Manbilay a Parad Natan Odino Parad Magnayon ya Arapen?
“Dia ed ilalo nilaban itayo.”—ROMA 8:24.
1. Anto so imbangat na saray Epicureano, tan panon ya angapekta itan a nengneng na pilosopia ed pigaran Kristiano?
ONIAY insulat nen apostol Pablo ed saray Kristianon manaayam ed Corinto: “Panon kasi pangikuan na arum ed sikayo ya anggapo so kioli ed bilay na saray inatey?” (1 Corinto 15:12) Mabitar, say makapatey a pilosopia na makabat a Griegon Epicurus so akaloob la ed limog na inmunan-siglon Kristianos. Kanian impaimano nen Pablo so bangat nen Epicurus a: “Mangan itayo tan oninum itayo, sirin ta nabuas ompatey itayo.” (1 Corinto 15:32) Memelagmelagen so dinanman ya ilalon bilay kayari patey, sinisia na papatumbok na pilosopo a say maka-laman a panliliket so say mogmo odino manunan gungguna ed panagbilay. (Gawa 17:18, 32) Say Epicureanon pilosopia so makasarili, agnapanmatalkan, tan diad kaunoran et mabanday.
2. (a) Akin ya ontanlan mapeligro so pangiburi ed kioli? (b) Panon a pinabiskeg nen Pablo so pananisia na saray taga-Corinton Kristiano?
2 Malaknab so lalanoren na sayan panangiburi ed kioli. Inkatunongan nen Pablo: “Et no anggapo so kioli ed bilay na saray inatey, anggan si Kristo agmet inmoli a binmilay. Tan no si Kristo et ag-inmolin binmilay, sirin say panagpulong mi andi-kabaliksan to, say pananisia yo met andi-kabaliksan to. . . . No dia ed sayan bilay wala so ilalo tayo ed Kristo lambengat sikatayo lay sankaugsan na palar ed ami too.” (1 Corinto 15:13-19) On, no anggapoy ilalon magnayon ya arapen, say Inkakristiano so “andi-kabaliksan.” Magmaliw itan ya andian na gagala. Agpankelawan, sirin, a lapud impluensia na sayan paganon kaisipan et say kongregasyon na Corinto et nagmaliw a sentro na saray problema. (1 Corinto 1:11; 5:1; 6:1; 11:20-22) Kanian, ginetma nen Pablo a pabiskegen so pananisia ra ed kioli. Diad impangusar na mabiskeg a panagkatunongan, saray impangaon ed Kasulatan, tan saray ilustrasyon, pinaneknekan to ya andiay duaruwa a say kikioli et aliwan gawagawa labat noagta inkapeteg a segseguradon nasumpal. Diad sayan letnegan, napaseseg toray kapananisiaan to: “Mansiansia kayo a malet, agkayo nagiing, lawas padaak yo so kime’yo ed Katawan, bangta amta yo a say kimey yo aliwa ya anggapo so kabaliksan to ed Katawan.”—1 Corinto 15:20-58.
“Manpuyat Kayo”
3, 4. (a) Unong ed si Pedro, anton mapeligron awawey so manekmel ed saray pigara legan na kaunoran iran agew? (b) Anto so nepeg tayon lawas a nodnonoten?
3 Natan et dakel so walaan na awawey a pesimistiko, manbibilay a para labat natan. (Efeso 2:2) Unong itan ed impasakbay la nen apostol Pedro. Sinaglawi to so kipaakaran na saray “managlurey a pati panaglurey . . . kuanen da: ‘Iner so kawalaan na sipan ed idateng to? Ta nanlapu la ed saman so agew ya inkaplag da’d ugip na atateng, ganagana a bengatla, ontutuloy a singa nen gapo na inkapalsa.’” (2 Pedro 3:3, 4) No onsuko iray tuan managdayew ed ontan a panmoria, ompan sikaray magmaliw a ‘manmenengmeneng odino ag-ombunga.’ (2 Pedro 1:8) Makapaliket, aliwan ontan so kipapasey dakel a totoo na Dios natan.
4 Agpa mauges so pagmaliw ya interesado ed onsasabin anggaan na kaplesan a marelmeng a sistema. Nonoten pay interes ya impanengneng a mismo na apostoles nen Jesus: “Katawan, ipawil mo so panarian ed Israel ed sayan panaon?” Oniay ebat nen Jesus: “Agnipabtang ed sikayo so pikabat na saray panaon ono kinepeg, ya inggeter na Ama ed pakauley ton dili.” (Gawa 1:6, 7) Lugan na saratan a salita so manunan mensahen imparungtal to ed Palandey na Olibo: “Agyo amta no anton agew so isabi Katawan yo. . . . dia ed oras ya agyo isisipen onsabi’ Anak na too.” (Mateo 24:42, 44) Kaukolan tayon naynay a panonotan so inkasikatayo ed satan a konseho! Arum so nayarin natukso ed awawey ya, ‘Anganko ta ontunda ak nin magano tan agtanton manseryoso.’ Agaylan lingo itan! Isipen pay Santiago tan Juan, saray ‘Anak na Karol.’—Marcos 3:17.
5, 6. Antoran leksion so naala tayo manlapud saray alimbawa di Santiago tan Juan?
5 Amta tayon si Santiago et agaylay seseg ton apostol. (Lucas 9:51-55) Bektan niletneg lay Kristianon kongregasyon, sikatoy maseguron walaan na aktibon betang. Balet sanen malangwer ni Santiago et sikatoy pinapatey la nen Herodes Agrippa I. (Gawa 12:1-3) Kasin isipen tayo a si Santiago, lapud ag-ililaloan a panganggay bilay to et naermenan ta sikatoy ontanlan maseseg, ya insekar toy inkasikato ed panagministro to? Andin balot! Seguradon sikatoy maliket ta akausar na sankaabigan iran taon ed antiktikey ya impambilay to diad serbisyo ed si Jehova. Natan, anggapo ed sikatayo so makaamta no kasin say bilay tayo et manganggan ag-ililaloan. (Eclesiastes 9:11; ikompara so Lucas 12:20, 21.) Kanian mabitabitar a makabat a pansiansiaen ya ampetang so seseg tayo tan aktibon tuloy diad panagserbi ed si Jehova. Diad ontan et namantini tayo so maong a ngaran ed sikato tan mantultuloy a makapambilay a walaay ilalo’d magnayon ya arapen.—Eclesiastes 7:1.
6 Wala so mitukoyan a leksion a manasaglawi’d si apostol Juan, a wadman met sanen impaseseg a maong nen Jesus, “Manpuyat kayo.” (Mateo 25:13; Marcos 13:37; Lucas 21:34-36) Impapuso itan nen Juan, a nanlingkor tekep na entusiasmo ed loob na dakel a dekada. Diad tua, ompatnag ya andukey so pinambilay to nen amin iray apostol. Sanen masiken lay Juan, sarag ton nanonotan niray dekada ed matoor ya impankimey to, kasin minoria to iman a lingo, bilay ya aliway inkiwanwan odino ag-asimbang? Andin balot! Sigugunaet nin maniilalo ed arapen. Sanen inkuan nen apaolin Jesus, “On; peteg, onlaak dia’n magano,” Tampol ya inmebat si Juan, “Amen! Gala, Katawan a Jesus.” (Apocalipsis 22:20) Talagan agmanbibilay si Juan a parad kaplesan labat, a pampipirawatay matayam tan maligen a ‘normal a kabibilay.’ Sikatoy determinadon mantultuloy a manserbi tekep na intiron bilay tan biskeg to, kapiganman ya onsabi Katawan. Komusta itayo balet?
Saray Letnegan na Panisia ed Andi-Anggaan a Bilay
7. (a) Panon a say ilalo ed magnayon a bilay a ‘insipan ya akauna nen saray panaon na saray nilasus a taon’? (b) Panon nen Jesus ya insindag so liwawa nipaakar ed ilalon andi-anggaan a bilay?
7 Napaseguroan kayo a say ilalon andi-anggaan a bilay et aliwan kugkugip labat odino pantasia. Unong a kuan na Tito 1:2, say maridios a debosyon tayo et nibase’d “panangilalo ed bilay ya andi-angga, a say Dios, ya agto nayari manburi, insipan ton akauna nen saray panaon na saray nilasus a taon.” Dati lan gagala na Dios parad amin a matulok a totoo a manbilay ed ando lan ando. (Genesis 1:28) Anggapo, anggan say impanrebeldi di Adan tan Eva, so makapangamper ed sayan gagala. Singa nirekord la’d Genesis 3:15, insipan a tampol na Dios so “bini” a mangekal ed amin a sakit a mampapairap ed katooan. Sanen sinmabi so “bini” odino Mesias, si Jesus, ginawa ton manunan bangat to so ilalo ed magnayon a bilay. (Juan 3:16; 6:47, 51; 10:28; 17:3) Diad impangisaklang to’d bilay to bilang dondon, agamoran nen Kristo unong ed ley so kanepegan a pangipagamor na andi-anggaan a bilay ed katooan. (Mateo 20:28) Arum ed saray babangatan to, ami-amin et 144,000, so manbilay a maando ed katawenan. (Apocalipsis 14:1-4) Kanian arum a datin mortal a totoo so “kawesan na ag-ompatey [imortalidad, NW]”!—1 Corinto 15:53.
8. (a) Anto so “imortalidad,” tan akin ya impagamor nen Jehova itan ed saray 144,000? (b) Anton ilalo so inyopresi nen Jesus ed “arum a karnero”?
8 Say “imortalidad” et mas ni kabaliksan to nen say basta ag-ipatey. Sasaglawien toy “pakayari na sakey a bilay ya andi-anggaan.” (Hebreos 7:16; ikompara so Apocalipsis 20:6.) Anto, sirin so nasusumpal na Dios ed pangipapagamor na ontan a makatantandan regalo? Isipen pay angat nen Satanas ya anggapo ed saray palsa na Dios so napanmatalkan. (Job 1:9-11; 2:4, 5) Diad pangipagamor na imortalidad ed 144,000, ipapatnag na Dios so kompleton kompiyansa to ed sayan grupo ya ontanlan matalonggaring ya angebat ed angat nen Satanas. Balet komusta so arum ni ed katooan? Imbaga nen Jesus ed inmuna iran membro na sayan “melag a pulok” na mananawir na Panarian a sikaray ‘onyurong ed saray trono pian mangukom ed labindua a poli na Israel.’ (Lucas 12:32; 22:30) Ipapanengneng na saya a walaray makaawat na andi-anggaan a bilay ed dalin bilang uuleyan na Panarian to. Anggaman sarayan “arum a karnero” so agnapagamoray imortalidad, naawat da met so “andi-anggaan a bilay.” (Juan 10:16; Mateo 25:46) Say andi-anggaan a bilay sirin so ilalo na amin a Kristianos. Aliwan pantasia itan noagta bengatlan seryoson tuloy ya insipan na “Dios, ya agto nayari manburi,” tan binayaran diad mablin dala nen Jesus.—Tito 1:2.
Nasumpal ed Arawin Arapen?
9, 10. Antoran malinew a pakapatnagan ya asingger tayo la ed anggaan?
9 Impasakbay nen apostol Pablo a “saray panaon a maatap” so pakapatnagan a sinmabi tayo la ed agnasuppiat a ‘kaunoran iran agew.’ Legan a nakukusboy sosyedad na too ed kipapasen ya andiay aro, agum, dilin-panliketan, tan ag-inkamaridios, agta namomoria tayon say agew nen Jehova ed pangidapo toy panangukom ed sayan marelmeng a sistema so asingsingger la? Bangta onloloor so karawalan tan gulaan, agta nanenengneng tayo ed kaliberliber tayo so kasusumpalan na kaaruman niran salita nen Pablo: “Saray totoo a mauges tan saray managsaol onuges laran onuges”? (2 Timoteo 3:1-5, 13) Arum so sitatalek a mangikekelyaw na “Kareenan tan andi-paga,” balet amin a panilalo’d kareenan so naandipat, ta “biglan kaderal so onsabi ed sikara, a singa pasakit na biin malukon; tan ag-ira makaliktar.” Agtayo nitilak ed kabilungetan no nipaakar ed kabaliksan na panaon tayo. Kanian, “manpuyat itayo tan mandangka itayo.”—1 Tesalonica 5:1-6.
10 Niarum ni, ipapanengneng na Biblia a ‘daiset a panaon’ so kaunoran iran agew. (Apocalipsis 12:12; ikomparay 17:10.) Maslak a kabiangan na satan a ‘daiset’ so mabitabitar a linmabas la. Alimbawa, dugarugay panideskribe na propesiya nen Daniel ed gulaan na “ari na amianen” tan “ari na abalaten” a linmaknab anggan sayan siglo. (Daniel 11:5, 6) Say atilak labat a nasumpal ni et say pinal a pangataki na “ari na amianen,” ya adeskribe’d Daniel 11:44, 45.—Nengnengen so Say Panag-Bantayan na Hulyo 1, 1987, tan Nobyembre 1, 1993, parad diskusyon na sayan propesiya.
11. (a) Diad anton laknab a nasusumpal lay Mateo 24:14? (b) Anto so ipapanengneng na saray salita nen Jesus a nirekord ed Mateo 10:23?
11 Wadtan met so prediksion nen Jesus a “saya ya ebanghelyo na panarian nipulong naani ed sankamundoan ya onkanan pamintuaan ed saray amin a nasyones; et saman la onsabi anggaan.” (Mateo 24:14) Natan, susumpalen na Tastasi nen Jehova so kimey da ed 233 daldalin, grupo na islas, tan teritorya. Tua, wala niray agni asabin teritorya, tan anganko diad aturon panaon nen Jehova et sakey a puerta na pankanawnawa so nilukas ni. (1 Corinto 16:9) Siansia, seryoso iray salita nen Jesus a nirekord ed Mateo 10:23: “Agyo ni nakar ya amin iray syudades na Israel, angga ed isabi Anak na too.” Bangta say maong a balita so seguradon niyanunsio ed intiron dalin, agtayo bilang indibidual et nasabin amin so parti na dalin tekep na mensahey Panarian sakbay na “isabi” nen Jesus bilang say Manangipaakseb.
12. (a) Anton ‘pakatatakan’ so tutukoyen na Apocalipsis 7:3? (b) Antoy kabaliksan na idaraiset na bilang na saray alanaan ed dalin?
12 Konsideraen pay teksto ed Apocalipsis 7:1, 3, a sasalambiten toray “apatiran dagem” na kadederal a mamupuger ya “angga ed agmi natatakan so saray aripen na Dios tayo dia ed saray moling da.” Ag-iya manutukoy ed unonan pakatatakan, a nagawa sano naawat na saramay 144,000 so mangatatawen a tawag da. (Efeso 1:13) Tutukoyen to so pinal a pakatatakan, sano sikaray agla manguman ed pakabidbiran da bilang asali tan matoor ya ‘ariripen na Dios tayo.’ Say bilang na puron alanaan ya ilalak na Dios a natitilak ni ed dalin so ondaraiset. Sakey ni, malinlinew ya ibabaga na Biblia a “nisengeg ed saray pinili” a say unonan kabiangay baleg a kairapan et “napatikeyan.” (Mateo 24:21, 22) Maslak ed saramay mankuan a kabiangay alanaan so maedad la ra. Lamet, agta saya so mangipapatnag a say anggaan et paganigani la?
Matoor a Managbantay
13, 14. Anto so responsabilidad na managbantay a klase?
13 Ambegya, marakep no tumboken tayo so direksion ya initer na ‘matoor ya aripen.’ (Mateo 24:45) Diad loob la na masulok a sanlasus a taon, say modernon-agew ya “aripen” so sitotoor a manseserbi bilang “managbantay.” (Ezequiel 3:17-21) Oniay impaliwawa na Say Panag-Bantayan na Enero 1, 1984: “Iimatonan na sayan managbantay no panon so kagagawa na saray bengatla ed dalin diad kasumpalan na propesiya na Biblia, ya ipapaknol da so pasakbay ed onsasabin ‘baleg a kairapan ya agni agawa nanlapulad gapo na mundo’ tan ipapalapag da so ‘maong a balita na bengatlan magmaong.’”—Mateo 24:21; Isaias 52:7.
14 Tandaan: Trabaho na managbantay ya ikelyaw “so nanengneng to.” (Isaias 21:6-8) Diad panaoy Biblia say managbantay so mangipaknol na pasakbay anggan arawi nin maong so posiblin pakakasesgaan pian nalinewan. (2 Arari 9:17, 18) Saray lingon impakapasakbay so agawa met nensaman. Balet ta say maong a managbantay et agto ontundan salitaen itan lapud takot na pakabaingan. No say abung mo et napopoolan, antoy liknaan mo sano say bombero et ag-onsabi lapud isipen ton satan so lingon pasakbay? Andi, ilaloan tayo iratan a totoon onkiwas a tampol ed antokaman a pakapatnagan na desyang! Diad mipadparan paraan, say managbantay a klase so mansasalita sano kakaukolanen na saray sirkumstansia.
15, 16. (a) Akin ya agawa iray pananguman ed pakatalos tayo ed propesiya? (b) Anto so naaralan tayo manlapud matoor ya ariripen na Dios ya alingo ed pakatalos da ed pigaran propesiya?
15 Balet, legan ya onaaligwas iray nagagawa, say pakatalos tayo ed propesiya so onlilinew. Ipapanengneng na awaran a mataltalag, no bilang ta wala, iray madibinon propesiya a sigpot ya atalosan sakbay na kasumpalan da. Imbaga na Dios ed si Abram so eksakton kabayag na “panayam [na bini to] ed dalin ya agda kayarian,” salanti, 400 taon. (Genesis 15:13) Anggaman ontan, magangganat lan inyapay nen Moises so inkasikato bilang manangiliktar.—Gawa 7:23-30.
16 Isipen pa met iray Mesianikon propesiya. Diad panmolimoli et ompatnag ya absoluton malinlinew a say impatey tan inkioli na Mesias so nipasakbay la. (Isaias 53:8-10) Ingen, ag-atebek na mismon babangatan nen Jesus iyan katuaan. (Mateo 16:21-23) Agda amorian say Daniel 7:13, 14 et nasumpal legan na arapen a pa·rou·siʹa, odino “kiwawala” nen Kristo. (Mateo 24:3) Kanian ngalngali 2,000 taon so inkamintis na kalkulasyon da sanen tinepetan day Jesus: “Katawan, ipawil mo so panarian ed Israel ed sayan panaon?” (Gawa 1:6) Anggan kayarin niletneg a maong so Kristianon kongregasyon, saray lingon ideya tan palson iilaloan so nantultuloy a pinmaway. (2 Tesalonica 2:1, 2) Anggaman say arum et sagpaminsan a walaan na lingon panmoria, agniburin benindisionan nen Jehova so kimey na sarayan inmunan-siglon mananisia!
17. Anto so kaukolan a panmoria tayo ed saray pananguman ed pakatalos tayo ed Kasulatan?
17 Kaukolan met a palinewen na managbantay a klase natan iray panmoria to a panapanaon. Balet, wala ta so makapanduaruwa a bebendisionan nen Jehova so ‘matoor ya aripen’? Nilikud ni, moriaen unong ed konteksto, agta maslak ed saray panangiyarunsa ya agawa la et samsamet a tuloy? Say manunan pakatalos tayo ed Biblia so agmanguuman. Say kombiksion tayo a manbibilay itayo la ed kaunoran iran agew so lalon ombibiskeg nen say ed kapiganman!
Manbilay parad Magnayon ya Arapen
18. Akin a nepeg tayon paliisan so pambilay labat a parad natan?
18 Nayarin ibaga na mundo, ‘Mangan itayo tan oninum itayo, sirin ta nabuas ompatey itayo,’ balet agnepeg iyan magmaliw ya awawey tayo. Akin a pambanikelan ni kaapaan a panliliket a naalam manlapud bilay natan no makapankimey ka parad magnayon ya arapen? Satan ya ilalo, balanglan imortal a bilay ed tawen odino ed andi-anggaan a bilay ed dalin, so aliwan kugkugip, aliwan pantasia. Satan so inkapeteg ya insipan na Dios ya “agmanburi.” (Tito 1:2) Daakan so ebidensia a say kapetegan na ilalo tayo so asingsingger la! “Say panaon apatikeyan la.”—1 Corinto 7:29.
19, 20. (a) Panon so panmoria nen Jehova ed saray panagsakripisyo tayo nisesengeg ed Panarian? (b) Akin a nepeg tayo so manbilay tekep na panmoria ed inkamagnayon?
19 Tua, sayan sistema so nambayag la nen say inisip na dakel. Liknaen na pigara natan a no amta da labat ya onia nensaman et agda komon ginawa iray pigaran panagsakripisyo. Balet kaukolan ya agpagbabawian na sakey so ginawa to. Tutal, say panagsakripisyo so manunan kabiangan na pagmaliw a Kristiano. Saray Kristiano et ‘benegan day inkasikara.’ (Mateo 16:24) Agtayon balot liliknaen a saray sagpot tayon pamaliket ed Dios et anggapoy kakanaan to. Insipan nen Jesus: “Anggapoy too ya anaynan na abung, ono agagin lalaki, ono agagin bibii, ono ina, ono saray anak, ono daldalin, nisengeg ed siak, tan nisengeg ed ebanghelyo. Ingen awaten to so maminlasus natan ed sayan panaon, . . . tan dia ed mundo ya onsabi say bilay a maando.” (Marcos 10:29, 30) Sanlibon taon manlapulad natan, kaunongan kaimportanti so trabahom, abung, odino kaykayamanan mo? Siansia, saray impansakripisyom parad si Jehova so magmaliw a makabaliksan a minilyon a taon manlapulad natan—binilyon a taon manlapulad natan! “Ta say Dios aliwan agmatunong pian nalingwanan to so gawa yo.”—Hebreos 6:10.
20 Sirin manbilay tayo tekep na panmoria ed inkamagnayon, ya iyapasakey so pakanengneng tayo aliwan, “ed saray bengatlan nanengneng, noag ingen dia ed saray agnanengneng; ta saray nanengneng ag-ira maando, balet saray agnanengneng maando ra.” (2 Corinto 4:18) Oniay insulat nen propeta Habacuc: “Say pasingawey sikato ni nipaakar ed nigeter a panaon, tan mansiglat ya onarap ed anggaan, et agnaani mantila; anggan manabala, sikato so alagden [ilaloan, NW] mo; ta petepeteg ya onsabi, ya agmanbayag.” (Habacuc 2:3) Panon a say ‘panilalo’ ed anggaan et mangaapekta ed paraan na panusumpal tayo ed saray responsabilidad bilang indibidual tan bilang pamilya? Ipaimano na ontumbok ya artikulo irayan isyu.
Saray Punto Parad Repaso
◻ Panon a naaapektaan so pigara natan ed singano pakaaabala na anggaan na sayan sistema na bengabengatla?
◻ Anto so basiyan na ilalo tayo ed andi-anggaan a bilay?
◻ Panon tayon moriaen iray panagsakripisyo tayo parad intereses na Panarian?
[Litrato ed pahina 15]
Nepeg a nasumpal so sankagloboan a kimey sakbay ya onsabi anggaan