“Ag-ontatakot, Melag a Pulok”

“Ag-ontatakot, melag a pulok, lapud inabobonan na Ama ya iter ed sikayo so panarian.”​—LUCAS 12:32, NW.

1. Anto so basiyan na saray salita nen Jesus: “Ag-ontatakot, melag a pulok”?

MANTULTULOY ya “anapen yo so panarian [na Dios].” (Lucas 12:31) Sanen inkuan nen Jesus irayan salita ed saray babangatan to, imbalikas to so sakey a prinsipyon mangiwawanwan ed panag-isip na Kristianos nanlapulad agew to anggad sikatayo. Say Panarian na Dios so nepeg ya unaen ed bilay tayo. (Mateo 6:33) Anggaman ontan, diad salaysay nen Lucas, intuloy nen Jesus a sinalita so nipaakar ed makapasagyat tan makapabiskeg iran salita ed sakey a nikadkaduman grupo na Kristianos. Inkuanto: “Ag-ontatakot, melag a pulok, lapud inabobonan na Ama yo ya iter ed sikayo so panarian.” (Lucas 12:32, NW) Bilang Maabig a Pastol, kabat nen Jesus a diad arapen et walay panaon na gonigon a nasagmak na maapit a babangatan to. Balet anggapoy rason parad sikara ya ontakot no itultuloy dan anapen so Panariay Dios. Kanian, say simbawa nen Jesus so aliwan makapasakit a ganggan. Imbes, satan so maaron sipan a kinmanan inspirasyon pian manmatalek tan nawalaan na biskeg a linawa.

2. Sioparay manitibukel ed melag a pulok, tan akin a sikaray nagkalautlan apribilihyoan?

² Mitotongtong ed saman si Jesus ed saray babangatan to, tan tinawag tora a “melag a pulok.” Mitotongtong met ed saramay ‘ikdan [nen Jehova] na panarian.’ No ipareng ed karaklan a mangawat ed si Jesus ed saginonor a panaon, sayan grupo so talagan dagdaiset ed bilang. Sikaray impasen met a mabli lapud sikaray pinili parad makatantandan arapen, ya usaren ed maarin serbisyo. Say Ama ra, say Baleg a Pastol, si Jehova, so ontatawag ed melag a pulok pian awaten da so sakey a mangatatawen a tawir a misiglaotan ed Mesianikon Panarian nen Kristo.

Say Melag a Pulok

3. Anton maglorian pasingawey na melag a pulok so anengneng nen Juan?

³ No ontan, siopay manitibukel ed sayan melag a pulok a walaan na ontan a makapakelaw ya ilalo? Saray patumbok nen Jesu-Kristo ya akaawat na inkalanaan na masanton espiritu. (Gawa 2:1-4) Diad impakanengneng ed sikara bilang mangatatawen iran komakanta a walaan na saray arpa ed kalimaan da, insulat nen apostol Juan: “Tan ninmengneng ak, tan say Cordero manalalagey ed tapew na palandey na Sion, et niolop ira ed sikato so sanlasus apataplo tan apatalibo, ya wala a nisulat so ngaran to tan ngaran nen Ama to ed saray muling da. Saraya sikara so ag arutakan ed saray bibii; ta sikara so virgen. Saraya sikara so mantombok ed Cordero ed angan iner a laen to. Saraya asaliw ira dia ed saray totoo, a pinagka-unonan bungabunga ed Dios tan ed Cordero. Tan dia ed saray sangira angapo so aromog a tila; ta sikara angapo so tilol da.”​—Apocalipsis 14:1, 4, 5.

4. Anto so posisyon natan na melag a pulok ed dalin?

⁴ Nanlapulad Pentecostes 33 K.P., sarayan alanaan, atagibi-ed-espiritu so nanlingkor la bilang embahadores nen Kristo ed dalin. (2 Corinto 5:20) Natan, sakey a nakdaan lambengat na saraya so nakekeraan, a nankakasakey a manlilingkor bilang matoor tan makabat ya aripen a klase. (Mateo 24:45; Apocalipsis 12:17) Nagkalautla nen taon 1935, sikaray inulop na “arum a carnero,” Kristianon walaan na mangaraldalin ya ilalo, a manbilang la natan a minilyon. Saraya so ontutulong ed panangipulong na maong a balita ed amin a dalin.​—Juan 10:16.

5. Anto so awawey na saray nakekeraan ed melag a pulok, tan akin a sikaray nepeg ya ag-ontakot?

⁵ Anto so awawey na saray nakekeraan ni na sayan melag a pulok ed dalin? Diad pakaamtan makaawat ira na ‘Panarian ya agnayarin tenyegen,’ sikaray mangisasaklang na sagradon serbisyo tekep na maridios a takot tan giwgiw. (Hebreos 12:28) Sipapaabeba ran amoria a walaan iray kayarian a sakey ya agnapadesiran a pribilihyon mansumpal ed andi-getar a gayaga. Aromog da so “sakey a perlas a baleg so bili to” a tinukoy nen Jesus sanen sinaglawi to so nipaakar ed Panarian. (Mateo 13:46) Legan a manansingger lay baleg a kairapan, saray alanaan na Dios so akatalindeg ya andi-takot. Anggaman ed say pagani-gani lan nagawa ed mundo na katooan ed panaon na “baleg tan bantog ya agew [nen Jehova],” andian ira na agmabunigas a takot ed arapen. (Gawa 2:19-21) Akin lamet?

Ondaraiset so Bilang

6, 7. (a) Akin a daiset a tuloy so bilang na melag a pulok a siansian walad dalin? (b) Panon so nepeg a panmoria na balang too ed ilalon walad sikara?

⁶ Diad agano niran taon et say bilang na melag a pulok a siansian walad dalin so ondaraiset. Saya so napatnagan ed 1994 a report ed Memoryal. Diad ngalngali 75,000 a kongregasyon na totoo nen Jehova ed sankamundoan, 8,617 lambengat so angidemostra na panangiparungtal dan sikaray membro na saray nakdaan diad impibiang ed saray emblema. (Mateo 26:26-30) Midumaan, say dagup na inmatendi et 12,288,917. Kabat na saray alanaan a Kristiano a saya so nepeg ya ilaloan. Inletneg nen Jehova so sakey a limitadon bilang, 144,000, pian tibukelen so melag a pulok, tan tinipon to la iya nanlapulad Pentecostes 33 K.P. Makatunongan labat, a say katawag na melag a pulok so mangangga sano say bilang so asingger lan nakumpleto, tan say ebidensya et say inkalapagan a pananugyop na sarayan nikadkaduman abendisyonan so anampot nen 1935. Anggaman ontan, say arum a karnero ed panaon na anggaan so nipropesiyan ombulaslas pian magmaliw a “baleg ya olop, a sikato so ag nayari a bilangen na too a nanlapu ed balang nacion tan amin na saray kailalakan, tan binaleybaley, tan salita.” Nanlapulad 1935 et say inkalapagan a pananugyop nen Jehova so para met natan ed baleg ya ulop, a say ilalo ra et andi-anggaan a bilay ed paraison dalin.​—Apocalipsis 7:9; 14:15, 16; Salmo 37:29.

⁷ Maslak ed saramay kabiangay melag a pulok a wadia ni ed dalin natan et walaay edad a masulok a 70, 80, tan 90. Say arum et linmampas lara ed koma-100 a taon na bilay da. Amin na saraya, antokaman so edad da, so akaamta a diad panamegley na mangatatawen a kioli, sikaray diad kaunoran et mikasakey ed si Jesu-Kristo diad saginonor tan miuley ed maglorian Panarian to. Saramay kabiangan na baleg ya ulop so magmaliw a mangaraldalin ya uuleyan nen Kriston Ari. Komon ta balang sakey so mangayaga ed intatarya nen Jehova parad saraman so mangaaro ed sikato. Aliwan parad sikatayo so panpili no anton ilalo so nepeg a niwalad sikatayo. Si Jehova so mandeside ed satan. Say duaran grupo so parehon manliket ed ilalo ra parad sakey a maliket ya arapen, balanglan satan so mangatatawen a Panarian odino sakey a paraison dalin ed silong na Panarian.​—Juan 6:44, 65; Efeso 1:17, 18.

8. Panon lan kaasingger so anggaan na panagtatak ed 144,000, tan anto so nagawa sano nakumpleto la?

⁸ Say suston bilang a 144,000 na melag a pulok so “Israel na Dios,” a sinmalat ed Israel ed laman ed saray gagala na Dios. (Galacia 6:16) Kanian, say nakdaan so manitibukel ed nakekeraan na satan ya espiritual a nasyon a siansian wadiad dalin. Saratan a nakekeraan so tatatakan parad kaunoran a panangabobon nen Jehova. Diad sakey a pasingawey, anengneng nen apostol Juan iyan agawa, tan inkuanto: “Anengneng ko so sananey ya angel ya onsesegep ed letakan na banwa, ya wala ed sikato so tatak na Dios a mabilay; tan tinmawag ed baleg a voces ed saray apat-ira ya angel, a sikara so angitdan na pamasakit dia ed dalin tan dayat. A kuan to, Ag-yo pasakitan so dalin, angan say dayat, angan saray kiew, anga ed ag mi natatakan so saray aripen na Dios tayo dia ed saray moling da. Tan nadngel ko so bilang na saray tinatakan, sanlasus tan apataplo tan apat libo, tinatakan ed saray balang kapulian na saray anak na [espiritual ya] Israel.” (Apocalipsis 7:2-4) Lapud sayan kimey a panagtatak ed espiritual ya Israel so mapatnag ya asingger lan nasumpal, saray makapasagyat ya ebenton magano lan nagawa so nipapatnag. Manuna ed amin, ‘say baleg a kairapan,’ sano nibulos lay apatiran dagem na kadederal ed tapew na dalin, so maseguron asingsingger la.​—Apocalipsis 7:14.

9. Panon so panmomoria na melag a pulok ed ombabaleg a bilang na baleg ya ulop?

⁹ Saramay kabiangan na baleg ya ulop ya atipon la so walaay bilang a minilyon. Agaylan makapasagyat iya ed kapusoan na saray nakdaan! Anggaman mantutultuloy ya ondaraiset so bilang na saramay kabiangay melag a pulok a siansian walad dalin, akapangipasal tan akapangiparaan lara na kualipikadon lalakin nanlapud baleg ya ulop pian manakbat ed saray responsabilidad a mitukoyan ed onlalaknab a mangaraldalin ya organisasyon na Dios. (Isaias 61:5) Unong ya impanengneng nen Jesus, walaray niliktar ed baleg a kairapan.​—Mateo 24:22.

“Ag-ontatakot”

10. (a) Anton panangataki so iilaloan a gawaen ed totoo na Dios, tan anto so kipaarapan na saya? (b) Antoran tepet so nipapaarap ed balang sakey ed sikatayo?

¹⁰ Si Satanas tan saray demonyo to so nibasileng la ed kabangibang na dalin. Sikato tan saray armada to so mangimamaneobra pian gawaen so sigpot a panangataki ra ed totoo nen Jehova. Sayan panangataki, a nipasakbay ed Biblia, so adeskribe bilang say panangataki nen Gog na Magog. Siopa so nagkalautlan pangiyaapasakeyan na Diablo ed panangataki to? Agta ed saray unor a membro na melag a pulok, say espiritual ya Israel na Dios, a maligen a manaayam ed “pegley na dalin”? (Ezequiel 38:1-12) On, balet say nakdaan na matoor ya alanaan a klase, pati saray matoor a kaiba ra, say arum a karnero, so makatasi no panon a papelesen na panangataki nen Satanas so sakey a dramatikon kiwas ed biang nen Jehova a Dios. Sikato so onsalet pian idepensay totoo to, tan saya so mangigapo ed ibetag na “baleg tan makapataktakot ya agew nen Jehova.” (Joel 2:31) Natan, say matoor tan makabat ya aripen so manusumpal ed sakey ya importanti, manangiliktar-bilay a serbisyo, a mangipapasakbay ed onsasabin isasalet nen Jehova. (Malaquias 4:5; 1 Timoteo 4:16) Kasin sikayoy aktibon manusuporta ed satan a serbisyo, a mibibiang ed panangipulong na maong a balita na Panarian nen Jehova? Kasin mantultuloy kayon manggawa ed saya bilang sakey ya andi-takot a manangiyabawag ed Panarian?

11. Akin ya importanti natan so pakawaalan na makpel ya awawey?

¹¹ Nisesengeg ed peles a kipapasen na mundo, agaylan nipanpanaon parad melag a pulok a tumboken iray salita nen Jesus a nipaarap ed sikara: “Ag-ontatakot, melag a pulok”! Say ontan a makpel ya awawey so importanti nisesengeg ed amin a susumpalen natan a mitunosan ed gagala nen Jehova. Natatalosan na balang sakey a kabiangan na melag a pulok so pankaukolan a pansungdo anggad anggaan. (Lucas 21:19, NW) No panon a si Jesu-Kristo, say Katawan tan Uloen na melag a pulok, so nansungdo tan apaneknekan a matoor anggad anggaan na mangaraldalin a bilay to, ontan met a balang sakey ed nakdaan so nepeg a mansungdo tan mamaneknek a matoor.​—Hebreos 12:1, 2.

12. Panon a si Pablo, singa si Jesus, so animbawa ed saray alanaan a Kristiano ya ag-ontakot?

¹² Amin ya alanaan so nepeg a walaan na mipadparan panmoria a singa ed si apostol Pablo. Imanoen no panon a saray salita to bilang alanaan a mapublikon manangiyabawag na kioli so mitunosan ed simbawa nen Jesus ya ag-ontakot. Insulat nen Pablo: “Nonnonot mo si Jesu-Cristo, a kapolian nen David, [ya] inmoli ed bilay dia ed pegley na saray inaatey, onong ed evangeliok. A sikato so panakoan ko ed saray irirap a singa manag-gawa na mauges, anga ed inkabalor ko dia ed saray panangipangawan; balet say salita na Dios ag abalor. Kanian itepel ko’n amin lapu ed saray apili, pian sikara met nagamoran da so kilalaban ya wala ed Cristo Jesus dia ed gloria ya andi anga. Tua so saya’n salita: Ta no inatey itayo ya akidamay ed sikato, nabilay itayo met a minabang ed sikato; no mantepel itayo, manari itayo met a minabang ed sikato; no sikato so itapa’tayo, sikato itapa’to itayo met; no sikatayo so ag matoor, sikato mansiansia a matoor; ta agto nayarian ya itapat so laman to.”​—2 Timoteo 2:8-13.

13. Anton aralem a kumbiksyon so bebenbenan na saray membro na melag a pulok, tan papakiwasen ira na saya ed anto?

¹³ Singa si apostol Pablo, saray nakekeraan a membro na alanaan a melag a pulok so mabulos a mansungdo ed kairapan legan ya iyabawag da so mabiskeg a mensahen asaglawi ed Salita na Dios. Say kumbiksyon da so nilamot a tuloy legan na pantultuloy dan panmamatalek ed saray madibinon sipan na kilalaban tan ed impakagamor da na “balanget na bilay” no sikaray napaneknekan a matoor anggad patey. (Apocalipsis 2:10) Diad pakaeksperiensia na kasikmat a kioli tan pananguman, sikaray nitarok a mikasakey ed Kristo, pian manuley a kaiba to bilang arari. Agaylan itatalona lapud manamenben-katooran a kurang da bilang mananalo ed mundo!​—1 Juan 5:3, 4.

Sakey a Nikadkaduman Ilalo

14, 15. Panon a nikadkaduma so ilalon kioli na melag a pulok?

¹⁴ Say ilalon kioli a walad melag a pulok so nikadkaduma. Diad antoran paraan? Manuna ed amin, saya so manunaan ed kaslakan a kioli na “saray matunong tan saray ag matunong.” (Gawa 24:15) Diad tua, say kioli na saray alanaan so nilinya ed sakey a maseguron pantutumbokan unong ed kaimportantian, a singa malinew ya ipapanengneng na sarayan salitan naromog ed 1 Corinto 15:20, 23: “Si Cristo pinaoli a binmilay ed saray inatey, a sikato so inmona’n bunga na saray naugip. Et balang sakey dia ed dilin bilang to: si Cristo so inmona; insan saray kien nen Cristo ed isabi [kiwawala, NW] to.” Diad pakawalaan na panagsundo tan pananisian singa impanengneng nen Jesus, amta na melag a pulok no anto so akatarya parad sikara sano asumpal lay mangaraldalin a kurso ra, nagkalautla nanlapulad sinmabi tuan Katawan ed templo to parad panangukom nen 1918.​—Malaquias 3:1.

¹⁵ Iikdan itayo nen Pablo na kaaruman a rason pian moriaen iyan kioli bilang nikadkaduma. Singa nirekord ed 1 Corinto 15:51-53, insulat to: “Nia, tongtongen ko ed sikayo so sakey a misterio: Ag itayo naugip ya amin, balet nauman itayo ya amin, dia ed kabekta, dia ed sankakirem, dia ed onor a trumpeta. . . . Ta saya a naderal kaokolan a kawesan na ag naderal, tan sayan onpatey kaokolan a kawesan na ag ompatey.” Sarayan salita so onaaplika ed saramay kabiangan na melag a pulok ya inatey kaleganay kiwawala nen Kristo. Lapud agla kaukolan ya onugip ed ipapatey ed andukey a panat na panaon, sikaray akawesan na ag-ipapatey, “dia ed kabekta, dia ed sankakirem.”

16, 17. Nipaakar ed ilalo ran kioli, panon a saray alanaan a Kristiano natan so nikadkaduman nabebendisyonan?

¹⁶ Diad liwawa na sayan pakatalos, naala tayo so kabaliksan na saray salita nen apostol Juan a naromog ed Apocalipsis 14:12, 13. Insulat to: “Dia so kawalaan na songdo na sasantos, saray mangonor ed gangan na Dios, tan say pananisia nen Jesus. Tan nadngel ko so sakey a voces ed tawen a kuan to ed siak, Isulat mo, Mapalar so saray inatey ya ompatey ira ed Katawan a manlapu ed natan anga ed arapen. On, kuan na Espiritu, tan manpainawa ra ed saray sagpot da, ta saray gawa-ra ontombok ed sikara.”

¹⁷ Agaylan nikadkaduman tumang so nitatarya parad nakdaan na melag a pulok! Say kioli ra so onsabin tamtampol, kayarin tuloy na maitlep a yugip da ed patey. Agaylan makapakelkelaw a pananguman so naeksperiensia ra ed pakaawat na asainmin da ed pasen na saray espiritu! Lapud say onian panangigloria ed melag a pulok so nagagawa la tan say kasumpalan na manuna iran propesiya ed Biblia so ngalngali la nakumpleto, saray unor a nakekeraan a membro na melag a pulok so talagan kaukolan ya ‘ag-ontakot.’ Tan say inkaandi-takot da so onkakanan panamaseseg ed saramay kabiangay baleg ya ulop, a nepeg a mamayubo na mipadparan awawey na inkaandi-takot legan a tatalaranan da so kililiktar legan na sankabalgan a panaon na gonigon ed dalin ed kapiganman.

18, 19. (a) Akin a say panaon a panbibilayan tayo so maganat? (b) Akin a nepeg ya ag-ontakot so namparan alanaan tan arum a karnero?

¹⁸ Say panangisalaysay ed saray kimey na melag a pulok so manggagawa ed sikara tan ed baleg a pulok a mantultuloy ya ontakot ed tuan Dios. Say oras na panangukom to so sinmabi la, tan say nakekeraan a panaon to so mablin tuloy. Limitado la so panaon parad arum pian onkiwas. Anggaman ontan, agtayo natatakot a say gagala na Dios so onsaew. Maseguron satan so ontalona!

¹⁹ Natan et say maksil a mangatatawen iran boses so narerengel a mangibabagan: “Say nanarian na mundo agawa ran nanarian na Katawan tayo, tan si Cristo to: tan manari ed ando lan ando.” (Apocalipsis 11:15) Maseguro, say Baleg a Pastol, si Jehova, so mangiwawanwan ed amin a karnero to ed “basbas na inkatunong nisesengeg ed ngaran to.” (Salmo 23:3, NW) Say melag a pulok so andi-lingon nipapaarap ed mangatatawen a tumang. Tan say arum a karnero so maligen a niliktar ed panaon na baleg a kairapan pian pangayagaan so andi-anggaan a bilay diad mangaraldalin a sakop na maglorian Panarian na Dios ed silong na uley nen Kristo Jesus. Kanian, bangta saray salita nen Jesus so nipapaarap ed melag a pulok, maseguron amin ya ariripen na Dios ed dalin so walaan na rason pian ontalineng ed saray salita to: “Ag-ontatakot, melag a pulok.”

Kasin Nisalaysay Yo?

◻ Akin a nepeg tayon ilaloan a say nakekeraan a bilang na melag a pulok so ondaiset?

◻ Anto so kipapasen na alanaan a nakdaan natan?

◻ Akin ya agnepeg ya ontakot iray Kristiano, anggaman ed manasingger a pangataki nen Gog na Magog?

◻ Akin a nikadkaduma so ilalon kioli na 144,000, nagkalautla natan?