“Singger Kayo ed Dios, et Sikato so Onsingger Naani ed Sikayo”
Antis tan Kayari—Saray Prinsipyo na Biblia so Akapanguman ed Sikato
BILANG kalangweran, si Adrian so pirmin maisasanok tan maimbel na linawa. Say inkamapetang na ulo to so manreresulta ed maramsak ya isasanok. Sikato so mainum, masigarilyo, tan imoral so kabibilay to. Kabkabat si Adrian bilang sakey a punk tan walaan na tattoo a mangipapatnag ed panisia ton agnakaukolan so gobierno. Oniay impaneskribe to ed saraman a taon: “Pupuklisan koy buek ko a singa kaslakan ya itsura na sakey punk, a papabegasen ko itan, tan no maminsan et kokoloran koy ambalanga odino arum nin kolor.” Si Adrian so nampatebeng met ed eleng to.
Inmalis si Adrian ed sakey a nadederal lan abung a kaiba so arum nin rebelyoson kalangweran. Ditan et sikaray maniinuman tan man-uusar na druga. “Nantumar ak na speed tan angiturok ak met na Valium tan antokaman ni a nademet ko,” so nanonotan nen Adrian. “Sanen anggapo iray druga odino glue, sinupsop ko so gasolina na luluganan na totoo ya anggad naelew ak.” Mabetbet a nalalanor si Adrian ed krimen ed karsada tan nagmaliw a makapataktakot tan maramramsak. Sikatoy agpibabalian na maslak a totoo. Anggaman ontan, asagyat to iray mauges a totoo a milimog ed sikato.
Kalkalna et amoria nen Adrian a mililimog labat ed sikato iray “kakaaro” to parad dilin pakagunggonaan da. Niarum ni, inkuan to ya “anggapon balot so agawaan na pagmaliw a maisasanok tan marawal.” Lapud liknaen ton andian la na kana tan dismayado la, tinaynan to iray kalimog to. Sanen akaromog na kopya na Say Panag-Bantayan diad sakey a pasen a pampapaalageyan, sikatoy asagyat ed mensahe na satan a nibase ed Biblia, tan bilang resulta et sikatoy impaiyaralan na Biblia ed saray Tasi nen Jehova. Si Adrian so magunaet a kinmiwas ed panamaseseg a: “Singger kayo ed Dios, et sikato so onsingger naani ed sikayo.” (Santiago 4:8) Kanian ag-abayag et amoria nen Adrian a nakaukolan to lan gapoan ya iyaplika iray prinsipyon naromog ed Masanton Kasulatan.
Say onaaligwas a pikakabat nen Adrian ed Biblia so walaan na maabig ya epekto ed konsiensia to tan inuman to so kurang na bilay to. Sikatoy atulongan a manalona ed inkamapetang na ulo to tan abayuboan to so panagdangka. Lapud pakapanyari na Salitay Dios, nauman a tuloy so personalidad nen Adrian.—Hebreos 4:12.
Balet, panon a say Biblia so nawalaan na ontan a mabiskeg ya epekto? Ontulong ed sikatayo so pikakabat ed Kasulatan pian ‘nikawes so too a balo.’ (Efeso 4:24) On, nauman so personalidad tayo diad pangiyaplika ed suston pikakabat a naromog ed Biblia. Balet panon a say ontan a pikakabat so mamasimbalo ed totoo?
Unona, say Biblia so mangipapabidbir ed saray makapuy ya ugali a nakaukolan ya iwaklit. (Uliran 6:16-19) Komadua, papasesegen itayo na Kasulatan ya ipatnag tayo iray makaparoyroyon kalidad a papawalaen na masanton espiritu na Dios. Kabiangan ed saraya so ‘aro, liket, deen, kasungdoan, kauyamoan, kaabigan, sisia, tayadno, dangka.’—Galacia 5:22, 23.
Say aralem ya impakatalos ed saray kakaukolanen na Dios so tinmulong ed si Adrian a nausisa so inkasikato tan nanengneng iray ugali a nakaukolan ton bayuboan tan saraman so nepeg ton iwaklit. (Santiago 1:22-25) Balet satan so gapoan lambengat. Nilikud ed pikakabat, nakaukolan so motibasyon—sakey a bengatlan mamakiwas ed si Adrian pian panggunaetan toy manguman.
Naaralan nen Adrian a say makaparoyroyon balon personalidad so namoldi a ‘mipara ed talintao na Amalsa ed satan.’ (Colosas 3:10) Amoria to a say Kristianon personalidad so nepeg a miulibay ed mismon personalidad na Dios. (Efeso 5:1) Diad impanaral nen Adrian ed Biblia, akabatan to so nipaakar ed pidedeneng nen Jehova ed katooan tan naimano to iray maabig a kalidad na Dios, a singa say aro, kaabigan, kamaongan, panangasi, tan inkatunong to. Say ontan a pikakabat so amakiwas ed si Adrian pian aroen to so Dios tan manggunaet a magmaliw a sakey a toon aabobonan nen Jehova.—Mateo 22:37.
Diad kaunoran tan diad tulong na masanton espiritu na Dios, napopokpokan la nen Adrian so inkapaweg to. Sikaran sanasawa so okupado natan ya ontutulong ed arum ya umanen so kabibilay da diad tulong na pikakabat ed Biblia. “Aliwan singa dakel ed datin kakaarok ya inaatey la natan, siak so mabilay ni tan manggagayaga ed maliket a bilay na pamilya,” so inkuan nen Adrian. Sikato so mabilay a paneknek ed pakayari na Biblia a mamasimbalo ed kabibilay.
[Blurb ed pahina 25]
“Anggapon balot so agawaan na pagmaliw a maisasanok tan marawal”
[Kahon ed Pahina 25]
Makatulong Iran Prinsipyo na Biblia
Niraya so pigaran prinsipyo na Biblia ya akatulong ed dakel a totoon maisasanok tan marawal a magmaliw a mareen:
“Manayam kayo ed kareenan ed ganaganay totoo. Aleg a sikayo a dili so ombales, inararo, noag ingen ikdan na pasen so sanok.” (Roma 12:18, 19) Abuloyan a say Dios so manetermina no kapigan tan no siopa so manepeg a pangibalesan. Nagawaan to itan lapud sigpot a pikakabat to ed katuaan, tan antokaman a panangibales a manlalapud sikato so mangipatnag ed nagnap ya inkahustisya to.
“Onsanok kayo, ingen ta agkayo mankakasalanan: agkomon onselek so agew a sipapasnok kayo ni: Tan agyo palongkitan so Diablo.” (Efeso 4:26, 27) Nayarin makatunongan ya onsanok so sakey a too a panapanaon. No nagawa iya, nepeg a sikatoy agmansiansia a “sipapasnok.” Akin? Lapud saya so managyat ed sikaton manggawa na bengatlan mauges, a diad ontan et ‘papalongkitan [to] so Diablo,’ a manreresulta ed agpanangabobon nen Jehova a Dios.
“Tundaan mo so petang na ulo, tan ikaindan mo so sanok: agmo gonigonen so inkasika ed antokaman a mananangguyor ed panggawa na mauges.” (Salmo 37:8) Say agnapokpokan a liknaan so mansumpal ed agnabanlongan iran kiwas. No abuloyan na sakey a too a sikatoy onsanok, nayarin sikatoy makapangibalikas odino makapanggawa na saray bengatlan makapasakit ed siopaman a nalalanor.