya iskolar nipaakar ed klase na panagsungdo a sinalambit na saray managsulat na Biblia: “Satan so awawey a makapan-anos ed saray bengatla, ya aglabat basta onabuloy [la’d saray nagagawa], noagta walaay mabilabilay ya ilalo . . . Satan so kalidad a mamapasiansia ed sakey a too ya akatalindeg legan ton susubaen so dagem. Sakey itan a maabig a walnan pagmaliwen ton gloria so sankairapan a subok lapud say nanenengneng na satan et say kalat aliwan say kaplesan ya ot-ot.”

⁵ Kanian, say pansungdo et aliwa labat a basta pakasagmak na agnapaliisan ya irap. No talosan unong ed Biblia, say panagsungdo et lalanoren toy inkamapekder, pamasiansia ed dugan disposisyon na nonot tan agnaaandian na ilalo anggaman ondadalan ed saray subsubok. Nonoten pa iyan ilustrasyon: Walay duaran laki ya inkulong ed parehon prisoan balet ta nandumaay sengegan na inkipriso ra. Samay sakey et kriminal a maunganget tan anggapoy nagawaan to noag say sumpalen so sentensia to. Tan samay sakey et tuan Kristiano ya impriso lapud inkamatoor to. Sikatoy mansiasiansian mapekder tan walaay positibon awawey lapud momoriaen to so kipapasen to a pankanawnawan nipatnag so pananisia to. Samay kriminal so agbalot nayarin ipasen ya ehemplo na panagsungdo, bangta samay matoor a Kristiano so napanuliranan ed sayan ekselentin kalidad.​—Santiago 1:2-4.

6. Panon tayon nabayuboan so panagsungdo?

⁶ Say panagsungdo et importante pian nisalba itayo. (Mateo 24:13) Balet, sayan makanan kalidad et agnisipor ed sikatayo. Kanian nepeg tayon bayuboan itan. Panon? “Say kairapan, mangiter na anos,” kuan na Roma 5:3. On, no talagan labay tayon napaaligwas so panag-anos odino panagsungdo tayo, agtayo nayarin payakotan a paliisan so amin a subsubok ed pananisia. Imbes et nepeg tayon arapen iratan. Magmaliw itayon maanos sano inagew-agew tayon aarapen tan tatalonaan iray subsubok, angkelag man odino angkabaleg. Kada subok a nalampasan tayo et mamabiskeg ed sikatayo a mangarap ed ontumbok. Siempre, aliwan sikatayon dili so mamapabiskeg ed panagsungdo tayo. Maniilalo itayo ed ‘pakayari ya iiter na Dios.’ (1 Pedro 4:11) Pian natulongan itayo a makapansiansian agnagiing, inikdan itayo nen Jehova na sankaabigan a tulong​—say ehemplo na Anak to. Usisaen tayo pan maong so naspot a rekord na panagsungdo nen Jesus.

No Antoray Sinungdoan nen Jesus

7, 8. Antoray sinungdoan nen Jesus sanen manampot lay bilay to diad dalin?

⁷ Legan a manasingger lay panampot na bilay nen Jesus diad dalin, sinungdoan to so nantutumbokan a pirmin panamairap ed sikato. Nilikud ni’d pinasyan pakakagonigon na nonot ed unor lan labi to, nonoten pa so impakabaingan to tan say inkadismayan nayarin alikna to. Sikatoy intapat na sakey a maapit a kaulop to, imbatikan na sankaapitan a kakaaro to, tan ilegal a binista, a legan na satan et saray membro na sankatagyan a korte na relihyon na satan a nasyon so amalaw, nanlutda, tan amoponiti ed sikato. Anggaman ontan, marendeen ton sinungdoan iratan ya amin, tekep na dignidad tan biskeg.​—Mateo 26:46-49, 56, 59-68.

⁸ Diad unor la ran oras nen Jesus, sinungdoan to so pinasyan ot-ot ed laman. Pirmi impanisiplat da ed sikato, a nideskriben satan so nanresulta ed “araralem a ginmugulis a sugat tan pandaldala” to. Sikatoy impasak, tan satan so nanresulta ed “impatey [ton] kankaninot balet ta sankagrabian ed ot-ot tan irap.” Sanen ipapasak da la ed palitek, nonoten pa so irap to legan ya ompapanek iray angkakabaleg a pasak ed limalima tan salisali to. (Juan 19:1, 16-18) Isipen pa met so panasosot to ed sakit sanen ipapaalagey la so palitek, sanen say belat na laman to et miguguyuran la ed saray pasak tan say asugatsugat a beneg to et ginmargar ed palitek. Sinungdoan to iyan graben ot-ot ed laman, a kabansag na satan et nagogonigon ni so nonot to, unong a deneskribe ed gapo na sayan kapitulo.

9. Anto so nalalanor ed panakbat ed “panamairapan a kiew” tayo tan say panumbok ed si Jesus?

⁹ Bilang papatumbok nen Kristo, antoray kaukolan tayon sungdoan? Inkuan nen Jesus: “No say siopaman a too et labay toy ontumbok ed siak . . . alaen toy [“panamairapan a kiew,” NW] to, tan tumboken to ak.” (Mateo 16:24) Say balikas a “panamairapan a kiew” so piguratibon inusar dia pian irepresenta so panirap, pakabaingan, odino ipapatey ni ingen. Say panumbok ed si Kristo et aliwan mainomay. Duma itayo lapud saray Kristianon estandarte tayo. Kagula itayo na mundo lapud ag-itayo kabiangan na satan. (Juan 15:18-20; 1 Pedro 4:4) Anggaman ontan, mabulos tayon sasakbaten so panamairapan a kiew tayo​—on, akaparaan itayon manirap, odino ompatey ni ingen, imbes ya ontundan manumbok ed Pinagkauliran tayo.​—2 Timoteo 3:12.

10-12. (a) Akin ya anubok ed inkasungdo nen Jesus iray ag-inkayadyari na saramay walad kaliberliber to? (b) Antoray pigaran makapasubok a kipapasen a sinungdoan nen Jesus?

¹⁰ Say sananey nin akasubokan nen Jesus legan na ministeryo to et say ag-inkayadyari na saray akapaliber ed sikato. Tandaan tayo a sikato so “uloen a komikimey” ya inusar nen Jehova a mamalsa ed sayan dalin tan ed amin a mabilay dia. (Uliran 8:22-31) Kanian amta nen Jesus no anto so gagala nen Jehova parad katooan; sikaray denisinyo pian mangipatnag ed saray kalidad nen Jehova tan panliketan so bilay tekep na ayadyarin bunigas. (Genesis 1:26-28) Sanen wadiad dalin si Jesus, naimatonan to, diad duman anggulo, so makapaermen iran resulta na kasalanan. Lapud sikatoy nagmaliw a too, naeksperiensya ton mismo so liknaan tan emosyon na too. Seguradon sikatoy asaksakitan sanen personal ton naimatonan ya arawrawi lay too ed samay datin inkaperpekto di Adan tan Eva! Sirin et asubok so inkasungdo nen Jesus. Kasin sikatoy adismaya tan sinmuko, ya impasen ton anggapo lay ilalo na makasalanan a totoo? Nengnengen tayo.

¹¹ Ontan lay impakagonigon nen Jesus ed agpangisengan-sengan na saray Judio a sikatoy inmakis ed imaton na arum. Kasin inabuloyan ton mamaletey ed seseg to odino mamatunda ed panagpulong to so kaandian da na interes? Andi, imbes et sikatoy “nambangat ya inagew-agew dia ed templo.” (Lucas 19:41-44, 47) Sikatoy ‘naer-ermenan’ ed inkaawet na kapusoan na saramay Fariseo a manatalaran no paabigen to imay sakey a laki legan na Sabaton. Kasin inabuloyan ton sikatoy napagyaw na saraman a mantunongtunongan a sumusumpa? Siempre andi! Sikatoy mapekder tan pinaabig to so laki​—diman ni ingen a mismo ed pegley na sinagoga!​—Marcos 3:1-5.

¹² Wala ni sananey a bengatla a maseguron anubok met ed si Jesus​—say kakapuyan na sankaapitan iran babangatan to. Unong a naaralan tayo ed Kapitulo 3, sikaray nairapan a mangiwaklit ed pilalek dan magmaliw a prominente. (Mateo 20:20-24; Lucas 9:46) Aminpiga iran sinimbawa nen Jesus a kaukolan day magmaliw a mapaabeba. (Mateo 18:1-6; 20:25-28) Balet, matantan iran mangiyaplika. Anggan diad samay unor lan labi a kaiba to ira et ‘nansisiblangan’ ni ira no siopa so sankatalonggaringan ed sikara! (Lucas 22:24) Kasin sinmuko lay Jesus ed sikara, ya inkatunongan ton anggapo lay ilalo ran manguman? Andi. Noagta sikatoy lawas a maan-anos, tan nansiansian positibo, tan mailalo, ya intultuloy ton inimano iray kaabigan da. Amta to a diad puso ra et inaro ra si Jehova tan talagan labay dan gawaen so linawa To.​—Lucas 22:25-27.

13. Antoray nayarin pakasubokan tayo a mipara ed saramay sinungdoan nen Jesus?

¹³ Nayarin nasagmak tayo met iray subok a mipara ed saramay sinungdoan nen Jesus. Alimbawa, nayarin walaray naabet tayon totoo ya ag-interesado odino sumpa ni ingen ed mensahe na Panarian. Kasin abuloyan tayo iratan a negatibon reaksion a manismaya ed sikatayo, odino itultuloy tayoy maseseg a pampulong? (Tito 2:14) Nayarin pakasubokan tayo met iray ag-inkayadyari na saray Kristianon agagi tayo. Nayarin pakasakitay liknaan tayo so bengatbengat a panagsalita odino kakikiwas da. (Uliran 12:18) Kasin onsuko itayo la lapud saray kakulangan na saray kapananisiaan tayo, odino itultuloy tayon itepel iray lingo ra tan anapen so kaabigan da?​—Colosas 3:13.

No Akin ya Akapansungdo si Jesus

14. Anton duaran aspekto so akatulong ed si Jesus a mansiansian mapekder?

¹⁴ Antoy akatulong ed si Jesus a mansiansian mapekder tan matoor diad amin na sinagmak to iran insulto, pakadismayaan, tan kairapan? Walay duaran importantin aspekto ya akatulong ed sikato. Unona, sikatoy nanilalo ed tulong na Ama to, ya akikasi ed “Dios a mangipapagamor na panagsungdo.” (Roma 15:5, NW) Komadua, ninmengneng si Jesus ed arapen, ya insentro toy nonot to ed no antoy pansumpalan na pansungdo to. Sansakeyen tayo pa irayan aspekto.

15, 16. (a) Anto so mangipapanengneng ya agsinmaral si Jesus ed dili ton biskeg pian makapansungdo? (b) Panon kabaleg so panagmatalek nen Jesus ed Ama to, tan akin?

¹⁵ Anggaman si Jesus so perpekton Anak na Dios, agto sinmaral ed dili ton biskeg pian makapansungdo. Imbes, sikatoy pinmapeg ed Ama ton walad tawen tan kinmerew na tulong diad pikakasi. Onia so insulat nen apostol Pablo: “[Si Kristo so] angibagat na pikakasi tan pikekerew, a tekep na mabiskeg a tagleey tan saray lua, ed saman so makapanyarin mangilaban ed sikato ed ipapatey.” (Hebreo 5:7) Diad orihinal a lenguahen Griego, samay terminon impatalos dia a “pikakasi” et espisipikon ontutukoy ed impapuso tan masimoon ya iyey-ey​—on, mikakasin patutulongan. Ipapabitar met na saman a termino a si Jesus et aglabat aminpinsan ya akikasi ed si Jehova diad hardin na Getsemani, noagta sikatoy aminpigapiga tan masimsimoon a nampikasi.​—Mateo 26:36-44.

¹⁶ Sigpot a manmamatalek si Jesus ya ebatan nen Jehova iray pikakasi to, lapud amta ton say Ama to so ‘Dumerengel na pikakasi.’ (Salmo 65:2) Antis ton nagmaliw a too, naimatonan na panguloan ya Anak no panon ya eebatan na Ama to iray pikakasi na matoor iran managdayew. Alimbawa, sanen walad katawenan so Anak, atasian to so impangibaki nen Jehova na anghel a mangebat ed impapuson pikakasi nen propetan Daniel, antis ni ingen ya asumpal a nampikasi. (Daniel 9:20, 21) Kanian, agkasi ebatan na Ama so bogbogtong ya Anak sanen imbesngaw to so walad puso to “tekep na mabiskeg a tagleey tan saray lua”? Talagan inebatan nen Jehova iray kerew na Anak to tan Sikatoy angibaki na anghel a mamabiskeg ed sikaton itepel so irap.​—Lucas 22:43.

17. Pian makapansungdo itayo, akin a nepeg tayoy manilalo ed tulong na Dios, tan panon tayon nagawaan itan?

¹⁷ Pian makapansungdo itayo, nepeg tayo met so manilalo ed tulong na Dios a ‘mamapabiskeg.’ (Filipos 4:13) No say perpekton Anak na Dios ni lanlamang et liknaen ton kaukolan toy patulongan ed si Jehova, agmas nagkalalo ed sikatayo! Singa si Jesus, nayarin kaukolan tayoy maminpigan mikasi ed si Jehova. (Mateo 7:7) Anggaman agtayo maniilalon bisitaen itayo na sakey ya anghel, segurado itayo ed saya: Ebatan na maaron Dios tayo iray ey-ey na matoor a Kristianon ‘mansiasiansia ed saray pikakasi tan pikekerew ed labi tan agew.’ (1 Timoteo 5:5) Antokaman iran subok so sasagmaken tayo​—balanglan maletey a bunigas, impatey na sakey ya inad-aro, odino panamasegsegang na saray onsusumpa—​ebatan nen Jehova so masimoon ya ikekerew tayo na karunongan, pakpel, tan biskeg pian makapansungdo itayo.​—2 Corinto 4:7-11; Santiago 1:5.

18. Panon a ninmengneng si Jesus ed arapen imbes a diad say paniirap to?

¹⁸ Say komaduan aspekto ya akatulong ed si Jesus a makapansungdo et sikatoy ninmengneng ed no antoy akatarya ed arapen, aliwan say kaplesan a paniirap to. Nipaakar ed si Jesus, oniay inkuan na Biblia: “Sikato lapud gayaga a niyan ed arap to sinungdoan to” so panamairapan a kiew. (Hebreo 12:2) Iyiilustra na ehemplo nen Jesus no panon a mankokonektaan so ilalo, liket, tan panagsungdo. Saya so nayarin sumaryoen ed onia: Say ilalo so mangitarok na liket, tan say liket so mangitarok na panagsungdo. (Roma 15:13; Colosas 1:11) Manatalaran ed si Jesus so agaylay dakep iran iilaloan. Amta to a no sikatoy manmatoor et niyalangon to so inkasoberano na Ama to tan nadondon to so katooan ed kasalanan tan patey. Wala met so ilalo nen Jesus a manguley bilang Ari tan manlingkor bilang Atagey a Saserdote, a lalon pakabendisyonan na matutulok a totoo. (Mateo 20:28; Hebreos 7:23-26) Diad impangisentro nen Jesus ed imano to ed saray tatalaranan tan iilaloan ton nagawa ed arapen, alikna to so agnaparaan a liket, tan satan a liket so tinmulong ed sikaton makapansungdo.

19. Sano nasusubok so pananisia tayo, panon itayon natulongan na ilalo, liket, tan panagsungdo?

¹⁹ Singa si Jesus, kaukolan a walaan itayo met na ilalo, liket, tan panagsungdo. “Manliket ed ilalo,” kuan nen apostol Pablo. Insan to inyarum: “Masungdo ed kairapan.” (Roma 12:12) Kasin diad kaplesan et pirmin nasusubok so pananisia yo? Onnengneng kayo sirin ed arapen. Aglilingwanan a say panagsungdo yo so kirayewan na ngaran nen Jehova. Pansiansiaen a malinew ed nonot so alay abig ya ilalo a Panarian. Ilitrato yo’d nonot yo so onsasabin balon mundo na Dios, tan isip yon nagagamoran yo la iray bendisyon na Paraiso. Say pantalaran ed pakasumpal na alay abig iran bengatla ya insipan nen Jehova​—a pati say kiyalangon na inkasoberano to, say kaandi na karelmengan ed dalin, sakit, tan patey—​so mamaliket a maong ed sikayo, tan satan a liket so ontulong ed sikayon nasungdoan so antokaman ya onsabin subsubok ed sikayo. Sano ikompara ed pakasumpal na iilaloan tayon Panarian, antokaman a paniirap ed sayan sistema na bengabengatla et talagan ‘maganggano tan anlemew’ labat.​—2 Corinto 4:17.

‘Tumbok Yo so Bakat To’

20, 21. No nipaakar ed panagsungdo, anto so iilaloan nen Jehova ed sikatayo, tan antoy nepeg a determinasyon tayo?

²⁰ Amta nen Jesus a walay irap-irap na pagmaliw a patumbok to. Satan so mankaukolan na panagsungdo. (Juan 15:20) Sikatoy akaparaan a mangidaulo ed ontan a kurang, lapud amta ton napabiskeg na ehemplo to so arum. (Juan 16:33) Tua, say inletneg nen Jesus ya ehemplo na panagsungdo et ayadyari, balet aliwa itayon ayadyari. Anto tay iilaloan nen Jehova ed sikatayo? Oniay impaliwawa nen Pedro: “Si Kristo nairapan met lapu ed sikayo, dia ed impangitilak to na panuliranan, pian [“maapit a,” NW] tumboken yo so baka’to.” (1 Pedro 2:21) Diad impangarap to ed subsubok, si Jesus so angitilak na “panuliranan.”a Nayarin ikompara so impansungdo to ed ‘saray bakat.’ Agtayo eksakton natumbok iratan a bakat, balet ta sarag tayon “maapit” a tumboken iratan.

²¹ Determinado tayo sirin a tumboken so ehemplo nen Jesus ed anggaay nayarian tayo. Agtayo lilingwanan a no tumboken tayon maapit iray bakat nen Jesus, lalo itayon akaparaan a mansungdo “angga ed kasampotan” na balanglan sayan daan a sistema na bengabengatla odino sayan bilay tayo. Agtayo amta no dinan so makauna, balet say amta tayo et saya: Magnayon itayon tumangan nen Jehova lapud panagsungdo tayo.​—Mateo 24:13.