“Miakis Kayo ed Saramay Onaakis”

1, 2. Akin et kaukolan tayon pantongtongan no panon ya ligliwaen iray inateyan? (Nengnengen so litratod gapo na artikulo.)

“DIAD loob na ngalngali sakey taon kayari impatey na anak mi, graben sakit so nalilikna mi,” kuan nen Susi. Imbaga met na sakey a Kristiano ya nen biglan inatey so asawa to, akalikna na “agnadeskribin sakit ed laman.” Makapaermen ta dakel ni ray makakalikna na ontan. Maslak ya agagi et nayarin agda iilaloan ya ompatey so inad-aro dad bilay antis na Armagedon. Balanglan inateyan ka odino walay kabat mon inateyan, nayarin itepet mo: ‘Panon ya natulongan iramay maneermen pian nasarag day sakit ya nalilikna ra?’

² Wala ray mangibabaga ya naekal lanlamang so sakit diad ilabas na panaon. Balet talaga kasin ontan ya lanang so nagagawa? Oniay naobserbaan na sakey a balo: “Parad siak, mas dugan ibaga ya say gagawaen mo ed ilalabas na panaon so makatulong pian naekal so sakit.” On, singa ed literal a sugat, say sugat ed emosyon et nayarin kalkalnan onabig diad ilabas na panaon no tambalen tan asikasoen. Anto sirin so makatulong ed saray inateyan pian natambal so sakit ya nalilikna ra?

JEHOVA​—“SAY DIOS NA AMIN A LIGLIWA”

3, 4. Akin et segurado tayon natatalosan nen Jehova no akin ya kaukolan na saray inateyan so naligliwa?

³ Say talagan manunan lapuan na ligliwa et say mapangasin Ama tayo ed tawen, si Jehova. (Basaen so 2 Corinto 1:3, 4.) Si Jehova, say manunan alimbawa ed panangipatnag na empatya, et impaseguro tod totoo to: “Siak a mismo so manligliwa ed sikayo.”​—Isa. 51:12; Sal. 119:50, 52, 76.

⁴ Say Dios tayo, ya Ama na maaron panangasi, et naeksperiensya ton mismo so naandian na inad-aro​—si Abraham, Isaac, Jacob, Moises, tan Arin David. (Num. 12:6-8; Mat. 22:31, 32; Gawa 13:22) Ipapaseguro ed sikatayo na Salita na Dios ya talagan tatalaranan tan pipirawaten nen Jehova so panaon ya bilayen to lamet ira. (Job 14:14, 15) Diad satan ya panaon et magmaliw iran maliket tan maksil so laman da. Nonoten tayo met ya say inad-aron Anak na Dios​—samay “nagkalalon panliliketan to”—​et pinairap ya maong anggad inatey. (Pro. 8:22, 30) Seguradon ansakisakit itan ed si Jehova.​—Juan 5:20; 10:17.

5, 6. Panon itayon liligliwaen nen Jehova?

⁵ Makapanmatalek tayo ya onkiwas si Jehova parad pankaabigan tayo. Kanian no manpipikasi tayo, agtayo manaalangan ya ibagad sikato so amin ya nalilikna tayon ermen. Talagan naliligliwa itayo lapud natatalosan nen Jehova so nalilikna tayon sakit tan liligliwaen to tayo no kakkaukolan tayo! Balet panon ton gagawaen itan?

⁶ Say sakey a paraan ya tutulongan itayo na Dios et panamegley na ‘panliligliwa na masanton espiritu.’ (Gawa 9:31) Say aktibon puersa na Dios et mabisbiskeg ya lapuan na ligliwa. Impromisa nen Jesus ya say Ama tod tawen et “mangiter na masanton espiritu ed saramay onkekerew ed sikato.” (Luc. 11:13) Imbaga nen Susi ya abitla niman: “Mabetbet ya basta kami labat la ontatalimukor tan ipipikasi mid si Jehova ya ligliwaen to kami. Kada no gawaen mi itan, say kareenan na Dios so manbabantay ed saray puso tan nonot mi.”​—Basaen so Filipos 4:6, 7.

JESUS​—ATAGEY YA SASERDOTE A WALAAY PILILIKNA

7, 8. Akin et makapanmatalek tayo ya ligliwaen itayo nen Jesus?

⁷ Say maaron pililikna nen Jehova et napatnagan ed saray imbaga tan ginawa na mapangasin Anak ton si Jesus nen wadiad dalin. (Juan 5:19) Nibaki si Jesus pian ligliwaen ‘iramay asugatan so puso ra’ tan “amin a maneermen.” (Isa. 61:1, 2; Luc. 4:17-21) Kanian sikatoy talagan maabagey—natatalosan toy paniirap na saray totoo tan labalabay to ran tulongan.​—Heb. 2:17.

⁸ Nen ugaw ni Jesus, seguradon naeksperiensya toy inateyan na saray kapamilya tan kaaro. Nayarin si Jose ya pinagka-ama to et inatey nen sikatoy kabataan ni.a Diad saman et nayarin tinedyer odino masulok ya 20 nen Jesus. Imadyin mo pa no panon ton inarap so paneermen to, pati say paneermen na ina tan agagi to.

9. Panon ya impanengneng nen Jesus so empatya nen inatey si Lazaro?

⁹ Nen inggapo nen Jesus so ministeryo to, impanengneng toy aralem a pakatalos tan pililikna. Singa bilang, nen inatey so inar-aro ton kaaro ya si Lazaro, siansia nin alikna to so sakit tan ermen ya nalilikna di Maria tan Marta anggano paolien to lanlamang si Lazaro. Aliklikna to so pinasyan ermen da, kanian atenyeg a maong so puso to tan akaakis.​—Juan 11:33-36.

10. Akin et makapanmatalek itayo ya siansia nin walay pililikna nen Jesus ed sikatayo?

¹⁰ Panon a makatulong ed sikatayo natan iray impatnag nen Jesus a pililikna tan saray makaligliwan imbaga to? Ipapaseguro ed sikatayo na Biblia ya “nensaman, natan, tan diad andi-anggaan, si Jesu-Kristo et agbalot manguuman.” (Heb. 13:8) Lapud natatalosan na “Manunan Manangitonton ed bilay” no antoy liknaan na maneermen, “nayarian ton tulongan iray nasusubok.” (Gawa 3:15; Heb. 2:10, 18) Kanian makapanmatalek itayo ya siansia nin natetenyeg so puso nen Kristo ed paneermen na arum, natatalosan toy sakit ya nalilikna da, tan liligliwaen to ra “diad dugan panaon.”​—Basaen so Hebreo 4:15, 16.

“LIGLIWA A MANLALAPUD KASULATAN”

11. Anto ran teksto so makaligliwa ed sika?

¹¹ Say ibabaga na Biblia nipaakar ed pinasyan ermen ya alikna nen Jesus nen inatey si Lazaro et sakey labat ed dakdakel ya makaligliwan teksto a naromog ed Salita na Dios. Agla itan pankelawan, “ta amin ya insulat nensaman et insulat pian nibangat itayo, pian diad panagsungdo tayo tan diad ligliwa a manlalapud Kasulatan et nawalaan itayo na ilalo.” (Roma 15:4) No maneermen ka, makaligliwa met ed sika irayan teksto:

• “Si Jehova et asingger ed samay asugatay puso to; ililiktar to iramay nagogonigon so espiritu ra.”​—Sal. 34:18, 19.

• “Sanen nadadaeg ak na saray kapagaan, niligliwa tan pinakalma mo ak [Jehova].”​—Sal. 94:19.

• “Komon ta say Katawan tayon Jesu-Kristo tan say Dios ya Ama tayo, a mangaaro ed sikatayo tan angiter na agmanganggan ligliwa tan alay abig ya ilalo diad panamegley na agnaparaan a kaabigan, so manligliwa ed kapusoan yo tan mamabiskeg ed sikayo.”​—2 Tes. 2:16, 17.b

KONGREGASYON​—LAPUAN NA LIGLIWA

12. Antoy sakey ya importantin paraan pian naligliwa tayoy arum?

¹² Say sakey nin lapuan na ligliwa na saray maneermen et say Kristianon kongregasyon. (Basaen so 1 Tesalonica 5:11.) Panon mon napabiskeg tan naligliwa iramay ‘nagogonigon so espiritu ra’? (Pro. 17:22) Tandaan ya walay “panaon na ag-iyesel tan panaon na pansalita.” (Ecl. 3:7) Imbaga na sakey a balo ya manngaran na Dalene: “Kaukolan ya ibalikas na saray inateyan so iisipen tan nalilikna ra. Kanian say sankaimportantian a nagawaan mo parad sakey ya inateyan et ondengel, agka onsasalet.” Onia ni imbaga nen Junia ya nambikkel so kuya to: “Anggano agmon talaga natalosan so paneermen da, say importante et labay mon natalosan no antoy nalilikna ra.”

13. Antoy nepeg tayon tandaan nipaakar ed paneermen?

¹³ Tandaan met ya agnampapara so nalilikna tan pangibabalikas tayoy ermen. No maminsan, samay too labat a mismo so talagan makaamta no panon kagrabe so sakit a nalilikna to, tan nayarin mairap ton ibalikas so walad puso to. Ibabaga na Salita na Dios: “Amta na puso so paneermen to, tan anggapoy arum a makalikna ed liket a nalilikna to.” (Pro. 14:10) Anggano ibalikas ni na sakey so nalilikna to, aliwan lanang ya mainomay a natalosan na arum so labay ton ibaga.

14. Anto ray nayari tayon ibaga pian naligliwa iray inateyan?

¹⁴ No maminsan, agtayo amta no antoy ibaga tayo ed sakey ya maneermen. Balet ibabaga na Biblia ya “say dila na marunong et mamaabig.” (Pro. 12:18) Akatulong ed dakel iray aromog dan makapabiskeg iran salita diad brosyur ya Sano Naandi’d-bilay so Pinabli Yo pian ligliwaen so arum.c Balet, mabetbet ya say talagan makatulong a nagawaan tayo et ‘miakis ed saramay onaakis.’ (Roma 12:15) Si Gaby ya inatey so mister to et imbaga ton say paraan labat pian nibalikas toy walad puso to et diad iyakis to. Imbaga to ni: “Kanian naliligliwa ak no miaakis ed siak iray kakaarok. Naliliknak ya agko bukbukor ed paneermen ko.”

15. Panon itayon makapiambegya no singa mairap tayon ibaga itan ed personal? (Nengnengen met so kahon ya “Makaligliwa Iran Salita na Piaambegya.”)

¹⁵ No mairap mon ibaga ed personal so piaambegyam, ompan sarag mon ibalikas itan panamegley na card, e-mail, text, odino sulat. Sarag moy mangusar na sakey ya makaligliwan teksto, saray nanonotan mon ugali tan kualidad na samay naandid bilay, odino mangistorya kay maliket iran agawa ya agmo nalingwanan. “No makakaawat ak na anggan antikey tan makapaseseg ya sulat odino no imbitaan ak na sakey ya agi, talagan baleg ya tulong itan ed siak,” so imbaga nen Junia. “Naliliknak ed saratan so panangaro tan malasakit dad siak.”

16. Anto so sakey ya epektibon paraan na piaambegya?

¹⁶ Baleg so nitulong na pampikasi a kaibay inateyan tan say pangipikasi ed sikato. Anggano singa mairap mon ibalikas ed pikakasi iray nononoten mo ed onia ran makapaermen ya situasyon, say nanlapud puso a pikakasim parad sikato, anggano makaakis ka tan onggaralgal so boses mo et nayarin mamalemew na liknaan to. Nanonotan ni nen Dalene: “No wala ray sister ya ompasyar ed siak pian ligliwaen ak, kekerewen kod sikara ya ipikasian da ak. Mabetbet ya no manpipikasi la ra, naiirapan iran mansalita ed gapo, balet agmanbayag et mankasil lay boses da tan nibabaga da lay impapuson pikakasi ra. Say mabiskeg ya pananisia, panangaro, tan say malasakit da et talagan makapabiskeg na pananisia.”

ITULTULOY SO MANLIGLIWA

17-19. Akin ya kaukolan tayon itultuloy so manligliwa?

¹⁷ Agpare-parehoy kabayag na paneermen na kada sakey. Kanian mas maabig no naynay kan akaparaan, aliwan diad pigaran agew labat sano wadtan iray kakaaro tan kakanayon na inateyan, noagta pati diad ontumbok ni ran bulan ya pinmawil la rad normal ya rotina ra. “Say tuan kaaro et mangaaro ed amin a panaon, tan sakey ya agi a nailaloan diad panaon na gonigon.” (Pro. 17:17) Baleg a lapuan na ligliwa iray kaagian no wadtan iran lanang anggad agni linmabas so paneermen na sakey.​—Basaen so 1 Tesalonica 3:7.

¹⁸ Tandaan tayo ya sagpaminsan et nayarin ompawil so ermen ya nalilikna na saray inateyan lapud anibersaryo, musika, litrato, aktibidad, odino anggan say angob, tanol, odino klima. Nayarin ansakisakit ed sakey ya abalo no first time ton gawaen a bukor so sakey ya bengatla, singa say iyatendi ed asemblea odino Memoryal. Imbaga na sakey ya brother: “Iilaloan ko lan say unonan anibersaryo na kasal mi kayari impatey to et ansaki-sakit, tan talagan mair-irap iman. Balet walay pigaran agagi ya namplano na simplin gathering ya kaiba iray maapit ya kakaarok pian agko bukbukor.”

¹⁹ Balet tandaan tayo met ya kaukolan na saray inateyan so panamaseseg aliwa labat ya no wala ray espisyal ya okasyon. “Naynay ya baleg so nagawaan na itulong tan pangiba na arum ed sika anggano anggapoy espisyal ya anibersaryo,” so imbaga nen Junia. “Saray ontan ya ag-iilaloan a gawaen na arum et naapresya tan makaligliwan maong.” Tua ya agtayo naekal ya amin so ermen ya nalilikna na saray inateyan odino napanoan so antokaman ya nalilikna ran kakulangan lapud impatey na inad-aro da, balet sarag tayo ran ligliwaen diad pangiter na praktikal iran tulong. (1 Juan 3:18) Nanonotan ni nen Gaby: “Talagan misalamat ak ed si Jehova lapud wadtan a naynay iray maaron elder diad amin ya irap ya dinalan ko. Impalikna ra ya singa akalakap si Jehova ed siak.”

20. Akin ya baleg a lapuan na ligliwa iray promisa nen Jehova?

²⁰ Talagan makapaliket ya naamtaan a si Jehova, say Dios na amin a ligliwa, et ekalen toy amin ya nalilikna tayon ermen tan mangiter na permanentin ligliwa no “amin a walad pakanodnonotan iran lubok et narengel day boses [na Kristo] tan ompaway ira”! (Juan 5:28, 29) Impromisa na Dios ya “paandien to so patey ya anggad angga, tan punasen na Soberanon Katawan a Jehova iray lua ed amin a kalupaan.” (Isa. 25:8, paimanod leksab) Diad satan a panaon, imbes ya ‘miakis ed saramay onaakis,’ amin ya manaayam ed dalin et ‘miliket ed saramay manliliket.’​—Roma 12:15.