Say Imbilay Lamet nen Jesus​—Talaga Kasin Agawa Itan?

WALAY inistorya nen Herodotus, sakey a Griegon historian ya nambilay manga 2,500 taon lay apalabas, nipaakar ed saray Ehipsio diad panaon to. Oniay inkuan to: “Diad saray engranden panangan na mayaman iran totoo, kayari na pangdem, ililiberliber na sakey a too so gawad kiew ya imahen na bangkay a walad lungon, pinintaan tan inukit a singa tua iyan imahen, say karukey to et manga kapaldua anggad sakey metro. Ipapanengneng to itan ed amin a wadman, insan to ibagan ‘Oninum tan manliket kayo, balet nengneng yo iya; ta no ompatey kayo, oniay pagmaliwan yo.’”

Parad saray Ehipsio, aliwa lan balo iyan pananisia ed patey tan bilay. Diad panaon tayo, say lanang lan narerengel et “Mangan, oninum, tan manliket tayo.” No say bilay et mangangga ed patey, e di man-enjoy ka la legan a mabilay ka ni. Akin et manpairap ka nin manggaway maong? No mangangga lanlamang so amin ed ipatey, di gawam lay labalabay mo. Ontan met so imbaga nen Pablo nen tinukoy to iramay totoon agmanisiad kioli. Inkuan ton: “No agpaolien iray inaatey, ‘mangan tan oninum tayo sirin, ta nabuas et ompatey tayo.’”—1 Corinto 15:32.

Siempre, mismon si Pablo et agmanisian say patey et anggaan la na amin. Sikatoy kombinsidon ombilay lamet iray inaatey tan nayarin agla ran balot ompatey. Satan a pananisia to et base ed sakey ya importantin inkagawa, ya unong ed si Pablo et agbalot nakuestion—say inkiolia nen Kristo-Jesus. Diad katuaan to, say inkioli nen Jesus so amabiskeg a maong ed pananisia na saray inmunan disipulo.

Balet anto so kabaliksan na kioli nen Jesus parad sikatayo? Panon tayon naseguro ya talagan agawa itan? Nengnengen tayo no panon ya impaliwawa nen Pablo so nipaakar ed satan diad saray Kristiano ed Corinto.

PANON TO NO AG-APAOLI SO KRISTO?

Wala ray Kristiano ed Corinto nensaman ya agda amtay panisiaan da, tan wala ray talagan agmanisiad kioli. Diad inmunan sulat na apostol ed saray Kristiano diman, insulat to ray nagawa no aliwan tua so kioli. Oniay inkuan to: “No anggapoy kioli na saray inaatey, agmet sirin inmoli si Kristo. Balet no agpinaoli si Kristo, say panagpulong tayo et seguradon andi-kakanaan, tan say pananisia tayo et andi-kakanaan. Sakey ni, magmaliw itayo met a palso iran tasi na Dios . . . Say pananisia yo et anggapoy kakanaan; agni aperdona iray kasalanan yo. . . . Saraman met sirin so inatey la a nikasakey ed si Kristo et aglan balot nabilay.”—1 Corinto 15:13-18.

“Sikatoy nampanengneng ed masulok a limanlasus ya agagi diad sakey a pankanawnawa . . . Kayari na satan et sikatoy nampanengneng ed si Santiago, insan diad amin ya apostol; balet kaunoran ed amin et sikatoy nampanengneng met ed siak.”—1 Corinto 15:6-8

Inggapo nen Pablo so sulat to ed sarayan agnakuestion a katuaan: No agnapaoli iray inaatey, si Kristo sirin, nen inatey et agmet apaoli. No bilang ta ag-apaoli so Kristo, antoy nagawa? Anggapoy kana na panagpulong na maong a balita, sakey labat itan a katilaan. Lalo la ta say inkioli na Kristo et importantin bangat a papanisiaan na saray Kristiano, tan mikonektaan iyad arum nin importantin bangat nipaakar ed soberanya na Dios, say ngaran to, Panarian to, tan say kilalaban tayo. No ag-agaway inkioli, say mensahen impulong nen Pablo tan arum nin apostol et katilaan tan anggapoy kakanaan.

Aliwan saratan labat so nagawa. No ag-apaoli so Kristo, say papanisiaan na saray Kristiano et anggapoy kakanaan, tan base labat ed katilaan. Ontan met, ompaway ya katilaan so imbaga nen Pablo tan arum ni ra, aliwa labat a nipaakar ed inkioli nen Jesus, noagta ontan met ed samay amaoli ed sikato, si Jehova a Dios. Kaaruman ni, say pangibagan si Jesus et “inatey parad saray kasalanan tayo” et magmaliw met a tila—lapud ta no agniliktar si Jesus ed patey, agto met niliktar so arum. (1 Corinto 15:3) Anggapo sirin so kakanaay impatey na saray Kristiano, a say arum et nagmaliw a martir ta aliwan tua so papanisiaan dan sikaray ombilay lamet.

Oniay konklusyon nen Pablo: “No say paniilalo tayo ed si Kristo et diad sayan bilay labat, sikatayo lay sankapakaskasian ed amin a totoo.” (1 Corinto 15:19) Singa saray arum a Kristiano, si Pablo et nansakripisyo, pinairap, nanmatoor anggad patey lapud manisia ed kioli tan ed amin a nagawaan na satan. Anggapoy kakanaan no say kioli et aliwan tua!

NO AKIN ET KAUKOLAN MOY MANISIA

Kombinsido si Pablo a tua so papanisiaan na saray Kristiano. Amta ton apaoli si Jesus manlapud saray inaatey tan imbaga to ray ebidensya parad saray taga Corinto, “say Kristo et inatey parad saray kasalanan tayo unong ed Kasulatan; tan sikatoy imponpon, tan diad komatlon agew et sikatoy pinaoli unong ed Kasulatan; tan sikatoy nampanengneng ed si Cefas, insan diad sikaran labindua.”b Inyarum to ni: “Kayari na satan et sikatoy nampanengneng ed masulok a limanlasus ya agagi diad sakey a pankanawnawa, a maslak ed sikara et mabilay ni anggad natan, balet say arum et inatey la. Kayari na satan et sikatoy nampanengneng ed si Santiago, insan diad amin ya apostol; balet kaunoran ed amin et sikatoy nampanengneng met ed siak.”—1 Corinto 15:3-8.

Matalek ya inggapo nen Pablo so mansalita diad impangibagan say Kristo et inatey parad kasalanan tayo, imponpon, tan pinaoli. Akin et segseguradod satan? Say sakey ya rason et lapud testimonya na dakel ya akanengneng. Say apaolin si Jesus et nampanengneng ed saray totoo (kaiba lay Pablo), diad melag iran grupo, tan anggan diad grupon manbilang na 500, a dakel ed sikara et agmanisia nen arengelan dan apaoli Jesus! (Lucas 24:1-11) Maslak ed saray akanengneng et mabilay ni diad panaon nen Pablo tan nayari mantepet ed sikara no kasin talagan agawa iratan. (1 Corinto 15:6) Mainomay ya ibagan aliwan tua so testimonya na sakey odino duara labat ya akatasi, balet mairap itan a gawaen no 500 o masulok ni so akanengneng.

Imanoen met ya amiduan imbaga nen Pablo a say impatey, impangiponpon, tan inkioli nen Jesus et “unong ed Kasulatan.” Pinaneknekan na sarayan agawa a say sipan ed Hebreon Kasulatan nipaakar ed say Mesias et asumpal, kanian pruebaan na saya a si Jesus imay insipan ya Mesias.

Anggano wala ray akatasi tan wala ray ebidensya ed Kasulatan, wala ni ran siansiay agmanisian apaoli si Jesus. Ibabaga na arum ya tinakew na saray disipulo to so bangkay nen Jesus, insan da imbagan anengneng dan apaoli. Balet ta anggapoy pakayari na saray disipulo odino impluensya ra pian natalo iray Romanon guardia ya manbabantay ed puerta na angiponponan ed si Jesus. Ibabaga na arum a say inkioli to et ilusyon labat. Balet ta dakdakel so nampanengnengan nen Jesus a totoo tan diad nanduruman panaon. Sakey ni, sarag kasin gawaen na sakey ya ilusyon labat so mankalot na sira, a singa ginawa na apaolin Jesus ed Galilea? (Juan 21:9-14) Kasin nadiwit so sakey ya ilusyon?—Lucas 24:36-39.

Balet siansia nin ibabaga na arum a say inkioli nen Jesus et inimbento labat na saray disipulo. Anto met so naala dad panggawad satan ey? Binalawbalaw, nanirap, tan inatey ni ingen iray disipulo to lapud impantasi rad inkioli to. Akin et labay day mansakripisyo parad sakey ya katilaan? Niarum ni, say unonan nantasian da et diad Jerusalem, diad arap a mismo na saramay onkokontrad sikara tan manaanap na pangakusaan dad sikara.

Say inkioli nen Jesus so angiter na pakpel ed saray disipulo to pian mantasi nipaakar ed sikato anggan diad sankagrabian ya panamairap. Satan a katuaan et nagmaliw ya importantin kabiangan na Kristianon pananisia. Ag-inrisga na saray inmunan Kristiano so bilay da pian labat mantasi parad sakey ya marunong ya managbangat ya pinatey. Imbes, anggan nipeligroy bilay da, imbaga day nipaakar ed inkioli nen Jesus lapud prueba itan a sikato so Kristo, say Anak na Dios, a makapanyari tan mabilay a persona a tinmulong tan angigiyad sikara. Say inkioli to et paneknek a napaoli met ira. Talagan no ag-apaoli Jesus, anggapoy Kristianismo, tan ompan agtayo anggan arengel so nipaakar ed sikato.

Balet, antoy kabaliksan na inkioli nen Jesus parad sikatayo natan?