Pananginabang ed Ligliwa ya Iiter nen Jehova
“Say ilalo mi lapu ed sikato malet, ya amta mi a no kaunongan so kalanor yo ed saray irirap, ontan yo met ed pakaligliwa.”—2 CORINTO 1:7.
1, 2. Anto so eksperiensia na dakel a nagmaliw a Kristianos natan?
DAKEL ed peles a managbasa na Say Panag-Bantayan so binmaleg ya andiay pikakabat ed katuaan na Dios. Anganko ta tua itan ed sika. No ontan, nonoten pay liknaan mo sanen nalulukasan so mata na pakatalos mo. Alimbawa, sanen inmunan atalosan mon saray inaatey so agmaniirap noagta anggapoy liknaan da, agta sika so nainawaan? Tan sanen naamtaan mo so ilalo parad saray inaatey, a binilyon so napaoli ed bilay ed balon mundo na Dios, agta sika so aligliwa?—Eclesiastes 9:5, 10; Juan 5:28, 29.
2 Komusta so nipaakar ed sipan na Dios a panganggaen so karelmengan tan pagmaliwen iyan dalin a sakey a paraiso? Sanen naaralan mo so nipaakar ed sikato, agta niligliwa ka na satan tan napno ka na magunaet a pantalaran? Anto so liknaan mo sanen inmunan naaralan mo so posibilidad ya aglan balot ompatey noagta makaliktar ed say onsasabin mangaraldalin a Paraiso? Anggapoy duaruwan sika so manliket. On, sika so nagmaliw a manangawat na makaligliwan mensahe na Dios a nipupulong natan ed sankamundoan na Tastasi nen Jehova.—Salmo 37:9-11, 29; Juan 11:26; Apocalipsis 21:3-5.
3. Akin a saramay manginanabang na makaligliwan mensahe na Dios ed arum so manasagmak met na kairapan?
3 Anggaman ontan, sanen sinalim ya inabang so mensahe na Biblia ed arum, amoriam a “sikaran amin anggapo so pananisia ra.” (2 Tesalonica 3:2) Anganko ta arum ed datin kakaarom so amalaw ed sika lapud impangibalikas mo na pananisiam ed saray sipan na Biblia. Nayarin asagmak mo ni ingen so panamasegsegang lapud pantutultuloy a panaaral na Biblia diad pililimog ed Tastasi nen Jehova. Nayarin pinmetang so isusumpa legan na pangitutunos mo ed bilay mo unong ed saray prinsipyo na Biblia. Naeksperiensiam la’d satan so kairapan ya idadapo nen Satanas tan say mundo to ed amin a mangaawat na ligliwa na Dios.
4. Diad antoran nandumaan a dalan a nayarin saray balo nin interesado so onkiwas ed kairapan?
4 Makapaermen, singa ed impasakbay nen Jesus, say kairapan so pakagapolan na arum tan ontunda ed pililimog da ed Kristianon kongregasyon. (Mateo 13:5, 6, 20, 21) Susungdoan na arum so kairapan diad pangiteteen na kanonotan da ed makaligliwa iran sipan a naaaralan da. Diad kaunoran et idedika ra so bilay da ed si Jehova tan manpabautismo bilang babangatan na Anak to, si Jesu-Kristo. (Mateo 28:19, 20; Marcos 8:34) Siempre, say kairapan so agmangangga diad bektan nabautismoan la so sakey a Kristiano. Alimbawa, say pamasiansian masimpit so mairap a pipupuligesgesan parad sakey a say abenegan to et imoral. Kaukolan a pilabanan na arum so mabetbet ya isusumpa manlapud saray agmananisian kapamilyaan. Antokaman so kairapan, amin a sitotoor a mangegemtan ed bilay a dedikado ed Dios et makapanseguro ed sakey a bengatla. Diad personal a tuloy a paraan et naeksperiensia ra so ligliwa tan tulong na Dios.
“Dios na Ami Ligliwa”
5. Nilikud ed dakel a subok a sinagmak nen Pablo, anto met so naeksperiensia to?
5 Say sakey ya angapresyan tuloy ed ligliwan intarok na Dios et si apostol Pablo. Kayari na nagkalautlan makapasubok a panaon diad Asia tan Macedonia, naeksperiensia to so baleg ya inawa ed impakadngel a say kongregasyon ed Corinto so positibon kinmiwas a tuloy ed sulat ton panamaat. Saya so amakiwas ed sikaton sulatan tora na onkomaddua, a karga to so onggendan a balikas na dayew: “Bendito so Dios tan Ama na Katawan tayon Jesu-Kristo, say Ama na saray panangasi tan Dios na ami ligliwa, a sikato so manligliwa ed sikatayo ed amin a panermenan tayo.”—2 Corinto 1:3, 4.
6. Anto so naaralan tayo manlapud saray salita nen Pablo a naromog ed 2 Corinto 1:3, 4?
6 Dakel so naala tayon impormasyon manlapud sarayan apuyanan a salita. Usisaen tayo pa iraya. Sanen ibabalikas nen Pablo so dayew odino pisasalamat ed Dios odino onkekerew ed sikato diad saray sulat to, kaslakan a naimano tayon itetekep to so aralem ya apresasyon parad si Jesus, say Ulo na Kristianon kongregasyon. (Roma 1:8; 7:25; Efeso 1:3; Hebreos 13:20, 21) Kanian, ipapaarap nen Pablo iyan balikas na dayew ed “Dios tan Ama na Katawan tayon Jesu-Kristo.” Insan, diad sankaunaan ed saray sulat to, inusar to so Griegon nombre a nipatalos a “matamoy iran panangasi.” Sayan nombre so manlalapud salitan nauusar a mangibalikas na ermen diad impanirap na sananey. Kanian dedeskribien nen Pablo so matamoy a liknaan na Dios parad siopaman ed matoor ya ariripen To a manasagmak na kairapan—matamoy a liknaan a mamapakiwas ed Dios ya onkiwas a sipapangasi ed biang da. Kaunoran, nanilalo si Pablo ed si Jehova bilang say lapuan na sayan kalkaliktan a kualidad diad impanawag to ed sikaton “say Ama na saray panangasi.”
7. Akin a nibagan si Jehova so “Dios na ami ligliwa”?
7 Say “matamoy iran panangasi” na Dios so manresulta ed pakainawaan na sakey a manasagmak na kairapan. Kanian, intuloy a dedeskribien nen Pablo si Jehova bilang “Dios na ami ligliwa.” Diad ontan, antokaman a ligliwan naeksperiensia tayo manlapud kaabigan na saray kapananisiaan, makapanilalo tayo ed si Jehova bilang say lapuan to. Anggapo so peteg, magnayon a ligliwan agmanlalapud Dios. Niarum ni, sikato so amalsa ed too unong ed indengan to, diad ontan et mamapakayari ed sikatayon magmaliw a managligliwa. Tan say masanton espiritu na Dios so mamapakiwas ed ariripen to a mangipanengneng na matamoy a panangasi ed saramay mankakaukolan na ligliwa.
Nipasal a Magmaliw a Managligliwa
8. Anggaman say Dios so aliwan say lapuan na saray subok tayo, anto so makagunggunan epekto ed sikatayo na say panagsungdo tayo ed kairapan?
8 Anggaman aabuloyan nen Jehova a Dios so nanduruman subok ya onsabi ed matoor ya ariripen to, sikato so agbalot lapuan na saratan a subok. (Santiago 1:3) Balet, say ligliwan iiter to sano susungdoan tayo so kairapan so makapangipasal ed sikatayo a magmaliw a lalon malikas ed saray pankaukolan na arum. Tekep na anton resulta? “Pian nayarian tayon ligliwaen so saray wala ed bengatlan panermenan ed samay ligliwa a diad sikatayon dili inpanligliwa na Dios.” (2 Corinto 1:4) Kanian ipapasal itayo nen Jehova pian magmaliw ya epektibon mananginabang na ligliwa to ed saray kapananisiaan tan ed saramay naabet tayo ed ministeryo tayo legan ya aaligen tayo si Kristo tan “manligliwa ed amin a managogol.”—Isaias 61:2; Mateo 5:4.
9. (a) Anto so ontulong ed sikatayo pian sungdoan so irap? (b) Panon a naliligliwa iray arum sano sitotoor tayo a susungdoan so kairapan?
9 Sinungdoan nen Pablo so dakel ya irap to, maong ta daakan so ligliwan naawat to manlapud Dios diad panamegley nen Kristo. (2 Corinto 1:5) Naeeksperiensia tayo met so daakan a ligliwa diad pandalepdep ed mabmablin sipasipan na Dios, diad pangipikasi ed tulong na masanton espiritu to, tan diad pakakaeksperiensia ed saray ebat na Dios a mismo ed saray pikakasi tayo. Diad ontan et napabiskeg itayon mantultuloy a mangitandoro ed inkasoberano nen Jehova tan napaneknekan ed satan a say Diablo so matila. (Job 2:4; Uliran 27:11) Sano sitotoor tayon nasungdoan so antokaman a nengneng na kairapan, kaukolan a sikatayo, singa si Pablo, so mangipaarap ed amin a kredito ed si Jehova, a say ligliwa to et mamapakayari ed Kristianos a mansiansian matoor ed silong na subok. Say panagsungdo na matoor a Kristiano so walaan na makaligliwan epekto ed impanaagi, a manggawa ed arum a determinadon “mangitepel ed sarayan amin ya irirap.”—2 Corinto 1:6.
10, 11. (a) Antoray arum a bengatlan pansesengegay irap ed kongregasyon ed kadaanan a Corinto? (b) Panon a niligliwa nen Pablo so kongregasyon ed Corinto, tan anton ilalo so imbalikas to?
10 Asagmak na saray taga-Corinto so irap a sinmabi met ed amin a tuan Kristianos. Niarum ni, kinaukolan da so konseho a dispelosipen so agmagbabawin milalawanan. (1 Corinto 5:1, 2, 11, 13) Say isaew ed sayan kiwas tan agpakapangangga ed balingaan tan inkaapag-apag so angitarok na kababaingan ed kongregasyon. Balet diad kaunoran et inyaplika ra so konseho nen Pablo tan impanengneng da so puron panagbabawi. Kanian, sisisimoon ton kinomendaan ira tan inkuanton say maabig a kiwas da ed sulat to so nanligliwa ed sikato. (2 Corinto 7:8, 10, 11, 13) Mapatnag, say adispelo so nagbabawi met. Kanian sinimbawa nen Pablo ira a ‘perdonaen tan ligliwaen da, agla piga et satan a too so agnalanor ed alabas ya ermen to.’—2 Corinto 2:7.
11 Say onkomaduan sulat nen Pablo so segseguradon nanligliwa ed kongregasyon na Corinto. Tan saya so sakey ed saray getma to. Insalaysay to: “Say ilalo mi lapu ed sikayo malet, ya amta mi, a no kaunongan so kalanor yo ed saray irirap, ontan yo met ed pakaligliwa.” (2 Corinto 1:7) Diad sampot na sulat to, impaseseg nen Pablo: “Manligliwa kayo komon, . . . tan say Dios na aro tan kareenan manayam ed sikayo.”—2 Corinto 13:11.
12. Anton pankaukolan so wala ed amin a Kristianos?
12 Agaylan importantin leksion so naaralan tayo manlapud saya! Amin a membro na Kristianon kongregasyon so kaukolan a ‘manginabang na ligliwa’ ya itatarok na Dios diad panamegley na Salita to, masanton espiritu to, tan mangaraldalin ya organisasyon to. Anggan saray adispelosip so mankaukolan na ligliwa no sikaray nagbabawi tan ipepetek daray lingon kurang da. Kanian, “[say] matoor tan makabat ya aripen” so angiletneg na mapangasin probisyon pian asistian ira. Maminsan ed kada taon et duaran mamatatken so nayarin ombisita ed sakey ed saray adispelosip. Nayarin saraya so agla mangipapanengneng na rebelyoson awawey odino manggawa na graben kasalanan tan mankakaukolan na tulong pian alaen iray kapilitan a kundang pian nipawil.—Mateo 24:45; Ezequiel 34:16.
Say Kairapan nen Pablo Diad Asia
13, 14. (a) Panon a deneskribi nen Pablo so panaon na pirmin kairapan a naeksperiensia to diad Asia? (b) Anton inkagawa so nayarin wala ed kanonotan nen Pablo?
13 Say nengneng na irap ya asagmak na kongregasyon ed Corinto ya anggad sayan punto so agnikompara ed dakel a kairapan a kaukolan a sungdoan nen Pablo. Kanian, napanonotan tora: “Ta agmi labay komon ya agyo naamtaan, agagi, so nipaakar ed ermen mi a sinmabi ed sikami ed Asia, ya analonggaring na amayamay ed pakayari mi a panduaruaan mi anggan say bilay. Tua, sikamin dili wala ed wari ed loob min dili so dusa na ipapatey, pian agkami komon manmatalek ed sikamin dili, noag dia ed Dios ya amangon ed saray inatey. A sikato so angilaban ed sikami ed ontan a kabaleg na ipapatey, tan ilaban to kami dia ed sikato lanlamang so angipasenan mi ilalo mi ta sikato met nilaban to kami.”—2 Corinto 1:8-10.
14 Sisiaen na arum ya iskolar ed Biblia a tutukoyen nen Pablo so gulo ed Efeso, a nayarin akabalangan lawari na bilay nen Pablo ontan met ed saramay bilay na duaran managbaroy a kaiba ton taga-Macedonia, si Gayo tan si Aristarko. Sarayan duaran Kristiano so pinilit ya inawit ed teatro a napno na magulon grupon “naningal ira a nankuan: ‘Baleg si Diana [say Diosa] na saray taga Efeso!’” Kabekta, sakey ya opisyal ed syudad so tinmalonan amareen ed dakel a totoo. Saya so anigensigen ed bilay di Gayo tan Aristarko a maseguron anesdes a tuloy ed si Pablo. Diad tua, labay to so onloob pian mikatunongan ed panatikon magulon pangkat, balet sikato so inamper ed pakarisgay bilay to ed onian dalan.—Gawa 19:26-41.
15. Anton alabas a situasyon so nayarin nadeskribi ed 1 Corinto 15:32?
15 Anggaman ontan, nayarin dedeskribien nen Pablo so situasyon a mas alabas ni nen say akadkaunan inkagawa. Diad inmunan sulat to ed saray taga-Corinto, intepet nen Pablo: “No siak, unong ed ugali too, akibakal ak ed saray ayep ed Efeso, anto so gunggunak?” (1 Corinto 15:32) Nayarin kabaliksan na saya a say bilay nen Pablo so niiyan ed kaatapan aliwa lambengat ed panamegley na inaayep a totoo noagta pati literal ya atap ya ayayep diad loob na estadyum na Efeso. No maminsan et saray kriminal so dinusa diad pamilit ed sikaran milaban ed atap ya ayayep legan a banbantayan ira na napgaan-ed-dala a totoo. No say labay ya ibaga nen Pablo et sikatoy nipaarap ed literal ya atap ya ayayep, maseguron sikato so diad sankaunoran et mamilagron niliktar manlapud maruksan ipapatey, no panon a si Daniel so nisalba manlapud sangi na literal iran leon.—Daniel 6:22.
Modernon-Agew Iran Alimbawa
16. (a) Akin a dakel a Tastasi nen Jehova so makasagmak ed saray mipadparan kairapan ya asagmak nen Pablo? (b) Anto so pakaseguroan tayo no nipaakar ed saramay inatey lapud pananisia ra? (c) Anto so maong ya epekton onsabi sano naeksperiensia na Kristianos so pakadawdawitan ed patey?
16 Dakel a kaplesan-agew a Kristianos so nisiglaot ed saray kairapan ya asagmak nen Pablo. (2 Corinto 11:23-27) Natan, met et saray Kristianos so “analonggaring na amayamay ed pakayari [ra],” tan dakel so nipaarap ed saray situasyon a ‘nanduaruwaan da anggan say bilay [da].’ (2 Corinto 1:8) Arum so inatey ed saray lima na saray turobos a managpatey tan maruksan manamasegsegang. Makapanseguro tayo a say makaligliwan pakayari na Dios so amakayari ed sikaran mansungdo tan inatey iran tekep na mapekder a kapusoan tan kanonotan a niteen ed kasumpalan na ilalo ra, balanglan satan so mangatatawen ya ilalo odino mangaraldalin. (1 Corinto 10:13; Filipos 4:13; Apocalipsis 2:10) Diad arum a kaso, imamaneobra nen Jehova iray pamaakaran, tan saray agagi tayo so niyagel manlapud ipapatey. Anggapoy duaruwan saramay akaeksperiensia na ontan a kiyagel so amayubo na apabiskeg a talek ed “Dios ya amangon ed saray inaatey.” (2 Corinto 1:9) Kayari to et sikaray makapansalita tekep na lalon mabiskeg a kombiksion legan ya ipapanabang da so makaligliwan mensahe na Dios ed arum.—Mateo 24:14.
17-19. Antoran eksperiensia so mangipapanengneng a saray agagi tayo ed Rwanda so mananginabang na ligliwa na Dios?
17 Agano ni et saray pinablin agagi tayo ed Rwanda so akaeksperiensia na mipadpara ed samay agawa ed si Pablo tan saray kaiba to. Dakel ed sikara so akabalang na bilay da, balet saray sagpot nen Satanas so sinmaew a maneral ed pananisia ra. Imbes, saray agagi tayo ed sayan dalin so akaeksperiensia na ligliwa na Dios ed dakel a personal a dalan. Legan na palanit a panagpatey ed Tutsi tan Hutu a manaayam ed Rwanda, walaray Hutu ya angirisga ed bilay da pian protektaan iray Tutsi tan saray Tutsi a nanprotekta ed saray Hutu. Arum so pinatey na saray aktibista lapud impanprotekta ed kapananisiaan dan Tutsi. Alimbawa, sakey a Hutu a Tasin manngaran na Gahizi so pinatey lapud impangiyamot ed sakey ya agin biin Tutsi a manngaran a Chantal. Say masiken nen Chantal, si Jean, so inyamot ed sananey a lugar na sakey ya agin Hutu a bii a manngaran a Charlotte. Diad loob na 40 agew si Jean tan sakey nin agin lakin Tutsi so nansiansian akaamot ed sakey a balbaleg a chimney, ya ompapaway labat a magano a panaon legan na labi. Amin na sayan panaon et sikaray tinaryaan nen Charlotte na tagano tan proteksion, anggaman manaayam ed asingger a kampo na armaday Hutu. Diad sayan pahina et nanengneng yo so litrato na akapannengnengan lamet a Jean tan Chantal, a misalsalamat ed kapara ran managdayew iran Hutu ta ‘inyan da so beklew dan dili’ nisesengeg ed sikara, a singa ginawa di Prisca tan Aquila parad si apostol Pablo.—Roma 16:3, 4.
18 Sakey nin Tasin Hutu, si Rwakabubu, so indayew na peryodikon Intaremara lapud impanprotekta ed saray kapananisiaan a Tutsi.a Inkuanto: “Wadtan met si Rwakabubu, sakey ed Tastasi nen Jehova, a nantultuloy ya angiyamot ed nanduruman pasen ed limog na agagi to (ontan so tawag na saray kapananisiaan ed sakey tan sakey). Uusaren toy sanagew pian awiten so tagano tan iinumen a danum parad sikara anggaman sikatoy asmatiko. Balet sikato so ginawa na Dios a mabiskeg a tuloy.”
19 Konsideraen pa met, so sakey ya interesadon Hutu a sanasawan manngaran a Nicodeme tan Athanasie. Sakbay na inbetag na palanit a panagpatey, sayan sanasawa so iyaaralan na Biblia na sakey a Tasin Tutsi a manngaran na Alphonse. Diad kirisgay bilay da, inyamot da si Alphonse ed ayaman da. Diad saginonor et amoria ran say abung so aliwan liktar a lugar lapud saray kakaabay dan Hutu et amta ra so nipaakar ed kaaro ran Tutsi. Kanian, inyamot di Nicodeme tan Athanasie si Alphonse ed sakey ya abot ed solar da. Saya so maong ya aksion, ta inagew-agew lawarin aanapen na kakaabay da si Alphonse. Legan ya akarukol ed sayan abot ed loob na 28 agew, nandalepdep si Alphonse ed saray salaysay ed Biblia a singa samay nipaakar ed si Rahab, ya angiyamot ed duaran Israelita ed atep na abung to diad Jericho. (Josue 6:17) Natan et itutultuloy nen Alphonse so serbisyo to ed Rwanda bilang manangipulong na maong a balita, a misalsalamat ta saray Hutu ya iyaaralan to na Biblia so angirisgay bilay da nisesengeg ed sikato. Tan komusta met si Nicodeme tan Athanasie? Sikara la natan so bautismadon Tastasi nen Jehova a mangikokondukta na 20 panangiyaral na Biblia ed interesadon totoo.
20. Diad anton paraan a naliligliwa nen Jehova so agagi tayo ed Rwanda, balet anton tuloytuloy a pankaukolan so walad dakel ed sikara?
20 Diad inggapo na samay palanit a panagpatey ed Rwanda, walaray 2,500 a manangiproklama na maong a balita ed bansa. Anggaman nilasus so akabalang na bilay da odino apilitan a manaynan ed bansa, say bilang na Tastasi so dinmaak na masulok a 3,000. Satan so prueba a talagan niligliwa na Dios iray agagi tayo. Komusta met so nipaakar ed dakel ya ulila tan balo ed limog na Tastasi nen Jehova? Mapatnag, saraya so siansia nin manasagmak na kairapan tan mankakaukolan na tuloytuloy a ligliwa. (Santiago 1:27) Saray lua ra so sigpot a napunas sano say kioli so nagawa ed balon mundo na Dios. Anggaman kuan, salamat ed panaglingkor na agagi ra tan lapud sikaray managdayew na “Dios na ami ligliwa,” nayarian dan anosan so kabibilay da.
21. (a) Iner ni so kawalaan na maganat a pankaukolan na agagi tayo ed ligliwa na Dios, tan ed anton sakey a dalan a makatulong tayo? (Nengnengen so kahon “Ligliwa Legan na Apatiran Taon na bakal.”) (b) Kapigan a say pankaukolan tayo na ligliwa so kompleton napenek?
21 Diad dakel nin lugar, a singa say Eritrea, Singapore, tan say datin Yugoslavia, saray agagi tayo so mantutultuloy a manlilingkor ed si Jehova a sitotoor anggaman ed kairapan. Komon ta tulongan tayo iratan ya agagi diad regular a pangipikasi ed sikara a makaawat ira komon na ligliwa. (2 Corinto 1:11) Tan komon ta makapansungdo tayon sitotoor anggad panaon sano say Dios diad panamegley nen Jesu-Kristo et “punasen to so amin a lua ed kamataan [tayo]” diad sigpot a pantalos. Insan diad ontan et naeksperiensia tayo so kompleton sukat na ligliwan itarok nen Jehova ed balon mundo na inkatunong.—Apocalipsis 7:17; 21:4; 2 Pedro 3:13.
[Paimano ed leksab]
a Insalaysay na Say Panag-Bantayan, Enero 1, 1995, pahina 26, so eksperiensia na anak a bii nen Rwakabubu, si Deborah, a say pikakasi to so akatenyeg ed ulop na Hutu iran sundalo tan sengegay inkisalba na pamilya manlapud ipapatey.
Kasin Amta Yo?
◻ Akin a si Jehova so atawag a “Dios na ami ligliwa”?
◻ Panon so nepeg a panmoria tayo ed saray kairapan?
◻ Diad siopa so panginabangan tayo na ligliwa?
◻ Panon a say pankaukolan tayo na ligliwa so kompleton napenek?
[Litrato ed pahina 17]
Si Jean tan Chantal, anggaman Tastasin Tutsi, so niamot ed biig a pasen na Tastasin Hutu legan na palanit a panagpatey ed Rwanda
[Litrato ed pahina 17]
Tuloytuloy so Tastasi nen Jehova a manginanabang ed makaligliwan mensahe na Dios ed kakaabay da ed Rwanda