Kasin Nanonotan Yo?

Kasin nanggayagaan mon binasa iray agano nin paway na Say Panag-Bantayan? No ontan, naromog mon makapainteres so pannonot ed onggendan:

◻ Akin a napankompiyansaan tayo so impamili nen Jehova ed saray indibidual a mangigiya ed saray totoo to?

Pipilien nen Jehova parad pigaran responsabilidad iray indibidual a walaay kualidades a nakakaukolan pian nigiya to so totoo ed dalan a labay ton laen da ed sakey a partikular a panaon.​—8/15, pahina 14.

◻ Anto so naaralan tayo manlapud eksperiensia nen Jonas? Alabas so pakanengneng nen Jonas ed inkasikaton dili balet ta minelmelag toy arum. Makaaral tayo ed si Jonas diad agpangiyuna ed inkasikatayo tan ed saray personal a liknaan tayo.​—8/15, pahina 19.

◻ Diad anton dalan a nibagan say “ngaran nen Jehova sikato so mabiskeg ya ilang”? (Uliran 18:10)

Say panpasalimbeng ed ngaran na Dios et kabaliksan toy panagmatalek ed si Jehova a mismo. (Salmo 20:1; 122:4) Say labay ton ibaga et pananuporta ed inkasoberano to, panangitandoro ed saray ganggan tan prinsipyo to, pakawalaay pananisia ed saray sipan to, tan pangiter ed sikato na nikabkabiig a debosyon. (Isaias 50:10; Hebreos 11:6)​—9/1, pahina 10.

◻ Panon tayon napanalimbawaan so impantasi nen Pablo ed arap na saray dederlengen?

Diad pitotongtong ed si Arin Agripa, inagamil nen Pablo so inkamasilib, ya indanet toray punto a panpaknaan dan dua nen Agripa. Ontan met, kaukolan tayon idanet so positibo iran aspekto na maong a balita, ya idadanet iray ilalon papanisiaan tayon amin. (1 Corinto 9:22)​—9/1, pahina 31.

◻ Siopa so nagunggunaan ed anos nen Jehova?

Lapud anos nen Jehova, minilyon ni so naiikdan na pankanawnawan nilaban ed onsabin “agew nen Jehova.” (2 Pedro 3:9-15) Say anos to so mangiyaabuloy met ed balang sakey ed sikatayo ya ‘isumpal so dili a kilalaban tayo ed takot tan giwgiw.’ (Filipos 2:12)​—9/15, pahina 20.

◻ Panon kaimportanti so Septuagint a patalos na Biblia?

Sayan patalos so walaay importantin betang ed panangikayat na pikakabat a nipaakar ed si Jehova a Dios tan say Panarian to pati si Jesu-Kristo bilang Ari. Diad panamegley na Septuagint, niletneg so importantin pundasyon parad saray Judion mansasalitay-Griego tan Gentiles diad inmunan siglo pian mangawat na maong a balita na Panarian.​—9/15, pahina 30.

◻ Anto so ibabangat ed sikatayo na parabolo na anak a managdarak nipaakar ed Dios?

Unona, si Jehova et “mapangasi tan mapaaro, mapalna ya onsanok, tan daakan ed maaro ya abig na linawa, tan katuaan.” (Exodo 34:6) Komadua, sikato et ‘akaparaan a mamerdona” sano say ipapabitar na say pananguman na puso so napangibasiyan ed panginatnat na panangasi. (Salmo 86:5)​—10/1, pahina 12, 13.

◻ Kapigan nasumpal iray mareen a kipapasen a nisipan ed Isaias 65:21-25?

Bilang nankakasakey a managdayew ed si Jehova diad espiritual a paraiso natan, saray alanaan tan saramay kabiangan na “arum a karnero” so makakaeksperiensia la na inter-Dios a kareenan. (Juan 10:16) Tan onnatnat so ontan a kareenan diad literal a Paraiso, sano ‘nagawa so linawa na Dios ed intiron dalin, a singa dia ed tawen.’ Sigpot a nasumpal iray salita nen propeta Isaias ed satan a panaon. (Mateo 6:10)​—10/15, pahina 24.

◻ Akin a seselebraan na saray Kristiano iray anibersaryoy kasal balet ta andi iray agew na inkianak?

Ag-ipapasen na Biblia a makapuy so panangasawa. Akauley laray Kristianos no labay dan selebraan so sakey ya anibersaryoy kasal, a nodnonoten so inkagayaga na satan ya okasyon tan ed determinasyon dan mantulongan ed italona ra bilang sanasawa. Balet, saray alenleneg ya impangiselebray agew na inkianak a nirekord ed Biblia et saramay ginawa na papagano, tan nisiglaot iratan ed saray maruksan gawa.​—10/15, pahina 30, 31.

◻ Diad ilustrasyon nen Pablo a nirekord ed 1 Corinto 3:12, 13, anto so irerepresenta na “apuy,” tan anto so nepeg a kabisadoen na amin a Kristiano?

Wala so apuy ya aarapen tayon amin diad bilay​—saray pakasubokan na pananisia tayo. (Juan 15:20; Santiago 1:2, 3) Amin a babangatan tayoy katuaan so nasubok. No kapuykapoy so panagbangat tayo, nayarin walay makapasinagem iran pansumpalan, a singa say impasakbay la nen Pablo. (1 Corinto 3:15)​—11/1, pahina 11.

◻ Panon a ‘nanakar [si Noe] a kaibay Dios’? (Genesis 6:9, NW)

Nanakar si Noe a kaibay Dios diad pantalos a ginawa toy pagagawa na Dios ed sikato. Lapud impangitalaga toy bilay ton manggaway linawa na Dios, nanggayagaan nen Noe so maligsa, maapit a relasyon ed Dios.​—11/15, pahina 10.

◻ Antoran pankanawnawa so akalukas ed sikatayo diad agtayo pakaamta ed eksakton panaon sano ipaakseb lay Dios so panangibales to ed saray marelmeng?

Mangiter iya ed sikatayo na pankanawnawan mamaneknek a talagan inaro tayo si Jehova tan labay tayoy mankurang ed saray dalan to diad ando lan ando. Satan so mangipanengneng met a matoor itayo ed Dios tan manmamatalek itayo ed paraay pangaasikaso to’d saray pamaakaran. Niarum ni, ontulong iya ed sikatayo pian mansiansian akabantay tan sililiing ed espiritual. (Mateo 24:42-44)​—11/15, pahina 18.

◻ Anto so kabaliksan na panisia “ed ngaran na Anak na Dios”? (1 Juan 5:13)

Kabaliksan toy katutulok ed amin a ganggan nen Kristo, laktip lay ganggan ton ‘manaaroan.’ (Juan 15:14, 17) Panggunaetan na aro so panggaway maong ed arum. Ekalen ton amin so panangidumaduma ed rasa, relihyon, tan lapud kipapasey panagbilay.​—12/1, pahina 7.

◻ Akin a saray Tastasi nen Jehova et “puntirya na panggula”? (Mateo 10:22, NW)

Agmakatunongan a nabubusol iray Tastasi nen Jehova nisesengeg ed saray parehon rason na inkapasegsegang na saray akadkaunan Kristiano. Unona, onkikiwas iray Tastasi nen Jehova unong ed relihyoso iran sisiaen da a pagmaliwen toran aglabay na arum. Komadua, sikara so puntirya na palson akusasyon​—butarbutar iran katilaan tan pinikewet iran panagpauges ed saray sisiaen da.​—12/1, pahina 14.