“Say Dios Aroen To so Sililiket a Mangiter”

SI JEHOVA so personipikasyon na inkamabunlok. On, ibabaga na Biblia a sikatoy Manangiter na “amin a maong a palangkap tan amin ya ayadyarin palangkap.” (Santiago 1:17) Alimbawa, konsideraen paray bengatlan pinalsa na Dios. Ginawa toy tagano a mananam, aliwan matabtabang; rosrosas a makolor, aliwan kupas; saray iseselek na agew a makapakelkelaw, aliwan andiay sinag. On, amin ya aspekto na pinalsa nen Jehova so mamapaneknek ed aro tan inkamabunlok to. (Salmo 19:1, 2; 139:14) Sakey ni, si Jehova et masayaksak a Manangiter. Panliliketan toy panggaway maong ed biang na ariripen to.​—Salmo 84:11; 149:4.

Ginanggan iray Israelita a mangisindag ed inkamabunlok na Dios diad pidedeneng da ed sakey tan sakey. “Agmo nepeg a pagibatoen so pusom, nisay panigoten so limam ya eleten mo ya ipaliis ed duka a laki ya agim,” so inkuan nen Moises ed sikara. “Sika nepeg mo ya itdan so satan tan say pusom nepeg to so agmanermen.” (Deuteronomio 15:7, 10) Lapud say panangiter so kaukolan ya impapuso, kaukolan a panliketan na saray Israelita iray gawa na inkamabunlok.

Naikdan met iray Kristiano na mipadparan simbawa. On, inkuan nen Jesus a wala so “liket ed panangiter.” (Gawa 20:35, NW) Saray babangatan nen Jesus so napanuliranan ed masayaksak a panangiter. Alimbawa, irereport na Biblia a saramay nagmaliw a mananisia diad Jerusalem et “inlako ra so saray kayamanan tan kayarian da, tan inyutob da ed sikara ya amin ed unong na kaukolan na sinansakey.”​—Gawa 2:44, 45.

Balet sarayan mabunlok a taga-Judea so diad saginonor et dinmuka. Ag-ibabaga na Biblia so eksakton nansengegan na kipapasen da. Arum ya iskolar so mangibabagan say eras ya atukoy diad Gawa 11:28, 29 so nayarin sengegan. Antokaman so agawa, saray Kristianon taga-Judea so wala ed mairap a kipapasen, tan labay nen Pablo a seguroen a naasikaso iray pankaukolan da. Panon ton gawaen itan?

Osos Parad Saray Mankaukolan

Nampatulong si Pablo ed saray kongregasyon anggad arawin Macedonia, tan inyareglo toy osos a naawit parad adanes na inkaduka a Kristianos diad Judea. Parad saray taga-Corinto, insulat nen Pablo: “Unong na ingganggan ko ed saray iglesia na Galacia, ontan met so gawaen yo. Dia ed balang unonan agew na sinimbasimba balang sakey ed sikayo mangibiig [“ed dilin abung to,” NW] na yatol to, unong ed yaaligwas to.”a​—1 Corinto 16:1, 2.

Getma nen Pablo a sarayan pundo so tampol a niyakar ed agagi diad Jerusalem, balet saray taga-Corinto so matantan ya onkiwas ed saray instruksion nen Pablo. Akin? Kasin aliwa iran mainomay ya onkiwas ed kipapasen na agagi ran taga-Judea? Andi, lapud amta nen Pablo a saray taga-Corinto so ‘daakan ed ganagana, dia ed pananisia, tan salita, tan kakabatan; tan dia ed amin a pilalek.’ (2 Corinto 8:7) Anganko et sikaray okupadon tuloy a mangasikaso ed arum ya importantin bengatla ya imbaga nen Pablo ed inmunan sulat to ed sikara. Balet say kipapasen la ed Jerusalem so maganat. Kanian impaimano nen Pablo so isyu ed komaduan sulat to ed saray taga-Corinto.

Iyaapelo ed Inkabunlok

Unona, sinaglawi nen Pablo ed saray taga-Corinto iray taga-Macedonia, a say kiwas da ed pananulong so napanuliranan. “Dia ed dakel a pakanengneng na ermen,” insulat nen Pablo, “say kadaakan na liket da tan say aralem ya inkaduruka ra dinmaak ed saray kayamanan na kaabigan na linawa ra.” Saray taga-Macedonia so agla kinaukolan a dagdagen pian mangiter. Diad kasunian, inkuan nen Pablo ya “impikasi ra ya inulit-ulit so saraya a grasya.” Say masayaksak ya inkabunlok na saray taga-Macedonia so mas sankaimano ed amin sano ikonsidera tayo a sikaran mismo so wala ed ‘aralem ya inkaduka.’​—2 Corinto 8:2-4.

Diad pangirarayew ed saray taga-Macedonia, kasin sasalien nen Pablo a liingen so laslasan ya awawey ed limog na saray taga-Corinto? Andin balot, ta amta ton agmanepeg iyan paraan ed pamakiwas. (Galacia 6:4) Sakey ni, amta ton saray taga-Corinto so agnepeg a pabaingan ed panggaway dugan bengatla. Imbes, sikatoy makompiyansan saray taga-Corinto et talagan mangaaro ed agagi ran taga-Judea tan manpilalek a mibiang ed pananulong. “Nen katantaon,” inkuanto ed sikara, “[“inggapo yo,” NW] aliwa lambengat a say panggawa, noag ingen say panlabay a panggawa met.” (2 Corinto 8:10) On, diad pigaran aspekto na pananulong, saray taga-Corinton mismo so napanuliranan. “Amtak so kasiglatan na kalakal yo, a sikato so idadayew ko ed saray taga-Macedonia,” inkuan nen Pablo ed sikara, a kuanto ni: “Say paga yo sinagyat to so dakel ed sikara.” (2 Corinto 9:2) Balet, natan kaukolan na saray taga-Corinto ya iyaplika so seseg da tan say inkamabulos na kanonotan da.

Kanian, inkuan nen Pablo ed sikara: “Balang sakey gawaen to komon so ginetma to ed puso to; aliwa a dia ed kaermenan odino dia ed pasootan; ta say Dios aroen to so sililiket a mangiter.” (2 Corinto 9:7) Sirin, say gagala nen Pablo et aliwan pian desdesen iray taga-Corinto, ta agmagmaliw a masayaksak so sakey a too a manangiter no sikatoy napapaskar. Mapatnag, impasen nen Pablo a wala lay dugan motibo, a kada sakey so determinado lan mangiter. Niarum ni, inkuan nen Pablo ed sikara: “No wadtan so kasiglatay linawa, naawat so unong na wala ed sakey a too, aliwa ya unong na anggapo ed sikato.” (2 Corinto 8:12) On, no wadtan so inkamabulos​—sano papakiwasen na aro so sakey a too​—say iyaapay to so makapaliket ed Dios, anggan ompatnag a melag so kantidad.​—Ikompara so Lucas 21:1-4.

Masayaksak Iran Manangiter Natan

Say pananulong a sagpot ed biang na Kristianos ed Judea so mangiiter na alay abig ya alimbawa parad panaon tayo. Gagawaen la na Tastasi nen Jehova so panagpulong a kampanya ed sankamundoan, a tataryaan so minilyon a naeerasan ed espiritual a paraan. (Isaias 65:13, 14) Gagawaen da iya bilang katutulok ed ganggan nen Jesus: “Onla kayo sirin, tan manggawa kayo na saray babangatan ed amin a nasyones, a binyagan yora . . . ya ibangat yoran mangunor na amin a bengabengatla ya ingganggan ko ed sikayo.”​—Mateo 28:19, 20.

Say panumbok ed sayan ganggan so aliwan mainomay a kimey. Lalanoren toy panmantini ed saray ayaman na misionaryo tan masulok a sanlasus a pasilidad na sanga ed sankamundoan. Sasaglawien to met so panangipaalagey na saray Kingdom Hall tan Assembly Hall ta pian saray managdayew nen Jehova so nawalaan na matukoy iran pasen pian pakapantitiponan tan pakapanpapasesegan. (Hebreos 10:24, 25) No maminsan, mangitatarya met iray Tastasi nen Jehova na tulong ed saray lugar a dineralderal na natural a desyang.

Isipen met so abalbaleg a nagagastos ed panag-imprinta. Kada simba, diad promedyon masulok a 22,000,000 a kopya na Say Panag-Bantayan odino manga 20,000,000 a kopya na Awake! so niiimprinta. Niarum ni ed sayan regular a suplay na espiritual a tagano et say minilyon a libro, brosyur, audiocassette, tan videocassette a napapawala kada taon.

Panon a nasusuportaan iyan amin a kimey? Diad panamegley na boluntaryo iran donasyon. Saraya so gagawaen, aliwan lapud publisidad odino sinisiblet a motibo, noagta diad kiyabanti na tuan panagdayew. Kanian, saray ontan a panangiter so makapaliket ed manangiter, tekep na panamendision na Dios. (Malaquias 3:10; Mateo 6:1-4) Anggan saray ugugaw ed limog na Tastasi nen Jehova et ipapanengneng dan sikaray mabulos, masayaksak a manangiter. Alimbawa, kayari impakadngel ed impangaygay na alimbusabos ed sakey a parti na Estados Unidos, si Allison a mantaon na apatira so angidonasyon na $2. “Saya so amin a kuarta ed alkansiaan ko,” insulat to. “Amtak a naandin amin so gakgalaw tan liblibro tan monyika na ugugaw. Anganko ta naisaliw yo iyan kuarta na sakey a libro parad kataonan kon ugaw a bii.” Si Maclean, mantaon na walora, so nansulat a sikatoy aliketan ta anggapoy agagin inatey ed bagyo. Inkuanto ni: “Akakuartaak na $17 ed panaglakoy hubcaps kaibay daddik. Isaliw ko komoy kuartak na sakey a bengatla, balet anonotan koray agagi.”​—Nengnengen met so kahon ed tagey.

Tua, naliliketan so puso nen Jehova ed pakanengneng ed ugugaw tan matatakken la a mangiyuuna ed intereses na Panarian to diad ‘pangigagalang ed sikato ed saray [“angkablin,” NW] kayarian da.’ (Uliran 3:9, 10) Siempre, anggapoy siopaman ya aktual a makapayaman ed si Jehova, ta kien ton amin a bengatla. (1 Awaran 29:14-17) Balet say panuporta ed kimey et sakey a pribilihyon mangiiter na pankanawnawa ed managdayew ya ipatnag so aro to’d si Jehova. Maliket itayo ed balang sakey a say puso to so mamapakiwas ed sikato ed ontan a paraan.

[Paimano ed leksab]

[Kahon ed pahina 26, 27]

Saray Paraan a Pinili na Arum Pian Mangiter na Kontribusyon Parad Sankamundoan a Kimey

Dakel so mangigagana, odino mangigegeter, na kantidad ya ipelag da ed saray “contribution box” ya atatakan na: “Contributions for the Society’s Worldwide Work​—Mateo 24:14.” Kada bulan et ipapawit na saray kongregasyon irayan kantidad balanglan diad sankamundoan a hedkuarter ed Brooklyn, New York, odino diad lokal a sangan opisina.

Saray boluntaryon donasyon a kuarta so nayarin direktamentin nipawit ed Treasurer’s Office, Watch Tower Bible and Tract Society of the Philippines, P.O. Box 2044, 1060 Manila, odino diad opisina na Sosyedad a manlilingkor ed bansa yo. Saray alahas odino arum nin ankablin bengatla so nayari met ya idonasyon. Sakey ya antikey a sulat a mangibabagan satan so sakey a direktan langkap so nepeg a nitekep ed sarayan kontribusyon.

Uksoyan na Kondisyonal a Donasyon

Nayarin niiter so kuarta ed Watch Tower Society ed silong na espisyal a reglamento a ditan, no bilang ta say angidonar et walaay personal a pankaukolan to, say donasyon so ipawil ed sikato. Parad nagkalalon impormasyon, ipangasin mitalosan ed say Treasurer’s Office diad address a nipaimano ed tagey.

Niplanon Panangiter

Bilang kaaruman ed direktan langkap a kuarta tan kondisyonal iran donasyon na kuarta, wala niray arum a paraan na panangiter pian benepisyoan so serbisyo nipaakar ed Panarian ed sankamundoan. Laktipen na saraya so:

Seguro: Say Watch Tower Society so nayarin ingaran bilang benepisyari na sakey a life insurance policy odino ed panretiro/pension plan.

Deposito ed Bangko: Saray deposito ed bangko, sertipiko na deposito, odino indibidual a deposito ed panretiro so nayarin imatalek parad odino ibayar ed oras na ipatey ed Watch Tower Society, unong ed saray kakaukolanen na lokal a bangko.

Saray Stock tan Bond: Saray stock tan bond so nayarin idonasyon ed Watch Tower Society bilang direktan langkap odino diad silong na sakey a reglamento a diad panamegley na say almo a mantultuloy ya ibayar ed angidonar.

Lote tan Abung: Say nayarin ilakon lote tan abung so nayarin idonasyon ed Watch Tower Society diad panamegley na direktan langkap odino diad pangireserba ed satan bilang panayaman na angidonar, a makapantultuloy a manayam legay bilay to. Nepeg a mitalosan nin unona ed Sosyedad sakbay ya iyalis ed ngaran na Sosyedad so antokaman a lote tan abung.

Testamento tan Inmatalek: Saray kayamanan odino kuarta so nayarin ipatawir ed Watch Tower Society diad panamegley na sakey a testamento ya inuksoy unong ed legal a paraan, odino say Sosyedad so ingaran bilang benepisyari na sakey a paknaan na panangimatalek. Say sakey a nimatalek a pakabenepisyoan na sakey a relihyoson organisasyon so nayarin mangitarya na pigaran bentaha ed panag-buis.

Singa isusuheri na terminon “niplanon panangiter,” sarayan nengneng na donasyon so kaslakan a mankakaukolan na pigaran panagplano ed biang na angidonar. Pian tulongan iray indibidual a manpipilalek a gunggunaan so Sosyedad ed panamegley na pigaran nengneng na niplanon panangiter, say Sosyedad so angiparaan na lenguahen-Ingles a brosyur ya atituloan na Planned Giving to Benefit Kingdom Service Worldwide. Say brosyur so nisulat bilang ebat ed dakel a mantetepet a naaawat na Sosyedad nipaakar ed saray langkap, testamento, tan imatalek. Lugan to met iray kaaruman a mausar ya impormasyon nipaakar ed lote, pinansyal, tan panangiplano ed buis. Tan denisinyo itan pian ontulong ed saray indibidual ed Estados Unidos a manplaplanon manggawa na espisyal a regalo ed Sosyedad natan odino mangiiter na kanepegan diad ipatey pian pilien so sankaabigan tan sanka-epektiboan a paraan diad panangikonsidera ed pamilya ra tan personal iran sirkumstansia.

Kayari impamasa ed brosyur tan impangonsulta ed Planned Giving Desk, dakel la so akayarin ontulong ed Sosyedad tan kabansag to, naromog so sankatagyan a balor ed saray benepisyo’d buis ed panggawa’d satan. Say Planned Giving Desk so kaukolan a pasantabian tan makaawat na kopya na antokaman a mitukoyan a dokumento nipaakar ed dinanman ed sarayan reglamento. Saramay interesado ed sakey a brosyur odino ed dinanman ed sarayan niplanon panangiter iran reglamento so kaukolan a mitalosan ed Planned Giving Desk, balanglan diad pansulat odino diad pantelepono, diad address a nilista ed leksab odino diad opisina na Sosyedad a manlilingkor ed bansa yo.

Planned Giving Desk

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telephone: (914) 878-7000

[Kahon ed pahina 28]

Masayaksak Met Iray Ugugaw a Manangiter!

Labay kon iter iya ed sikayo pian makaimprinta kayo na dakel niran libro parad sikami. Atipon ko iyan kuarta diad intulong ko’d si daddik. Salamat na balbaleg ed amin ya impasyan kimey a gagawaen yo.​—Pamela, mantaon na pitora.

Ipawit ko ed sikayo so $6.85 pian ontulong ed pamaalagey na dakel nin Kingdom Hall. Nalmoan ko iya ed sayan tiagew sanen nanlako ak na palamig.​—Selena, mantaon na anemira.

Nankumponi ak na nganak ya akapabalegan koy lalong tan sakey nin nganak. Insipan ko imay unor ed si Jehova. Diad kaunoran et minmunat na taloran nganak, ya inlakok. Akatekep dia so kuartan parad kimey nen Jehova.​—Thierry, mantaon na walora.

Saya so ami-amin lan kuartak! Ipangasin usaren a sikakabat. Mairap so mantipon. Nia so $21.​—Sarah, mantaon na samplora.

Analo ak na first prize ed asainmin ed eskuelaan, kanian kaukolan koy mikontis ed county. Apanaloan ko met diman so first prize insan second prize ed district finals. Diad ami-amin na saraya, analo ak na kuarta. Labay kon inabang so arum ed satan a kuarta ed Sosyedad. Liknaen kon apanaloan ko irayan premyo lapud inkipasal ko ed Teokratikon Eskuelaan Parad Panagministro. Matalek ak a mangiter na report ko ed arap na judges.​—Amber, komanem a grado.

Labay kon iter iya ed sikayo parad si Jehova. Tepeten ed sikato no antoy gawaen ed satan. Amta ton amin a bengatla.​—Karen, mantaon na anemira.

[Saray litrato ed pahina 25]

Saray aktibidad na Tastasi nen Jehova so susuportaan na boluntaryo iran donasyon