Tepetepet Manlapud Saray Managbasa
Anto so bautismo a parad saray inaatey?
Sanen mansusulat nipaakar ed mangatatawen a kioli, insulat nen apostol Pablo so makapainteres a tuloy a teksto. Diad King James Version et oniay nabasa tayo: “No aliwan ontan, anto so gawaen na saramay manpabautismo a parad saray inaatey, no saray inaatey so agbalot onoli? akin sirin a manpabautismo ira a parad saray inaatey?” Tan oniay impangipatalos na The New Jerusalem Bible ed sayan teksto: “Parad anto a saray totoo et manpabautismo ira nisesengeg ed saray inaatey? No saray inaatey et agbalot onoli, anto ni so kana na nabautismoan nisesengeg ed sikara?”—1 Corinto 15:29.
Kasin isusuheri dia nen Pablo a saray mabilay a totoo so nabautismoan nisesengeg ed saramay inatey la ya agni abautismoan? Singano ompatnag a makatunongan itan unong ed saratan a patalos na Biblia tan arum nira. Balet, wala ni sananey a konklusyon sano usisaen tayon maong so Kasulatan tan say orihinal a Griegon inusar nen Pablo. Say labay ya ibaga nen Pablo et nabautismoan, odino nipalseb, iray alanaan a Kristiano ed sakey a kurso na bilay a mangitonton ed ipapatey lapud katooran a singa ed samay impatey nen Kristo. Kayari na satan, sikaray napaoli ed espiritun bilay a singa ed sikato.
Susuportaan na Kasulatan iyan eksplinasyon. Oniay inkuan nen Pablo diad sulat to ed saray taga-Roma: “Agyo amta ya amin tayo ya abinyagan ed Jesu-Kristo, ibinyagan itayo ed patey to?” (Roma 6:3) Diad sulat to ed saray taga-Filipos, tinukoy nen Pablo so inkasikato, a kuanto: ‘Mikakasakey ed saray impanirap [nen Kristo], a midamay ed kaulibay na impatey to, pian dia ed panamegley na dinanman nagamoran ko komon so kioli ed saray inaatey.’ (Filipos 3:10, 11) Ipapabitar nen Pablo a say bilay na sakey ya alanaan a patumbok nen Kristo so mangilalanor ed panamemben na katooran diad silong na subok, inagew-agew a kidunget ed ipapatey, tan diad kaunoran et ipapatey lapud katooran, insan napaoli ed mangatatawen a bilay.
Makatantanda a saraya tan arum niran teksto a direktan anaglawi ed ipapatey a pati saramay abautismoan so manutukoy ed saray mabilay ya indibidual ya abautismoan la tan aliwan saramay inaatey la. Oniay inkuan met nen Pablo ed saray kapara ton alanaan a Kristiano: “Apitabon kayo ed sikato ed binyag, a dia ed saya met akapibilay kayo ed sikato ed kakanaan na pananisia dia ed gagawaen na Dios, a sikato so amabangon ed sikato ed saray inaatey.”—Colosas 2:12.
Say Griegon preposition a hy·perʹ, ya impatalos a “parad” odino “nisesengeg ed” diad nanduruman bersion na Biblia diad 1 Corinto 15:29, so nayarin mankabaliksan met a “diad gagalan.” Mitunosan ed arum nin teksto ed Biblia, say New World Translation of the Holy Scriptures sirin so suston angipatalos ed sayan bersikulo 1Co 15:29: “Anto so gawaen na saraman so nababautismoan diad gagalan magmaliw ya inaatey? No saray inaatey so talagan ag-onoli, akin a nababautismoan met ira diad gagalan magmaliw ya ontan?”